1. Иегова бодунуң бараалгакчыларынга кандыг хамаарылгалыг?

 ИЕГОВА бодунуң бараалгакчыларынга дыка кичээнгейлиг. Оларның өөрүшкүзүн, муңгаралын ол билир (Ыд. ыр. 36:18). Сеткиливисте балыгларга алыспайн, бараалгаарывысты көргеш, ол бис дээш аажок чоргаарланыр. Иегова бисти аарышкывыс-биле арттырбайн, деткип, аргалап турар.

2. Иегова сеткил-хөңнү карарган улуска чүнү кылып турар база ооң дузазын канчаар алыр?

² Ырлар 146:3-те Иегова «сеткил-хөңнү карарган улустуң... балыгларын шарып берип турар» дээн. Сеткилинде аарышкылыг улуска, Иегованың дуза кадыксап турары ол сөстерден тода көскү. Ооң дузазын канчаар ап болур? Мындыг чижекти бодап көрүңер. Кижи кемдээшкин алгаш, дуржулгалыг эмчиже баар. Сегиир дизе, эмчиниң сүмелерин улаштыр кызымаккай сагыыры чугула. Бо статьяга Иегова биске Сөзүнде кандыг «рецепт» бижип бергенин база сагыш-сеткиливиске оожургалды алырда, чүнү кылыр ужурлуувусту көөр бис.

ИЕГОВА БИСТИ ҮНЕЛЭЭРИНГЕ БҮЗҮРЕДИП ТУРАР

3. Чамдык улуска ынакшылга олар төлептиг деп бүзүрээри чүге берге?

³ Чурттап чоруур делегейивисте ынакшыл чок. Дыка хөй улус боттарын кымга-даа херекчок деп бодаар. Хе́лен a мынча дээн: «Ынакшыл деп чүл дээрзин билбейн өскен  мен. Ачам ёзулуг дарлакчы болгаш, хүннүң-не меңээ кымга-даа херекчок сен дээр турган». Багай хамаарылга көрүп, үргүлчү шүгүмчүледип азы ажык чок диртип чораан чадавас силер. Ынакшылга төлептиг сен деп чугаалаарга, силерге бүзүрээри берге бооп болур.

4. Иегова бисти чүү чүвеге бүзүредип турар? (Ырлар 34:18, ЧД).

⁴ Улус кандыг-даа хамаарылгалыг болза, Бурган силерге ынак база силерни үнелээр деп сактып чоруңар. «Иегова чүрээнде аарышкылыг улуска чоок». (Номчуптуңар: Ырлар 34:18, ЧД.) Бурган эки талаларыңарны билир болгаш, бодунче хаара туткан деп утпаңар (Ин. 6:44). Ол үргүлчү дузалаарынга белен, чүге дизе аңаа дыка үнелиг силер.

5. Ниитилелде үнези куду улуска Иисустуң хамаарылгазында биске кандыг кичээл бар?

⁵ Иисустуң чижээнден Иегованың дугайында хөйнү билип ап болур бис. Ол черге бараалгалының үезинде куду көрдүрген улуска буянныг, кээргээчел хамаарылганы көргүскен (Мф. 9:9—12). Бир катап аарыгдан хинчектенген херээжен кижи Иисуска идегеп, оожум чоокшулап келген. Аңаа дээпкеш экирий бээрге, ону бүзүрели дээш оожургадып мактаан (Мк. 5:25—34). Иисус кижилерге Адазы дег хамаарылгалыг чораан (Ин. 14:9). Ынчангаш Иегова шупту эки шынарларыңарны, бүзүрелиңерни база ынакшылыңарны эскерип, силерни үнелээринге чигзинмеңер.

6. Бот-үнелээшкини куду кижи чүнү кылыр болза эки?

⁶ Үргүлчү азы кезек болгаш-ла, кымга-даа херекчок мен деп бодалдар тыптып келзе, чүнү канчаар? Иегованың силерге ынакшылын сагындырган шүлүктерни Библиядан номчуңар. Ооң дугайында  боданыңар (Ыд. ыр. 93:19) b. Сорулгаңарны чедип шыдавайн барган чадавас силер. Азы өске улус ышкаш хөйнү кылып шыдавас силер. Ол дээш бодуңарны чектевеңер. Иегова силерден болдунмас чүве манавас болгай (Ыд. ыр. 102:13, 14). А бир эвес сагыш-сеткил азы мага-бот талазы-биле күчүлелге таварышкан болзуңарза, силерниң бурууңар чок деп утпаңар. Кымга-даа ындыг хамаарылга турбас ужурлуг! Иегованың мурнунга буруулуг кижи долу харыысалганы чүктээр (1 Пет. 3:12). Чажында каржы аажылалды көрген Сандра мынча деп үлешкен: «Бодумче Иегова ышкаш шын көрүштүг болурунга дузаны оон үргүлчү дилеп чоруур мен».

7. Чуртталгада таварышкан чүүлүвүс Иеговага бараалгалывыска чүге ажыктыг болур чадавас?

⁷ Бодуңарны ажык чок деп санаар болзуңарза, Иегова ынчаар бодавас. Ол силерни кады ажылдаарынче чалааш, өөрүшкүлүг медээни суртаалдаарын бүзүрээн (1 Кор. 3:9). Силерни таварыштыр ол өске улуска дузалап болур. Силер ышкаш байдалга таварышкан улустуң сеткилин эки билип шыдаар болгай силер. Чугаалашканывыс Хелен Иеговадан, чыыштан дузаны алган болгаш, ам боду улуска дузалап шыдаар. Ол мынчаар үлешкен: «Бодумну кым-даа эвес, кандыг-даа ажыым чок деп санап чораан мен. Ынчалза-даа Иегованың ачызында улус меңээ ынак база бодумну ажыктыг мен деп миннип эгелээн мен». Амгы үеде Хелен долу эгелекчилеп чоруур.

ИЕГОВА ӨРШЭЭЛИНГЕ БҮЗҮРЭЭРИН БИСТЕН КҮЗЭЭР

8. Исайя 1:18-те биске кандыг бүзүредиг бар?

⁸ Чамдык акы-угбалар сугга суктурар мурнунда азы соонда чазыпканын сактып, аарышкыны миннип чоруур. Ынчалза-даа Иегова биске ынак, бис дээш төлевирни берген болгаш, ол белекти хүлээп алырывысты күзээр. Иегова-биле хамаарылгавысты c экижидип алган болзувусса, эрткен бачыттарны ол кажан-даа сагындырбас деп бүзүреткен. (Номчуптуңар: Исайя 1:18.) Иеговага өөрүп четтирер бис, чүге дизе бачыттарны ол уттуптар, а бүгү эки ажыл-херээвисти сактып чоруур (Ыд. ыр. 102:9, 12; Евр. 6:10).

9. Эрткен үеде частырыгларның орнунга, чүге келир болгаш амгы үе дугайында бодааны дээре?

⁹ Эрткен үеде хараадал бар болза, олче эвес, а амгы болгаш келир үеже кичээнгейни салыңар. Павел элчин ынчаар кылган. Ол христианнарны каржызы-биле истеп сүрүп чораанындан, бодун төнчү чок буруудадып болур турган. Ынчалза-даа Иегова ону өршээп каан деп ол билир (1 Тим. 1:12—15). Павел иудаизмге чедиишкиннерин азы частырыгларын боданыр үе үндүрбээн (Флп. 3:4—8, 13—15). Ол бүгү күжүн бараалгалче углап, бурунгаар бүзүрелдиг көрүштүг турган. Эрткен үени, Павел ышкаш, өскертип шыдавас силер. Ынчалза-даа амгы байдалда Иегованы өөртүп, алдаржыдып, ооң аазаан келир үезин манап болур силер.

10. Өске кижини балыглаан болзувусса, чүнү кылыр болза эки?

¹⁰ Силерниң хараадалыңар ооң мурнунда бир кижиге аарышкы чедиргенинге хамаарылгалыг чадавас. Ынчаарга чүнү канчап болур? Чижээ, сеткилиңерден өршээлди дилеңер (2 Кор. 7:11). Силерниң хайыңарда  когараан улуска оожургалды бээрин Иеговадан мөргүп дилеңер. Бурган оларга-даа, силерге-даа амыр-тайбыңны минниринге база аңаа улаштыр бараалгаарынга дузалап болур.

11. Иона медээчиниң чижээнден чүнү өөренип алыр бис? (Чурукту база көрүңер.)

¹¹ Частырыгларыңарга өөренип, Иегованың удуртулгазын эдереринге белен болуңар. Иона медээчини сактып келиңер. Бурган ону Ниневияже чорударга, ол өске талаже дезипкен. Иегова Ионага частырыын минниринге база түңнелдерни үндүреринге дузалаан (Иона 1:1—4, 15—17; 2:7—10). Иегова медээчизин кагбайн, ийи дугаар арганы берген. Катап Ниневияже чорударга, Иона ону дораан күүсеткен. Ол частырыын хараадаан-даа болза, Иегованың чаа даалгазын күүседирде багай бодалдарынга алыспаан (Иона 3:1—3).

ИЕГОВА БИСТИ АРГАЛАП, СҮЛДЕЗИН БЕРИП ТУРАР

12. Коргунчуг болуушкунну ажып эртеринге Иегова биске канчаар дузалап турар? (Филипчилерге 4:6, 7).

¹² Берге байдалга таваржырывыска, Иегова бисти оожургадыр дээш сүлдезин берип турар. Рон биле Кэ́ролдуң улуг оглу амы-тынынга четкен. Олар мынча деп үлешкен: «Чуртталгавыста бергелер аразындан бо байдал эң-не берге болган. Дүнелерде удуп шыдавайн баргаш, хондур мөргүп турган бис. Иегова биске Филипчилерге 4:6, 7-де (номчуптуңар) бижээн тайбыңны берип турганын билген бис». Чуртталгаңарга коргунчуг чүүл болган болза, сагыш-сеткилиңерни ажыы-биле Иеговага чугаалаарындан эпчоксунмаңар. Хөй-даа катап, үргүлчү-даа мөргүүр болзуңарза, ол силерни дыңнаар (Ыд. ыр. 85:3; 87:2). Ыдыктыг сүлдени дилеңер, ону Иегова силерге албан бээр (Лк. 11:9—13).

13. Иеговага шынчы бараалгаарынга ыдыктыг сүлде канчаар дузалап турар? (Эфесчилерге 3:16).

¹³ Берге шенелде күжүвүстү долузу-биле кошкадып болур. Ындыг чүүл көрген силер бе? Ынчалза-даа Иеговага улаштыр шынчы бараалгаарынга ыдыктыг сүлде силерни быжыктырып болур. (Номчуптуңар: Эфесчилерге 3:16.) Фло́ра мындыг болуушкунга таварышкан. Ол өөнүң ээзи-биле миссионерлеп турган. Өг-бүлези бузулганын Фло́ра үлешкен: «Өскерлиишкинни билип каарымга, өске чүнү-даа бодаар хире эвес аарышкылыг болган. Ындыг байдалдан үнери болдунмас ышкаш сагындырган. Иеговадан ыдыктыг сүлдени дилеп турган мен. Мени оон уштуп, балыгларымны ол эмнээн». Ам Флора Бурганга оон-даа идегээр апарган. Ооң-биле ол кандыг-даа шенелдени ажып эртиптер бүзүрелдиг. «Ырлар 118:32-де ышкаш минниишкинниг мен: „Сен мээң чүрээмге делгемнерни ажыдып бээриңге, айтыышкыннарың оруу-биле дүрген маңнаптар мен“» — деп ол немээн.

14. Ыдыктыг сүлдени хөйү-биле алыр дизе, чүнү кылыры чугула?

¹⁴ Ыдыктыг сүлдени дилээш, улаштыр чүнү кылыр? Оон-даа хөй күш алырынга дузалаар чүүлдерни кылыңар. Чыыштарже барып, суртаалдаңар. Ооң Сөзүн хүннүң номчуп тура, Иегованың бодалдарын угааныңарга долдуруңар (Флп. 4:8, 9). Янзы-бүрү бергелерге таварышкан улустуң төөгүлерин Библиядан тып ап болур силер. Оларга шынчы база шыдамык артарынга, Иегованың канчаар дузалаанынче кичээнгейни салыңар. 6-гы абзацка чугаалашканывыс Сандра чуртталгазынга хөйнү ажып  эрткен. Ол мынчаар үлешкен: «Иосифтиң чижээ үргүлчү мени сорук киирип турган. Шенелделер болгаш шын эвес хамаарылга ону Иеговадан ырадыптарын ол болдурбаан» (Э. д. 39:21—23).

ИЕГОВА БИСТИ АКЫ-УГБАЛАР ТАВАРЫШТЫР АРГАЛАП ТУРАР

15. Иегова бисти акы-угбалар таварыштыр канчаар деткип, аргалап турар? (Чурукту база көрүңер.)

¹⁵ Берге үеде акы-угбалар бисти деткип, аргалап болур (Кол. 4:11). Олар биске Иегованың ынакшылының дириг бадыткалы-дыр. Ха-дуңма бисти канчаар аргалаар? Сеткиливисти үндүр чугаалаар арганы берип, кээргээчели, бодап билири-биле бисти дыңнаар. Оларның чанывыста турары безин оожургадыр. Бисти деткиир библейжи шүлүк-биле d үлежир азы кады мөргүүр (Рим. 15:4). Чамдыкта акы-угбаларның бирээзи байдалывысче Иегованың көрүжүн сагындырыптарга, биске чиик апаар. Чижээ, күжүвүс чок каарга, акы-угбалар аъш-чем кылып дузалап болур.

16. Дуза алыр дизе, чамдыкта чүнү кылыр херек?

¹⁶ Чамдыкта дуза херекте ону дилээри чугула. Акы-угбалар биске ынак болгаш, дузалаарын күзээр (У. ч. 17:17). Ынчалза-даа олар бистиң чүнү миннип, чүнү хереглеп турарывысты билбес чыгыы (У. ч. 14:10).  Бир эвес сеткилиңерде саргып турар чүүл бар болза, быжыг бүзүрелдиг өңнүктериңер-биле чажыт чокка үлежиңер. Кандыг дуза херегин чугаалаңар. Бир азы ийи бүзүрээриңер удуртукчу-биле чугаалажып болур силер. Чамдык угбалар быжыг бүзүрелдиг угбаларындан деткимчени дилээр.

17. Аргалал, оожургал алырынга биске кандыг бергелер шаптыктап болур, ону канчаар болдурбас?

¹⁷ Чамдыкта кым-биле-даа чугаалажыр харык чок апаар чадавас силер. Акы-угбалар билбейн баар азы эпчок сөстерни чугаалаптар (Иак. 3:2). Ындыг-даа болза, олардан ойталаваңар. Иегова оларны таварыштыр силерни аргалап болур. Депрессиядан аарып чоруур Гэ́вин деп удуртукчу мынча дээн: «Улус-биле чугаалажыр күзелим чок боор апарган». Ынчалза-даа Гэвин минниишкиннеринге алыспайн, үени акы-угбалар-биле кады эрттирген соонда, албан сеткили ажып, чиигей бээр. Э́ми угбавыс мынчаар үлешкен: «Эрткен үем дээш, улуска бүзүрээри меңээ берге. Ынчалза-даа акы-угбаларга ынак болуп, оларга бүзүрээринге өөренип турар мен, чүге дизе Иегова ышкаш болуксаар мен. Бурганга ол чүүл таарымчалыг деп билир мен. Иегованы өөрткеш, бодум база өөрүшкүнү алыр чордум».

СИЛЕРНИ КЕЛИР ҮЕЖЕ ИДЕГЕЛ ӨӨРТҮП ООЖУРГАТСЫН

18. Иегова биске кандыг келир үени белеткеп каан база ам чүнү кылыр болза эки?

¹⁸ Удавас Иегова шупту аарыгларны чок кылыптар (Ажыд. 21:3, 4). Ол үеде кандыг-даа аарышкылыг сактыышкыннар чүрээвиске артпас (Иса. 65:17). Амдан тура биске эки болзун дээш, Иегованың кылып турар хөй чүүлүн көрдүвүс. Ынчангаш балыгларывысты экиртиринге ооң берген бүгү чүүлүн ажыглаңар. «Ол силер дээш сагыш салып чоруур» деп хензиг-даа чигзинмеңер (1 Пет. 5:7).