ЧЫЛДЫҢ-НА чыыштан үндүрткен хөй акы-угбалар хуралче эглип кээп турар. Бачыдын миннип, Бурганче кижи катап эглип кээрге, дээрлерде өөрүшкү улуг боор! (Лк. 15:7, 10). Сен база катап чыышче эглип келген болзуңза, Иегова, дээрниң төлээлери база Иисус сени четтикпейн манап турган деп черле чигзинме. Ынчалза-даа Иегова-биле катап быжыг найыралдыг апаары ындыг кончуг белен эвес. Кандыг бергелерге таваржып болур сен база оларны канчаар ажып эртер?

Чыышка катап тургустунуп алган улустуң хөй кезии муңгарап чоруур. Ону билип болур. Чижээ, Давид хаанны Иегова чеже-даа өршээпкен болза, ол: «Бузуттарым мени сүрүп келди» — дээн (Ыд. ыр. 64:4; 39:13). Сеңээ ооң минниишкиннери таныш чадавас. Чыышче катап эглип келген соонда чамдык акы-угбалар хөй чылдар дургузунда ыядып, бодун буруузунуп чоруур. 20 чыл ажыг чыыштан үндүртүп алгаш турган Изабель * мынча дээн: «Иегова мени өршээпкен деп чүүлге бүзүрээри меңээ дыка берге турган». Бир эвес ундаралга алзыр болзуңза, Иегова-биле найыралыңны тургузар күжүң чок боор (У. ч. 24:10). А ону болдурбас болза эки.

Иегова-биле найыралды катап тургузар дээш, хөй-ле чүүлдү кылыр апаар деп билип кааш, чамдык улус: «Мен ону кылып шыдавас мен» деп бодаар. Чыышче катап эглип келген Антуан мынча дээн: «Үндүртүрүнүң мурнунда өөренип алган арга-мергежилимни база хөй-ле чүүлдү уттупкан болган мен». Чыыштың ажыл-херээнге идепкейлиг киржиринге шак мындыг миннишкиннер чамдык улуска шаптыктап турар.

Улуг хат-шуурганның хайындан бажыңы когараан кижиниң дугайында бодап көрүңер. Бажыңын катап тударынга кайы хире хөй үе болгаш күш херегин бодап келгеш, ооң холу сула салдынып болур.  Аар бачыт кылгаш сээң база Иегова-биле найыралың баксырап калган, ону катап тургузарынга дыка хөй күш херек. Ынчалза-даа акы-угбалар сеңээ дуза кадарынга белен.

Иегова: «Чедип келиңер, бо бүгүнү кады үзе шиитпирлеп көрээли» — деп сеңээ чугаалап турар (Иса. 1:18). Иегова-биле харылзааңны катап быжыктырып алыр дээш, дыка хөй күштү үндүрген бооруңга, Ол ону дыка үнелеп турар. Бодап көр даан: Иегова сээң үлегериңни ажыглап, Эрликтиң буруудадыышкыннарынга харыылап болур! (У. ч. 27:11).

Иеговаже эглип келгеш, Аңаа уткуштур базымнарны кылган сен, а Ол сенче углай базымнарны кылырын аазап турар (Иак. 4:8). Акы-угбалар база сен дээш өөрүп турар. Ынчалза-даа дээрде Адаңга, Өңнүүң Иеговага, ынакшылыңны оон-даа артык күштелдирер болзуңза эки. Ону канчаар кылып болурул?

Мурнунда улуг шуурганга таварышкан бажыңның дугайында чижекти сактып кээр болзувусса, ол улуг шуурган бажыңның таваан чогум үревээн. Ооң биле дөмей, сенде Иегованың база Ооң аазаашкыннарының дугайында үндезин билиглер бар. Ол улуг хат чүгле бажыңның ханаларын үрээн — ол дээрге Бурганның бараалгакчызының кылып чораан ажыл-херээ-дир, чижээ, суртаал ажылы, чыыштарже баары, ха-дуңмазы-биле аралажыры. Мындыг сорулгаларны салып ап болур сен.

Иегова-биле үргүлчү чугаалаш. Буруузунуп турар минниишкиннериң дээш мөргүүрү берге деп, Иегова дыка эки билип турар (Рим. 8:26). Ынчалза-даа Ол үргүлчү мөргүүрүңнү дилеп турар (Рим. 12:12). Ынчангаш катап Ооң өңнүү болуксап турар күзелиңни Аңаа чугаалап бер. Андрей мынча дээн: «Мен бодумну буруузунуп, ыядып турган мен, ынчалза-даа мөргээн санымда-ла, ынчаар бодавайн баар турган мен, а сагыш-сеткилим чиигей бээр турган». Чүнүң дугайында мөргүүрүн билбес болзуңза, Ырлар 50 биле 64-тү катап база номчуп болур сен. Ында Давид хаанның буруузун миннип турган мөргүлдерин бижээн.

Библияны доктаамал шинчиле. Ооң ачызында күштүг болуп, Иеговага оон-даа ынак апаар сен (Ыд. ыр. 18:8—12). Филипп үлешкен: «Библияны үргүлчү номчуур, шинчилээр чаңчылым чок турган болгаш, Иегова-биле хамаарылгам баксырап, Оон хая көрнү берген мен. Ол частырыгны катаптавас дээш, ам Библияны үргүлчү шинчилеп турар мен». Сен база чүге ынчаар кылып болбас деп сен? Кандыг теманы хууда шинчилээрин билбес болзуңза, бүзүрели быжыг акы-угбалардан дузадан диле.

Акы-угбалар-биле найыралыңны катап тургузуп ал. Чыышче катап эглип келген улус «акы-угбалар мени чемелээр» деп бодааш, сагыш човап болур. Аңаа хамаарыштыр Лариса мынча дээн: «Чыышта акы-угбаларны садыпкан мен деп бодааш, аажок ыядып турган мен. Шак ол бодал-биле дыка үр үе дургузунда чурттап келдим». Чыышта удуртукчулар болгаш бүзүрели быжыг акы-угбалар сээң Иегова-биле найыралыңны катап тургузуп алырынга дузалажыксап турар деп чүүлге быжыг бүзүре. (« Удуртукчулар чүнү кылып болур?» деп көзенекти көр.) Сээң катап эглип келгениңге олар дыка өөрүп турар база сеңээ чүгле экини күзээрлер (У. ч. 17:17).

Чыышка катап чоок апаарынга сеңээ чүү дузалаар? Чаңгыс-даа чыыш үспейн, акы-угбалар-биле хөй суртаалда. Ол чүге чугула? Феликс мынча дээн: «Бүгү чыыш мээң эглип кээримни манап турган. Олар мени чылыг-чымчак хүлээп алганнар. Кижи бүрүзү мени катап өг-бүлениң кежигүнү апарганынга бүзүредип, Иегова мени өршээпкен база хая көрүнген ажыы чок деп билип алырынга дузалаан». (« Чүнү кылып болур сен?» деп көзенекти көр.)

Иегова-биле найыралыңны катап тургузуп алыр дээш кызып турарыңны көргеш, Эрлик анаа турбас (Лк. 4:13). Ол сени сы базар дээш, чаа-чаа «улуг хат-шуурганны» чоргузар. Ынчангаш Иегова-биле найыралыңны улаштыр быжыгла.

Иегова хойларының дугайында мынча дээн: «Читкен хойларны дилеп, аза бергеннерин дедир эккээр мен; балыгланганнарын шарып, аарааннарын быжыктырар мен» (Иез. 34:16). Бут кырынга кызып туруп келген хөй бараалгакчыларынга Бурган дузалаан. Ынчангаш Ол сеңээ база кажан-даа бузулбас найыралды тургузарынга албан дузалаар деп чигзинме!