1, 2. Библияны номчуурда, шинчилээрде кандыг аргалар эки? Чижекти чугаалаңар.

 БАЖЫҢ садып алырда кайы талаларынче көөр силер? Шиитпир үндүрерде чүнү кичээнгейге алыр силер? Даштындан чуруун бе? Чок, бодуңар баргаш, иштин-даштын долгандыр шуптузун көргеш, ол бажыңның тудуунуң шыйыгларын безин шинчилээр чадавас силер.

² Библияны база шак ынчаар номчуп, өөренип болур бис. Бир библеист ол номну «таваа ханы, бедик суургаларлыг, дыка улуг бажың-биле» деңнээн. Ынчаарга Библияда бижээн бүгү чүүл-биле таныжып алыры болдунар бе? Анаа дүрген номчуп кааптар болзуңарза, Бурганның Сөзүнүң чүгле «эге билиглерин» билип аар силер (Евр. 5:12). Ынчангаш бажың садарда ышкаш, «иштинче» киргеш, аңгы-аңгы талаларын шинчилээр болза эки. Библияны шинчилээр эки арга дээрге ооң аңгы-аңгы кезектериниң канчаар харылзажып турарын өөренип көөрү. Чүү чүвеге бүзүрээринден аңгыда, аңаа бүзүрээр кандыг чылдагааннар барын билип аарын кызыдыңар.

3. Павел элчин акы-угбаларны чүже кыйгырган база чүге? (Эфесчилерге 3:14—19).

³ Библияны эки билип алыр дизе, ону ханы шинчилээр болзувусса эки. Павел элчин акы-угбаларны Бурганның Сөзүнүң «кайы хире өй-хемчээл, кызыгаар чогун угааптар» кылдыр шинчилээринче кыйгырган. Ынчан оларның бүзүрели ханы дазылданыр, таваа быжыг болур. (Номчуптуңар: Эфесчилерге 3:14—19.) Биске база шак ынчаар кылыры чугула. Бурганның Сөзүн ханы шинчилээринге база  ооң утказын эки билип алырынга чүү дузалаарын көрүптээлиңер.

4. Библияны өөренип-шинчилээри Иеговага чоокшулаарынга канчаар дузалаар? Чижектерден чугаалаңар.

⁴ Библияның чүгле кол билиглери биске чедишпес. «Бурганның бодалдарының ханы дүвүн» чедип аар күзелдиг бис. Аңаа ыдыктыг сүлде биске дузалаар (1 Кор. 2:9, 10). Сонуурганчыг айтырыгны азы теманы шилип алгаш, ону ханы шинчилеп болур силер. Ынчаар өөренири силерни Иеговага чоокшуладыр. Чижээ, бурунгу үеде Бурган бараалгакчыларынга ынакшылын канчаар көргүскенин база ол төөгүлер Иегова силерге ынак деп канчаар бадыткап турарын шинчилеңер. Азы бурунгу үеде израильчилер биле амгы үеде христианнарның чүдүлгези чүзү-биле дөмейин деңнеңер. Оон аңгыда, Иисустуң чуртталгазынга болгаш бараалгалынга кандыг медеглелдер күүсеттингенин шинчилеп болур.

5. Хууда шинчилел үезинде эки сайгарып алыксаар айтырыгларыңар бар бе?

⁵ Библияның дуржулгалыг шинчилекчилери кандыг темаларны ханы сайгарыксаарын үлешкен. Ол темалар  «Хууда шинчилээр солун бодалдар» деп көзенекте бердинген. «Индекс публикаций Сторожевой башни» азы «Путеводитель по публикациям Свидетелей Иеговы» деп справочниктер дузазы-биле шинчилээри дыка солун. Библияны шупту талазындан өөренири, «Бурган дугайында билигни» тып алгаш, бүзүрелиңерни быжыглаарынга дузалаар (У. ч. 2:4, 5). Тодаргай сайгарып болур, каш ханы библейжи алыс шын билигже кичээнгейни салып көрээлиңер.

6. а) Күзел-бодал биле планның ылгалы кандыг? б) Иегованың черге болгаш кижилерге хамаарыштыр күзел-бодалын чүге мөңгеде деп болур?

⁶ Бурганның күзел-бодалын Библиядан көрээлиңер. Күзел-бодал биле план улуг ылгалдыг. Планны чедер дээн черге чедирер баш удур бодап каан орукка дөмейлеп болур. Шаптараазыннар тыптып келзе, план болдунмайн баар. А күзел-бодал  чедер дээн черге дөмей. Баар черивисти билир бис, ынчалза-даа аңаа канчалдыр чедип алырывыс чугула эвес. Болдунмас апарза, өске орук-биле чоруптар бис. Бурган черге болгаш кижилерге хамаарыштыр күзел-бодалын Библия таварыштыр чоорту ажыткан. Иегованың «үе-дүпте... чажыдын» билиривис дээш өөрүп четтирер бис (Эф. 3:11). Кандыг-даа шаптараазыннар таварышса Иегова чедиишкинниг болур, чүге дизе ол «шупту чүвени бодунуң күзел-соруунга дүүштүр кылып турар» (У. ч. 16:4, Чаа делегей). Ооң бодап алган күзелинге кым-даа, кажан-даа шаптыктап шыдавас. Ынчаарга Иегованың күзел-бодалы кандыг база ону күүседир дээш ол чүнү өскертир ужурга таварышканыл?

7. Бир дугаар үймээн соонда, Иегова күзел-бодалын күүседир дээш чүнү кылган? (Матфей 25:34).

⁷ Бурган бир дугаар кижилерге хамаарыштыр күзел-бодалын мынчаар ажыткан: «Өзүп-көвүдеңер, черниң кырын ээлеңер... черниң бүгү-ле дириг амытаннарын чагырып тергиидеңер» (Э. д. 1:28). Адам биле Еваның үймээни дээш, кижи төрелгетенниң өг-бүлезинге бачыт кирип келген. Ынчалза-даа Иеговага ол чүүл шаптык болбаан. Чүге дизе ол баштайгы сорулгазын чедип аар дээш, өске арганы ажыглаан. Бурган кижи төрелгетенге болгаш черге хамаарыштыр күзелин боттандырарда, дээрге Чагырганы тургузарын ол-ла дораан шиитпирлээн. (Номчуптуңар: Матфей 25:34.) Иегова шилип алган үезинде дун Оглун черже чорудупкан. Иисус кижилерге ол Чагырганы чугаалап чораан, амы-тынын бисти бачыт биле өлүмден хостаар дээш берген. Ынчалдыр Иегова дыка улуг ынакшылды көргүскен. Ооң соонда Бурган Иисусту дээрде Чагыргазының хааны болзун дээш диргизипкен. Бурганның күзел-бодалының дугайында оон-даа хөйнү билип ап болур.

8. а) Библияның кол темазы кандыг? б) Иегованың күзел-бодалынче оон ыңай чүү кирип турар? (Эфесчилерге 1:8—11). (Журналдың даштында чурукту көрүңер.)

⁸ Иегова бодунуң буянныг адын камгалаар — ол Библияның кол темазы. Бурган күзел-бодалын Иисустуң Чагыргазының дузазы-биле боттандыргаш, адын камгалап алыр. Иегованың күзел-соруун кым-даа өскертип шыдавас. Бурганның шупту аазаашкыннары быжыг (Иса. 46:10, 11; Евр. 6:17, 18). Ынчангаш чер чоорту дываажаң апаар. Аңаа Адам биле Еваның салгалы мөңгеде өөрүп чурттаар (Ыд. ыр. 21:27). Ынчалза-даа Бурганның күзел-бодалы оон-даа улуг. Иегова дээрде-даа, черде-даа бараалгакчыларын шуптузун каттыштырып, демнештирер. Олар шупту Дээди Өрүкү Бурганның эрге-чагыргазын хүлээп, аңаа долузу-биле бердинген болур. (Номчуптуңар: Эфесчилерге 1:8—11.) Иегованың күзел-бодалы канчаар күүсеттинерин көөрү дег кайгамчык чүве чок!

9. Библияның номчулгазы таварыштыр келир үеже кайы хире ырадыр көрүп болур бис?

⁹ Иегованың Эдем садынга ажыткан медеглелин көрээлиңер. Ону Эге дөс 3:15-те b бижээн. Ында Бурган күзел-бодалын канчаар күүседирин тайылбырлаан. Ол болуушкуннар чүгле муң-муң чылдар эрткенде, чоорту күүсеттинип эгелээн. Чижээ, Бурган Авраамга ооң бир салгалы Чагдырган чагырыкчы апаарын аазаан (Э. д. 22:15—18). Ооң соонда б. э. 33 чылда Иисус  таваңгайынче шактырган (Аж.-ч. 3:13—15). А 1 000 чыл эртерге Чагдырган чагырыкчы Эрликтиң бажын буза шааптарга, ол медеглел долузу-биле бүдер (Ажыд. 20:7—10). Эрликтиң делегейи биле Иегованың организациязының аразында демисели дээди чадазынга кээрге, кандыг болуушкуннар болурун Библиядан тодаргай билип ап болур.

10. а) Удавас кандыг болуушкуннар эгелээр? б) Келир болуушкуннарга угаан-бодалывысты, чүрээвисти канчаар белеткеп ап болур бис? (Немелде тайылбырда айыткан номну көрүңер.)

¹⁰ Библияда өттүр сөглээн кайгамчык болуушкуннар дугайында боданып көрүңер. Чоннар баштай: «Амыр-тайбың-дыр» — деп чарлаар (1 Фес. 5:2, 3). Оон меге шажыннарже халдай бээр (Ажыд. 17:16). Ынчалдыр коргунчуг хилинчек эгелээр. Ооң соонда кижилер «күчү-күжү биле өндүр чырыынга бүргеткен, дээрниң булуттарын кырлап кел чыдар Кижи амытан Оглун» көрүп каар. Ол сөстер хуулгаазын болуушкуннарны илереткен чадавас (Мф. 24:30). Ооң соонда Иисус кижи төрелгетенин шиидип эгелээр, хойларны өшкүлерден аңгылаар (Мф. 25:31—33, 46). Ол үеде Эрлик анаа орбас: каржыланып, чоннар каттыжыышкынын (Магог черден Гогту) Иегованың бараалгакчыларынче халдаарынче ыдалаптар (Иез. 38:2, 10, 11). Бир кезек үеде черде арткан чагдырган христианнарны дээрже чыггаш, Иисус дээрде шерии-биле Армагеддонга коргунчуг хилинчектиң түңнел демиселинге киржир (Мф. 24:31; Ажыд. 16:14, 16) c. Ооң соонда Христостуң Муң чыл башкарылгазы эгелээр (Ажыд. 20:6).

11. Мөңге чуртталга биске кандыг аргаларны ажыдып турар? (Чурукту база көрүңер.)

¹¹ 1 000 чыл доозулган ыраккы келир үени сагыштаалап көрээлиңер. Библияда Чаяакчы «кижи амытанга мөңге өй дугайында бодап чоруур чүректи берип каан» дээн (Эккл. 3:11). Ол чүүл силерге кандыг уткалыын база силерниң Иегова-биле хамаарылгаңарга кандыг салдарлыын боданып  көрүңерем. «Приближайся к Иегове» деп номнуң 319 дугаар арнында чараш сөстер бар: «Чүс-чүс, муң-муң, миллион-миллион, безин миллиард-миллиард чылдар чурттааш, Иегова Бурганның дугайында амдан артык оон-даа хөйнү билир апаар бис. Ынчалза-даа кайгамчыктыг сан-түң чок билиг мурнувуста болур. [...] Мөңге чуртталга өөрүшкүлүг болуушкуннар-биле долган онзагай солун болур! А эң-не чугула чүүл, дээрде Адавысты оон-даа эки билип алыр бис!» Амдыызында Бурганның Сөзүн шинчилээш, кандыг ажыдыышкыннар кылып болур бис?

12. Дээрже бакылаптарынга биске чүү дузалаар? Чижекти чугаалаңар.

¹² Бурганның Сөзү «дээрлерниң эң бедиинде» Иегованың чанынга турары кайы хире экизин сагыштаалаарынга дузалап турар (Иса. 33:5). Иегованың болгаш ооң организациязының дээрде кезииниң дугайында Библия кайгамчыктыг тодаргай ажыткан (Иса. 6:1—4; Дан. 7:9, 10; Ажыд. 4:1—6). Иезекиилдиң «дээр ажыттына берген» үеде көрген көстүүшкүнү безин кайы хире онзагай-дыр! (Иез. 1:1).

13. Иисустуң дээрде бараалгалының кайы талазын үнелээр силер? (Еврейлерге 4:14—16).

¹³ Иисустуң дээрде туруш-байдалын бодап көрүңер. Ол дүжүлгезинде олурупкан Хаан, кээргээчел Дээди бараалгакчы. Ооң ачызында «авыралдың үнер дөзү боор Бурганның дүжүлгезинге» чоокшулаар аргалыг бис. Өскээр чугаалаар болза, Бурган биске энерел көргүзүп, «херек өйде» дузалаар деп бүзүрелдиг мөргүп болур бис. (Номчуптуңар: Еврейлерге 4:14—16.) Чаңгыс-даа хүннү эрттирбейн, Иегова биле Иисус дээрден биске чүнү кылганын база чүнү кылып турарын боданыылыңар.  Оларның ынакшылынга харыы кылдыр бүгү-ле сеткил-сагыжывыстан Иеговага бараалгаалыңар (2 Кор. 5:14, 15).

14. Иеговага, Иисуска өөрүп четтиргенивисти канчаар көргүзүп болур бис? (Чурукту база көрүңер.)

¹⁴ Бурганга база ооң Оглунга ынакшылывыстың күштүүн көргүзер эң-не эки арганың бирээзи — кижилерге Иисустуң өөреникчилери апаарынга дузалажыры (Мф. 28:19, 20). Павел база өөрүп четтиргенин шак-ла ынчаар илередип чораан. Иегова «бүгү улустуң камгалалды алырын база алыс шынны билип аарын күзеп турар» деп ол билген (1 Тим. 2:3, 4). Павел бүгү күжүн бараалгадып турган болгаш, «оода-ла чамдык улусту камгалап алыр» дээш, шупту чүүлдү кылган мен дээр эргелиг болган (1 Кор. 9:22, 23).

15. Ырлар 1:2-ден алырга, бистиң аас-кежиивис чүден хамааржыр?

¹⁵ Ыр күүседикчизи «Иегованың хоойлузундан өөрүшкүнү ап, ону дүн-хүн дивейн оожум үн-биле номчуур» кижи аас-кежиктиг, чедиишкинниг деп бижээн (Ыд. ыр. 1:1—3, Чаа делегей). Ол шүлүктү тайылбырлаарда, Библияның очулдурукчузу Джозеф Ротергам аас-кежиктиг кижиниң дугайында мынча дээн: «...ол Бурганның өөредиинге дыка ынак болгаш, ону дилеп, ханы өөренип, ооң дугайында үр үеде боданыр. [...] ...Хүннүң төнчүзүнде библейжи мерген угаанны эки билип турар мен деп шыдавас болза, ол хүннү хилис деп санаар» (Joseph Rotherham. Studies in the Psalms). Библия кайгамчык бай-байлак болгаш тодаргай. Бурганның Сөзүнүң бүгү талаларын, иштики харылзаазын шинчилээри — өөрүшкүлүг ажыл!

16. Дараазында статьяга чүнү сайгарар бис?

¹⁶ Иегова Бижилгеде дыка хөй кайгамчык билиглерни ажыдып турар. Ону кажан-даа билип ап шыдавас мен деп бодаарынче далашпас болза эки. Иегованың өндүр улуг өргээзи деп ханы темаларның бирээзин дараазында статьяга сайгарар бис. Ооң дугайында Павел элчин Еврейлерге чагаага бижээн. Ол статьяны шинчилээри силерге өөрүшкү эккээр деп чигзинмес бис.