1. Библейжи үелерде чурттап чораан бараалгакчыларның күжүнүң чажыды чүдел?

 КАЙГАМЧЫК ажыл-херектерни кылып чораан Бурганның шынчы бараалгакчыларын Библиядан билир бис. Ынчалза-даа эң күштүглери безин боттарын кошкак кылдыр миннип турган. Чижээ, Давид хаан бодун бирде «быжыг даг дег» миннип, а чамдыкта ону коргуш хөме аптар турган (Ыд. ыр. 29:8). Самсон Бурганның сүлдезиниң ачызында дендии күштүүн, а Иегованың дузазы чокта анаа улус ышкаш кошкай бээрин билип турган (Башт. 14:5, 6; 16:17). Ол шынчы бараалгакчылар чүгле Иегованың ачызында күштүг чораан.

2. Павел элчин чүге кошкаан дамчыштыр күжү илерээр дээнил? (2 Коринфичилерге 12:9, 10).

² Павел элчин база Иегованың күжүнден хамааржырын билип турган. (Номчуптуңар: 2 Коринфичилерге 12:9, 10.) Бистиң чамдыывыс ышкаш, ооң кадыы багай чораан (Гал. 4:13, 14). Үе-үе болгаш-ла, аңаа шынчы артары амыр эвес турган (Рим. 7:18, 19). Чуртталгазында дүвүрелдерге, девиденчиг байдалдарга Павел хөй таваржып чораан (2 Кор. 1:8, 9). Ындыг үелерде Иегова аңаа күштү берип турган. Ол шупту шенелделерни ооң ачызында ажып эрткен.

3. Бо статьяга кандыг айтырыгларга харыылаар бис?

³ Иегова биске база күштү бээрин аазаан (1 Пет. 5:10). Ынчалза-даа ол бистен бир чүүлдү манап турар. Чижектен көрээли. Машинаны ажылдадырда мотор энергиязы херек. Чолаачы бир-ле черже халдыр дээн болза, газын базар ужурлуг. Биске база Иегованың күжү  херек. Ону алыр дизе, кандыг тускай базымнар кылыр бис? Күштүг болурунга, Иегова биске чүнү берген? Ону алырда, чүнү кылыр ужурлуг бис? Ооң харыызын Бурганның үш бараалгакчызының чижээнден билип алыр бис. Иона медээчини, Иисустуң авазы Марияны база Павел элчинни Иегова канчаар быжыктырганын сайгарар бис. Амгы үеде Иегова бодунуң бараалгакчыларын канчаар быжыктырып турарын көөр бис.

4. Иегованың дузазын алырда, чүнү кылыр ужурлуг бис?

⁴ Иеговадан дуза алыр аргаларның бирээзи — мөргүл. Дилеглеривиске харыылап, Иегова биске «дээди күштү» берип болур (2 Кор. 4:7). Бурганның Сөзүн номчуп, ооң дугайында боданып тургаш, күш кирип алыр бис (Ыд. ыр. 85:11). Библияның медээзи «дыка улуг күштүг» болгай (Евр. 4:12, Чаа делегей). Мөргүл биле Библияның номчулгазы — шенелдени ажып эртеринге, өөрүшкүнү чидирбезинге азы берге даалганы күүседиринге дузалаар чүүлдер-дир. Иона медээчини Иегова канчаар быжыглаанын көрээлиңер.

5. Иона медээчиге Иегованың дузазы чүге дыка херек турган?

⁵ Иона медээчи дыка берге байдалга турган. Иегова аңаа амыр эвес даалга бээрге, ол дезипкен. Күштүг шуурган үезинде ол өлүр часкаш, корабльда улустуң амы-тынын база айыылга тургускан. Кажан Ионаны корабльдан үндүр октаптарга, ону дыка улуг балык сыырыпкан, ол бодавааны черге — ооң иштинге барган. Балыктың ишти караңгы, коргунчуг болган. Ол чүнү миннип турган? Иона өлүрүм ол деп бодаан бе? Иегова оон хая көрнү берген деп муңгараан бе? Ионага дөмей-ле коргунчуг болган чадавас.

6. Балык иштинге Ионаны чүү күш киирген? (Иона 2:1, 2, 7).

⁶ Сагыш-сеткили харыксырай бээрге, эрес-дидим боор дээш Иона чүнү кылган? Мөргээн. (Номчуптуңар: Иона 2:1, 2, 7.) Иона Иеговага удурланган-даа болза, Бурган ооң буруузунганын көрүп, дилээнге албан харыылаар деп чигзинмээн. Оон аңгыда, медээчи Ыдыктыг Бижилге дугайында боданып турган. Чүге ынча деп болур? Иона номунуң 2 дугаар эгеде бижээн мөргүлде, Ырлар номундан алган сөстер хөй. (Чижээ, деңнеңер: Иона 2:2, 5 биле Ырлар 68:2; 85:7.) Ыдыктыг Бижилгениң ол үзүндүлерин Иона дыка эки билир деп көскү. Ооң дугайында бодангаш, Иеговага шиитпирлеттинмес байдалдар турбас, аңаа ол албан дузалажыр деп шынзыккан. Иона черге үнүп келгеш, Иеговадан чаа даалга алырынга белен болган (Иона 2:10—3:4).

7, 8. Тайвань чурттуг акывыска шенелделерни ажып эртеринге чүү дузалап турар?

⁷ Янзы-бүрү шенелделер үезинде Ионаның чижээ биске дузалап болур. Чижээ, Тайваньдан Чжими́н b акывыс берге аарыглыг. Оон аңгыда, Иеговага бүзүрели дээш, дөргүл-төрели аңаа дыка багай хамаарылгалыг. Чжимин күштү мөргүл биле шинчилелден ап турар. «Бергелер хөме ап кээрге, башка дүвүрелдиг бодалдар кирип эгелээр. Ынчан меңээ оожургап алырынга, шинчилел кылырынга дыка берге апаар» — деп, ол үлешкен. Ынчалза-даа Чжимин дүжүп бербес. Ол мынча дээн: «Баштай Иеговага мөргүп алгаш,  наушниктерим кеткеш, бистиң ырларывысты дыңнап, сеткилим оожургаарынга чедир кады аяар ырлаар чордум. Оон шинчилелди кылып кириптер мен».

⁸ Хууда шинчилел үезинде билип алган билиглери Чжиминге бо-ла дузалаар. Чижээ, нарын кезиишкин соонда наркозтан үнүп турда, аңаа медсестра гемоглобиниң чавыс-тыр, ынчангаш хан кудар болза эки дээн. Чоокта чаа Чжимин шак-ла ындыг кезиишкин эрткен угбавыстың дугайында номчаан. Гемоглобини оон артык чавыс-даа болза, хан куттурарындан угбавыс ойталааш, сегий берген. Бурганга шынчы артарынга ол таварылга Чжиминге дузалаан.

9. Шенелде үезинде кошкай берзиңерзе, чүнү кылып болур силер? (Чурукту база көрүңер.)

⁹ Сагышсыралдар дээш мөргүүрү берге апаар-дыр бе? Азы шинчилел кылыр күжүңер чок боор-дур бе? Иегова силерни кымдан-даа артык эки билип турар деп утпаңар. Ынчангаш мөргүлүңер бөдүүн-даа болза, Иегова силерге херек чүүлдү бээр (Эф. 3:20). Бир эвес мага-бот азы сагыш-сеткил аарышкызы номчуттунарынга, шинчилел кылырынга шаптыктаар болза, Библияның база ном-дептерлерниң аудиозун дыңнаарын шенеп көрүңер. JW.ORG сайтыдан ырыны дыңнап азы видеону көрүп болур. Мөргүүр, организациявыстың берип турар бүгү чүүлүн ажыглаар болзуңарза, Бурган-биле найыралыңар быжыгып база ол силерни күш киирер.

10. Акы-угбалар бисти канчаар деткип болур?

¹⁰ Иегова бисти акы-угбалар таварыштыр күш киирип турар. Кажан шенелделерге таварышканывыста азы берге даалга алганывыста, өңнүктеривис бар шаа-биле бисти деткип болур (Кол. 4:10, 11). Ылаңгыя берге үелерде олар дыка херек (У. ч. 17:17). Кошкай бээривиске, акы-угбаларывыс дузаны кадарынга, аргалаарынга база Бурган-биле найыралывысты быжыглаарынга белен. Иисустуң авазы Мария өске улустан кандыг деткимчени алганын көрээлиңерем.

11. Марияга Иегованың күжү чүге херек турган?

 ¹¹ Бурганның күзел-соруун күүседирде, Марияга ооң күжү херек турган. Ашакка барбайн-даа, иштели бээрин аңаа Гавриил чугаалаан. Ындыг харыысалгалыг даалга бээрге ол чүнү миннип турган, бодап көрүңер даан. Мария Чагдырган чагырыкчыны өстүрер даалга алган, а ооң ажы-төл кижизидер дуржулгазы чок турган! Душтуу Иосиф-биле нарын чугаа база кылыр апарган. Эр-херээжен харылзаа чокка иштели бергенин аңаа канчаар тайылбырлаар? (Лк. 1:26—33).

12. Мария херек күштү канчаар алган? (Лука 1:39—45).

¹² Тускай, харыысалгалыг даалга күүседир күштү Мария канчаар алган? Ол дузаны өскелерден дилеп турган. Чижээ, Гавриилден даалга дугайында хөйнү чугаалап бээрин Мария дилээн (Лк. 1:34). Удатпаанда Мария «Иудеяның даглыг черинде турар [төрели] Елисаветаның чурттаан хоорайынче» чорупканы эки болган! Елисавета Марияны мактааш, ыдыктыг сүлде таварыштыр ооң төрүттүнер оглунуң дугайында медеглээн. (Номчуптуңар: Лука 1:38—45.) Иегова «Бодунуң холунуң күчүзүн көргүс[кенин]» Мария чугаалаан (Лк. 1:46—51). Иегова Марияны Гавриил биле Елисаветаны таварыштыр деткээн.

13. Боливиядан угбавыска акы-угбалар канчаар дузалаан?

¹³ Бурганның бараалгакчыларындан деткимчени Мария ышкаш база дилеп болур силер. Боливиядан Дасури́ге дуза херек турган. Ачазынга эмнеттинмес диагноз салып каарга, ол үргүлчү чанынга эмчиге хүнзеп, ажаап турган (1 Тим. 5:4). Чамдыкта дыка берге апаар болганын: «Ам шуут шыдашпас мен деп бодай бээр турган мен» — деп, Дасури ажыы-биле чугаалаан. Эгезинде ол чүге дуза дилевээнин тайылбырлаан: «Мен акыларымны чүдүрүксевээн мен. Иегова барда, меңээ кым-даа херекчок деп бодап, бергелеримни чааскаан шиитпирлээрин оралдажып, өскелерден хагдынып алганымны билип каан мен» (У. ч. 18:1). Дасури байдалын эштеринге бижиир деп шиитпирлеп алган. Ол уламчылаан: «Эргим акы-угбаларымның мени кайы хире деткээнин сөс-биле дамчыдып шыдавас-тыр мен. Олар аъш-чемни эмчиже эккеп, Библиядан сорук киирер шүлүктер-биле мени деткип турган. Бодун чааскаан эвес деп миннири — дыка-ла кайгамчык! Дуза кадарынга белен эш-өөрүң бар, кады ыглажып, төнчүзүнге чедир туржур Иегованың дыка улуг өг-бүлезинде сен».

14. Хуралдың удуртукчуларындан дузаны чүге хүлээр ужурлуг бис?

¹⁴ Иегова бисти хуралдың удуртукчулары таварыштыр база сорук киирип, быжыктырып болур. Ол дээрге Бурганның белээ-дир (Иса. 32:1, 2). Ынчангаш силерни бир-ле чүве дүвүредип турар болза, удуртукчулар-биле чугаалажыңар. Дуза кадарга ойталавайн, өөрүп четтирип хүлээп алыңар. Шак ынчаар Иегова силерни күштүг кылып каар.

15. Шупту христианнар кандыг идегелди үнелээр?

¹⁵ Библияга үндезилээн идегел биске күштү берип турар (Рим. 4:3, 18—20). Христианнарда мөңге чурттаар кайгамчыктыг арга бар: бир кижи дываажаң черге чурттаар, а өскези дээрге Бурганның Чагыргазынга. Идегелдиң ачызында  шенелделерни шыдажыр, өөрүшкүлүг медээни суртаалдаар база чыышка янзы-бүрү даалгалар күүседир күжүвүс бар (1 Фес. 1:3). Ол-ла идегел — мөңге чурттаар идегел — Павел элчинни быжыктырып турган.

16. Павелге Бурганның күжү чүге херек турган?

¹⁶ Бургандан күш Павелге чүге херек турган? Коринфичилерге чагаазынга ол бодун бустуучал дой савага деңнээн. Ол кызагдалды, истеп-сүрүүшкүннү, аай-бажы тывылбас азы амы-тыны безин хыл кырынга келген байдалдар көргенин бижээн (2 Кор. 4:8—10). Павел ол сөстерни миссионерлеп чораан үш дугаар аян-чоруунуң үезинде бижээн. Ынчалза-даа оон-даа шыңгыы шенелделер: хөй улус халдаашкыны, корабльга озал-ондак, кара-бажың манап турганын безин ол билбээн.

17. Шенелделерни шыдажырынга Павелге чүү дузалаан? (2 Коринфичилерге 4:16—18).

¹⁷ Павел шенелделерни ажып эртер күштүг турган, чүге дизе кичээнгейни идегелинче салып чораан. (Номчуптуңар: 2 Коринфичилерге 4:16—18.) Ол коринфичилерге «мага-боду... харыксыраза-даа» сула салдынмаанын бижээн. Павел элчин келир үеде дээрге чурттаар идегелин үнелеп, ол дээш кандыг-даа хилинчекти ажып эртеринге белен чораан. Павел күжүнүң үндезини боор идегелиниң дугайында ханы боданып турган.

18. Тихомирни болгаш ооң өг-бүлезин идегел канчаар күш киирип турар?

¹⁸ Болгариядан Тихомир акывысты келир үеже идегел быжыктырып турар. Каш чыл бурунгаар ооң оол дуңмазы, Здра́вко, орук озал-ондаанга чок апарган. Тихомир муңгаралга алзыпкан турган. Ажыг-шүжүгнү ажып эртер дээш өөнүң ишти, оглу суглар кады диргизиишкин дугайында хөй боданып эгелээнин ол мынчаар тайылбырлаан: «Чижээ, Здравкону канчаар уткуурун, кайы хире чаагай аъш-чем белеткээрин, кымнарны чалаарын база сөөлгү хүннерден чүнү чугаалап бээривисти сайгарар  чордувус». Идегелдиң ачызында сула салдынмайн, Иегова Здравкону диргизиптер үени өг-бүлези манап турарын Тихомир чугаалаан.

19. Келир үеже идегелди канчаар быжыглап болур? (Чурукту база көрүңер.)

¹⁹ Келир үеже идегелди канчаар быжыктырып болур? Бир эвес черге мөңге чурттаар идегелдиг болзуңарза, дываажаңга амыдырал кандыг болурун Библиядан номчуңар (Иса. 25:8; 32:16—18). Боттарыңарны аңаа сагыштаалаңар. Кымны көрүп тур силер? Чүнү дыңнап тур силер? Чүнү миннир-дир силер? Ону бодаарынга дуза кылдыр ном-дептеривисте дываажаң чуруктарын көрүңер. «Мы ждём новый мир», «Этот день очень близко!» азы «Кайгамчыктыг үеже идегел» дээн ышкаш хөгжүмнүг видеоларны көрүңер. Идегеливисти үргүлчү-ле сактып чоруур болзувусса, кандыг-даа бергелер «түр када... ажып эртери белен» апаар (2 Кор. 4:17). Иегова силерни күштүг болзун дээш идегелди берген.

20. Бодуңарны кошкак кылдыр миннир болзуңарза, чүү силерни күш киирип болур?

²⁰ Чамдыкта кошкай бергеш-даа, дыка муңгараваңар. Иегова силерни албан күш киирер (Ыд. ыр. 107:14). Деткимче бээр бүгү чүүлдү ол берген. Ынчангаш берге даалга күүседирде, шенелдени ажып эртерде азы өөрүшкүлүг артарда чүнү канчаарыл? Иеговага сеткилиңерден мөргүңер, хууда шинчилел кылып, удуртулганы дилеңер. Акы-угбаларның деткимчезинден ойталаваңар. Үргүлчү-ле дываажаңны сагыштаалаңар. Ынчан Бурган «силерни Бодунуң өндүр улуг күчүзүнге дүүштүр кандыг-даа күш-биле быжыктырзын база бүгү чүвени туруштуу-биле шыдажып эртер арганы силерге хайырлазын» (Кол. 1:11).