Библияның Шинчилекчилеринге суртаалдаарынга эрес-дидим чорук херек турган. Чүге дээрге олар биче сеткилдиг улуска буянныг медээни дыңнадып турганындан аңгыда, багай чүүлдерни кылып чоруур улуска «Бурганның өжээн негээр хүннүң келгенин» медеглээр ужурлуг турган.

Канададан Джон Хоскин дээр акывыс дыка эрес-дидим бараалгакчы кижи чораан. Бир катап чазын, 1921 чылда ол методист церковтуң бараалгакчызынга ужуражы бергеш, мынча дээн: «Библияның дугайында алгыш-кырыш чокка оожум чугаалажып көрээлиңерем. Бир эвес үзел-бодалывыс аңгылажы бээр-даа болза, оожум-топтуг чугааны доозуп каап болур бис». Ынчалза-даа ындыг чүүл каяа боор ийик! Хоскин акывыстың сөстери-биле алырга: «Каш минут безин эртпээнде, ол церковь бараалгакчызы хорадааш, эжиин хак кылдыр хааптарга, эжиинде шили безин буступ каар часкан».

Ол эр кижи: «Ооң орнунга өске бурганнарга чүдүп турар улуска баргаш, ону чугаалап тур сен!» — деп алгырыпкан. Джон удур харыылавайн, иштинде: «Оларның бирээзи-биле ам чаа чугаалашкан эвес мен бе?» деп боданган.

Хоскин акывыстың чугаазы-биле алырга, ол методист церковьтуң бараалгакчызы дараазында хүнде церковунче кээп турган улустарны өөредип тургаш: «Джон дээрге бо хоорайда эң-не коргунчуг мегечи кижи-дир, ону адып кааптар болза эки!» деп чугаалап турган. Ынчалза-даа акывыс бичии-даа кортпайн, улаштыр чедиишкинниг бараалгап турган. Джон ол үениң дугайында мынча деп сактып чугаалаан: «Ол үеде улус дыка дыңнаар турган! Чамдык улус безин: „Сени Бурган чорудупкан-дыр!“ дээр турган база мээң шупту херек чүүлдерим турар кылдыр, дуза кадарынга белен турган».

Алыс шынны сонуургаар улустуң бүзүрелин быжыктырарынга дузалаар дээш, Библияның Шинчилекчилери «Алдын век» * деп журналда янзы-бүрү өөредилге программаларын парлап турган. Чижээлээрге, ада-иелерге дуза кылдыр «Аныяк Библияның шинчилекчилери» деп рубрика үнүп турган. Ында бижээн айтырыгларны ада-иелер ажы-төлүнге салып турган. Оон Библиядан харыыларны тып бээринге дузалап турган. Чамдык айтырыглар дыка бөдүүн турган, чижээ: «Библияда каш ном бар?» дээн чижектиг. А өскелери оон нарын турган, чижээ: «Алыс шын христиан кижи бүрүзү  истеп сүрүүшкүннерге таваржыр бе?» дээн ышкаш. Ындыг янзылыг айтырыглар элээди оолдар-уругларга эрес-дидим суртаалчылар болурунга дузалап турган.

Библияны эки билир улуска оон өске рубрика үнүп турган. Ында «Бижилгени шинчилээри» деп номнуң бирги томунга үндезилеттинген ханы уткалыг айтырыглар турган. Ол ийи рубрика муң-муң номчукчуларга дыка улуг дузаны чедирген. Ынчалза-даа 1921 чылдың декабрь 21-ниң «Алдын век» деп журналдың үндүрүлгезинде ол айтырыгларны моон соңгаар парлавас деп чарлап каан. Чүге?

Удуртулга ап турган акылар Ыдыктыг Бижилгени улуска чурум аайы-биле өөредир болза эки деп чүүлдү билип кааннар. Ынчангаш 1921 чылдың ноябрь айда «Бурганның чадаганы» деп чаа ном үнген. Ол номну алган улусту Библияны хууда өөренир курстарже бижип аар турган. Ооң ачызында номчукчулар Бурганның кижилерге мөңге амыдырал бээр дээн күзелиниң дугайында хөйнү билип алыр турган. Ол курстар канчаар эртип турган?

Номну алган кижиге кайы арыннарны номчуурун айтып каан бичии карточканы база бээр турган. Оон ол бир неделя болгаш, номчаан чүүлүнге хамаарыштыр айтырыгларлыг карточканы чагаа таварыштыр алыр турган. Ооң адаанда келир неделяда чүнү номчуурун айтып каан турган.

Библия өөренип турган улус ол карточкаларны 12 неделя дургузунда алыр турган. Ону тус черниң чыыжында улуг назылыг акы-угбаларга азы кадыының аайы-биле бажыңнар кезип суртаалдап шыдавас улустарга дагзып каар турган. Чижээлээрге, Милвейлден Анна Гарднер (Пенсильвания штады) мынча дээн: «Мээң угбам Тейл инвалид турган. Ынчалза-даа „Бурганның чадаганы“ дээр номнуң ачызында ол хөй суртаалдаар аргалыг апарган. Библия өөренип турар улуска айтырыгларлыг карточкаларны ол чоргузуп турган». Кичээлдерни өөренген соонда, чыышта кандыг-бир кижи аңаа улаштыр Библияны оон-даа эки билип алырынга дузалажыр дээш, олче баар турган.

1921 чылдың төнчүзүнде Джозеф Рутерфорд акый шупту Библияның Шинчилекчилеринге мындыг чагааны чоргускан: «Бо чылын Чагырга дугайында медээ кажангызындан-даа артык өткүт кылдыр дыңналып, мооң мурнунда чылдарга бодаарга, дыка хөй улуска дузалыг болган». Ынчалза-даа ол акы-угбаларны чаңгыс черге турбайн, оон-даа улаштыр кызымаккай бараалгаарынче кыйгырып: «Бисти хөй ажыл манап турар. Ынчангаш бо кайгамчык ажылга оон-даа хөй улус киржир кылдыр, оларны чалаңар» — дээн. Библияның Шинчилекчилери акывыстың сөстерин тооп дыңнаан деп төөгү көргүзүп турар. 1922 чылда олар Бурганның Чагыргазының дугайында медээни оон-даа артык эрес-дидим болгаш чүткүлдүг кылдыр суртаалдап турганнар.