1, 2. а) Чугаалар 16:31-ден алырга, улуг назылыг акы-угбаларга кандыг хамаарылга көргүзер ужурлуг бис? б) Бо статьядан кандыг айтырыгларның харыызын тып алыр бис?

АМЕРИКАНЫҢ Арканзас штадында паркче агаарлап кирген улус алмазтарны тып ап болур. Ол үнелиг даштарның чамдыызы анаа чер кырында чыдар. Ынчалза-даа бир чүүл бар — олар хевир киирип, сиилбиттинмээн. Ынчангаш улус алмазты көргеш-даа, билбес болгаш, кылаштажып эрте бээр.

² Бурганга шынчы акы-угбалар база шак ындыг алмазтарга дөмей. Олар дыка үнелиг! Безин Бурганның Сөзүнде: «Буурул баш — алдарлыг оваадай» — деп бижээн. (Номчуптуңар: Чугаалар 16:31; 20:29.) Улуг назылыг улусту кижилер шоолуг үнелевес боор. Бис оларның чаражын эскерип өөренип алыр болзувусса, кандыг-даа бай-байлакшылдан артык улуг эртине-байлакты тып алганывыс ол боор. Аңаа хамаарыштыр үш айтырыгны көрүптээлиңер: 1) Иегова улуг назылыг бараалгакчыларын чүге үнелиг даштарга дөмейлээн? 2) Иегова организациязында кандыг чугула черни оларга берген? 3) Улгады берген улус дуржулгазы-биле үлежир кылдыр, чүнү канчап болур бис?

3. Иегова улуг назылыг шынчы бараалгакчыларын чүге үнелеп турар? (Ыд. ыр. 91:13—16).

³ Иегова улуг назылыг шынчы бараалгакчыларын аажок үнелеп турар. Ол оларны дыка эки билир база оларның кайгамчык шынарларын үнелеп чоруур. Бүгү назынында шынчы бараалгап чораан улуг назылыг бараалгакчылары арга-дуржулгазын аныяктарга дамчыдарга, Ол өөрүп турар (Иов 12:12; У. ч. 1:1—4). Иеговага оларның быжыг туруштуу база  дыка үнелиг (Мал. 3:16). Амыдырал-чуртталгазынга бергелерни көрүп чораан-даа болза, бүзүрелин быжыг хевээр кадагалап артырып алганнар. Олар идегелиниң одун өжүрбээн, харын-даа ол ам оон-даа хып чоруур. Улгадып назылаан-даа болза, эргим акы-угбаларывыс Бурганның адының дугайында улуска чугаалап чоруур. Иегова ол дээш оларга дыка ынак. (Номчуптуңар: Ырлар 91:13—16.)

4. Улуг назылыг акы-угбаларывысты чүү оожургадып болур?

⁴ Хүндүткелдиг улуг назылыг акы-угбалар, Иегова ажыл-херээңерни кажан-даа утпас деп чигзинмеңер! (Евр. 6:10). Суртаал ажылынга ынааңар дээрде Адавысты өөртүп турар. Чуртталгаңарда эвээш эвес шенелделерге — безин аар-берге шенелделерге — таварышкаш, төлептиг ажып эртип турган силер. Хөй чылдар дургузунда библейжи дүрүмнерни ажыглап, чыышта шыңгыы даалгаларны күүседип база өскелерни өөредип чораан силер. Оон аңгыда, Иегованың организациязы-биле деңге чоруурун кызып база долу бараалгакчыларны деткип турган болгай силер. Бурганывыс Иегова чаныш-сыныш чок бүзүрелиңер дээш силерге дыка ынак база «Бодунга бердинген улусту кагбас» деп аазап турар (Ыд. ыр. 36:28). Иегова силерге: «Буурул-даа апаарыңарга, Мен-не силерни көдүрүп чоруур мен» — деп чугаалаан (Иса. 46:4). Ынчангаш назы-харыңарның улгатканындан Иегованың организациязында үне чок мен деп черле бодаваңар. Силер биске эргежок чугула силер!

5. Улуг назылыг акы-угбалар чүнүң дугайында утпас болза эки?

⁵ Улуг назылыг акы-угбалар Иегованың организациязынга хөй чүүлдү кылып болур. Олар аныянда дег күштүг эвес-даа болза, чылдар дургузунда чыып алган хөй дуржулгалыг. Иегованың амгы үеде безин оларга бээр даалгалары бар. Ону эрткен болгаш амгы үениң бараалгакчыларының чижээ бадыткап турар.

6, 7. Бердинген чоруу дээш шаңнал алган улуг назылыг Бурганның бараалгакчыларының чижектерин чугаалаңар.

⁶ Назы-хары улгады бергеш-даа, Бурганның даалгаларын күүседип чораан бараалгакчыларның дугайында Библияда бижээн. Чижээ,  Моисей 80 хире харлыг турда, Иегова ону израиль чоннуң баштыңы болгаш медээчизи боор кылдыр шилип алган. А Даниил медээчи 90 хар ажып турда, Иегова аңаа Бодунуң адындан чугаалаарын дааскан. Иоанн элчин ыдыктыг сүлдеге бүргеткеш, Ажыдыышкын номун бижип турган үезинде база ол хире харлыг турган.

⁷ Библияны номчуп тургаш, Бурганның чамдык шынчы бараалгакчыларының дугайында ийи-чаңгыс катап бижээн боорга, кижи оларны эскербейн барып болур. Ынчалза-даа Иегова оларга кичээнгейни көргүзүп, шынчы чоруу дээш оларны шаңнаан. Чижээ, «чөптүг-шынныг, Бурганга бердинген» Симеоннуң дугайында Библияда чүгле чаңгыс катап бижээн. Ынчалза-даа Иегова ону эки билир турган. Ол Симеонга чаш Иисусту көөр база Иисустуң болгаш ооң авазының дугайында өттүр медеглээр улуг алдар-хүндүнү көргүскен (Лк. 2:22, 25—35). Кажан-даа Бурганның өргээзин каап көрбээн, 84 харлыг дулгуяк Анна медээчини база сактып кээлиңер. Амгы үе-биле алыр болза, Анна чаңгыс-даа чыыш үспейн чораан. Иегова база аңаа чаш Иисусту көөр арганы берген. Чигзиниг чок, Симеон биле Анна Иеговага эң үнелиг турган (Лк. 2:36—38).

8, 9. Дулгуяк акы-угбаларывыс ха-дуңмага кандыг үлегер көргүзүп турар?

⁸ Амгы үеде база кайгамчык үлегерни көргүзүп чоруур улуг назылыг акы-угбаларывыс дыка хөй. Чижээ, Лоис Дидурнуң төөгүзүн көрүптээлиңер. Ол 21 харлыында Канадага тускай эгелекчи кылдыр бараалгап эгелээн. Оон ашаа Джон-биле хөй чылдар дургузунда эргий кезиир бараалгалга киржип чораан. Ооң соонда олар 20 хире чыл ишти Канадада Вефилге бараалгап турганнар. Лоис 58 харлыг турда, оларны Украинаже көжерин сүмелээн. Олар канчалган? Ол хире назы-харлыг улус колдуунда өске черже көжеринден дидинмес боор, ынчалза-даа олар өөрүшкүлүг чөпшээрешкен. Джонну Украинада салбыр комитединиң кежигүнү кылдыр томуйлап каан. Муңгаранчыг чүүл, Джон 7 чыл эрткенде чок апарган, ынчалза-даа Лоис Украинада салбырга бараалгап артып каар деп шиитпирлеп алган. Ам ол 81 харлыг, ынчалза-даа Иеговага ооң мурнундаазында дег хөйнү кылып чоруур. А Вефилде ха-дуңмазы аңаа дыка ынак.

⁹ Лоис ышкаш угбаларывыс ашаа дириг турганында дег шоолуг эскертинмес боор. Ынчалза-даа олар ам-даа үнелиг алмазтар-дыр! Хөй чылдар дургузунда ашаан деткип база Бурганга ам-даа бердинген бооп чорууру дээш, Бурган оларга өөрүп четтирип турар (1 Тим. 5:3). Оон аңгыда, ындыг угбаларывыс аныяктарга шынап-ла улуг деткимче-дир.

10. Тони акывыс биске кандыг чараш үлегерни көргүзүп турарыл?

¹⁰ Оон ыңай биске бажыңындан үнүп шыдавас азы үргүлчү ажаалда херек улуг назылыг акы-угбаларывыс дыка үнелиг. Каттышкан Штаттарда хоочуннар бажыңында чурттап турар Тони дээр акывыстың чижээн көрүптээлиңер. 1942 чылдың сес айда 20 харлыг  тургаш, ол сугга суктуруп алган. Үр болбаанда ону политикага киришпээни дээш ийи чылга шиидип каан. Тони кадайы Хильда-биле оглун, кызын алыс шынга өөредип кижизидип алганнар. Ол чылдарның дургузунда Тони үш чыышка удуртукчулар чөвүлелиниң башкарыкчызы бооп база шуулганнар хайгааракчызы кылдыр бараалгап чораан. Оон аңгыда, ол бир кара-бажыңга чыыштарны эрттирип база хоругдаттырганнар-биле библейжи кичээлдерни эрттирип турган. Ам Тони 98 харлыг. Ынчалза-даа ол Иеговага бараалгаарын соксадыр хире эвес. Ол бо хүнге дээр Иеговага шыдаар шаа-биле хөйнү кылып, чыыжы-биле сырый ажылдажып чоруур.

11. Үргүлчү ажаалда херек улуг назылыг акы-угбаларга хүндүткелди канчаар көргүзүп болур бис?

¹¹ Үргүлчү ажаалда херек улуг назылыг акы-угбаларга хүндүткелди канчаар көргүзүп болур бис? Суртаалга доктаамал киржиринге, чыыштарже баарынга азы программаны бажыңынга дыңнаарынга хуралдың удуртукчулары оларга дузалажып турар. А бистиң оларже барып азы видео-харылзаа таварыштыр аралажыр аргавыс бар. Чыыжының девискээринде чурттавайн турар акы-угбаларга, чижээ, Иегованың Херечизи эвес төрелиниң азы хоочуннар бажыңында чурттап турар акы-угбаларга, кичээнгейни көргүзери ылаңгыя чугула. Оон башка оларны уттуп болур айыыл бар. Улгады берген чамдык улус бодунуң дугайында чугаалаарындан эпчоксунар. А бир эвес бис олар-биле аралажыр үени үндүрүп, Иеговага бараалгап чораан үелерин чугаалап бээр кылдыр дилээр болзувусса, боттарывыска ажыктыг чүүлдү билип алыр бис.

12. Чыыжыңарда улуг назылыг акы-угбалар-биле чоок таныжып алыр болзуңарза, силерге чүзү-биле ажыктыг боор?

¹² Чыыжыңарда улуг назылыг акы-угбалар-биле чоок таныжып алыр болзуңарза, оларның быжыг бүзүрелин кайгап ханмас силер. Чижээ, Харриетт дээр угбавыс 1920 чылдарда сугга суктуруп алгаш, Американың Нью-Джерси штадында чыыжынга он-он чылдар дургузунда бараалгап келген. Оон ол уруунуң чанынче көже берген. Ооң чаа чыыжында акы-угбалар Харриетт-биле чоок таныжып алыр дээш, үени үндүрүп чугаалашкаш, ону ёзулуг эртине деп билип каан. Сугга суктурганының соонда Харриетт-биле болган төөгүлер оларны ылаңгыя кайгаткан. Ол суртаалче үнериниң бетинде, кара-бажыңче суп калза канчаар деп бодааш, диш чуур щётказын үргүлчү ап алыр турган. Шынап-ла, ону 1933 чылда ийи катап бир неделя ишти кара-бажыңнап турган. Ооң ашаа Иегованың Херечизи эвес-даа болза, Харриетти деткип, ол кара-бажыңга турда, үш ажы-төлүн азырап турган. Харриетт ышкаш Бурганга шынчы улуг назылыг акы-угбаларывыс оларны үнелээринге төлептиг!

13. Иегова улуг назылыг бараалгакчыларынга организациязында кандыг черни берген?

¹³ Иегова улуг назылыг бараалгакчыларынга организациязында чугула черни берген. Иегованың оларны-даа, организациязын-даа деткип чораанын олар бүгү назынында көрүп келген. Оларның чуртталгазынга частырыглар турган, ынчалза-даа олар оон өөренирин кызып турганнар. Ол акы-угбаларны «мерген угаанның үнер дөзү» кылдыр көрүп, оларның дуржулгазындан өөрениңер (У. ч. 18:4). Оларны оон-даа эки билип алыр болзуңарза, бүзүрелиңер быжыгып, хөй чүүлдерге өөренип алыр силер.

14. Ыдыктыг хоойлуну катаптааны 32:7-де сөстер аныяктарны чүү чүвеже оттуруп турар?

¹⁴ Бир дугаар базымны кылып, улуг назылыг акы-угбалар-биле чугаалажыңар. (Номчуптуңар: Ыдыктыг хоойлуну катаптааны 32:7.) Ийе, оларның караа четпес, кылаштаары оожум база үнү ындыг кончуг өткүт эвес.  Ынчалза-даа олар сеткилинде ам-даа аныяк хевээр база Иегованың ээ көрүүшкүнүн чаалап алганнар (Эккл. 7:1). Иеговага олар үнелиг деп черле утпаңар база оларга хүндүткелди көргүзүңер. Элисей ышкаш болуңар. Элисей Илия-биле сөөлгү бараалгап турган хүнүнде ону кагбаан. Ол үш катап: «Силерни черле кагбас мен!» — дээн (4 Хаан. 2:2, 4, 6).

15. Улуг назылыг акы-угбалардан кандыг айтырыглар салып болур?

¹⁵ Улуг назылыг улустан чуртталгазының дугайында эвилең-ээлдек, хүндүткелдиг сонуургап айтырыңар (У. ч. 1:5—6; 1 Тим. 5:1, 2). Олардан мынча деп айтырып болур силер: «Алыс шынны тып алганыңарга силерни чүү бүзүреткен? Чуртталгаңарда кандыг болуушкун силерни Иеговаже чоокшулаткан? Иеговага хөй чылдар дургузунда өөрүшкүлүг бараалгаарынга силерге чүү дузалап турар?» (1 Тим. 6:6—8). Оон оларны кичээнгейлиг дыңнаңар.

16. Улуг назылыг-даа, аныяк-даа улус бот-боттары-биле аралашкаш, кандыг ажык-дузаны ап болур?

¹⁶ Улуг назылыг улус-биле аныяктар аралажыр болза, оларның кайызынга-даа ажык-дузалыг боор (Рим. 1:12). Иегова шынчы бараалгакчылары дээш сагыш човап чоруур деп чүүлге аныяктар оон-даа шынзыгар. А улуг назылыг улус ха-дуңма оларга ынак, оларны үнелээр деп чүүлдү миннир боор. Оон аңгыда, улгады берген акы-угбалар бердинген чоруу дээш Иеговадан кандыг йөрээлдер ап чораанын үлешкеш, өөрүшкүнү миннир.

17. Улуг назылыг акы-угбаларывыстың чаражы чүге чылдан чылче дам бар чыдар?

¹⁷ Назы-хар улгадырга, кижиниң чаражы чечек ышкаш чоорту оңа бээр-даа болза, Иегованың караанга ооң чаражы чылдан чылче дам бар чыдар (1 Фес. 1:2, 3). Чүге дизе олар хөй чылдар дургузунда Бурганның ыдыктыг сүлдезинге боттарын эдип-чазаарын база кайгамчыктыг чараш шынарларны сайзырадырын чөпшээреп турганнар. Бир эвес улуг назылыг акы-угбалар-биле чоок таныжып алгаш, оларның үлегерин өттүнер болзувусса, олар үнелиг база хүндүткелге төлептиг деп көрүп каар бис!

18. Дараазында статьяга чүнү сайгарар бис?

¹⁸ Чыыш менди-чаагай болзун дизе, аныяктар улуг назылыг акы-угбаларын үнелээр ужурлуг. Ынчалза-даа улуг назылыг акы-угбалар база аныяктарны үнелээр болза эки. Ону канчаар кылып болурун дараазында статьяга сайгарар бис.