1, 2. а) Чамдык чазактар Иегованың Херечилеринге удур чүнү кылып турар? А олар аңаа кандыг хамаарылгалыг? б) Истеп сүрүүшкүннер турза-даа, канчап аас-кежиктиг артып болурул? (Журналдың даштында чурукту көрүңер.)

 АМГЫ үеде бистиң ажыл-чорудулгавысты 30 ажыг чурттарда болгаш девискээрлерде кызыгаарлап азы хоруп каан. Чамдык черлерде Иегованың Херечилери кара-бажыңнарда олурар. Олар чүнү үүлгеткенил? Иегованың көрүжү-биле алырга, чүнү-даа эвес. Олар Библияны номчуп, өөренип, билип алган чүүлүн улуска чугаалап, кады бүзүрээннери-биле чыглып турганнар. Оон ыңай олар политиктиг айтырыгларга кымның-даа талазын ээлээринден ойталааннар. Күштүг удурланыышкыннар турза-даа, Бурганның ол шынчы бараалгакчылары кем-буруу чок артып, Иеговага долузу-биле бердингенин көргүзүп турар. Ол дээш олар аажок өөрүп турарлар!

² Бо журналдың даштында чуруктарны ооң мурнунда-ла көрген чадавас силер. Чигзиниг чок, ол эрес-дидим акы-угбаларның арыннарында хүлүмзүрүг чайыннап турар деп эскерген боор силер. Олар чүге өөрүп турар? Кем-буруу чок боорга, Иегова оларга чүүлзүнүп турар деп, олар билир (Ыд. ыр. 14:1, 2). Иисус мынча дээн: «Чөптүг-шынныг чоруу дээш, истедип-сүрдүргеннер амыр-чыргалдыг... [...] Ол дээш өөрүп-байырлаңар! Чүге дээрге аажок улуг шаңнал силерни дээрге манаар» (Мф. 5:10—12).

3. Ажыл-чорудулга 4:19, 20-ден алырга, элчиннер истеп сүрүүшкүннерни канчаар хүлээп алган база чүге?

³ Амгы үеде акы-угбаларывыстың истеп сүрүүшкүннерге таваржып чорууру бисти кайгатпас ужурлуг. Бирги векте  элчиннер база Христостуң дугайында суртаалдап турганы дээш, шак-ла ындыг хамаарылганы көрүп чораан. Дээди иудей Чөвүлел чаңгыс эвес удаа оларны «Иисустуң ады-биле өөретпезин» дужаап турган (Аж.-ч. 4:18; 5:27, 28, 40). Элчиннер аңаа кандыг хамаарылгалыг болган? (Номчуптуңар: Ажыл-чорудулга 4:19, 20.) Христостуң дугайында «суртаалдаарын... база херечилээрин» кымдан-даа артык эрге-күштүг Бурган дужааган деп, олар билип турганнар (Аж.-ч. 10:42). Ынчангаш Пётр биле Иоанн шупту элчиннерниң мурнундан ол шииткекчилерге эвес, а Бурганга чагыртып, Иисустуң дугайында чугаалаарын соксатпас бис дээннер. Ажыы-биле чугаалаарга, элчиннер олардан мынчаар айтырган: «Таанда-ла, Бургандан артык улуг эргелиг бис деп бодап тур силер бе?»

4. Шупту алыс шын христианнарга элчиннер кандыг кайгамчык үлегерни арттырган? Оларны канчаар өттүнүп болур бис? (Ажыл-чорудулга 5:27—29).

⁴ Элчиннер шупту алыс шын христианнарга кайгамчык үлегерни арттырган. Эрге-чагырга ээлээннерге олар мынча дээн: «Кижилерге эвес, а Бурганга колдадыр чагыртыр ужурлуг бис». (Номчуптуңар: Ажыл-чорудулга 5:27—29.) Түңнелинде оларны эттеп каапкан. Ынчалза-даа элчиннер «Иисус дээш дорамчылал алырынга төлептиг болганынга өөрүп, дээди иудей Чөвүлелден чоруй» баргаш, суртаалдаарын уламчылаан (Аж.-ч. 5:40—42).

5. Кандыг айтырыгларга харыылаар ужурлуг бис?

⁵ Элчиннерниң алдынганынга хамаарыштыр кезек айтырыглар тургустунуп кээр. Чижээ, оларның «кижилерге эвес, а Бурганга колдадыр чагыртыр» дээн шиитпири «кижи бүрүзү үстүнден башкарган эрге-чагыргага чагыртып чорзун» деп библейжи айтыышкынга дүгжүп турар бе? (Рим. 13:1). Бис канчап «чагырыкчыларга болгаш эрге-чагырга ээлээннерге» чагыртпышаан, Дээди Өрүкү Чагырыкчывыска бердинген артып болур бис? (Тит. 3:1).

6. а) Римчилерге 13:1-де «үстүнден башкарган эрге-чагырга» кымнарны илередип турар база бис оларга кандыг хамаарылгалыг болур ужурлуг бис? б) Черде шупту чагырыкчыларның ниити чүзү бар?

⁶ Номчуптуңар: Римчилерге 13:1. Бо  шүлүкте «үстүнден башкарган эрге-чагырга» дээрге черде чагырыкчылар-дыр. Христианнар оларга чагыртыр ужурлуг. Чүге дизе чазактар корум-чурумну тудуп, улустуң хоойлу-дүрүмнерни сагып турарын хайгаарап, чамдыкта Иегованың бараалгакчыларын безин камгалап турар (Ажыд. 12:16). Оларга үндүрүгнү, албан-үндүттү, хүндүткелди, алдар-хүндүнү бээрин биске бижээни кайгамчык эвес (Рим. 13:7). Ынчалза-даа чазактар Иегованың чөпшээрели-биле эрге-чагырганы ээлеп турар. Иисус Понтий Пилат чагырыкчының мурнунга байысаадып тургаш, ол дүрүмнү тода тайылбырлаан. Кажан Пилат Иисусту хостаары азы шиидери ооң эргезинде дээрге, ол мынча дээн: «Өрүтен силерге бербээн болза, силерге Мээң бажым билир кандыг-даа эрге турбас ийик» (Ин. 19:11). Амгы шагның черде чагырыкчыларның эргелери, Пилаттың ышкаш, кызыгаарлыг.

7. Кандыг байдалдарда черде чазактарга чагыртпас бис база олар чүнү утпас ужурлуг?

⁷ Чурттуң хоойлулары Бурганның хоойлуларынга удур эвес болза, христианнар черде чагырыкчыларга чагыртып турар. А кажан кижилер Бурганның хоруп каан чүүлдерин кылырын бистен негээрге азы Бурганның бистен негеп турар чүүлдерин хоруурга, оларга чагыртпас бис. Чижээ, чазактар аныяк эр улусту шеригже b кыйгырып азы Библияның «Чаа делегей» очулгазын база аңаа үндезилеттинген дептерлеривисти хоруп, суртаалдаарын, кады чыглып ужуражырын чөпшээревеске, оларның аайы-биле кылбас бис. Бир эвес чагырыкчылар эргезин эрттир ажыглап, Христостуң өөреникчилерин истеп сүрер болза, олар Бурганның мурнунга харыы тудар. Иегова шупту чүвени көрүп турар! (Эккл. 5:7).

8. Иегованың эрге-чагыргазы «үстүнден башкарган эрге-чагыргалардан» чүзү-биле ылгалып турар?

⁸ Римчилерге 13:1-де «үстүнден» деп сөс «эң бедик» азы «дээди» деп утканы дамчытпайн турар. Кижи чагырыкчыларын Библияда «үстүнден башкарган эрге-чагырга» дээн-даа болза, бүрүн эрге-чагырганы Кым ээлеп турарын база бижээн. Ыдыктыг Бижилгеде Иегованы хөй катап «Дээди Өрүкү Бурган» деп адаан (Дан. 7:18, 22, 25, 27).

9. Даниил медээчи көстүүшкүннерден чүнү көрген?

⁹ Иегованың эрге-чагыргазы кандыг-даа чагыргалардан ушчок бедик деп, Даниил медээчи көрген. Эгезинде «далайдан аңгы-аңгы дендии улуг дөрт араатан аң» үнүп келген. Ол дээрге эрткен болгаш амгы үениң делегей чергелиг күрүнелери-дир: Вавилон, Мидо-Персия, Греция, Рим биле Англи-Американ күрүне (Дан. 7:1—3, 17). Оон медээчи Бодунуң дүжүлгезинде олурар Иегованы көрген (Дан. 7:9, 10). А ооң соонда Даниилдиң көрген көстүүшкүнү амгы шагның чагырыкчыларынга оваарындырыг болур ужурлуг.

10. Иегова черни чагырар эргени кымнарга бээр база ол чүүл Ооң дугайында чүнү чугаалап турар? (Даниил 7:13, 14, 27).

¹⁰ Номчуптуңар: Даниил 7:13, 14, 27. Бурган черде чагырыкчылардан эрге-чагырганы хавыргаш, ону «кижи амытан оглу ышкаш», Иисус Христоска болгаш 144 000 «Дээди Өрүкү Бурганның ыдыктыг чонунга» бээр. Ол төлептиг болгаш күчү-күштүг чагырыкчылар «кезээ мөңгеде» черни чагырар (Дан. 7:18). Чугаажок, Иегова — Дээди Өрүкү Бурган, чүге дээрге мындыг өскерлиишкиннерни чүгле Ол кылып шыдаар.

11. Даниилдиң сөстери-биле алырга, Иегова чоннарның чагырыкчылары-биле чүнү кылып болур?

¹¹ Даниилдиң көстүүшкүнге көрген чүүлү  ооң мурнунда чугаалаан сөстерин бадыткап турар: «Дээрде саадаан Бурган... […] хааннарны дүжүрүп, оларның орнунга чаа хааннарны көдүрүп турар». Оон аңгыда, Даниил: «Кижи күрүнелериниң кырынга Дээди Өрүкү Бурган эрге-чагыргалыг. Хааннаашкынны Ол берип турар» — деп бижээн (Дан. 2:19—21; 4:17). Иегова чагырыкчыларны дүжүр октап, оларның орнунга өскелерни олуртуп турган бе? Ийе, чаңгыс эвес удаа.

12. Иегова хааннарны канчаар дүжүр октап турган? Чижектерни чугаалаңар. (Чурукту көрүңер.)

¹² Иегова «үстүнден башкарган эрге-чагыргалардан» өндүр бедиин хөй катап көргүскен. Үш чижекти көрүптээлиңер. Египеттиң хааны Иегованың бараалгакчыларын кулдар кылып алгаш, оларны салбайн турган. Ынчалза-даа Иегова чонун хостааш, фараонну Кызыл далайга дүжүрүп өлүрген (Хост. 14:26—28; Ыд. ыр. 135:15). Вавилоннуң хааны Валтасар улуг дой эрттирип тургаш, «дээрниң Дээргизинден» өрү көрдүнүп турган. Ооң кадында ол боду болгаш аалчылары Иегованы эвес, а «мөңгүн, алдын... бурганнарын мактап» олурганнар (Дан. 5:22, 23). Ынчалзажок Бурган ол улуургакты томаарткан. «Ол-ла дүне халдей хаан Валтасар өлүртүп каан», а ооң чагыргазын «мидийлер биле перстерге берипкен» (Дан. 5:28, 30, 31). Палестинаның хааны Ирод Агриппа I Иаков элчинни өлүрүп шаажылааш, Пётр элчинни база өлүрер дээш, кара-бажыңнап алган. Ынчалза-даа Иегова ооң каржы үзел-бодалының боттанырын болдурбаан. «Дээрги-Чаяакчының төлээзи ол дораан ону чылча берипкен», ынчангаш ол өлүп калган (Аж.-ч. 12:1—5, 21—23).

13. Иегова хөй санныг чагырыкчылардан артык күштүүн канчаар көргүскен?

¹³ Оон ыңай Иегова хөй санныг чагырыкчылардан артык күштүүн көргүскен. Ол израильчилер дээш дайылдажып, 31 ханаан хааннарны чылча шапкаш, Аазаттынган черниң хөй кезиин чаалап алырынга дузалаан (Иис. 11:4—6, 20; 12:1, 7—8, 24). Ол ышкаш Иегова Венадад хаанның болгаш өске-даа 32 сирий чагырыкчыларның башкарган аг-шериин чылча шапкан (3 Хаан. 20:1, 26—29).

14, 15. а) Навуходоносор биле Дарий хаан Иегованың чагыргазының дугайында чүү дээнил? б) Ыр күүседикчизи Иегованың дугайында болгаш Ооң чонунуң дугайында чүү дээнил?

¹⁴ Иегова Бодун Дээди Өрүкү деп чаңгыс эвес удаа көргүскен. Бир катап Вавилоннуң  хааны Навуходоносор Иегованы биче сеткилдии-биле алдаржыдарының орнунга, бодунуң күш-шыдалы болгаш өндүр чаагайы дээш мактанган. Ол дээш Бурган ону тенек аарыглыг кылып каан. А кажан Навуходоносорнуң угаан-медерели катап эглип кээрге, ол «Дээди Өрүкүнү алдаржыдып», «Ооң эрге-чагыргазы — мөңге чагырга-дыр» деп хүлээп көрген. Оон ыңай ол: «Ооң холун кым-даа доктаатпас» — деп немээн (Дан. 4:30, 33—35). Даниил кадыг-дошкун шенелдени ажып эртип, Иегова ону арзылаңнардан камгалаан соонда, Дарий хаан Иегованың дугайында мынча дээн: «Шупту улус Даниилдиң Бурганын хүндүлеп, Оон кортсун! Чүге дээрге Ол — дириг, мөңге амыдыраан Бурган-дыр. Ооң хааннаашкыны кажан-даа узуткаттырбас, Ооң чагыргазы төнчү чок» (Дан. 6:7—10, 19—22, 26, 27).

¹⁵ Ыр күүседикчизи мынча дээн: «Дээрги-Чаяакчы аймактарның бодал-сагыжын күш чок болдуруп, чоннарның бодалдарын буурадып турар. Дээрги-Чаяакчы оларның Бурганы болган чон, Ооң өнчү кылдыр шилип алганы аймак амыр-чыргалдыг» (Ыд. ыр. 32:10, 12). Иегованың мурнунга кем-буруу чок артар чылдагааннарывыс хөй!

16. «Коргунчуг хилинчек» дугайында бодап келгеш, чүү чүвеге ыяк бүзүрээр бис база чүге? (Чурукту көрүңер.)

¹⁶ Иегованың эрткен үеде чүнү кылып турганын номчудувус. А чоокку келир үеде Ол чүнү кылыр? Иегова Бодунуң бердинген бараалгакчыларын чоокшулап кел чыдар «коргунчуг хилинчек» үезинде камгалаар дээрзинге бичии-даа чигзинмес бис (Мф. 24:21; Дан. 12:1). Кажан чоннар каттыжыышкыны, азы Магогтан Гог, бүдүн делегейде Иеговага шынчы улусче каржы-хажагайы-биле халдап кээрге, Бурган чонун камгалаар. Ол чоннар каттыжыышкынынче, Каттышкан Нациялар Организациязының кежигүннери болур, 193 күрүне кирер-даа болза, олар Дээди Өрүкү Бурганга болгаш Ооң дээрде аг-шериинге канчап-даа деңнешпес! «Мен шак ынчаар Бодумнуң өндүр бедиимни,  ыдыктыымны көргүзер мен, хөй чоннарга ажыттынар мен. Олар ынчан Мени Дээрги-Чаяакчы деп билип аар» — деп, Иегова аазаан (Иез. 38:14—16, 23; Ыд. ыр. 45:11).

17. Библиядан алырга, черниң хааннарын чүү манап турар? А кем-буруу чок улусту?

¹⁷ Гог халдаашкынын эгелей бээрге, Иегова доп-дораан Армагеддон дайынын эгелээр. Аңаа Ол «чер-делегейниң хамык хааннарын» узуткаар (Ажыд. 16:14, 16; 19:19—21). Бурганның дайзыннары ис чок чиде бээрге, «эки мөзүлүг улус чер-чуртка чурттаар, кем-буруу чок улус аңаа артып каар» (У. ч. 2:21).

18. Хөй алыс шын христианнар чүнү кылырынга белен база чүге? (Даниил 3:28).

¹⁸ Чүс-чүс чылдар дургузунда хөй алыс шын христианнар Дээди Өрүкү Чагырыкчызынга, Иеговага, бердинген артар дээш, хосталгазын чидирип, безин амы-тынындан чарлырынга белен турган. Ол кем-буруу чок улус Бурганга шынчы артар быжыг хөөннүг турган. Олар үш еврей оолду, Седрах, Мисах болгаш Авденагону, биске сагындырар. Иеговага бердинген боорга, ол оолдарны чалбырааштыг изиг отче киир октапкан. Ынчалза-даа Дээди Өрүкү Бурган оларга камгалалды хайырлаан. (Номчуптуңар: Даниил 3:28.)

19. Иегова чүү чүвеге үндезилеп улусту шиидер база бис чүнү кылыр ужурлуг бис?

¹⁹ Бурганның мурнунга кем-буруу чок артарының кайы хире чугулазын Давид хаан бижээн: «Дээрги-Чаяакчы аймактарны шиидип турар. Меңээ шын шииткелден үндүрүп көр, чөптүүмнү, кем-буруу чогумну көрүп көр, Дээрги-Чаяакчы» (Ыд. ыр. 7:9). Өске бир ырызында ол: «Эки мөзүм биле чөптүүм мени кадагалазын» — деп дилээн (Ыд. ыр. 24:21). Чүү-даа болуп турда, Иеговадан хая көрүнмейн, Аңаа бердинген болурундан артык чугула чүве чок! Бир эвес ынчаар кылып чоруур болзувусса, «бодунуң эртер оруктарынга кем-буруу үүлгетпес, Дээрги-Чаяакчының хоойлузун сагып чоруур улус амыр-чыргалдыг!» дээн ыр күүседикчизиниң минниишкиннерин үлежир бис (Ыд. ыр. 118:1).