1. Кижи канчап бүгү назынында аас-кежиктиг бооп болур?

 ААС-КЕЖИК дээрге бөгүн бар, а эртен чок бедик сеткил көдүрлүүшкүнү эвес-тир. Кижи бүгү назынында аас-кежиктиг бооп болур. Даг кырынга суртаалынга Иисус ону мынчаар тайылбырлаан: «Бурган-биле харылзаа тудар хереглелин миннип турар улус аас-кежиктиг» (Мф. 5:3, Чаа делегей). Кижилер Чаяакчызын, Иегова Бурганны, эки билип алыр база Аңаа мөгеер күштүг күзелдиг кылдыр чаяаттынган деп, ол билир турган. А Иегова — «ачы-буянныг», азы аас-кежиктиг, Бурган болганда, Ооң бараалгакчылары база аас-кежиктиг бооп болур (1 Тим. 1:11).

2, 3. а) Иисустуң сөстеринден алырга, кым аас-кежиктигил? б) Бо статьяга чүнү сайгарар бис база ол чүге чугула?

² Аас-кежиктиг болур дизе, албан шупту чүве эки боор ужурлуг бе? Чок. Даг кырында суртаалынга Иисус мынча дээн: «Муңгарап ыглааннар амыр-чыргалдыг». Моон алырга, бачыды дээш азы амыдыралдың түрегдели дээш ыглап-сыктаан улус безин аас-кежикти миннип болур. Оон ыңай Иисус «чөптүг-шынныг чоруу дээш, истедип-сүрдүргеннер амыр-чыргалдыг» база ону эдергени дээш, бак сөглеткен улус амыр-чыргалдыг дээн (Мф. 5:4, 10, 11). Мындыг байдалдарда кижи канчап аас-кежиктиг бооп болур?

³ Аас-кежик кижиниң байдалындан эвес, а Бурган-биле харылзаа тудар хереглелин миннип, Олче чоокшулаарындан хамааржыр деп, Иисус өөредип турган (Иак. 4:8). Ону канчаар кылып болур? Ёзулуг аас-кежик эккээр үш кол базымны бо статьяга сайгарар бис.

4. Аас-кежикке чедирер 1-ги базым кандыгыл? (Ырлар 1:1—3).

⁴ 1-ги БАЗЫМ. Аас-кежиктиг болур дээш, Бурганның Сөзүн номчуур ужурлуг бис. Дириг артар дээш, кижилер-даа, дириг амытаннар-даа чемненир ужурлуг. Ынчалза-даа чүгле кижилер Бурганче чоокшулап, доора уткалыг аъш-чемни чип болур. Иисус: «Кижи амытан чүгле хлеб-биле эвес, а Бурганның чугаалаан бүгү чүвезиниң ачызында амыдыраар болгай» — дээн (Мф. 4:4). Ынчангаш Библияны, Бурганның үнелиг Сөзүн, чаңгыс-даа хүн номчувайн барбаалыңар. Ол бодалды ыр күүседикчизи мынчаар дамчыткан: «Дээрги-Чаяакчының хоойлузун дүн-хүн дивейн бодап, аңаа хандыкшып, таалал алыр [кижи амыр-чыргалдыг]». (Номчуптуңар: Ырлар 1:1—3.)

5, 6. а) Библиядан чүнү билип ап болур? б) Библияны номчууру биске чүзү-биле ажыктыг?

⁵ Иегова биске дыка ынак болгаш, канчаар аас-кежиктиг чурттаарын Библияда бижип каан. Бурганның бистен чүнү негеп турарын оон билип алган бис. Оон аңгыда, канчаар Бурганның өңнүү апаарын база өршээлди канчаар алырын Библия ажыдып берген. Оон ыңай кайгамчык идегелдиг апарган бис (Иер. 29:11). Бо алыс шынны Бурганның Сөзүнүң ачызында билир бис, ол билиглер бистиң чүрээвисти аажок өөртүп чоруур.

⁶ Ол ышкаш Библияда амыдырал-чуртталгага херек мерген угаанныг сүмелер хөй. Бир эвес оларны ажыглаар болзувусса, аас-кежиктиг апаар бис. Амыдыралдың бергелеринге алзып, ундараан үеңерде Иегованың Сөзүн номчуур, ханы боданыр үени үндүрүңер. Иисус мынча дээн: «Бурганның  медээзин дыңнааш, ону сагып чоруур улус оон-даа амыр-чыргалдыг!» (Лк. 11:28).

7. Библияның номчулгазындан оон-даа хөй ажык-дузаны алыр дизе, чүнү канчаарыл?

⁷ Бурганның Сөзүн далашпайн, таалап номчуңар. Мындыг байдал силерге таныш-тыр бе? Ынак чемиңерни силерге кылып берген. Ынчалза-даа силер та далашкаш азы хөй бодалдарга алыскаш, ону таптыг-даа дайнавайн, сыырыпкан силер. А кажан тавааңар куруглай бээрге, ындыг дүрген эвес, а таптыг амданнанып чиир турган болза эки деп билип каан силер. Эки утказын-даа билбейн, өөрүшкү-даа миннивейн, Библияны далаштыг номчаан силер бе? Ол номну «амданнанып» номчуур дээш, үеден үндүрүп алыңар. Ында бижээн болуушкуннарны диригжидип, кандыг үннер дыңналып турарын сагыштаалап, чүнүң дугайында номчуп турарыңарны хандыр боданыңар. Ынчаар болзуңарза, оон-даа аас-кежиктиг боор силер.

8. «Шынчы болгаш сарыылдыг чалча» хүлээнген даалгазын канчаар күүседип турар? (Немелде тайылбырны база көрүңер.)

⁸ Иисус «шынчы болгаш сарыылдыг чалчаны» биске чогуур үеде «аъш-чемни» бээр кылдыр томуйлаан (Мф. 24:45) b. Бистиң мурнувуста кезээде долдур «аъш-чем» делгээн стол бар. Шынчы чалчаның кылып турар «аъш-чеминиң» кол ингредиентизи — Ыдыктыг Бижилге-дир (1 Фес. 2:13). Ынчангаш шынчы чалчаның биске белеткеп берип турар «аъш-чеми» Иегованың Библияда бодалдарын билип алырынга дузалап турар. Ынчангаш «Таңныыл суургазы», «Оттуп келиңер!» деп журналдарны болгаш jw.org деп сайтыда статьяларны номчуп турар бис. Оон ыңай чыыштарның дөгерезинге белеткенип, бистиң дылывыста бар болза, ай санында үнер JW Broadcasting^®-ти көрүп турар бис. Шак мындыг эки шынарлыг «аъш-чем» бисти аас-кежикке чедирер ийи дугаар базымны кылырынга дузалаар.

9. Аас-кежикке чедирер 2-ги базымны чугаалаңар.

⁹ 2-ги БАЗЫМ. Аас-кежиктиг болур дээш, Иегованың негелделери-биле чурттаар ужурлуг бис. Ыр күүседикчизи: «Дээрги-Чаяакчыдан коргар, Ооң оруктарын эдерип чоруур кижи бүрүзү амыр-чыргалдыг» — деп бижээн (Ыд. ыр. 127:1). Иегованы хомудадыптар ажыл-херектерден дезеринге Дээрги-Чаяакчыдан коргуш дузалаар (У. ч. 16:6). Ынчангаш бар-ла шаавыс-биле Библиядан билип ап турарывыс Бурганның эки-бакты ылгаар дүрүмнерин сагып чурттаарын кызып турар бис (2 Кор. 7:1). Иегованың хөңнү чок ажыл-херээнден ойталап, Ооң ынак ажыл-херээн кылыр болзувусса, аас-кежиктиг болур бис (Ыд. ыр. 36:27; 96:10; Рим. 12:9).

10. Римчилерге 12:2-ден алырга, Иегова бистен чүнү манап турар?

¹⁰ Номчуптуңар: Римчилерге 12:2. Иегова эки-бактың дүрүмнерин тургузар эргелиг деп билиринден аңгыда, кижи оларны сагып чурттаар ужурлуг. Мындыг чижекти көрүптээлиңер. Эрге-чагырга ээлээннер машинаның кайы хире дүрген халдыырынга хамаарыштыр негелдени тургузар эргелиг деп, бир кижи билир дижик. Ынчалза-даа ол дүрүмнү сагыыр хөңнү чок болгаш, бо-ла ону үреп турар. Иегованың дүрүмнери-биле чурттаары эң-не дээре деп бодаар болзувусса, ол чүүл бистиң ажыл-херээвистен көскү боор (У. ч. 12:28). Давид шак ынчаар бодап чораан. Ол Иеговага мынча дээн: «Сен меңээ амыдыралче орукту айтып бээр сен;  Сээң-биле кады турарымга, өөрүшкү мени бүргээр, Сээң холуңда аас-кежик кезээ мөңгеде бар» (Ыд. ыр. 15:11).

11, 12. а) Ундарап азы бир-ле чүүл дээш дүвүреп турар үевисте чүге оваарымчалыг боор ужурлуг бис? б) Оюн-тоглаа шилип тура, Филипчилерге 4:8-те сөстер биске канчаар дузалап болур?

¹¹ Кижи ундарап азы дүвүреп тургаш, өскээр чардыгарын кызар. Ында багай чүве чок. Ынчалза-даа Иегованың көөр хөңнү чок чүүлдерин кылырындан оваарныр ужурлуг бис (Эф. 5:10—12, 15—17).

¹² Филипчилерге чагаазында Павел элчин христианнарны «алыс шынныг... арыг база ынакшылга болгаш макталга төлептиг чүүлдер» дугайында үргүлчү боданырынче оттуруп турган. (Номчуптуңар: Филипчилерге 4:8.) Павел мында оюн-тоглаа дугайында биживээн-даа болза, ооң сөстери ону бодамчалыг шилииринге биске дузалаар. Бо шүлүктү мынчаар өскертипкеш, номчуп көрүңер: «Бодалдарыңарны чүгле арыг ырылар, макталга төлептиг фильмнер, номнар болгаш видеооюннар-биле иштеп көрүңер». Мооң ачызында оюн-тоглаавыс Бурганның көрүжүнге дүгжүр бе деп билип алыр бис. Иегованың бедик мөзүлүг дүрүмнери ёзугаар чурттаарын күзеп чоруур бис (Ыд. ыр. 118:1—3). Ынчан бис арыг арын-нүүрлүг бооп, ёзулуг аас-кежикке чедирер үш дугаар базымны кылып шыдаар бис (Аж.-ч. 23:1).

13. Кандыг 3-кү базым аас-кежикке чедирер? (Иоанн 4:23, 24).

¹³ 3-кү БАЗЫМ. Иеговага мөгейиишкинни бирги черге салырын кызыңар. Иегова бистиң Чаяакчывыс болганда, мөгейиишкинивиске чүгле Ол төлептиг (Ажыд. 4:11; 14:6, 7). Ынчангаш Бурганга бараалгал чуртталгавыска кол черни ээлээр ужурлуг. Ол бистен «сүлде болгаш алыс шындан» мөгееривисти манап турар. (Номчуптуңар: Иоанн 4:23, 24.) Бурганга мөгейип тура, ыдыктыг сүлдениң удуртулгазын эдерер херек. Ынчан бараалгалывыс библейжи алыс шынга дүгжүр боор. Ажыл-чорудулгавысты кызыгаарлап азы хоруп каан чуртта чурттап турар-даа болзувусса, Иеговага мөгейиишкин биске эң чугула боор ужурлуг. Чүгле Иегованың Херечилери болганы дээш, бо үеде 100 ажыг акы-угбаларывыс кара-бажыңнарда олурар c. Ындыг турбуже, олар өөрүшкүзүн чидирбейн, улаштыр-ла мөргүп, Библияны өөренип база өскелерге Бурганның болгаш Ооң Чагыргазының дугайында чугаалап турар. Иегова бистиң-биле кады база Ол бисти албан шаңнаар. Ынчангаш кандыг-даа дорамчылал, истеп сүрүүшкүннер турза-даа, аас-кежиктиг боор бис (Иак. 1:12; 1 Пет. 4:14).

14. Таджикистандан аныяк оол дуңмавыс-биле чүү болган база кандыг чылдагаан-биле?

¹⁴ Сайгарганывыс үш базым, байдалывыс кандыг-даа бол, аас-кежикке чедирер деп чуртталгадан чижектер бадыткап турар. Шериг баарындан ойталаан Таджикистандан 19 харлыг Джовидон Бободжоновтуң чижээ бо-дур. 2019 чылдың октябрь 4-те ону күш-биле бажыңындан тудуп аппаргаш, элээн каш ай ишти хоругдааш, кем-херек үүлгедикчизи дег аажылап турган. Ындыг чөптүг эвес чоруктуң дугайында медээ бүдүн делегейге тарай берген. Присяганы берип, шериг хепти кедер кылдыр, ону эттеп-соп турган, а соонда ону кара-бажыңнап каан. Адактың соонда чурттуң президентизи Джовидонга өршээл көргүзүп, ону  хостаан. Ол шенелдениң дургузунда Джовидон Бурганга бердинген бооп, аас-кежиктиг турган. Аңаа чүү дузалаан? Бурган-биле харылзаазын быжыглаарын ол утпайн чораан.

15. Джовидон кара-бажыңга олургаш, бүзүрелин канчаар быжыглап турган?

¹⁵ Библиязы-даа, дептерлери-даа чок турган хирезинде, Джовидон кара-бажыңга Бурганның Сөзүн номчуп турган. Канчап? Акы-угбалар аңаа аъш-чем эккээр санында-ла, пакеттерге хүннүң шүлүүн бижип каар турганнар. Ынчангаш ооң хүннүң-не Библия номчуур, ханы боданыр аргазы турган. Хосталып үнүп келгеш, ол мындыг сүме берген: «Шыңгыы шенелделерге амдыызында таварышпаан улус үезин шын ажыглап, Иегова-биле харылзаазын быжыктырар дээш, Ооң Сөзүн болгаш дептерлеривисти номчуур болза эки».

16. Джовидон чүнүң дугайында кызып боданып турган?

¹⁶ Джовидон Иегованың негелделери-биле чурттап турган. Ол бачыттыг күзелдеринге алыспайн, бодун төлептиг кылдыр алдынган. Дуңмавыс үргүлчү Иегованың дугайында база Ооң үнелээр чүүлдериниң дугайында боданып турган. Джовидон Бурганның чаяалгаларының чаражын магадаар турган. «Эртен эрте кушкаштарның чараш ырызын дыңнап, оттуп кээр турган мен,  а дүне айны болгаш сылдыстарны чарашсынып кайгаар турган мен. Иегованың ол белектериниң ачызында өөрүшкүлүг болгаш күштүг арткан мен» — деп, ол сактып чугаалаан. Бир эвес Иегованың биске берген шупту белектери дээш өөрүп четтирер болзувусса, сеткиливис өөрүшкү-биле долар, а ол өөрүшкүнүң ачызында чүнү-даа ажып эртиптер бис.

17. 1 Пётр 1:6, 7-де сөстерни Джовидон ышкаш байдалга таварышкан кижиге канчаар хамаарыштырып болур?

¹⁷ Джовидон Иеговага мөгейиишкинни бирги черге салып турган. Алыс шын Бурганга бердинген артары дыка чугула деп, ол билир турган. Иисус мынча дээн: «Чүгле Дээрги-Чаяакчы Бурганыңга мөгейип чор, чүгле Аңаа бараан бол» (Лк. 4:8). Офицерлер болгаш шеригжилер Джовидонну бүзүрелинден ойталаар кылдыр күзеп турган. А ол, дүн-хүн дивейн, Иеговадан шынчы артар күштү чаннып дилеп турган. Ол хире каржы-хажагай аажыладып тургаш-даа, Джовидон тендиш дивээн. Ам ол дыка аас-кежиктиг, чүге дээрге ооң бүзүрели шылгаттынып, тудуп хоругдадыр, эттедип-соктурар, кара-бажыңга суктурар мурнунда үелерге бодаарга, оон-даа быжыг апарган. (Номчуптуңар: 1 Пётр 1:6, 7.)

18. Канчап аас-кежиктиг артып болур?

¹⁸ Ёзулуг аас-кежиктиг болурунга биске чүү херегин Иегова билир. Бо статьяда сайгарганывыс үш базым аас-кежикти чедип алырынга база кандыг-даа аар-бергелер турда, аас-кежикти чидирбезинге дузалаар. Ынчан: «Дээрги-Чаяакчы оларга Бурган болган чон амыр-чыргалдыг» деп чугаалап болур бис (Ыд. ыр. 143:15).