1. Чыыштан үндүртүп алган кижиниң улузу чүнү миннип болур?

СИЛЕРНИҢ чоок кижиңерни чыыштан үндүрген бе? Ол чүүл кижиге дыка улуг согуг болур! Хильда * мынчаар үлешкен: «41 чыл ишти кады чурттап келген өөм ээзи чок апаарга, оон артык багай чүүл турбас деп бодаан мен. Ынчалза-даа кажан оглум чыыштан чорупкаш, кадайын, ажы-төлүн кааптарга, ол оон-даа артык коргунчуг болган».

2, 3. Бараалгакчылары Оон хая көрнү бээрге, Иегова чүнү миннип турарыл? (Ырлар 77:40—42).

² Кажан дээрниң төлээлери Иеговадан хая көрнү бээрге, Аңаа кайы хире аарышкылыг болган деп бодаар силер! (Иуда 6). А израиль чон чеже катап Ону хомудатканыл! Бурган оларга ынакшылды көргүзерге, олар Ону тооп дыңнаар хамаанчок, Аңаа удур катап-катап тура халып-ла турган. (Номчуптуңар: Ырлар 77:40—42.) Чоок улузуңар Иегованы кааптарга, эриг баарлыг дээрде Адавыс силерни дыка эки билип турар база силерниң-биле кады сеткилинден хомудап турар. Ол силерниң чүнү миннип турарыңарны кымдан-даа артык билир база силерни албан деткиир деп бүзүреңер.

³ Иегованың деткимчезин алыр дизе, чүнү кылып болурувусту бо статьядан билип алыр бис. Ол ышкаш чыыштан үндүрткен төрелдерлиг акы-угбаларга канчаар дузалап болурувусту сайгарар бис. Баштай кандыг бодалдарга алыспас ужурлуг бис, билип алыылыңар.

4. Иегованы каапкан төлдүг ада-иелер чүнү миннип турарыл?

⁴ Иегованы каапкан ажы-төлдүг ада-иелер боттарын буруудадып, бир-ле чүүлдү чедир кылбаан бис деп бодаар. Чижээ, оглун чыыштан үндүрүптерге, Льюис дээр акывыс мындыг минниишкиннерлиг турган: «Мен бодумну буруудадып, коргунчуг  дүштер дүжеп турган мен. Ыглап-даа турдум, чүрээм саргып аарып турган». Шак ындыг чүүлге таварышкан Элизабет база хинчектенип, мынча деп бодап турган: «Мен чүнү шын эвес кылган кижи мен? Оглумну Иеговага ынак боор кылдыр кижизидип шыдаваан болган-дыр мен, шупту буруу чүгле менде».

5. Бир кижи Иеговадан чорупкан болза, ол дээш харыысалганы кым чүктээр ужурлуг?

⁵ Иегова биске хостуг эргени берген. Өскээр чугаалаарга, Бурганны дыңнаар-дыңнавазын боттарывыс шиитпирлээр ужурлуг бис. Ада-иезиниң эки үлегерин көрбейн чораан чамдык аныяк оолдар, кыстар Иеговага бараалгаар деп шиитпирлеп алган. Олар Аңаа шынчы бараалгап чоруур. А чамдык ада-иелер ажы-төлүн Бурганга ынак боор кылдыр кижизидип өстүрген. Ынчалза-даа уруглары өзүп келгеш, Иеговадан хая көрнү берген. Канчап-даа кээрге, кижи бүрүзү Иеговага бараалгаар-бараалгавазын боду шиитпирлээр ужурлуг (Иис. 24:15). Ынчангаш эргим ада-иелер, ажы-төлүңер Бургандан чорупкан болза, бодуңарны черле буруудатпаңар!

6. Ада-иезиниң бирээзи алыс шынны кааптарга, ажы-төлүнге кандыг салдар чедирер?

⁶ Ада-иезиниң бирээзи алыс шынны кааптар таварылгалар база бар. Безин ол өг-бүлезинден чоруп болур (Ыд. ыр. 26:10). Шак ындыг чүүл ажы-төлге улуг аарышкы чедирер, чүге дизе ада-иези оларга үлегер-чижек болгай. Ачазы чыыштан үндүртүп алган Эстер мынча дээн: «Ачам алыс шындан анаа-ла ырай бербээн, ооң Иеговадан өжегерээн чорупканын көргеш, бо-ла ыглаар турган мен. Ачамга ынак мен, ынчангаш ону чыыштан үндүрүптерге, ол дээш үргүлчү дүвүреп турган мен. Анаа-ла хей чылдагаан чокка чүрээм дүргедеп, коргар апарган мен».

7. Ада-иези чыыштан үндүрткен ажы-төлге хамаарыштыр Иегова чүнү миннип турар?

⁷ Чыыштан үндүрткен ада-иелиг эргим дуңмаларывыс, бистиң сагыш-сеткиливис силерниң ышкаш аарып турар. Иегова силерниң чүнү миннип турарыңарны, силерге кайы хире аарышкылыын кымдан-даа артык эки билир деп утпаңар. Аңаа бердинген бооруңарга, Ол силерни үнелеп турар база силерге ынак. Ада-иеңерниң шиитпирлери дээш харыысалга чүктевес силер. Чүге дээрге Иегова кижи бүрүзүнге хостуг шилиир эргени берген болгай. Бурганга чуртталгазын бараалгаткан, сугга суктурган кижи бодунуң үүрге-чүъгүн чүктээр ужурлуг (Гал. 6:5).

8. Чоок улузувус чыыштан үндүртүп алган үеде чүнү кылып болур бис? ( «Иеговаже эглип кел» деп көзенекти көрүңер.)

⁸ Чоок киживис Иеговадан чоруптарга, кажан-бир ол черле эглип кээр деп идегээр бис. Амдыызында чүнү кылып болур бис? Иегова-биле харылзаавысты быжыктырарын кызаалыңар. Ынчан бис чоок улузувуска, безин үндүртүп алган киживиске, эки үлегер болур бис. Оон аңгыда, муңгаранчыг миннишкиннер-биле туржур күштүг боор бис. Биске чүү дузалап болурун сайгарыптаалыңар.

9. Иеговага бисти деткиир арганы канчаар берип болур бис? ( «Чыыштан үндүртүп алган кижиниң төрелдеринге деткимче боор библейжи шүлүктер» деп көзенекти көрүңер.)

⁹ Бараалгал графигинден быжыг туттунуңар. Бодуңарның болгаш өг-бүлеңерниң Бурган-биле чоок хамаарылгазы дээш сагыш човаарын  уламчылаңар. Ону канчаар кылып болур? Бурганның Сөзүн доктаамал номчуп, ооң дугайында ханы боданыңар база чыыштарны үспеңер. Шак ынчаар Иеговага силерни быжыглаар арганы берип турар силер. Улуг угбазы чыыштан үндүртүп алган Джоанна мынча дээн: «Библиядан Авигеяның, Эсфирниң, Иовтуң, Иосифтиң база Иисустуң дугайында номчааш, сагыш-сеткилимге оожургалды миннир чордум. Оларның төөгүзү меңээ муңгаранчыг бодалдар-биле туржурунга дузалап турар. Оон аңгыда, сайтыда ырыларывыс мени деткип, сорук киирип турар».

10. Ырлар 31:6—8-те сөстер муңгаранчыг минниишкиннер-биле туржурунга канчаар дузалап турар?

¹⁰ Иеговага дүвүрелдериңерни чугаалап бериңер. Кажан силерни багай бодалдар хөме ап, сагыш-сеткилиңер хоозурай бээрге, ол байдалче Иегованың ышкаш көрүштүг боор дээш, Оон дузадан дилеңер. Ынчан ынакшылдыг Адавыс силерге мерген угаанны берип, шын орукче углаар. (Номчуптуңар: Ырлар 31:6—8.) Минниишкиннериңни үндүр чугаалаары берге бооп болур. Ынчалза-даа Иегова чүрээңерниң кайы хире балыгланганын көрүп турар. Ол силерге аажок ынак, сеткил-чүрээңерни Аңаа ажыдып мөргүүрүңерни дилеп турар (Хост. 34:6; Ыд. ыр. 61:7, 8).

11. Еврейлерге 12:11-ден алырга, Иегованың кижини чыыштан үндүрген шиитпиринге чүге бүзүрээр ужурлуг бис? ( «Чыыштан үндүрери — ынакшыл илередип турар кеземче» деп көзенекти көрүңер.)

¹¹ Удуртукчуларның үндүрген шиитпирин деткиңер. Чыыштан үндүрер хемчегни Иегова чонунга ынак болгаш, тургузуп каан. Ол хемчег шупту улуска, безин бачыт кылган кижиге, ажыктыг боор. (Номчуптуңар: Еврейлерге 12:11.) Чамдыкта шииткел комитединиң үндүрген шиитпирин чыышта бир кижи шүгүмчүлеп болур. Ындыг кижи чыыштан үндүрткен кижиниң багай талаларын чажырар дээш ынчаар алдынар. Ынчалза-даа байдалды долузу-биле билбес бис деп сактыры  чугула. Удуртукчулар шиитпирни библейжи дүрүмнерге үндезилеп, Дээрги-Чаяакчының адындан шииткелди үндүрген деп чигзинмес болзувусса, мерген угаанныг болур (2 Чыл. 19:6).

12. Иегованың кеземче хемчеглелдерин чүге деткиир болзувусса эки? Чижекти чугаалаңар.

¹² Чоок кижиңерни чыыштан үндүрүптер дээн удуртукчуларның шиитпирин деткиир болзуңарза, ол кижиге Иеговаже катап эглип кээринге дузалаар силер. Кырында чугаалашканывыс Элизабет улаштыр мынча дээн: «Оглувус-биле харылзааны шуут соксадыры биске дыка берге турган. Ынчалза-даа оглувус дедир эглип келгеш, ол кеземчениң чөптүүн база өөредиглиг болганын чугаалаан. Иегова шупту чүвени шын кылып турар деп ам черле чигзинмес мен». Элизабеттиң ашаа Марк үлешкен: «Үе эрткенде, оглум ооң-биле харылзашпайн баарывыска, дедир эглип кээр деп шиитпирлеп алганын чугаалаан. Дыңнангыр болурунга Иегованың биске дузалааны дээш дыка өөрүүр-дүр мен!»

13. Муңгаранчыг бодалдар-биле канчаар туржур?

¹³ Силерни эки билип шыдаар эштериңер-биле сагыш-сеткилиңерни үлежиңер. Бурган-биле харылзаазы быжыг акы-угбалар-биле үени эрттирер болзуңарза, олар силерге сула салдынмазынга дузалаар (У. ч. 12:25; 17:17). Мурнунда чугаалашканывыс Джоанна мынча дээн: «Мен бодумну дыка чааскаанзыргай кылдыр миннип чораан мен. Ынчалза-даа шынчы эштерим-биле аралашкаш, чааскаанзыравас апарган мен». А чыышта бир кижиниң боданмайн чугаалаан сөстери силерни муңгарадыптар болза, канчаар?

14. Акы-угбаларга шыдамык хамаарылгалыг бооп, оларны чүге өршээр ужурлуг бис?

¹⁴ Акы-угбаларже хомудаан херээ чок. Аксы-биле бачыт үүлгетпес кижи кайыын турар (Иак. 3:2). Бис шупту бачыттыг бис, ынчангаш кандыг-бир кижи бисти билбейн хомудадып, эпчок сөстерни чугаалаар болза, кайгавас болза эки. Павел элчинниң сүмезин сактып чоруулуңар: «Бот-боттарыңарга шыдамык хамаарылгалыг бооп, кайы-бирээңер өске-бир эжинге хомудап-даа турза, бот-боттарыңарны өршээңер» (Кол. 3:13). Оглу чыыштан үндүрткен бир угбавыс мынча дээн: «Иегова меңээ акы-угбаларны өршээринге дузалаан. Чүге дээрге олар чандыр-соора-даа болза, боттарыныы-биле мени деткиир дээш кызып турган болгай». Төрелдерин чыыштан үндүрткен улуска чыыш канчаар дузалап болурун сайгарыптаалыңар.

15. Чоокта чаа чыыштан үндүрткен кижиниң төрелдеринге канчаар дузалап болур бис?

¹⁵ Чыыштан үндүрткен кижиниң өг-бүлезинге кичээнгейни, чылыг-чымчак хамаарылганы көргүзүңер. Эр дуңмазы чыыштан үндүртүп алырга, Мириам чыыштарже баарындан эпчоксунар турган. Ол мынчаар тайылбырлаан: «Артык чугаалардан коргар турган мен. Ынчалза-даа шынчы эштерим мээң аарышкымны  үлежип, дуңмамның дугайында бичии-даа багай чүве чугаалаваан. Оларның ачызында бергелерим-биле чааскаан артпаан мен». А өске угбавыс мынчаар сактып чугаалаан: «Оглувусту чыыштан үндүрүптерге, эштеривис ашаам биле мени деткиир дээш чедип келгеннер. Оларның чамдыызы чүнү чугаалаар аайын тыппайн, мен ыглаарымга, мээң-биле кады ыглажып турганнар. А бир эживис чылыг-чымчак сөстерлиг открытка база чорудупкан. Ол деткимче меңээ дыка херек турган!»

16. Чыыштан үндүрткен кижиниң төрелдерин акы-угбалар моон-даа соңгаар канчаар деткип болур?

¹⁶ Чыыштан үндүрткен кижиниң чоок улузун деткиирин соксатпаңар. Оларга силерниң ынакшылыңар болгаш кичээнгейиңер кажангызындан-даа артык херек (Евр. 10:24, 25). Муңгаранчыг чүүл, чамдыкта чыыштан үндүрткен кижиниң төрелдери боттарын база чыыштан үне берген ышкаш кылдыр миннир. Ындыг чүүлдү кажан-даа болдурбаалыңар! Иеговага бараалгавайн барган ада-иелиг ажы-төлдү деткиири ылаңгыя чугула. Марияның ашаа чыыштан чорупкаш, өг-бүлезин кааптарга, акы-угбалар ону кагбаан. Ол үлешкен: «Акы-угбалар мээң бажыңымга келгеш, аъш-чемни белеткеп, өг-бүле мөгейиишкинин эрттиржип турган. Олар меңээ кайы хире бергезин билип, мээң-биле кады ыглажып турганнар. А кажан мээң дугайымда шын эвес чугаалар үнүп кээрге, олар меңээ болчуп турган. Олар эвес болза, та канчаар турган мен!» (Рим. 12:13, 15).

17. Ундараан улуска удуртукчулар канчаар дузалап болур?

¹⁷ Удуртукчулар, чыыштан үндүртүп алган улустуң төрелдеринге, арга тыптып кээрге-ле, дузалажыңар. Бир дугаар ээлчегде ындыг акы-угбаларны аргалаар харыысалга силерде (1 Фес. 5:14). Чыыштың мурнунда азы соонда олар-биле чугаалажыңар. Оларның бажыңынче барып, олар-биле кады мөргүңер. Оларны суртаалче чалап, үе-үе болгаш-ла, өг-бүлеңерниң мөгейиишкининче чалаңар. Иегованың ол хойлары силерниң ынакшылыңарны, кичээнгейиңерни база кээргээчел хамаарылгаңарны аажок хереглеп турар. Ынчангаш олар дээш сагыш човаар ужурлуг силер (1 Фес. 2:7, 8).

18. 2 Пётр 3:9-тан алырга, Иегова бачыт кылган кижиден чүнү манап турар?

¹⁸ Иегова «кымның-даа өлүп чидерин күзевейн, харын бүгү улустуң бачыдын миннип», Олче эглип кээрин манап турар. (Номчуптуңар: 2 Пётр 3:9.) Аар бачыт үүлгеткен кижиниң амы-тыны безин Бурганның караанга үнелиг хевээр. Бодап көрүңер даан, Иегова бис дээш кайы хире бедик өртекти төлээн-дир: Ол ынак Оглун бис дээш өргүл кылдыр берген! Чыыштан чорупкан улусту Бурган дөмей-ле кээргеп, Олче эглип кээрин манап чоруур. Иисустуң будалган оолдуң дугайында угаадыглыг чугаазында ачазы дег, Иегова база Ону каапкан улустуң эглип кээрин идегеп, манап турар (Лк. 15:11—32). Алыс шындан чорупкан улус дээрде ынакшылдыг Адазынче дедир эглип кээрге, акы-угбалар оларны чылыг-чымчак хүлээп алганнар. Өөрүнчүг чүүл, Элизабеттиң оглу чыышка катап тургустунуп алган. «Ол берге үеде холувусту сула салбазынга дузалаан акы-угбаларывыска аажок өөрүп четтирер-дир мен!» — деп, Элизабет чугаалаан.

19. Иеговага кезээде чүге идегеп болур бис?

¹⁹ Иеговага кезээде идегеп болур бис. Биске хора чедирер хире чүүлдү Ол кажан-даа негевес. Иегова элбек беримчелиг база кээргээчел Ада болгаш, Аңаа сеткилинден ынак бараалгакчыларынга чылыг-чымчак хамаарылгалыг. Иегова бисти кажанда-даа, ылаңгыя берге үелерде, кагбас (Евр. 13:5, 6). Кырында чугаалашканывыс Марк бо сөстерге шынзыккан: «Берге үелерде Иегова кезээде бистиң-биле кады». Иегова биске дээди күжүн моон-даа соңгаар бээр (2 Кор. 4:7). Чоок кижиңер чыыштан чоруптарга безин, идегелиңерни ышкынмайн, Иеговага шынчы артып шыдаар силер!