1. Мерген угаанга улустуң хамаарылгазы кандыгыл? (Чугаалар 1:20, 21).

 ХӨЙ чурттарда улус хайнып турар черлерде өөрүшкүлүг суртаалчыларның кижилерге журналдарны берип турарын бо-ла көрүп болур. Суртаалдың ол хевиринге киришкен силер бе? Ийе болза, ол чүүл Чугаалар номунда бижээн мерген угаанны сагындырып кээр эвес-тир бе? Ол улус чыглыр хөлзээзинниг черлерде ооң сүмелерин улус дыңнаар кылдыр, кыйгырып турар. (Номчуптуңар: Чугаалар 1:20, 21.) Библияда болгаш бистиң дептерлерде Иегованың «мерген угаанын» бижээн. Ол дээрге кижилерге чуртталгада шын орукту тып алырынга херек мерген угаан-дыр. Улус бисти дыңнап, кандыг-бир дептерлерни номчуур кылдыр ап аарга, дыка өөрүүр бис. Ынчалза-даа чамдык улус Библияны шуут сонуургавас, а өскелери бисти кыжырып-шоодар. Олар Библияны эргижирээн деп санаар. А үшкүлери библейжи бедик мөзү-шынар негелделеринге таарзынмас. Библейжи дүрүмнер ёзугаар чурттап турар улусту олар эмин эрттир шыңгыы негелделиг дижир. Ынчалза-даа Иегова шупту улуска мерген угаанын ынакшылдыы-биле берип турар. Канчаар?

2. Ёзулуг мерген угаанны кайыын тып ап болур? Улустуң хөй кезии чүү чүвеге идегеп турар?

² Иегова Ооң Сөзү, Библияны, барык шупту кижилер номчуп болур кылдыр сагыш човаан. Библияны тайылбырлап турар дептерлеривис Иегованың деткимчезиниң ачызында 1 000 ажыг дылдарда очулдуртунуп турар. Иеговадан мерген угаанның кыйгызын дыңнап турар, өскээр чугаалаарга, Библияны номчуп, Ооң дүрүмнерин сагып турар кижилер аас-кежиктиг апаар. Ынчалза-даа чамдык улус Иегованы  дыңнаксавас. Олар шиитпир хүлээрде, боттарынга азы өске улуска идегээр. Безин бис Библияның дүрүмнерин сагып чурттаар боорувуска, олар бисти чуртталгадан чыдып калган улус деп көөр. Бо статьяга ол улустуң чүге ынчаар алдынып турарын көөр бис. Эгезинде Иеговадан мерген угаанга канчаар өөренип болурувусту көрүптээлиңер.

3. Ёзулуг мерген угаанныг болур дизе, чүнү канчаарыл?

³ Мерген угаан дээрге шын шиитпирлерни хүлээр дээш, билиглерни ажыглаары-дыр. Ынчалза-даа ёзулуг мерген угаанның утказы оон-даа ханы. Библияда: «Дээрги-Чаяакчыдан коргары — мерген угаанның үнер дөзү ол-дур, ыдыктыг Бурганны билип аары — сарыыл ол-дур!» — дээн (У. ч. 9:10). Ынчап кээрге, чугула шиитпирлер хүлээп тургаш, Иегованың үзел-бодалын кичээнгейге алыр херек. Ону, Библияны болгаш аңаа үндезилээн дептерлерни өөренип тургаш, билип ап болур. Шак ынчаар кылыр болзувусса, ёзулуг мерген угаанныг боор бис (У. ч. 2:5—7).

4. Ёзулуг мерген угаанны чүге чүгле Иегова берип шыдаарыл?

⁴ Ёзулуг мерген угаанны чүгле Иегова берип шыдаар (Рим. 16:27). Чүге Иегованы мерген угаанның Үндезини деп болур? Бирээде, Ол Чаяакчы болгаш, шупту чаяалгаларын кымдан-даа артык эки билир (Ыд. ыр. 103:24). Ийиде, ол шупту чүвени мерген угаанныг кылып турар (Рим. 11:33). Үште, Иегованың мерген угаанныг сүмелери ону ажыглап турар улуска кезээде ажыктыг (У. ч. 2:10—12). Ынчап кээрге, ёзулуг мерген угаанныг болур дизе, ол үш кол алыс шынны хүлээп аар ужурлуг бис. Оон ыңай кандыг-бир байдалда канчаар алдынарын шиитпирлеп тургаш, оларның дугайында сактыры чугула.

5. Улус Иегованы мерген угаанның Үндезини деп хүлээп албаска, түңнели кандыг бооп турар?

⁵ Хөй улус чаяалгаларны магадап ханмас, ындыг-даа бол, Чаяакчы бар деп бүзүревес. А өскелери Бурганга бүзүрээр-даа болза, библейжи негелделерни эргижирээн база кижи бодунуң угааны-биле чурттаар болза эки дижир. Ооң түңнели кандыг болган? Кижилер Бурганның мерген угаанын херекке албайн, бодунга ынанырга, делегей экижээн бе? Олар аас-кежиктиг апарган бе база оларның келир үеже быжыг идегели бар бе? Долгандыр көрүп турар чүүлүвүс: «Кижиниң мерген угааны-даа, угаан-сарыылы-даа, арга-сүмези-даа Дээрги-Чаяакчының мурнунга хоозун чүүлдер-дир» дээн сөстерниң шынныын бадыткап турар (У. ч. 21:30). Ынчангаш Иеговадан мерген угаанны дилээри эргежок чугула! Хомуданчыг чүүл, кижилер ынчаар кылбайн турар. Чүге?

6. Кандыг улус мерген угаанны хүлээвезил? (Чугаалар 1:22—25).

⁶ «Кудумчуда кый деп турар мерген угаанны» дыка хөй улус дыңнаксавас. Бижилгеде ындыг улусту үш бөлүкке чарган: «кенен улус», «кочуургактар» болгаш «мелегейлер». (Номчуптуңар: Чугаалар 1:22—25.) Олар Бурганның мерген угаанын чүге хүлээвезил база оларга дөмей апарбас дээш, чүнү канчап болурувусту көрүптээлиңер.

7. Чамдык улус «кенен» чоруун чүге кагбазыл?

⁷ «Кенен улусту» мегелээри азы бир-ле чүүлге бүзүредири дыка белен (У. ч. 14:15). Суртаал үезинде ындыг улуска бо-ла таваржыр бис. Миллион-миллион улус шажын болгаш политика баштыңчыларынга мегеледип чоруур. Олар мегеледип турганын  билип кааш, кайгай бээрлер. Ынчалза-даа Чугаалар 1:22-де улус кенен, азы бүзүрээчел, болурун боттары шиитпирлеп алган (Иер. 5:31). Ындыг улус боттарының күзелдерин хандырарынга ынак. Олар Библия чүү чүвеге өөредип турарын биликсевес, ооң дүрүмнериниң аайы-биле чурттаксавас. Олар кулактарын бөөшкүннеп, карактарын хаптап алган ышкаш. Хөй улус Квебектен Бурганга бүзүреп чоруур мен дээр херээжен кижи-биле дөмей боданыр. Ол бистиң акывыска мынча дээн: «Священник кижи мени мегелеп турар болза, ол мээң эвес, а ооң буруузу-дур». Бистер шак ындыг улус дег, кенен болбаалыңар! (У. ч. 1:32; 27:12).

8. Чедишкен улуг кижи апаарынга биске чүү дузалаар?

⁸ Библия бисти кенен болбаңар деп өөредип турар. Ында: «Угааныңар аайы-биле чедишкен улуг улус дег болуңар» — деп бижээн (1 Кор. 14:20). Библейжи дүрүмнерни ажыглаар болзувусса, чедишкен улуг улус апаар бис. Бергелерге таварышпазынга база мерген угаанныг шиитпирлер хүлээринге библейжи дүрүмнерниң ажыктыын чаңгыс эвес удаа көрген бис. Ынчангаш, үе-үе болгаш-ла, ол дүрүмнерни кайы хире эки ажыглап турарывысты хынаалыңар. Бир эвес Библияны өөренип, чыыштарже барып турар болзуңарза, бодуңардан: «Иеговага чуртталгамны бараалгадып, сугга суктуруп алырынга меңээ чүү шаптыктап турар?» деп айтырыңар. А бир эвес сугга суктуруп алган болзувусса кандыг? Өөрүшкүлүг медээниң суртаалчызы база эки башкы кылдыр мергежип турар мен бе? Библейжи дүрүмнерге чагыртып турарым шиитпирлеримден көскү бе? Иисус ышкаш, өскелерге эки хамаарылгалыг мен бе? Бир эвес четпестер барын көрүп кагзывысса, «кенен улусту угаан киирер» Иегованың чагыгларының дугайында ханы боданыылыңар (Ыд. ыр. 18:8).

9. «Кочуургактар» мерген угаанны херекке албайн турарын канчаар көргүзүп турар?

⁹ Бурганның мерген угаанындан ойталап турар улустуң ийи дугаар бөлүүнче «кочуургактар» кирип турар. Чамдыкта суртаалга ындыг улуска таваржы бээр бис. Олар өскелерни куду көөрүнге ынак (Ыд. ыр. 122:4). Библияда сөөлгү хүннерде ындыг улус хөй боор дээн (2 Пет. 3:3, 4). Шынчы Лоттуң күдээлери дег, бөгүн база чамдык улус Бурганның сагындырыгларынче кичээнгей салбас (Э. д. 19:14). Хөй улус библейжи дүрүмнер-биле чурттап чоруур кижилерни кыжырып турар. Ындыг кочуургактар «боттарының күзээшкиннериниң аайындан эртпес» (Иуда 7, 17, 18). Библияда бижээн кочуургактар дээрге ойталакчылар болгаш Бурганның дугайында биликсевес улус-тур.

10. Кочуургак болбас дизе, чүнү канчаарыл? (Ырлар 1:1).

¹⁰ Кочуургак болбас дизе, чүнү канчаарыл? Шүгүмчүлээринче сундулуг улус-биле аралашпас херек. (Номчуптуңар: Ырлар 1:1.) Ол дээрге ойталакчыларны дыңнавайн, оларның бижээн чүүлдерин номчувазы-дыр. Бир эвес оваарымчалыг болбас болзувусса, чарбыттынып, Иеговага болгаш Ооң организациязының берип турар айтыышкыннарынга чигзинип эгелээр бис деп билип турар бис. Ону болдурбас дизе, дараазында айтырыгларның дугайында боданыр херек: «Чаа айтыышкын азы тайылбыр алгаш, хорадаарынче сундулуг мен бе? Удуртулга ап турар акыларны чемелээр чаңым бар бе?» Ындыг чаңнардан адырлып алыр дээш кызар болзувусса, Иегованың сеткилинге кирер бис (У. ч. 3:34, 35).

11. «Мелегей улус» Бурганның мөзү-шынар негелделеринге кандыг хамаарылгалыг?

¹¹ Мерген угаандан ойталап турар улустуң үш дугаар бөлүү — «мелегейлер-дир». Бурганның мөзү-шынар дүрүмнеринге чагыртпас  боорга, Библияда оларны ынчаар адаан. Олар чүнү күзээрил, ону кылып чоруур (У. ч. 12:15). Олар мерген угаанның Үндезини боор Иеговадан ойталап чоруур (Ыд. ыр. 52:2). Суртаал үезинде ындыг улус бисти Библияның мөзү-шынар негелделери-биле чурттап турар боорувуска, каржы шүгүмчүлеп турар. Ынчалза-даа олар эки чүнү-даа сүмелеп шыдавас. Библияда ындыг улустуң дугайында: «Мелегей кижиге мерген угаан чедип алдынмас бедикте турар, ол кижи чугула херектер шиитпирлээр черге аксын ажар-даа харыы чок болур» дээн (У. ч. 24:7). Ындыг кижи ёзулуг мерген угаанныг сүмени берип шыдавас. Ынчангаш Иегованың бисти «мелегей кижиден ырадыр тур» дээни чөп (У. ч. 14:7).

12. Мелегейлерниң оруун эдербезинге биске чүү дузалаар?

¹² Бурганны дыңнаксавас улуска бодаарга, бис Ооң сүмелеринге, ооң санында бедик мөзү-шынарга хамаарышкан сүмелеринге, ынакшылды сайзырадып турар бис. Бурганга дыңнангыр азы дыңнангыр эвес чоруктуң кандыг түңнелдерге чедирип болурун боданыр болзувусса, ол ынакшылывыс оон-даа күштүг апаар. Иегованың мерген угаанныг чагыгларын херекке албас улус кандыг бергелерге таварышпас дээрил! А силер Бурганга дыңнангыр бооруңарга, чуртталгаңар кайы хире эки-дир? (Ыд. ыр. 31:8, 10).

13. Иегова Бодунуң мерген угаанныг сүмелерин дыңнаарынче бисти албадап турар бе?

¹³ Иегова Бодунуң мерген угаанын шупту улуска элбээ-биле берип турар-даа болза, ону кымга-даа сыгавайн турар. Ындыг-даа бол, мерген угаанның кыйгызын дыңнавайн турар улус-биле чүү болурун Ол тайылбырлап берген (У. ч. 1:29—32). Иеговага чагыртыр күзели чок улус дөмей-ле эки чүве көрбес. Оларның «херектериниң үре-түңнели» аарышкыга, хилинчек-човалаңга, а соонда өлүмге чедирер. А Иегованың чагыгларын хүлээп ап турар улуска бо аазаашкын күүсеттинер: «А мени тооп дыңнап турар кижи кандыг-даа бузуттан кортпайн, айыылга таварышпайн, амыр-шөлээн амыдыраар» (У. ч. 1:33).

14, 15. Чугаалар 4:23-тен чүнү өөренип ап болур бис?

¹⁴ Иегованың мерген угааны биске кезээде ажыктыг. Бурган Ооң чагыгларын тып алыры белен боор кылдыр сагыш човаан деп көрдүвүс. Чижээ, Чугаалар номунда чуртталганы экижидип болур, кажан-даа эргижиревес хөй сүмелер бар. Оларның дөртүн сайгарыптаалыңар.

¹⁵ Чүрээңерни камнап-кадагалаңар. Библияда: «Чүрээңни чүден артык камнап-кадагала, чүге дээрге ол — амыдыралдың үнер дөзү-дүр» — дээн (У. ч. 4:23). Кижиниң чүрээ кадык болзун дизе, чүү херегил? Багай чаңчылдардан ойталап, сула шимчээшкиннер кылып, ажыктыг чемнер чиир болза эки.  Бистиң доора уткалыг чүрээвиске хамаарыштыр база ынча деп болур. Бис Бурганның Сөзүн номчуп тургаш, хүннүң-не «чемненип» турар бис. Ол ышкаш чыыштарга белеткенип, оларже барып, аңаа киржип турар бис. Оон ыңай күжүвүс харамнанмайн, доктаамал суртаалдаар бис. База угаан-бодалывысты бокталдырып турар багай чаңчылдардан, ооң санында мөзү-шынары куду оюн-тоглаадан база багай эш-өөрден ойталап турар бис.

16. Чугаалар 23:4, 5-тен сүме чүзү-биле ажыктыг?

¹⁶ Бар чүүлүңерге сеткилиңер ханып чорзун. Библияда дыка эки сүме бар: «Байлакшылды хөлүн эрттир сүрбе... байлакшылче чүгле көрүп четтигип чыдырыңда, ол арлы бээр: эзир куштуң чалгыннарын чыпшырып алгаш, дээрже ужа берген болур» (У. ч. 23:4, 5). Акша-хөреңгини чидирип алыры белен. Ындыг турбуже, бай-даа, ядыы-даа улус акшаны сүрүп-ле чоруур. Ындыг хандыкшыл ат-алдарны, кадыкшылды, өске улус-биле хамаарылганы үрээр (У. ч. 28:20; 1 Тим. 6:9, 10). А мерген угаанның ачызында бис акша дээш хөлүн эрттир сагыш човавас бис. Ол бисти чазый чоруктан камгалап, бар чүүлүвүске өөрүүрүнге дузалаар (Эккл. 7:12).

17. Чугаалар 12:18-те бижээни дег, мерген угаанныг аас-сөстүг болур дизе, чүнү канчаарыл?

¹⁷ Чугааланырының бетинде боданып алыңар. Оваарымчалыг болбас болзувусса, бистиң сөстеривис улуска улуг хора чедирип болур. Библияда: «Хоозун чугаа хылыш ышкаш балыглап боор, а мерген угаанныг улустуң аас-сөзү — экиртир шынарлыг» — дээн (У. ч. 12:18). Бир эвес хоп-чип дажыыр болзувусса, улус-биле хамаарылгавыс баксырап каар (У. ч. 20:19). Аксы-сөзүвүс улусту балыглавайн, экиртсин дизе, чүрээвисти Бурганның Сөзүнде билиглер-биле долдурар херек (Лк. 6:45). Библияда бижээн чүүлдерниң дугайында боданыр болзувусса, бистиң сөстеривис «мерген угаанның үнер дөзү» бооп, өскелерни сорук киирер (У. ч. 18:4).

18. Чугаалар 24:6-да дүрүм бараалгалга канчаар дузалап турар?

¹⁸ Организацияның айтыышкыннарын эдериңер. Библияда мынча дээн: «Дайын чоруда  бергеш, арга-сүмени дыңнап аар сен: чөвүлекчилериң хөй болза, тиилелге сээңии боор» (У. ч. 24:6). Ол дүрүм суртаалга база өөреникчилер белеткээр ажылга канчаар дузалап болур? Суртаалдап азы библейжи кичээл эрттирип тургаш, бис бодунуу-биле эвес, а организацияның сүмелерин ажыглаарын кызып турар бис. Мерген угаанныг айтыышкыннарны христиан ужуражылгалардан ап болур бис. Ында ёзулуг мергежилдиг улус илеткел чугаалап, даалгаларны күүседип турар. Оон аңгыда, организация ажыктыг херекселдерни берип турар. Ынаар Библияны эки билип алырынга дузалаар дептерлер болгаш видеороликтер кирип турар. Силер ол херекселдерни мергежилдиг ажыглаар дээш, кызып турар силер бе?

19. Иегованың берип турар мерген угаанынга хамаарылгаңар кандыг? (Чугаалар 3:13—18).

¹⁹ Номчуптуңар: Чугаалар 3:13—18. Иеговага, Ооң Сөзүнде мерген угаанныг сүмелер дээш, өөрүп четтирер-дир бис! Олар чок турган болза, та канчаар ийик бис? Бо статьяга бис Чугаалар номундан каш үнелиг дүрүмнерни көрдүвүс. Чугаажок, бүдүн Библия Иегованың мерген угаанныг сөстери-биле долган. Ынчангаш Ооң чагыгларын кезээде эдерээлиңер. Бо делегейде кижилерниң ол чагыгларга хамаарылгазы биске хамаан чок, чүге дизе «[мерген угаан-биле] чарылбас улус амыр-чыргалдыг» деп ыяк билир бис.