1. Ангел чүнү чугаалап турар база ооң сөстери биске кандыг уткалыг?

 СИЛЕР-БИЛЕ ангел чугаалажы берген болза, дыңнаар силер бе? Амгы үеде бир ангел янзы-бүрү дылдарлыг сөөк-язы, аймак-чон бүгүдезинге: «Бургандан коргуп, Ону алдаржыдып мактаңар... Дээрниң, черниң, далайның болгаш суг баштарының Чаяакчызынга мөгейиңер!» — деп медээлеп турар (Ажыд. 14:6, 7). Иегова — чаңгыс алыс шын Бурган. Шупту кижилер чүгле аңаа чүдүүр ужурлуг. Өндүр улуг өргээге бараалгаар хүндүткел дээш, Иеговага дыка-ла өөрүп четтирер бис!

2. Иегованың өргээзи деп чүл? ( «Иегованың өргээзи...» деп көзенекти база көрүңер.)

² Бурганның доора уткалыг өргээзи чүден тургустунган база ону кайыын эки билип ап болур бис? Ол дээрге анаа бажың эвес, а Иегованың тургузуп каан чүдүлге чуруму, ооң дөзүнде — Иисус Христостуң төлевир болган өргүлү. Ол өргээниң дугайында Павел элчин Иудеяда еврей христианнарга чагаазынга бижээн b.

3, 4. Павел Иудеяда христианнар дээш чүге сагыш човап турган база оларга канчаар дузалаан?

³ Павел Иудеяда христианнарга чүге чагаа бижээн? Эвээш дизе ийи чылдагаан бар. Бирээде, оларның хөй кезии иудаизмге өзүп келген. Ынчангаш ол ха-дуңманы деткиирин кыскан. Олар христианнар апаарга, эрги шажынында башкарыкчылар кыжырып турган чадавас. Чүге дизе христианнарның өргээзи, өргүл салыр бедигээжи, бараалгакчылары чок болган. Ол дээш Иисустуң өөреникчилери муңгарап, бүзүрели кошкап болур турган (Евр. 2:1; 3:12, 14). Иудаизмче эглир бодал безин турган чадавас.

 ⁴ Ийиде, Бурганның Сөзүнден «кадыг чемни» — ханы билиглерни азы чаа өөредиглерни акы-угбалар шиңгээдирин кыспаанын Павел көргүскен (Евр. 5:11—14). Оон алырга, чамдык христианнар Моисейниң хоойлузун сагыыр хевээр турган. Өргүлдер кижилерни бачыттан долузу-биле арыглавас болгаш, хоойлу күш чок апарганын Павел тайылбырлааш, чагаазынга оон-даа ханы билиглерни сайгарган. Бурганга шынап-ла чоокшуладып болур Иисус Христостуң өргүлүнге үндезилээн «чаагай идегелди» оларга Павел сагындырган (Евр. 7:18, 19).

5. Еврейлерге чагаадан чүнү билип алыры чугула база чүге?

⁵ Павел еврей акыларынга эрткен үеден адырлырының чугулазын көргүскен. Оларның эрги чүдүлгези чедип кээр чүүлдүң «хөлегези», а Иисуска бүзүрел — чүдүлгениң алыс утка-дөзү турган (Кол. 2:17). Хөлеге бир-ле чүүлдүң ниити хевирин дамчыдар. Шак-ла ынчаар еврейлерниң бурунгу чүдүлгези Бурганның тургузар дээн эң-не дээре чүдүлгезиниң «хөлегези» болган. Бистиң бачыттарывыс өршээттинип, ооң күзелинге дүүштүр чүдүүр аргалыг болзун дээш, биске Иегова чүнү кылганын билип турар ужурлуг бис. «Хөлегени» (еврейлерниң бурунгу чүдүлгезин) «алыс утка-дөс-биле» (христианнарның канчаар чүдүп чоруурун) деңнеп көрээлиңер. Ол деңнелгениң ачызында Бурганның өргээзин болгаш ооң биске утказын оон-даа эки билип аар бис.

6. Ыдыктыг өргээ-майгынны канчаар ажыглап турган?

⁶ Еврейлерниң бурунгу чүдүлгези. Павел элчин Иегованың өргээзин сайгарып тургаш, ону б. э. чедир 1512 чылда Моисейниң тургускан ыдыктыг өргээ-майгыны-биле деңнээн. («Еврейлерниң бурунгу чүдүлгези. Христианнарның чүдүлгези» деп схеманы көрүңер.) Израильчилер ол майгынны көжерде-ле ап чораан. Олар ону Иерусалимге өргээ туттунарынга чедир 500 чыл хире ажыглап келген (Хост. 25:8, 9; Сан. 9:22). Ол «ужуражылга майгынынга» израильчилер келгеш, өргүлдерин эккеп, Бурганга чүдүп чорааннар (Хост.  29:43—46). Ол өргээ-майгын христианнарның үезинде тургустунар оон дээре чүүлдү көргүзүп турган.

7. Дээрде өргээ кажан тыптып келген?

⁷ Христианнарның чүдүлгези. Бурунгу өргээ-майгын «ыдыктыг черниң... хөлегези» болган. Павелдиң сөстеринден алырга, ол өргээ-майгын — Иегованың өндүр улуг өргээзин көргүскен (Евр. 8:5; 9:9). Ол өргээ б. э. 29 чылда, Иисус сугга суктургаш, ыдыктыг сүлде-биле чагдырган соонда тыптып келген. Ынчаарга Еврейлерге чагаа бижиттинген үеде ол өргээ бар турган. Ол чылын Иисус Иегованың өргээзинге «өндүр улуг дээди бараалгакчы» хүлээлгезин күүседип кирипкен (Евр. 4:14; Аж.-ч. 10:37, 38) c.

8, 9. Өндүр улуг дээди бараалгакчы Израильдиң дээди бараалгакчыларындан чүзү-биле ылгалып турар? (Еврейлерге 7:23—27).

⁸ Еврейлерниң бурунгу чүдүлгези. Бурганның мурнунга чонну дээди бараалгакчы төлээлеп турган. Аарон Израильге бир дугаар дээди бараалгакчы чораан. Иегова ону ыдыктыг майгынны чүдүлгеге ажыглап эгелээн хүнде томуйлаан. «Бурганның... бараалгакчылары солчуп... турганнар, чүге дээрге бараан болуушкунун уламчылаар арганы өлүм оларга бербейн келген» — деп, Павел тайылбырлаан d. (Номчуптуңар: Еврейлерге 7:23—27.) Дээди бараалгакчылар тергиин эвес болгаш, бодунуң бачыттары дээш өргүл эккээр чораан. Өндүр улуг Дээди бараалгакчы Иисус Христостан оларның кол ылгалы ол турган.

⁹ Христианнарның чүдүлгези. Бистиң дээди бараалгакчывыс Иисус Христос кижилерниң эвес, а Иегованың «тургузуп кааны... ёзулуг майгында» бараалгап турар (Евр. 8:1, 2). «Иисустуң Бурганга бараан болуушкуну мөңге, чүге дээрге Ол кезээ шагда дириг» — деп, Павел тайылбырлаан. Оон аңгыда, Иисусту «бузутка борашпаан, бачыттыглар санынче кирбээн» база израильчи дээди бараалгакчылар ышкаш бодунуң бачыды дээш, «хүннүң-не өргүл» кылбас дээн. Бурунгу үеде еврейлерниң болгаш амгы үеде христианнарның өргүлдери биле өргүл бедигээштериниң дөмей талаларын көрээлиңер.

10. Еврейлерниң эккеп турган өргүлдери чүже айтып турган?

¹⁰ Еврейлерниң бурунгу чүдүлгези. Ыдыктыг өргээ-майгынның хаалгазының чанынга Иеговага дириг-амытаннар өргүүр бедигээш турган (Хост. 27:1, 2; 40:29). Ынчалза-даа өргүлдер дузазы-биле чон долузу-биле өршээл ап шыдавас турган (Евр. 10:1—4). Үргүлчү салыр өргүлдер келир үеде кижи төрелгетенин долузу-биле хостаптар өргүлче айтып турган.

11. Иисус бодун кандыг бедигээшке өргээн? (Еврейлерге 10:5—7, 10).

¹¹ Христианнарның чүдүлгези. Иегова Иисусту черже амы-тынын төлевир кылдыр берзин дээш чорутканын ол билир турган (Мф. 20:28). Иисус сугга суктургаш, Иегованың күзелин күүседиринге беленин көргүскен (Ин. 6:38; Гал. 1:4).  Бурганның «күзел-соруу» — Иисустуң бодунуң амы-тынын салган доора уткалыг өргүл бедигээжи. Ооң ужур-утказы дээрге Бурганның Оглу тергиин кижи чуртталгазын өргүлге эккээри-дир. Иисус бодун аңаа бүзүрээр кижи бүрүзүнүң бачыттарын дуглаар дээш, «чаңгыс катап боорда, кажан кезээде» берипкен. (Номчуптуңар: Еврейлерге 10:5—7, 10.) Өргээ-майгынның иштинге чүү турганын көрээлиңер.

12. Ыдыктыг өргээ-майгынче кым кирип болур турган?

¹² Еврейлерниң бурунгу чүдүлгези. Иерусалимге өргээлер биле ыдыктыг майгынның тургузуу дөмей: ыдыктыг өрээл биле эң ыдыктыг өрээлди көжегелей аңгылаан (Евр. 9:2—5; Хост. 26:31—33). Ыдыктыг өрээлге алдын чырыткы, фимиам өрттедир бедигээш болгаш өргүл далганы салыр стол турган. Ынаар хүлээлгезин күүседирде чүгле «шилип чаап каан» бараалгакчылар кирип болур турган (Сан. 3:3, 7, 10). Эң ыдыктыг өрээлде Иегованың ында барын илереткен ыдыктыг алдын аптара салган (Хост. 25:21, 22). Көжеге артынче чүгле Өндүр улуг арыглаашкын хүнүнде дээди бараалгакчы кирер эргелиг турган (Лев. 16:2, 17). Дээди бараалгакчы бодунуң болгаш бүгү чоннуң бачыттарын дуглаар дээш, чылдан-чылче дириг-амытан ханы эккээр турган. Үе эрткенде, Иегова ыдыктыг сүлдениң дузазы-биле  өргээ-майгынның кезектери чүнү илереткенин бараалгакчыларынга тайылбырлап берген (Евр. 9:6—8) e.

13. Ыдыктыг өрээл биле Эң ыдыктыг өрээл чүнү илередип турар?

¹³ Христианнарның чүдүлгези. 144 000 чагдырган христианнар Иисус-биле дээрге бараалгаар (Ажыд. 1:6; 14:1). Бурган оларны черге чурттап турда, ыдыктыг сүлде-биле шилип чаггаш, ажы-төлү кылдыр азырап ап турар. Ыдыктыг өрээл оларның аразында тускай харылзааны илереткен (Рим. 8:15—17). Эң ыдыктыг өрээл Иегованың чурттап турар дээри. Ыдыктыг өрээлди эң ыдыктыг өрээлден аңгылаан «көжеге» Иисустуң кижи мага-бодун көргүскен. Ынчангаш ол кижи тургаш, дээрже кирип шыдавас турган. Иисус кижи мага-бодун кижилер дээш өргээш, дээрже үне бергени-биле чагдырган христианнарга дээрге чуртталгаже орукту ажыткан. Дээрде шаңналын алырда, олар база кижи мага-бодундан адырлыр ужурлуг (Евр. 10:19, 20; 1 Кор. 15:50). Иисус дирлип келгеш, дээрде Эң ыдыктыг өрээлче кире берген, чоорту аңаа шупту чагдырган христианнар каттыжып кээр.      

14. Эрткен үеге бодаарга, Иегованың амгы үеде тургускан чүдүлге чуруму чүзү-биле дээре? (Еврейлерге 9:12, 24—26).

¹⁴ Амгы үеде арыг чүдүлгеге хамаарыштыр Иегованың негелдезин көрдүвүс. Ооң үндезини — Иисустуң ыдыктыг бараалгалы биле төлевири. Ол чурум эрткен үениң чурумундан оранчок дээре. Израильге кижилер туткан майгынның Эң ыдыктыг өрээлинче дээди бараалгакчы дириг амытан ханы-биле кирер турган. А Иисус Иегованың мурнунга турар дээш, «дээрниң бодунче» — эң-не ыдыктыг черже кирген. Ынчан ол «бачытты чок кылыр дээш», тергиин кижи кылдыр чурттаар эргезин Бурганга берипкен. (Номчуптуңар: Еврейлерге 9:12, 24—26.) Иисустуң өргүлү бачыттарны кезээ мөңгеде арыглаар. Дээрге-даа, черге-даа чурттаар идегелдиг болзувусса, бис шупту Иегованың дээрде өргээзинге мөгейип болурувусту улаштыр көөр бис.

15. Ыдыктыг өргээ-майгынның хериминиң иштинге кым бараалгап турган?

¹⁵ Еврейлерниң бурунгу чүдүлгези. Бараалгакчылар хүлээлгезин ыдыктыг өргээ-майгынның хериминиң иштинге күүседир турган. Аңаа бүрүн өрттедир өргүл салыр улуг бедигээш биле чунар сава турган. Бараалгаарының мурнунда савада суг-биле бараалгакчылар чунуп аар турган (Хост. 30:17—20; 40:6—8). Сөөлзүредир туткан өргээлерге, өске кижилер Бурганга мөгеер аргалыг болзун дээш, даштыкы херим база кылыр апарган.

16. Бурганның доора уткалыг өргээзиниң иштики болгаш даштыкы херимнеринде кым бараалгап турар?

¹⁶ Христианнарның чүдүлгези. Чагдырган христианнар Иисус-биле дээрге бараалгаарының мурнунда Бурганның өргээзиниң иштики хериминде шынчы бараалгап чоруур. Чагдырган-даа, өске-даа христианнарга улуг суглуг сава мөзү-шынарның болгаш чүдүлгениң арыг болурунуң чугулазын сагындырып турар. Иисус биле чагдырган христианнарны шынчы  деткип чоруур «мөөң чон» кайда бараалгап турар? Олар «дүжүлгениң... баарында» — өргээниң даштыкы хериминде Бурганга «дүн-хүн дивейн... бараан болуп» турарын Иоанн элчин көрген (Ажыд. 7:9, 13—15). Өндүр улуг өргээзинге чүдүүрүн чөпшээрээни дээш, Иеговага дыка-ла өөрүп четтирер-дир бис!

17. Иеговага кандыг өргүлдер эккеп турар бис?

¹⁷ Амгы үеде шупту христианнар Иеговага өргүл эккээр үнелиг аргалыг. Ол дээрге Чагырганың ажыл-херээнче үндүрүп турар үевис, күжүвүс болгаш акша-төгериивис болур. Павел элчинниң бижээни ышкаш, «Бурганның адының дугайында улуска чугаалап... аксы-сөзүвүс-биле алгаг-мактал өргүлүн үргүлчү» эккеп болур бис (Евр. 13:15, Чаа делегей). Эң-не үнелиг чүүлүвүстү Иеговага берип тургаш, аңаа мөгеер алдар-хүндүнү үнелээривисти көргүзер бис.

18. Чүнүң дугайында кажан-даа утпас ужурлуг бис? (Еврейлерге 10:22—25).

¹⁸ Номчуптуңар: Еврейлерге 10:22—25. Павел элчин Еврейлерге чагаазының төнчүзүнде кажан-даа уттуп болбас чүүлдерни бижээн. Аңаа мөргүл, суртаал ажылы, ужуражылгалар болгаш бот-боттарывысты деткижери хамааржыр. Иегованың хүнү чоокшулап орарын көргеш, аравыста улам деткижери дыка чугула. Ажыдыышкын номунуң түңнел кезээнде Иегованың төлээзиниң: «Бурганга мөгей!» деп кыйгызын ийи катап бижээн (Ажыд. 19:10; 22:9). Ол сөстерни катаптаан болганда, ону дыңнаары кайы хире чугула-дыр? Иегованың өргээзиниң дугайында ханы билиглерни үргүлчү сактып, Бурганга мөгеер аргавысты үнелеп чоруулуңар!