ӨӨРЕНИР СТАТЬЯ 43
ЫРЫ 90 Бот-боттарыңарны деткиңер
Чигзиниглерни канчаар шиитпирлээр?
«Шуптузун хынап чаңчыгыңар» (1 ФЕС. 5:21).
КОЛ БОДАЛ
Иеговага бараалгаарынга шаптыктаар чигзиниглерни канчаар ажып эртип болур?
1, 2. а) Иегованың бараалгакчыларынга кандыг чигзиниглер тыптып болур? б) Бо статьяга чүнү сайгарар бис?
ЧИГЗИНИГЛЕР тыптыры назы-хардан хамаарышпас a. Чижээ, Иегова ону херекке албас деп бодап турар аныяк Херечини сагыштаалап көрүңерем. Ол дээш сугга суктурбайн турар чадавас. Азы аныяандан тура хөй бараалгаар дээш, эки ажыл-агыйже чүткүвээн ортумак назылыг акывыс дижик. Өг-бүлезиниң акша-төгерии чедишпейн баарга, ол акый шиитпиринге чигзинип эгелээн. А улгады берген улустуң бергелери база бар. Бир угбавыстың күжү аныяанда дег эвес. Ооң мурнунда ышкаш хөйнү кылып шыдавас апаргаш муңгарап турар. Мындыг айтырыглар силерге тывылган чадавас: «Хууда мени Иегова бодаар бе? Үндүрген күжениишкиннерим Иеговага херек болган бе? Иеговага ам-даа бичии-даа бол ажык-дузам бар бе?»
2 Ындыг бодалдарны кичээнгей чок арттырбас болза эки. Оон башка бүзүреливис чидип, Иеговага бараалгаарын безин соксадып болур бис. Бо статьяга: 1) Иегова бисти эскерип турар, 2) шиитпирлеривис шын болганынга база 3) Иеговага ам-даа херек бис дээрзинге чигзинер болзувусса, Библия канчаар дузалаарын сайгарар бис.
ЧИГЗИНИГЛЕРНИ ШИИТПИРЛЭЭРИНГЕ ЧҮҮ ДУЗАЛААР?
3. Чигзиниглер тыптып кээрге, чүнү канчаар болза эки?
3 Чигзиниглер тыптып кээрге, сүмени Бурганның Сөзүнден алыры чугула. Ынчан Иеговага бүзүреливис улам күштелирге, оон быжыг туттунуп шыдаар бис (1 Кор. 16:13).
4. «Шуптузун хынап чаңчыгыңар» деп сүмениң утказы кандыг? (1 Фессалоникчилерге 5:21).
4 Номчуптуңар: 1 Фессалоникчилерге 5:21. Библия бисти: «Шуптузун хынап чаңчыгыңар» — деп кыйгырган. Ону канчаар кылып болур? Бир-ле чүүлге бүзүрээриниң бетинде Библияга дүгжүр бе деп хынаңар. Элээди оол ону Бурган үнелээринге чигзинип турар дижик. Башка кирген бодал-ла шын болбас. Ынчангаш Библияны ажыткаш, Иегованың аңаа хамаарылгазы херек кырында кандыызын, ол оол билип алыр ужурлуг.
5. Айтырыывыска Иегованың харыызын канчаар «дыңнап» болур бис?
5 Библияны номчуурда, Иегованың үнүн «дыңнап» турар бис. Бир-ле айтырыгга ооң бодалын билип алыксаар болзуңарза, күжениишкиннер үндүрери чугула. Темаңарга хамаарышкан библейжи шүлүктерни дилеңер. Ынчан ном-дептеривисти шинчилээри чугула (У. ч. 2:3—6). Иеговадан ооң көрүжүн билип алыр дээш, дузаны болгаш удуртулганы дилеңер. Оон байдалыңарга тааржыр библейжи дүрүмнерни, ажыглаар сүмелерни тып ап болур. Силер ышкаш байдалга таварышкан бараалгакчыларның дугайында төөгүлерни сайгарары база ажыктыг.
6. Чигзиниглерни шиитпирлээринге ужуражылгаларывыс канчаар дузалап турар?
6 Чыыштар таварыштыр Иегованы дыңнап турар бис. Хуралдарже доктаамал баар болзувусса, айтырыывыстың харыызын илеткелден азы акы-угбаларның харыыларындан тып ап болур бис (У. ч. 27:17). Бурганның бараалгакчыларынга кандыг чигзиниглер тыптып болурун көрээлиңер.
ИЕГОВА МЕНИ ЭСКЕРИП ТУРАР БЕ?
7. Кижилерге чамдыкта кандыг айтырыг тыптып болур?
7 «Иегова мени эскерип турар бе?» — деп боданган сен бе? Бодуңну чөгенчиг кылдыр миннип турар болзуңза, Октаргайның Чаяакчызы-биле найыралдажып алыры болдунмас ышкаш сагындырар. Давид хаан шак ындыг минниишкиннерлиг турган чадавас. Иегова кижилерже чүү дээш кичээнгей салырын кайгааш, ол бир катап Иеговадан: «Кижи деп кымыл ол, Сен ол дээш чүге сагыш човаар сен?» — деп айтырган (Ыд. ыр. 143:3). Иегова хууда сен дээш сагыш човап чоруурун канчаар билип ап болур?
8. Иегова кижилерниң кандыг талазынче кичээнгей салыр? (1 Хааннар 16:6, 7, 10—12).
8 Шупту кижилерни, улус үнелевес кижилерни безин, Иегова эскерип турарын Библиядан билир бис. Чижээ, Иегова бир катап Иессейже Самуилди айбылаан. Ооң сес оглунуң бирээзин Израильдиң хааны кылдыр чаап каарын дааскан. Хеймеринден өске шупту оолдарын Иессей кыйгырып эккелген. Ынчалза-даа Иегова хеймерин, Давидти b, шилип алган. (Номчуптуңар: 1 Хааннар 16:6, 7, 10—12.) Өске улустуң эскербээн чүүлүн Иегова көрген — элээди Давид аңаа дыка ынак турган.
9. Иегованың сени дыка эки билири чүден көскү? (Чурукту база көрүңер.)
9 Иегова сени эскерип турарын канчаар көргүзерин, бодап көрем. Ол сээң хууда байдалыңга тааржыр сүмени берип турар (Ыд. ыр. 31:8). Сени ол дыка эки билир деп оон көскү эвес-тир бе? (Ыд. ыр. 138:1). Иегованың сүмезин ажыглааш, ажыын көргеш, чуртталгаңда ооң киржилгези барын билип каар сен (1 Чыл. 28:9; Аж.-ч. 17:26, 27). Аңаа бараалгаар, дыңнангыр боор дээш кызарыңны Бурган көрүп турар. Ол сээң чараш шынарларыңны үнелээр, сээң-биле чоок өңнүктежирин күзээр (Иер. 17:10). Ооң чалалгазын хүлээп алгаш, өңнүү болурун чөпшээрээр болзуңза, Бурган дыка өөрүүр (1 Ин. 4:19).
«Чүткүүр болзуңза, [Иегованы] тып аар сен» (1 Чыл. 28:9, ЧД) (абзац 9). c
ШИИТПИРЛЕРИМ ШЫН БЕ?
10. Эрткен үени сактып кээривиске, биске кандыг чигзиниглер тыптып болур?
10 Чамдык христианнар эрткен чуртталгазын сактып, хүлээп алган шиитпирлеринге чигзине бээр. Иеговага хөй бараалгаар дээш, олар эки төлевирлиг ажылын азы бизнезин кагган чадавас. Чылдар эрткенде көөрге, ажылды шилип алган улус чедиишкинниг, кандыг-даа сагышсырал чок чурттап чоруур ышкаш. Ынчангаш: «Иеговага бараалгаар дээш, үндүрген шиитпирим шын болган бе? Азы ол дээш өске аргаларны чидирип алган мен бе?» — дээн ышкаш чигзиниглер тыптып болур.
11. 72-ги Ырының автору чүү дээш муңгараан?
11 Ындыг бодалдар кирер болза, 72-ги Ырыны көөрү ажыктыг. Ооң автору ол ышкаш байдалга таварышкан. Өске улус Бурганга бараалгавайн-даа кадыы быжыг, бай-шыырак, бергелер чок чурттап чоруурун ол көрген (Ыд. ыр. 72:3—5, 12). Оларга бодаарга, ооң чуртталгазы ужур-утка чок ышкаш сагындырган. Кударанчыг бодалдардан ол «хүннү бадыр хинчек көрүп» келген (Ыд. ыр. 72:13, 14). Багай бодалдардан ол канчаар адырлып алган?
12. Ыр күүседикчизинге кударанчыг бодалдардан адырлып алырынга чүү дузалаан? (Ырлар 72:16—18).
12 Номчуптуңар: Ырлар 72:16—18. Ыр күүседикчизи Иегованың өргээзинге баргаш, оожум байдалга, бараалгакчылар аразынга шупту чүвеже шын көрүштүг апарган. Кижилерниң амгы үеде чуртталгазы магалыг ышкаш-даа болза, келир үези чогун ол билип каан. Чуртталгазында Иеговага бараалгалды бирги черге салып, шын шилилгени кылганынга шынзыккаш, ол оожургаан. Ынчалдыр ооң улаштыр Иеговага шынчы бараалгаар күжү тыптып келген (Ыд. ыр. 72:23—28).
13. Чамдык шиитпирлериңер дээш хараадай берген болзуңарза, чүнү кылыры чугула? (Чурукту база көрүңер.)
13 Эрткен шиитпирлериңер дээш хараадаар болзуңарза, оожургалды минниринге чүү дузалаар? Силерде бар бүгү эки чүүл дугайында боданыңар. Иегова силерни деткип турар, кайы хире бай-дыр силер! А Бурганга бараалгавас улусту чүү манап турар? Оларның күзели, идегели, чедиишкини чүгле бо делегей-биле тудуш. Ынчангаш эки ажыл-агый, чуртталганың таалалдары — чедиишкини чүгле ол. А бисти Иеговадан төнчү чок кайгамчыктыг белектер манап турар (Ыд. ыр. 144:16). Өске шилилге кылган болзувусса, чуртталгавыс кандыг болурун билбес боор бис. Бурганга болгаш чанывыста кижилерге ынакшылга башкартып, шиитпирлер хүлээр болзувусса, чедиишкинге база ёзулуг аас-кежикке чедирер деп ыяк билир бис.
Иегованың силерге белеткеп каан кайгамчык келир үениң дугайында хөй боданырын кызыңар (абзац 13). d
ИЕГОВАГА АМ-ДАА ХЕРЕК МЕН БЕ?
14. Чамдык христианнар кандыг бергелерлиг, оларга кандыг айтырыг тыптып болур?
14 Иегованың чамдык бараалгакчылары назылап кыраанындан, кадыы кошкаанындан азы инвалид болганындан ооң мурнунда ышкаш хөйнү кылып шыдавас апаар. Боттарын ажык чок кылдыр миннип: «Иеговага ам-даа херек мен бе?» — деп айтырып болур.
15. 70 дугаар Ырының автору чүү чүвеге чигзинмээн?
15 70 дугаар Ырының авторунуң сагыжы база ол дээш аарып турган чадавас. Ыр күүседикчизи: «Шыдал-күжүм суларай бээрге, мени кагба» — деп мөргүп турган (Ыд. ыр. 70:9, 18). Бодун кошкак кылдыр миннип турза-даа ол шынчы артар болза, Бурган ону деткиир деп чигзинмээн. Амгы үеде Иегованың көрүжү өскерилбээн: бар күжүвүстү канчаар ажыглаарывыс аңаа чугула (Ыд. ыр. 36:23—25).
16. Назылай берген бараалгакчылар Иеговага болгаш өске акы-угбаларга чүнү кылып болур? (Ырлар 91:13—16).
16 Назылай берген эргим акы-угбаларывыс! Бодуңарже Иегова ышкаш көөрүн кызыңар. Силерниң кызыгаарларыңарга ол торулбас дээрзин утпаңар — ол силерге кандыг-даа назыда чечектелиринге дузалаар. (Номчуптуңар: Ырлар 91:13—16.) Шыдавас чүүлдер орнунга, кылып шыдаар ажылдарыңарже кичээнгейни салыңар. Шынчы бараалгап чорууруңар, херек кырында акы-угбаларны дыка-ла сорук киирер. Хууда сонуургалды илередип тургаш, оларны быжыктырып болур силер. Чылдар дургузунда Иегова силерни канчаар деткип келгенин база чаа делегейден чүнү ылаңгыя манаарыңарны оларга чугаалаңар. Акы-угбалар дээш мөргүүр болзуңарза, олар кайы хире өөрүүр ийик! (1 Пет. 3:12). Кандыг-даа байдалда кижи бүрүзү Иеговага база өске улуска бир-ле чүвени кылып болур.
17. Чүге бодун өске улус-биле деңневес болза эки?
17 Иеговага эвээш бараалгаан ышкаш болзуңарза, муңгараваңар. Кылып турар бүгү чүүлүңерни ол үнелээр. Бодуңарны өске улус-биле деңнээр боор силер. Ынчаар кылбаңар. Иегова силерни кым-биле-даа деңневес болгай (Гал. 6:4). Бодап көрүңерем, Мария Иисуска аар өртектиг чаагай үс белекке берген (Ин. 12:3—5). А дулгуяк херээжен өргээге чүгле ийи көпеек салган (Лк. 21:1—4). Ынчалза-даа Иисус ол ийи херээженни деңневээн. Аңаа оларның белээниң өртээ эвес, а бүзүрели чугула турган. Иегова бараалгакчыларынче база шак ындыг көрүштүг. Ынчангаш ынакшыл болгаш бүзүрел-биле кылган бүгү чүүлүңер аңаа дыка үнелиг!
18. Чигзиниглерни шиитпирлээринге биске чүү дузалаар? ( «Иегованың сөстери чигзиниглерни шиитпирлептер» деп көзенекти база көрүңер.)
18 Үе-үе болгаш, биске шуптувуска чигзиниглер тыптып кээп болур. Аңаа Библия дузалаарын көрдүвүс. Айтырыгларыңар харыызын оон дилээр болзуңарза, чигзиниглер орнунга бүзүрелиңер быжыгар. Иегова хууда силер дээш сагыш салыр деп билир боор силер. Шупту чидириглерге белен болганыңарны ол үнелээр, албан шаңнаар. Иегова шынчы бараалгакчыларынга бердинген ынакшылдыг база олар дээш сагыш човаар деп сактып чоруңар.
ЫРЫ 111 Өөрүшкүнүң чылдагааннары
a ТАЙЫЛБЫР. Иегова кижини үнелевес азы хүлээп алган шиитпирлери шын эвес деп чигзиниглер тывылдырар бодалдарны бо статьяга сайгарар. Ол чигзиниглер Иеговага болгаш ооң аазаашкыннарынга бүзүрелдиң кошкаан илеретпейн турар.
b Иегова Давидти каш харлыында шилип алганын Библияда чугаалаваан. Ол ынчан элээди турган чадавас. («Таңныыл суургазын» көрүңер, 2011 чыл, сентябрь 1, ар. 29, абз. 2.)
