1. «Энерелдиг» деп сөстү дыңнааш, бажыңарга кандыг кижи кирип кээр-дир?

 «ЭНЕРЕЛДИГ» деп сөстү дыңнааш, бажыңарга кандыг кижи кирип кээр-дир? Дузааргак, кээргээчел база беримчелиг кижи чадавас. Азы Иисустуң угаадыглыг чугаазында Самариядан буянныг кижини сактып кээр чадавас силер. Дээрбечилерниң эттеп-эттеп, ишти тынныг чыттырзын каапкан еврей кижиге ол энерелди көргүскен. Ол чеже-даа ооң чаңгыс чер чурттуу эвес болза, самарий кижи ону кээргеп, ол дээш ынакшылдыы-биле сагыш човаан (Лк. 10:29—37). Бо угаадыглыг чугаада Иегованың чараш шынары, энерел, дугайында чугаалаан. Энерел дээрге Бурганның ынакшылының бир талазы-дыр, Ол ону биске хүннүң-не көргүзүп чоруур.

2. Энерелди оон ыңай канчаар илередип болур?

² Энерелди оон ыңай канчаар илередип болур? Энерелдиг кижи буруулуг кижини шиитпес деп бодап ап болур. Ырлар 102:10-да: «Ол [Бурган]... бисти бачыттарывыс ёзугаар кезетпеди» — дээн. Моон алырга, Иегова бараалгакчылары-биле шак ынчаар алдынып турар. Ынчалза-даа херек үеде Иегова бачыт кылган кижини шыңгыы шиидип турар.

3. Кандыг айтырыгларны сайгарар бис?

³ Бо статьяга үш айтырыгны сайгарар бис: Иегова энерелди чүге көргүзүп чоруур? Шыңгыы кеземче биле энерелдиң аразында кандыг харылзаа бар? Биске энерелдиг болурунга чүү дузалаар? Ооң дугайында Бурганның Сөзүнде чүү деп турарын көрүптээлиңер.

4. Иегованы энерелдиг болурунче чүү оттуруп турар?

⁴ Иегова кижилерге ынак болгаш, энерелди көргүзүп чоруур. Павел элчин эфесчилерге 2-ги чагаазында Бурганның өндүр улуг энерелиниң дугайында бижээн. Бо удаада Павел дээрге чурттаар идегелдиг, бачыттыг чагдырган христианнарга Бурганның энерелиниң дугайында чугаалаан (Эф. 2:4—7). Ынчалза-даа Иегованың энерели ооң-биле кызыгаарлаттынмаан. Давид бир ырызынга мынча деп ырлаан: «Дээрги-Чаяакчы бүгү улуска буянныг, Ооң чаяаганы бүгү чүүлдерге ээ-хайыралы илереп кээр» (Ыд. ыр. 144:9). Чылдагаан-на бар болза, Иегова кижилерге кезээде энерелдиг.

5. Иегованың энерелдиин Иисус кайыын билир?

⁵ Иегованың кайы хире энерелдиин Иисус кымдан артык билир. Ол черже кээриниң мурнунда Ачазы-биле дыка хөй чылдар ишти кады турган (У. ч. 8:30, 31). Оон аңгыда, бачыттыг кижилерге Иегованың хөй чылдар дургузунда энерелди канчаар көргүзүп келгенин ол чаңгыс удаа эвес көрген! (Ыд. ыр. 77:37—42). Ынчангаш Ачазының ол чараш шынарынче дыңнакчыларының кичээнгейин ооң салып турганы кайгамчык эвес.

6. Иисус Адазының энерелдиг чорукту илередиринге беленин канчаар көргүскен?

⁶ Иегованың энерелдиг чорукка кайы хире ынаан Иисус будалган оолдуң дугайында угаадыглыг чугаазы-биле көргүскен. Ону эрткен статьяга база сайгарган бис. Ол угаадыглыг чугаада оол бажыңындан чорупкаш, «будалып чурттааш, бодунуң бүгү акша-хөреңгизин төтчеглеп каапкан» (Лк. 15:13). Ынчалза-даа ол бодун томаартып, буруузун миннип, бажыңынче катап чедип келген. Ачазы ону канчаар хүлээп алган? Иисус уламчылаан: «Оглу чоокшулап келбээнде-ле, ачазы ону көрүп кааш, кээргей берип-тир. Ачазы оглунга маңнап чеде бергеш, ону кужактааш, ошкап эгелээн». Ачазы ону буруудатпайн, өг-бүлезинче дедир өөрүшкүлүг хүлээп алган. Оглу чеже-даа буруулуг болза, буруузун миннингени дээш, өршээпкен. Бо угаадыглыг чугаада энерелдиг ада дээрге Иегова-дыр. Дээрде Адавыс буруузун миннип турар улусту өршээринге белен (Лк. 15:17—24).

7. Иегованың мерген угааны биле энерели кандыг харылзаалыг?

⁷ Иегова тергиин мерген угаанныг болгаш, энерелди көргүзүп чоруур. Ооң шупту шиитпирлери биске ажыктыг. Чүге дизе Библияда «дээрден кээр мерген угаан өршээлдиг,  буянныг ажыл-херектери-биле бай» дээн (Иак. 3:17). Ынакшылдыг Адавыс бисти энерелди хереглеп турар деп билир (Ыд. ыр. 102:13; Иса. 49:15). Четпес талаларывыс хөй-даа бол, Ол биске келир үеже кайгамчык идегелди берген. Оон аңгыда, Иегованың төнчү чок мерген угааны, чылдагаан-на бар болза, энерелди илередиринче Ону оттуруп турар. Каржы-бакты деткиир дээш, энерелдиг болуру шын эвес деп, бистиң мерген угаанныг Адавыс билир.

8. Чамдыкта чыышка кандыг хемчегни алыры шын база чүге?

⁸ Кады бүзүрээн ха-дуңманың бирээзи мөзү-шынар чок амыдырал тудар болза, канчаар алдынар бис? Иегова Павел элчинни таварыштыр биске ындыг кижи-биле «харылзашпаңар» дээн (1 Кор. 5:11). Ынчангаш бачыт үүлгеткеш, буруузун миннивес кижини чыыштан үндүрүптер. Ол хемчегни Бурганга шынчы акы-угбаларны камгалап, чыыш Иегованың караанга арыг болзун дээш кылыр. Бир кижиге ол кеземчеде Иегованың энерели көстүп турар деп чүүлдү хүлээри берге боор. Ынчаар бодаары шын бе, сайгарыптаалыңар.

9, 10. Чыыштан кижини үндүрери дээрге энерел көргүзери деп кандыг чижектен көскү? (Еврейлерге 12:5, 6).

⁹ Таныырывыс кижи азы ынак эживис Иегованың Херечизи эвес апаарга, биске дыка муңгаранчыг. Ону чыыштан үндүрери албан бе деп бодап болур бис. Ынчаар энерелди көргүскен боор бе? Ийе. Кеземчеге онаар ужурлуг кижини кезетпес болза, ында мерген угаан-даа, энерел-даа, ынакшыл-даа чок (У. ч. 13:24). Чыыштан үндүрер кеземче бачыт үүлгеткен кижиге ажыктыг боор бе? Ийе. Хөй акы-угбалар аар-бачыт үүлгеткеш, үндүртүп алган соонда удуртукчуларның шиитпири оларны билиндирип, эттинип алгаш, Иеговаже эглип кээринге дузалаан деп үлешкеннер. (Номчуптуңар: Еврейлерге 12:5, 6.)

¹⁰ Бир чижекти көрээлиңер. Кадарчы кижи бир хоюнуң аарый бергенин эскерип каан дижик. Ол аарыгны шинчилеп көргеш, ону өске хойлардан аңгылап каан. Хойлар — кодан мал болгаш, олар бот-боттарынче чүткүүр, а чааскаан арткаш, девидээр боор. Ынчаарга кадарчы кижи шын эвес кылган бе? Чок. Хойну аңгылавас болза, өске хойлар аарый бээр деп, ол билир. Шак ынчаар ол бүгү кодан хойну камгалап турар. (Деңнеңер: Левит 13:3, 4.)

11. а) Чыыштан үндүрткен кижини аарый берген хойга чүге дөмейлеп болур? б) Чыыштан үндүрткен кижи чүнү кылып болур база аңаа кандыг дузаны көргүзүп турар?

¹¹ Чыыштан үндүрткен кижини кырында чижекте хойга дөмейлеп болур. Доора уткалыг чугаалаарга, ооң Бурган-биле хамаарылгазы баксырааш, аарый берген (Иак. 5:14). Ындыг аарыг, дорт уткалыг аарыглар ышкаш халдавырлыг бооп болур. Ынчангаш ындыг кижини чыыштан аңгылаары чугула. Ол хемчегде Иегованың шынчы бараалгакчыларынга ынакшылы көстүп турар. Оон ыңай «аарыг» кижи кайы хире аар бачыт кылганын билип, буруузун миннирин Бурган күзеп турар. Ол чеже-даа чыыштан үндүртүп алган болза, Бурган-биле хамаарылгазын катап тургузуп алыр дээш, чыыштарже барып, номчуур дептерлерни ап, JW Broadcasting^®-тен үндүрүглерни көрүп болур. Чыыштан үндүрткен кижи эки талазынче өскерлир дээш кызып турар болза, удуртукчулар аңаа катап Иегованың Херечизи апаарынга дузалаар ажыктыг сүмелерни берип болур *.

12. Бачыт кылгаш, буруузун миннивес кижиге удуртукчулар ынакшыл биле энерелди канчаар көргүзүп турар?

 ¹² Бачыт кылгаш, буруузун миннивес кижини чыыштан үндүрер боор. Удуртукчулар бүгү байдалды хынап шинчилээн соонда, ындыг шыңгыы шиитпирни хүлээр. Иегова кымны-даа чөптүү-биле кезедир болганда, удуртукчулардан база ону манап турар (Иер. 30:11). Удуртукчулар акы-угбаларга ынак болгаш, оларның Иегова-биле хамаарылгазының баксырай бээрин черле күзевес. Ындыг-даа бол, бачыт кылган кижини чыыштан үндүрүптери аңаа ынакшылды болгаш энерелди көргүзүп турары болур.

13. Коринфиде бир акыйны чүге чыыштан үндүрер ужурлуг турган?

¹³ Бирги векте Коринф хоорайга мындыг чүүл болган. Бир акый соңгу иези-биле холбажып, кады чурттап турар деп, Павел элчин билип каан. Дыка-ла бужар бачыт! Бурунгу үеде Иегова израильчилерге мынча дээн: «Ачазының өске кадайы — соңгу иези-биле хойгажыр кижи ачазының мага-бодунуң тудуш кезээ-биле холбашкан дег болган-дыр. Ол кижини-даа, соңгу иезин-даа өлүрүп каар херек» (Лев. 20:11). Павел Моисейниң хоойлузун сагып, бачыт кылган кижини өлүмге шиидип шыдавас турган-даа болза, ол акыйны чыыштан үндүрерин дужааган. Чүге дизе ооң мөзү-шынар чок амыдыралы өске акы-угбаларга багай салдар чедирип турган. Оларның чамдыызы ооң херектерин көңгүс анаа чүүл деп санаар апарган (1 Кор. 5:1, 2, 12—13).

14. Павел Коринфиде чыыштан үндүртүп алган кижиге энерелди канчаар көргүскен база чүге? (2 Коринфичилерге 2:5—8, 11).

¹⁴ Кезек үе эрткенде, Павел демги эр кижиниң буруузун миннип, чуртталгазын бүрүнү-биле өскертип алганын билип каан. Ол кижи бодунуң бачыды-биле чыышты чеже-даа бак атка киирген болза, Павел аңаа эмин эрттир шыңгыы болбас болза эки деп билип турган. Ынчангаш ол удуртукчуларга: «А ам ону өршээп, деткээниңер дээре» — дээн. Чүге? «Оон башка ооң сеткил-хөңнү муңгарап, ийлей бээр» — деп, Павел уламчылаан. Павел ол кижиниң бодунга чөгенип, өршээлге төлеп чок мен деп хөлүн эрттир муңгарай бербезин дээш, аңаа энерелди көргүскен. (Номчуптуңар: 2 Коринфичилерге 2:5—8, 11.)

15. Удуртукчулар хары угда шыңгыы-даа, энерелдиг-даа канчаар бооп болур?

¹⁵ Хуралдың удуртукчулары, Иегова ышкаш, энерелдиг болуксаар. Болдунар-ла болза, олар бачыт үүлгеткен кижини чыыштан үндүрбезин кызар. А ону кезедири шынап-ла  херек болза, олар шыңгыы кылдыр алдынып турар. Чылдагаан чокка энерелди илередири дээрге-ле бачытты деткип турары болур. Ынчалза-даа чүгле удуртукчулар энерелди көргүзер ужурлуг бе?

16. Чугаалар 21:13-тен алырга, Иегова энерел көргүспес улуска кандыг хамаарылгалыг?

¹⁶ Бис шуптувус, Иегова ышкаш, энерелдиг болуксаар бис. Чүге дизе ооң бир чылдагааны — Иегова энерел көргүспес улустуң мөргүлүн дыңнавас. (Номчуптуңар: Чугаалар 21:13.) Чаңгыс ону бодап кээрге безин коргунчуг апаар. Ынчангаш доң баарлыг азы эмин эрттир шыңгыы болуксавас бис. «Ядамыктың алгы-кышкызын дыңнааш, кулаан бөөшкүннеп» алган кижи ышкаш алдынмас бис. Ынчангаш ха-дуңмавыстың кайы-бирээзинге дуза херек апаарга, тоовайн барбас бис. Оон артык, «өршээл билбес улусту Бурган база өршээл чокка шиидер» деп библейжи сагындырыгга шыңгыы хамаарылгалыг бис (Иак. 2:13). Бир эвес биске энерелдиң кайы хире херегин сактып чоруур болзувусса, өскелерге энерелди көргүзери биске белен болур. Бачыт үүлгеткен кижи чыышче катап эглип кээрге, аңаа энерелдиг болуру ылаңгыя чугула.

17. Давид ёзулуг энерелди канчаар илереткен?

¹⁷ Энерелди илередиринге база каржы-дошкун болбазынга дузалаар чижектер Библияда көвей. Чижээ, Давид — энерелди ёзулуг илередип чораан кижилерниң бирээзи-дир. Саул хаан ону чаңгыс удаа эвес өлүрерин оралдашкан. Ынчалза-даа Давид аңаа энерелдиг болуп, оон өжээн негевээн. Чүге дээрге Саул — Иегованың чагдырган бараалгакчызы деп, ол билип турган (1 Хаан. 24:10—13, 19, 20).

18, 19. Кандыг ийи байдалда Давид энерелди көргүспээн?

¹⁸ Чамдык байдалдарда Давидке энерелдиг чорук четпейн турган. Чижээ, туразы улуг Навал Давидти сөглеп-сөглеп, аңаа болгаш ооң улузунга аъш-чем бербээн боорга, Давид хорадаанындан Навалды болгаш ооң бажыңында шупту эр улусту өлүрер дээш үнүпкен. Навалдың шыдамык болгаш биче сеткилдиг кадайы Авигея эвес болза, Давид хан төгүүшкүнүнге буруулуг боор часкан (1 Хаан. 25:9—22, 32—35).

¹⁹ Ам бир өске байдал. Нафан медээчи Давидке бир бай кижи ядыы кижиниң ынак хоюн оорлапкан деп төөгү чугаалап берген. Давидтиң килеңи кыптыгып: «Дириг Дээрги-Чаяакчының ады-биле даңгыраглап тур мен: ындыг чүвени үүлгеткен кижи өлүмге төлептиг!» — деп кышкырыпкан (2 Хаан. 12:1—6). Кончуун аа! Хой оорлаан кижи орнунга дөрт хойну төлээр ужурлуг деп Моисейниң хоойлузун ол дыка эки билир турган (Хост. 22:1). Ындыг-даа болза, Давид ол кижини өлүмге шиидиксээн! Херек кырында Нафан ол чогаадып каан төөгүнү Давид частырыгларының кайы хире аарын билип кагзын дээш чугаалаан. Давид ол оор кижини өлүрер ужурлуг деп бодап турган, а Иегова Давидке өндүр улуг энерелин көргүскен (2 Хаан. 12:7—13).

20. Давидтиң чижээнден чүнү өөренип ап болур?

 ²⁰ Эскерип көрүңер даан: Давид аажок кылыктанып, Навал-биле ооң улузу өлүмге төлептиг деп шиитпирлээн. Соонда Давид Нафанның чугаалааны бай кижиге база өлүмнүг шииткел үндүрген. Ийи дугаар таварылганы кичээнгейлиг көрээлиңер. Давид, чымчак сеткилдиг кижи, бо удаада канчап өскелерни кадыг-дошкун шиидип эгелээн? Ооң мурнунда болуушкуннарны кичээнгейге алыр болза эки. Ол үеде ооң арын-нүүрү арыг эвес турган. Өскелерге эмин эрттир шыңгыы хамаарылгалыг бооп, оларны кээргел чокка шиидип турар кижиниң Бурган-биле хамаарылгазы эки болбас. Ынчангаш Иисус эдерикчилеринге мынча деп сагындырган: «Кымны-даа шиитпеңер, Бурган ынчан силерни база шиитпес. Чүге дээрге өскелерни канчаар шиидер-дир силер, Бурган силерни база ынчаар шиидер» (Мф. 7:1, 2). Ынчангаш өскелерни кээргел чокка шиидер хөөн-биле туржуңар. Ынчаар өндүр улуг энерелдиг Бурганывысты өттүнер бис.

21, 22. Энерелди канчаар көргүзүп болур бис?

²¹ Энерел дээрге анаа-ла кээргээри эвес-тир. Кижи энерелди ажыл-херектеринге көргүзер. Ынчангаш чоок улузувустуң, чыышта ха-дуңмавыстың база кожаларывыстың дуза хереглеп турарын эскерип, оларга энерел көргүзер аргаларывыс дыка хөй. Чижээ, бир кижини аргалап, өскезиниң бажың-балгадында ажылдарынга дузалап, а үшкүзүнге аъш-чемни эккеп болур. А чоокта чаа чыышка катап эглип келген кижиге деткимче херек. Ооң-биле чүге өңнүктежип болбас деп? Энерелди көргүзер эң эки аргаларның бирээзи — Библиядан буянныг медээни улуска чугаалаары-дыр (Иов 29:12, 13; Рим. 10:14, 15; Иак. 1:27).

²² Шынап-ла, бистиң өскелерге энерел көргүзер аргаларывыс дыка хөй! Чүгле эскериичел боор болзувусса эки. Шак ынчаар өндүр улуг энерелдиг дээрде Адавысты өөртүр бис!