1. Иегова биске кандыг идегелди белекке берген?

 ИЕГОВА биске мөңге амыдыраар кайгамчык идегелди белекке берген. Чамдык улус дээрге мөңге чурттаар идегелдиг (1 Кор. 15:50, 53). А кижилерниң хөй кезии черге каң-кадык, аас-кежиктиг мөңге чурттаар деп идегеп чоруур (Ажыд. 21:3, 4). Черге-даа азы дээрге-даа чурттаар идегелдиг болзувусса, ону аажок үнелээр бис.

2. Идегеливис чүү чүвеге үндезилеттинген база чүге ынча деп болур?

² Библияда «идегел» деп сөс бир-ле эки чүүлдү манап турар бодалды дамчыдып турар. Келир үеже идегеливис албан боттаны бээр деп бичии-даа чигзинмес бис, чүге дизе ону биске Иегова берген болгай (Рим. 15:13). Бурган кезээде аксы-сөзүн тудар деп билир бис (Сан. 23:19). Иегова бүгү аазаашкыннарын күүседир күзелдиг-даа, аргалыг-даа деп бүзүрээр бис. Ынчангаш идегеливис хоозун бодалдарга эвес, а бадыткалдарга болгаш фактыларга үндезилеттинген.

3. Бо статьяга чүнү сайгарар бис? (Ырлар 26:14).

³ Дээрде Адавыс биске аажок ынак, Ол бисти Аңаа идегезин деп күзеп турар. (Номчуптуңар: Ырлар 26:14.) Иеговага быжыг идегеливис бергелерни ажып эртеринге база өөрүшкүнү чидирбейн, келир үеже эрес-дидим көөрүнге дузалаар. Ынчангаш идегел бисти канчаар камгалап турарын сайгарыптаалыңар. Эгезинде ону чүге якорьга болгаш куяк бөртке дөмейлеп болурун көрүптээлиңер. Ооң соонда идегелди канчаар быжыглап болурун көөр бис.

4. Идегелди чүге якорьга дөмейлеп болурул? (Еврейлерге 6:19).

⁴ Павел элчин еврейлерге чагаазында идегеливисти якорьга деңнээн. (Номчуптуңар: Еврейлерге 6:19.) Павел болганчок далайга аян-чоруктап чораан болгаш, якорь күштүг  хат үезинде хемени ужур чайгылдырбас деп билир турган. Бир катап коргунчуг шуурган үезинде далайжылар хаяларже үндүр октадырындан «корткаш... корабльдың артыы талазындан дөрт якорь» бадырыпканын ол көрген (Аж.-ч. 27:29, 39—41). Шуурган дег бергелер амыдыралга тургустунуп кээрге, идегеливис якорь ышкаш, Иеговадан быжыг туттунарынга дузалап турар. Быжыг идегелдиң ачызында кадыг-дошкун шенелделерниң чалгыгларын шыдажыптар бис, чүге дээрге мурнувуста шыпшың кургаг чер манап турарын билир бис. Бисти истеп сүрер деп, Иисус сагындырып турган (Ин. 15:20). Ынчангаш Иегованың аазаан шаңналының дугайында бодап тургаш, алыс шынның оруундан чандыр баспас бис.

5. Өлүм чайлаш чок турда безин, идегел Иисуска күштү канчаар берип турган?

⁵ Иисусту каржы өлүм манап турза-даа, Иеговага шынчы артарынга быжыг идегел аңаа канчаар дузалаан? Б. э. 33 чылдың Беженги хүнүнде Пётр элчин Мессияның дугайында Ырлар номундан өттүр билген медеглелди чугаалаан: «Мээң мага-бодум үргүлчү идегел-биле амыдыраар. Сен мээң амы-тынымны өлүглер оранынга кагбас сен, Сеңээ бердинген чалчаңның ирип каарын болдурбас-ла болгай сен! ...Сен мээң-биле кады турар болгаш, мени өөрүшкү-биле бүргээр сен!» (Аж.-ч. 2:25—28; Ыд. ыр. 15:8—11). Ында Иисустуң өлүмден кортпайн турарын тайылбырлаан. Иисус амы-тынындан чарлыр мен деп билир турган. Ынчалза-даа Адазы ону диргизиптерге, ол Ооң-биле база катап чоок харылзаалыг боор деп, быжыг идегел ону сорук киирип турган (Евр. 12:2, 3).

6. Идегелдиң дугайында бир акывыс чүнү чугаалаан?

⁶ Идегелдиң ачызында дыка хөй акы-угбаларывыс шенелделерни быжыг туруштуг ажып эртип турар. Англияга чурттап чораан шынчы акывыс Леонард Чинниң чижээ бо-дур. Бирги делегей дайынының үезинде ону, шеригже баарындан ойталааны дээш, кара-бажыңга олуртуп каан. Ол чаңгыс кижи олурар камерага ийи ай ишти олурган, оон аңаа кадыг-берге ажылдар кылдыртып эгелээн. Ол мынча деп бижээн: «Ол бүгүнүң соонда мону билип алган мен: дүжүп бербес дизе, биске идегел эргежок чугула. Бисте Иисустуң, элчиннерниң, медээчилерниң үлегери, ол ышкаш Библиядан үнелиг аазаашкыннар бар. Бо бүгү биске келир үеже кайгамчык идегелди болгаш быжыг туруштуг болурунга күштү берип турар». Леонардтың идегели, якорь дег, быжыг турган. Бистиң идегеливис база ындыг бооп болур.

7. Шенелделер идегеливисти канчаар быжыктырып турар? (Римчилерге 5:3—5; Иаков 1:12).

⁷ Шенелделерни быжыг туруштуг ажып эртип, Иегованың деткимчезин болгаш ээ көрүүшкүнүн минниривиске, идегеливис улам быжыгып орар. (Номчуптуңар: Римчилерге 5:3—5; Иаков 1:12.) Өөрүнчүг медээни чаа-ла дыңнаан үевиске бодаарга, идегеливис оон-даа күштүг апарган. Эрлик бисти сы базарын күзеп турар. Ынчалза-даа Иегованың дузазы-биле кандыг-даа шенелделерни ажып эртиптер бис.

8. Идегелди чүге куяк бөртке дөмейлеп болур? (1 Фессалоникчилерге 5:8).

⁸ Оон ыңай Библияда идегелди куяк бөртке дөмейлээн. (Номчуптуңар: 1 Фессалоникчилерге 5:8.) Куяк бөрт дайынчы кижиниң бажын кемдээшкиннерден камгалап чораан. Эрликке удур дайынга киржип тура, бис база ооң халдаашкыннарындан угаанывысты камгалаар ужурлуг бис. Бистиң угаан-бодалывысты бужартадыр дээш, Эрлик янзы-бүрү күткүлгелерни болгаш аңгы-аңгы үзел-бодалдарны ажыглап турар. Дайынчы кижиниң бажын куяк бөрттүң камгалап турары  дег, идегел угаан-бодалывысты камгалап, Иеговага шынчы артарынга дузалап турар.

9. Мөңге чуртталгаже идегели чок улус канчаар амыдырап чоруур?

⁹ Мөңге чуртталгаже идегеливис мерген угаанныг шиитпирлер үндүреринге дузалаар. Ынчалза-даа бо делегейниң үзел-бодалдарынга алзып, идегеливис кошкаар болза, мөңге чурттаар идегеливисти чидирип ап болур бис. Бурунгу Коринфиге чамдык христианнар-биле чүү болганын сактып кээлиңер. Олар диргизиишкинге бүзүревейн барганнар (1 Кор. 15:12). Келир үеже идегел чок улус чүгле бөгүнгү хүн-биле чурттап чоруур деп, Павел бижээн (1 Кор. 15:32). Амгы үеде Бурганның аазаашкыннарынга бүзүревес улус чуртталгадан шупту чүвени алыр дээш, түр када күзээшкиннерин хандырып чурттап чоруур. А бис Бурганның аазап турар келир үезинге ыяк бүзүрээр бис. Идегеливис, куяк бөрт дег, бистиң угаан-бодалывысты камгалап, Иегова-биле найыралывысты үрептер бачыттыг күзелдерге алыспазынга дузалап турар (1 Кор. 15:33, 34).

10. Идегел шын эвес бодалдардан бисти канчаар камгалаар?

¹⁰ «Иегованың сеткилинге кирер дээш, оралдашкан-даа ажыы чок» дээн бодалдар тывылбас кылдыр, угаанывысты идегелдиң куяк бөргү камгалап турар. Чижээ, кандыг-бир кижи мынчаар бодап болур: «Мен-даа мөңге чурттавас мен, чүге дизе аңаа төлеп чок мен. Бурганның шупту негелделеринге кажан-даа дүгжүп шыдавас мен». Элифазтың Иовка ындыг хевирлиг сөстерни чугаалап турганын сактып келиңер. Ол меге аргалакчы: «Кижи амытан деп кымыл, ол канчап арыг боорул?» — деп айтырган. Оон аңгыда, Элифаз Бурганның дугайында мынча дээн: «Бурган ыдыктыг төлээлеринге безин бүзүревес, Ооң караанга дээр безин арыг эвес көстүр» (Иов 15:14, 15). Кандыг кончуг бужар меге чоор! Ооң артында Эрлик турар деп черле утпаңар! Бир эвес шак ындыг бодалдарга алзыр болзуңарза, идегелиңер өжүп каар деп, ол билир. Ынчангаш ооң мегезинден шиитпирлии-биле ойталап, Иегованың аазаашкыннарының дугайында хөй боданырын кызыңар. Дээрде Адаңар мөңге чурттаарыңарны изиг күзеп, ол сорулганы чедип алырынга силерге албан дузалаар деп черле чигзинмеңер! (1 Тим. 2:3, 4).

11. Бурганның аазаашкыннарының күүсеттинерин чүге шыдамыккай манаар херек?

¹¹ Чаа делегейниң кээрин идегеп манаары ындыг-ла амыр эвес. Бурганның аазаашкыннарының күүсеттинерин манап чадааш, шыдамыккай эвес апарып болур бис. Ынчалза-даа Иегова мөңге Бурган болганда, Аңаа үе-шак бир өскээр чоруп турар (2 Пет. 3:8, 9). Ол, бистиң манап турган үевисте эвес-даа бол, күзел-соруун албан боттандырар. Бурган аазаашкыннарын күүсетпээн шаанда, идегеливистен быжыг туттунуп, шыдамык манаарынга биске чүү дузалаар? (Иак. 5:7, 8).

12. Еврейлерге 11:1, 6-дан алырга, идегел бүзүрел-биле кандыг холбаалыг?

¹² Идегеливис быжыг болур дизе, Иегованың чоок өңнүктери боор ужурлуг бис. Чүге дээрге идегеливис албан боттаныр деп, чүгле Ол магадылап турар болгай. Бурган бар база «Олче чүткүп чоруур улуска Ооң шаңналы турар» деп бүзүрел биле идегелдиң сырый харылзаалыын Библияда дорту-биле көргүскен. (Номчуптуңар: Еврейлерге 11:1, 6.) Иегова бар деп херек кырында бүзүрээр болзувусса, Ол шупту аазаашкыннарын күүседиптер деп чигзинмес бис. Ам Иегова-биле найыралывысты оон-даа быжыктырарынга дузалаар каш ажыктыг сүмелерни көрээлиңер. Шак ындыг найырал идегеливистен  моон-даа улаштыр быжыг туттунарынга дузалаар.

13. Бурган-биле найыралды канчаар сайзырадып болур бис?

¹³ Иеговага мөргүп, Ооң Сөзүн номчуңар. Бурганны көрүп шыдавас-даа болзувусса, Ооң-биле өңнүктежип болур бис. Аңаа мөргүүрүвүске, Ол бисти дыңнап турар деп ыяк бүзүрээр бис (Иер. 29:11, 12). Библияны номчуп, ханы боданып тургаш, Иегованың үнүн дыңнап турар бис. Эрткен үеде бердинген бараалгакчылары дээш Иегованың канчаар сагыш човап турганын номчуурувуска, идегеливис улам быжыгар. «Бижилгелерде... бүгү чүвени биске өөредиг кылдыр бижээн-дир. Бижилгелер дамчып кээр сорук кириишкинниң ачызында бис шыдамык бооп, идегеливис чидирбес ужурлуг бис» (Рим. 15:4).

14. Иегованың өскелерге чүнү кылганының дугайында боданыры чүге ажыктыг?

¹⁴ Иегованың аазаашкыннарын канчаар күүседип турарын боданыңар. Авраам биле Саррага Бурганның чүнү кылганын сактып кээлиңер. Олар ажы-төлденир хире эвес кырый бергеш турда, Иегова оларга оолдуг болур силер деп аазаан (Э. д. 18:10). Авраам аңаа кандыг хамаарылгалыг болган? Ол «эңдерик хөй чоннарның адазы» апаарынга бүзүреп турган (Рим. 4:18). Кижи бодаарга, ол чүүл бүтпес ышкаш турган. Ынчалза-даа Бурган аксы-сөзүн тудар деп, Авраам ыяк бүзүреп турган. Ооң бүзүрели шаңнаттынган (Рим. 4:19—21). Мындыг төөгүлер бүзүреливисти дыка-ла быжыглаар-дыр! Үнер арга чок ышкаш байдалдарда безин, Иегова аазаашкыннарын кезээде күүседир деп шынзыгып турар бис.

15. Бурганның хууда биске чүнү кылганын эскерери чүге чугула?

¹⁵ Иегованың силерге чүнү кылганын эскериңер. Бурганның Сөзүнден аазаашкыннарның күүсеттинип турары силерге кандыг  ажык-дузаны эккелгенин боданыңар. Чижээ, дээрде Адаңар амыдыралга херек бүгү-ле чүүлдү силерге бээр деп, Иисус бүзүреткен (Мф. 6:32, 33). Оон ол Бургандан ыдыктыг сүлдени дилээр-ле болзуңарза, албан алыр силер дээн (Лк. 11:13). А Иегова бо аазаашкыннарны күүседип турар. Бурганның силерге оон-даа хөйнү кылганын сактып кээр чадавас силер. Чижээ, Иегова аазааны ёзугаар, силерни «ашкарып-чемгерип», өршээп, аргалап турар (Мф. 6:14; 24:45; 2 Кор. 1:3). Бурганның эрткен үеде силер дээш канчаар сагыш човап турганының дугайында боданыр болзуңарза, Ол келир үеде база силерни кагбас деп идегелиңер быжыгар.

16. Идегелди чүге үнелиг белек деп болур?

¹⁶ Мөңге чурттаар идегел — Бурганның үнелиг белээ-дир. Ол кайгамчык үе албан кээр деп бичии-даа чигзинмейн, ону четтикпейн манап чоруур бис. Идегел, якорь дег, Иеговадан быжыг туттунуп, шенелделерни ажып эртеринге, истеп сүрүүшкүннерни шыдажырынга, безин өлүмден кортпазынга дузалаар. Оон ыңай идегел, куяк бөрт дег, угаан-бодалывысты камгалап, бузут-бактан ойталап, буян кылырынче бисти оттуруп турар. Библияга үндезилеттинген идегеливис бисти Бурганче оон-даа чоокшуладып, Ооң биске кайы хире ынаан көрүп каарынга дузалап турар. Идегеливисти өжүрбес болзувусса, кажан-даа чөгенмес бис.

17. Идегел чүге өөрүшкү эккээр?

¹⁷ Павел элчин Римде христианнарга: «Идегелиңер силерге өөрүшкүнү эккелзин» — деп бижээн (Рим. 12:12). Ол идегелинге өөрүп, Бурганга шынчы артар болзумза, дээрге мөңге чурттаар мен деп ыяк бүзүреп чораан. Идегел биске база өөрүшкүнү эккеп болур, чүге дээрге Иегова кезээде аксы-сөзүн тудар дээрзинге чигзинмес бис. «Дээрги-Чаяакчыга — Бурганынга идегээр кижи амыр-чыргалдыг! Ооң Бурганы кезээ мөңгеде шынчы» — деп, ыр күүседикчизи ону кончуг шын эскерген (Ыд. ыр. 145:5, 6).