1. Биске дыңнангыр болуру чүге берге?

 ДЫҢНАНГЫР болуру чамдыкта амыр эвес. Иеговага дыка ынак чораан Давид хаан безин дыңнангыр болуру берге апаарга: «Сеңээ белени-биле чагыртыр күзелди база оттуруп берем» деп мөргүлге дилеп турган (Ыд. ыр. 51:12, Чаа делегей). Бурганга дыңнангыр болуру кижилерге чүге ындыг берге? Бирээде, дыңнангыр эвес чорукту салгап алган бис. Ийиде, Иеговага удур тура халаан Эрлик бисти үргүлчү бодунуң талазынче тыртарын кызып турар (2 Кор. 11:3). Үште, үймээнчи хөөннүг делегейде чурттап чоруур бис (Эф. 2:2). Ынчангаш Эрликке, делегейниң базыышкынынга, бачыттыг күзелдеривиске алыспазы чугула. Иеговага болгаш ооң тургускан эрге-чагыргазынга дыңнангыр болур дээш, бар шаавыс-биле кызар ужурлуг бис.

2. Күзелдии-биле дыңнангыр болурунуң утказы кандыг? (Иаков 3:17).

² Номчуптуңар: Иаков 3:17, Чаа делегей. Ыдыктыг сүлдеге бүргеткеш, Иаков мерген угаанныг улусту «күзелдии-биле дыңнангыр» дээн. Ооң утказын бодап көрүңерем. Иегованың тургускан эрге-чагыргазынга күзелдии-биле дыңнангыр боору чугула. А ооң хоойлуларын үрээрин негээр улуска чагыртырывысты Иегова күзевес болгай (Аж.-ч. 4:18—20).

3. Эрге-чагыргалыг улуска дыңнангыр болурувус Иеговага чүге чугула?

³ Бачыттыг кижилерге бодаарга, тергиин Бурганны дыңнаары белен болгай (Ыд. ыр. 18:8). Дээрде Адавыс бодунуң эргезин ада-иелер, күрүнениң эрге-чагыргазы база хуралдың удуртукчулары-биле үлешкен (У. ч. 6:20; 1 Фес. 5:12; 1 Пет. 2:13, 14). Оларга чагыртып тургаш, Иеговага  дыңнангырывысты көргүзер бис. Ынчаарга айтыышкыннар-биле чөпшээрешпес азы күүседир күзеливис чокта чагыртырынга биске чүү дузалаарын сайгарыптаалыңар.

4. Чамдык ажы-төл ада-иезинге чүге дыңнангыр эвес?

⁴ Ажы-төлдүң ада-иезинге чагыртпазының чылдагааны чүде? (2 Тим. 3:1, 2). Оларның чамдыы улуг улус боттарының кылбас чүвезин негээр деп санаар. А өскелери ада-иезин чыдып калган азы негелделерин эмин эрттир шыңгыы деп бодаар. Аныяк-чалыы христианнар, силерге ындыг бодалдар кирип кээр-дир бе? «Дээрги-Чаяакчыга башкарткаш, ада-иеңерни дыңнаңар, ынчаар кылыры чөптүг-шынныг болур» — деп Иегованың чагыын сагыыры амгы үеде дыка хөй улуска берге (Эф. 6:1). Аңаа дыңнангыр болурунга силерге чүү дузалаар?

5. Иисус элээди христианнарга дыңнангыр чоруктуң чүге дээре дээн үлегери? (Лука 2:46—52).

⁵ Иисус — дыңнангыр чоруктуң эң эки үлегери. Силер оон өөренип ап болур силер (1 Пет. 2:21—24). Тергиин Иисусту тергиин эвес ада-иези кижизиткен. Ынчалза-даа олар чазып, билишпейн-даа барган үеде Иисус ада-иезин хүндүлээр чораан (Хост. 20:12). Иисус 12 харлыг турда болуушкунну сактып кээлиңер. (Номчуптуңар: Лука 2:46—52.) Иерусалимден үнүпкеш, Иосиф биле Мария оглу чыдып каарга эскербээннер. Олар ада-иези болганда, шупту ажы-төлүн четчелээр ужурлуг турган. Иисусту тып алгаш авазы чемелээрге, оглу кысказы-биле хүндүткелдиг харыылаан. Иосиф биле Мария оглу «чүнүң дугайында чугаалаанын билбээннер», ынчалза-даа Иисус «оларның аайындан эртип көрбээн».

6, 7. Ада-иезинге дыңнангыр болурунга элээди-даа, бичии-даа ажы-төлге чүү дузалаар?

⁶ Эргим ажы-төлүвүс, элээдилер, ылаңгыя ада-иеңер чазыпканда азы олар-биле билишпейн барганда, чагыртыры берге апаар-дыр бе? Силерге чүү дузалап болур? Бирээде, Иегованы хомудатпазын бодаңар. Ада-иеңерге дыңнангыр боор болзуңарза, «Дээрги-Чаяакчыга таарымчалыг» (Кол. 3:20). Кажан улуг улус силерни билбейн баарга азы тергиин эвес дүрүмнер тургузарга Иегова көрүп турар. Ынчан дөмей-ле дыңнангыр бооруңарга Иегова дыка өөрүүр.

⁷ Ийиде, ада-иеңерниң сеткилин бодаңар. Дыңнангыр боор болзуңарза, оларны өөртүп, бүзүрелин чаалап ап, олар-биле чоок хамаарылгалыг апаар силер (У. ч. 23:22—25). Бельгиядан Александр үлешкен: «Ада-иемниң дилеглерин үргүлчү күүседип эгелээримге, хамаарылгавыс оон-даа экижээн, а өг-бүлевис өөрүшкүлүг, найыралдыг апарган b. Үште, дыңнангыр чорук силерни келир үеже белеткеп турарын бодаңар. Бразилиядан Па́улу мынча дээн: «Ада-иемни дыңнаары меңээ эки белеткел болган. Ол белеткел мени Иеговага, эрге-чагыргалыг улуска дыңнангыр болурунга өөреткен». Бижилгеде ада-иезинге дыңнангыр болурунуң чугула чылдагааны бар: «Бирги айтыышкынын утпаңар: „Ачаң биле аваңны хүндүлеп чор. Сеңээ ынчан буян-кежик доктаап, чер кырынга үр амыдыраар сен“» (Эф. 6:2, 3).

8. Аныяк-чалыы христианнар чүге ада-иезин дыңнаар деп шиитпирлээнил?

⁸ Дыңнангыр чорук эң-не эки шилилге  деп дыка хөй оолдар, уруглар боттары көрген. Бразилиядан Луизаның үе-чергези хөй кезии телефоннарлыг турган. Ада-иези телефон садып бербес боорга, ол баштай билбейн турган. Соонда ада-иези ону камгалап турганын билип кааш, Луиза мынча дээн: «Авам, ачамның тургускан кызыгаарлары — кеземче эвес, а камгалал болган». Каттышкан Штаттардан аныяк дуңмавыс Эли́забет ада-иезиниң шиитпирлери-биле чамдыкта чөпшээрешпейн баар. Ынчан аңаа чүү дузалаарын ол тайылбырлаан: «Олар меңээ бир чүвени хоруп каарга, аайын тыппайн баргаш, оларның дүрүмнери ажыктыг болган таварылгаларны сактып кээрин кызар чордум». Армениядан Мо́ника бодунуу-биле кылырының орнунга, ада-иезиниң сүмезин ажыглаары чүс катап дээре деп эскерген.

9. Кижилер колдуунда күрүне хоойлуларынга кандыг хамаарылгалыг?

⁹ Библияда «үстүнден башкарган эрге-чагырга» күрүне чагыргаларын илереткен (Рим. 13:1). Дыка хөй улус ол чагыргалар херек база чурттуң хоойлуларынга чагыртыры чугула деп чөпшээрежир. Ынчалза-даа ол-ла улус чамдык хоойлуларны эмин эрттир берге азы чөптүг эвес деп көөр, ынчангаш сагыырын кыспас. Чижээ, Европаның бир чурттунда улустан айтырарга, дөрттүң бир кезии үндүрүгнү чөптүг эвес деп санаар болза, төлевейн барып болур деп харыылаан. Ол күрүне үндүрүглериниң үштүң бир кезиин чедир албайн турары кайгамчык эвес.

10. Сеткиливиске кирбес хоойлуларны безин чүге сагыыр бис?

¹⁰ Библияда кижи чазактарын хилинчек-човалаң чедирип турар, Эрликке чагырткан база удавас узуткаттырар деп чугаалаан (Ыд. ыр. 109:5, 6; Эккл. 8:9; Лк. 4:5, 6). Ында оон аңгыда, «эрге-чагыргага удурланыр кым-даа бар болза, Бурганның доктаадып каан чүүлүнге удурланган» дээн. Иегова кезек үе дургузунда кижи чагыргаларын чөпшээреп каан. Ынчангаш «шуптузунга чогуур чүвени» берип, үндүрүгнү төлеп, дыңнангыр болгаш хүндүткелдиг болур бис (Рим. 13:1—7). Бир-ле хоойлу биске эпчок, чөптүг эвес, сагыыры эмин эрттир берге ышкаш сагындырып болур. Ынчалза-даа Бурганны дыңнап, ооң хоойлулары-биле чөрүшкек эвес болза, кижи чазактарынга чагыртыр бис (Аж.-ч. 5:29).

11, 12. Иосиф биле Мария хоойлуга чагыртыр дээш чүнү кылган, түңнели кандыг болган? (Лука 2:1—6). (Чуруктарны база көрүңер.)

¹¹ Чеже-даа берге болза, Иосиф биле Мария кижи чазактарынга дыңнангыр чоруктуң эки үлегерин көргүскеннер. (Номчуптуңар: Лука 2:1—6.) Марияның божуур  айы үнүп келгенде, олар белен эвес шиитпир үндүрер апарган. Август император Рим империяның чурттакчылары шупту чизе эртер ужурлуг деп чарлык үндүрген. Иосиф биле Мария 150 хире километр ыракта Вифлеемче чизеледир дээш, белен эвес даглыг оруктап чорупканнар. Мария орук ара божупса канчаар деп, олар коргуп турган чадавас. Чүге дизе Мессияның амы-тыны оон хамааржып турган! Ол байдал оларны чазакка чагыртырындан хостаар бе?

¹² Иосиф биле Марияның дүвүрелдери турган-даа болза, олар дөмей-ле хоойлуга чагыртканнар. Оларның дыңнангырын Иегова йөрээген. Иосиф Мария-биле Вифлеемге менди чаагай чедип алганнар. Ол кадык оолду божааш, өттүр билген медеглелдиң күүсеттинеринге дузалашкан (Мих. 5:2).

13. Дыңнангыр чоруувус акы-угбаларга канчаар дузалап болур?

¹³ Кижи чазактарынга дыңнангыр боорга, биске-даа, өске-даа улуска ажыктыг. Бодап көрүңер: хоойлуларны сагыыр болзувусса, кандыг-даа кеземче чүктевес бис (Рим. 13:4). Оон аңгыда, хууда дыңнангыр чоруувус эрге-чагырга улузунуң Иегованың Херечилеринге хамаарылгазынга эки салдарлыг. Он-он чылдар бурунгаар Нигерияга бир катап чыыш үезинде шериглер чедип келген. Олар үндүрүг төлээринге удур ниитилелге хөлзээзиннер эгелээн улусту дилеп турган. Ынчалза-даа офицер чыылган улусту — Иегованың Херечилери деп билип кааш, шериин дедир чорудупкан. Ол мынча дээн: «Иегованың Херечилери үндүрүг төлээринге удурланмас». Хоойлуну сагып тургаш, Иегованың чонунга эки атты чаалап ап турар силер. А келир үеде ол ат акы-угбаларны камгалап болур (Мф. 5:16).

14. Үстүнде чагыргаларны дыңнаарынга бир угбавыска чүү дузалаан?

¹⁴ Чамдыкта дыңнангыр болуру чугула деп билип турзувусса-даа, чүрээвис удурланып турар. Каттышкан Штаттардан  Джоанна ажыы-биле чугаалаан: «Чоок улузумнуң чамдыызы чазактан чөптүг эвес аажылалга хөй таваржып чораан. Ынчангаш дыңнангыр болурунга меңээ дыка улуг күжениишкиннер үндүрери херек турган». Эрге-чагыргага хамаарылгазын өскертир дээш, Джоанна аажок кыскан. Бирээде, социал четкилерден чазакка багай хамаарылга өөскүдер медээлер көөрүн соксаткан (У. ч. 20:3). Ийиде, өскерлиишкиннерни кижилерден эвес, а Бургандан манаарынга дузалаар кылдыр Иеговага мөргүп турган (Ыд. ыр. 9:10, 11). Үште, ном-дептеривистен нейтралитет дугайында статьяларны номчуп турган (Ин. 17:16). Чагыргаларны хүндүлеп өөренип алгаш, Джоанна дыка эки оожургалды алганын чугаалаан.        

15. Иегованың организациязының айтыышкыннарын сагыыры чамдыкта чүге берге?

¹⁵ Иегова бистен: «Удуртукчуларыңарны дыңнап, оларга чагыртыңар» — деп дилеп турар (Евр. 13:17). Чыыштың баштыңы, Иисус Христос, — тергиин. А хуралдың удуртукчулары шупту улус дег тергиин эвес. Ылаңгыя сеткиливиске кирбес чүве кылырын дилээрге, оларны дыңнаары берге апаар. Ындыг байдалга Пётр элчин таварышкан. Ангел аңаа Моисейниң хоойлузу-биле алырга, арыг эвес дириг амытаннар чиирин чугаалаарга, Пётр үш катап ойталаан! (Аж.-ч. 10:9—16). Чүге? Ол чаа айтыышкын угаанынга кирбес, ооң чаңчыкканындан шуут өске болган. Тергиин ангелге чагыртыры Пётрга берге болган. Бачыттыг улустуң айтыышкыннарын күүседири биске оон-даа берге бооп болур!

16. Павел элчинден кылыры албан эвес чүвени күүседирин дилээрге, ол канчалган? (Ажыл-чорудулга 21:23, 24, 26).

¹⁶ Кылыры албан эвес чүүлдү безин кылырын дилээрге, Павел элчин чагыртырынга белен турган. Еврей христианнарга Павел «Моисейниң хоойлузундан ойталаар кылдыр өөредип» турар деп дамчыыр чугаа четкен (Аж.-ч. 21:21). Шупту улус Павелдиң хоойлуну сагып турарын көрзүн дээш, Иерусалимде удуртукчулар ону дөрт эр кижи-биле кады өргээге барып, арыгланыр ёзулалды кылырын дилээн. Христианнар Моисейниң хоойлузун сагывазын база багай чүүл кылбаанын билип турза-даа маргышпайн, «Павел... даартазында хүндүс олар-биле кады арыгланыр ёзулалды эртип алган». (Номчуптуңар: Ажыл-чорудулга 21:23, 24, 26.) Ооң удуртукчуларны дыңнаан түңнелинде, чыыштың демниг чоруу быжыглаттынган (Рим. 14:19, 21).

17. Стефаниниң чижээ силерге чүнү өөредип турар?

¹⁷ Салбырның шиитпири-биле чөпшээрежири Сте́фани угбавыска берге болган. Ол ашаа-биле өске дылдыг бөлүкке суртаалдаарынга ынак турган. Кажан бөлүүн тарадыпкаш, оларны төрээн дылында чыыжынче томуйлапкан үеде минниишкиннерин Стефани үлешкен: «Дыка муңгараан мен. Төрээн дылымда чыыжымда улуг ажыл чок деп бодаан мен». Ынчалза-даа ол дыңнангыр болурун шиитпирлээн. Улаштыр Стефани мынча дээн: «Чоорту салбырның ол шиитпири кайы хире мерген угаанныг болганын билип каан мен. Иеговага бараалгап чоруур төрели чок чамдык акы-угбаларга ада-ие апарган бис. Ам чыышче чаа эглип келген угбай-биле өөренип турар мен. Хууда шинчилел кылыр үем база хөй апарган». «Дыңнангыр болур дээш, болдунар-ла чүүлдү кылган болгаш, Иеговага  арыг арын-нүүрлүг бараалгап болур мен» — деп, ол немээн.

18. Дыңнангыр болуру чүге чугула?

¹⁸ Дыңнангыр болурунга өөренип ап болур. Иисус тергиин байдалга эвес, а «эрткен хилинчээн дамчыштыр» «дыңнангыр чорукка» өөренип алган» (Евр. 5:8). Бис база дыңнангыр чорукка колдуунда нарын байдалга өөренип ап турар бис. Чижээ, COVID-19 пандемияның эгезинде Хурал залдарынга чыглып, бажыңнар кезип суртаалдаарын соксадыр дээнин сактыр силер бе? Ол айтыышкыннарны хүлээп алыры белен болган бе? Берге-даа болза, дыңнангыр болган силер. Дыңнангыр чорууңар Иегованы өөрткен база силерни акы-угбалар-биле чоокшулаткан. Ынчаар келир үениң болуушкуннарынга тулган белеткелди эрткен бис. Ооң ачызында коргунчуг хилинчек үезинде айтыышкыннарны дыңнаары биске белен болур. А дыңнангыр чоруктан камгалалывыс хамааржыр болгай! (Иов 36:11).

19. Дыңнангыр болурунуң кол чылдагааны кандыг?

¹⁹ Дыңнангыр болурунуң эки талалары хөй деп көрдүвүс. Иегованы дыңнаар кол чылдагаан — аңаа ынак болгаш, ону өөртүксеп турар бис (1 Ин. 5:3). Иегованың биске кылып турар бүгү-ле буяны дээш, орнун эгидип шыдавас бис (Ыд. ыр. 115:3). Ынчалза-даа аңаа база чагырар эргелиг улуска чагыртып шыдаар бис. Ынчаар кылыр болзувусса, Иегованың чүрээн өөртүп, мерген угаанныг болур бис (У. ч. 27:11).