1940 чылдарда ада-ием Иегованың Херечилери-биле Библияны өөренип эгелээн. Оон ада-ием өөренмейн барган. Ынчалза-даа авам «Таңныыл суургазы» биле «Оттуп келиңер» деп журналдарны улаштыр ап турган. 1950 чылда Нью-Йоркка делегей чергелиг шуулган болуп эрткен, бистиң өг-бүлевис база ынаар барган.

Ооң соонда бисче Лоренс Джеффрис дээр акый бо-ла кээр апарган. Алыс шынга сонуургалымны өстүрер дээш, ол кызып турган. Эгезинде арай дедирленип турган мен. Иегованың Херечилери политикага киришпес, шериг хүлээлгезин эрттирбес боорга, таарзынмаан мен. Оон ол акыйдан: «Бир эвес Америкада шупту улус дайылдашпас болза, чуртту кым камгалаар ынчаш?» — деп айтырган мен. Джеффрис акый шыдамыккай: «Америкада шупту улус Иеговага бараалгап эгелээн кылдыр сагыштаалап көр даан. Дайзыннар халдап кээр болза, Бурган чүнү канчаар? Чүү деп бодаар сен?» — дээн. Ооң бо болгаш өске-даа айтырыгларга харыылары мээң саналдарымның үндезин чогун көргүскен. Түңнелинде Библияны аажок сонуургап эгелээн мен.

Авамның подвалга шыгжап турган «Таңныыл суургазы» биле «Оттуп келиңер» деп журналдарының эрги үндүрүлгелеринче бажым супкан мен. Чоорту алыс шынны тып алганымны билип кагдым. Оон Джеффрис акый Библияны өөренирин сүмелээрге, чөпшээрешкен мен. Ол ышкаш чыыштарже үргүлчү барып эгелээн мен. Чүрээмни алыс шын дола бээрге, өөрүнчүг медээниң суртаалчызы апарган мен. «Дээрги-Чаяакчының өндүр улуг хүнү чоокшулап келген» деп билгеш, сорулгаларым өскерилген (Соф. 1:14). Университетке өөренириниң  орнунга, улусту библейжи алыс шынга өөредиксей берген мен.

1956 чылдың июнь 13-те школаны доозупкаш, үш хүн эрткенде кожуун шуулганынга сугга суктуруп алган мен. Бургандан өөренир база өскелерге Ооң дугайында өөредир ажылга чуртталгамны бараалгаткан мен. Ынчан Иегованың меңээ кайы хире хөй белектер бээр деп турарын безин бодаваан мен.

Сугга суктурганым соонда чартык чыл эрткенде, доктаамал эгелекчи апарган мен. 1956 чылдың декабрьның «Ыдыктыг бараалгалынга» «Могли бы вы служить там, где нужна помощь?» деп статья турган. Ол чалалга меңээ база болган. Суртаалчылар эвээш черге дузалажыксап турган мен (Мф. 24:14).

Мурнуу Каролинада Эджфилдче көже берген мен. Тус черниң чыыжынга чүгле дөрт суртаалчы турган. Оон мээң-биле кады беш апарган. Чыыштарны бир акыйның бажыңынга эрттирип турган бис. Ай санында 100 шак бараалгап турган мен. Идепкейлиг суртаалдап, илеткелдерни бо-ла чугаалаар турган мен. Солун чүүл, чыыштың ажыл-херээн хөй кылган тудум, Иегованың дугайында оон-даа хөйнү билип ап турган мен.

Джонстон хоорайга хөөржүдүлге бюрозунуң ээзи херээжен кижиге Библия өөредип турган мен. Ол хоорай бистен элээн каш километр ыракта. Меңээ ажыл дыка херек турда, ооң-биле кады неделяда каш хүн ажылдаар ажылды ол берген. Ол эки угбай бичежек бажыңын биске Хурал залы кылдыр аңгылап берген.

Оон бисче Бруклинден меңээ Библия өөредип турган акыйның оглу Джолли Джеффрис көжүп келген. Кады эгелекчилеп эгелээш, бир акыйның улуг эвес трейлеринге чурттап турган бис.

Мурнуу штаттарга шалың чүге-даа чедишпес турган. Бүдүн хүн ажылдааш, бир-ийи доллар алыр турган бис. Бир катап сөөлгү акшам-биле чем садыпкан мен. Садыгдан үнүп бар чыдырымда, бир эр кижи кыйгырыпкаш: «Сеңээ ажыл херек бе? Бир шакта бир доллар төлээр мен» — дээн. Ол мени үш хүн ишти тудуг богун аштаар кылдыр ажылдадып алган. Иегова мээң Эджфилдке артып каарымны күзеп турганы илдең болган. Көңгүс акша чок хиремде, 1958 чылда делегей чергелиг шуулганче баар дээш, Нью-Йоркче чорупкан мен.

Шуулганның ийи дугаар хүнүнде бир онза чүүл болган. Теннеси штадында Галлатинге доктаамал эгелекчи Руби Уодлингтонга дужа берген мен. Кайывыс-даа миссионерлер кылдыр бараалгаксаар болган бис. Ынчангаш ол-ла шуулганга Галаадка өөренир күзелдиг улуска ужуражылгаже барган бис. Оон чагаалажып эгелээн бис. Бир катап мени Галлатинге илеткел чугаалаар кылдыр чалаан. Үе манап турбайн, Рубиден мээң кадайым боорун дилээн мен. Мен ооң чыыжынче шилчип алгаш, 1959 чылда өгленип алган бис.

23 харлыымда мени чыыштың бараалгакчызы (амгы үеде хуралдың удуртукчулар чөвүлелиниң  башкарыкчызы) кылдыр томуйлаан. Ол-ла үеде Чарлз Томпсон черлер кезип бараалгап эгелээн. Ооң бир дугаар келген хуралы Галлатин болган. Ол акый улуг дуржулгалыг-даа бол, акыларга кандыг дуза херегин база өске кожуун хайгааракчылары чыышка чүнү канчап турганын менден сонуургап айтырып турган. Шиитпир хүлээриниң мурнунда айтырыгларны салдынып база бүгү-ле херек информацияны чыып алыр болза эки деп оон өөренип алган мен.

1964 чылдың майда Саут-Лансинге бир ай өөренир Ыдыктыг бараалгакчылар школазынче мени чалаан. Башкылар меңээ оон-даа хөй билиглер ап, улаштыр бүзүрелимни быжыглаар изиг күзелди оттурган.

1965 чылдың январьда Руби-биле кожуун бараалгалын эгелээн бис. Бистиң девискээривис дыка делгем болган: Теннессиде Ноксвиллден барык Виргинияда Ричмонга чедир. Ынаар Соңгу Каролина, Кентукки болгаш Барыын Виргиния штаттарында хуралдар кирип турган. Ол үеде АКШ-тың мурнуу чарыынга сегрегация болуп турган болгаш, кара кештиг биле ак кештиг акы-угбалар ужуражып шыдавас турган. Ынчангаш чүгле кара кештиг акы-угбалардан тургустунган чыыштарны кезип турган мен. Ха-дуңма бөдүүн чурттап турар боорга, олар-биле херек чүүлдерни үлежип чораан бис. Дуржулгазы улуг бир кожуун хайгааракчызы меңээ дыка ажыктыг сүме каткан: «Сен бодуңну чыышка дарга кылдыр эвес, а ха-дуңманың акызы кылдыр алдын. Акы-угбалар сээң чымчак хамаарылгаңны миннир болза, чүгле ынчан оларга дузалажып шыдаар сен».

Бир катап эвээш суртаалчылыг чыышты кезип турувуста, Руби 1 харлыг уруглуг херээжен кижи-биле Библия өөренип эгелээн. Ооң-биле өөренир кижи чок боорга, Руби кичээлдерни чагаа таварыштыр эрттирип турган. Дараазында кээривиске, ол аныяк ава чыыштарны үспейн, барып турган. Оон ол девискээрже ийи тускай эгелекчи угбаларны томуйлап каарга, олар ооң-биле өөренирин уламчылаан. Удатпаанда ол сугга суктуруп алган. 30 чыл эрткенде, 1995 чылда, Паттерсоннуң Вефилинге Рубиге бир аныяк уруг чедип келген. Ол демги херээжен кижиниң уруу болган! Ол ашаа-биле Галаад школазының 100-кү клазында өөренип турган.

Бистиң ийи дугаар девискээривис Флориданың ортаа кезээнде болган. Аай-дедир аргыжар дээш, чиик өртектиг машина садып алган бис. Ынчалза-даа бир неделя эрткенде, ооң суг тыртар насозу үрелип калган. А ону септээр акшавыс чок турган. Мен бир акыйже долгаптарымга, ол биске машина септээр кижини чорудупкаш, согур көпеек-даа албаан. Акывыс: «Ажырбас, ол дээш дүвүревеңер» — дээш, безин боду биске акша берген. Бо таварылга Иегова бараалгакчылары дээш сагыш човап чоруур база беримчелиг болуру чугула деп биске сагындырган.

Чыыштар кезип тургаш, үргүлчү акы-угбаларның бажыңынга чурттаар турган бис. Ынчангаш хөй эки эш-өөрлүг апарган бис. Бир катап чыыштар кезээн отчёдумну долдуруп олургаш, ону парлаар машинага арттырып каан мен. Катап чедип келгеш, көөрүмге, бажың ээлериниң 3 харлыг оглу отчётту төндүр «парлапкан» болган. Оон хөй чылдар дургузунда ол оолчугашты баштактанып келген мен.

1971 чылда мени Нью-Йоркка область хайгааракчызы кылдыр томуйлап каан. Бис шуут кайгап калган бис. Ол үеде чаа-ла 34 харлыг турган мен. Ынчалза-даа ха-дуңма оларның бир дугаар кара кештиг область бараалгакчызын, мени, чылыг-чымчак уткуп алганнар.

Дыштаныр хүннерде-ле кожуун шуулганнарынга Иегованың дугайында улусту өөредиринге ынак турган мен. Чамдык кожуун хайгааракчыларының дуржулгазы менден улуг турган. Оларның бирээзи сугга суктуруп турумда илеткел чугаалап турган. А өске акый, Теодор Ярач, соонда Удуртукчу чөвүлелге бараалгап эгелээн. Аңаа Бруклинде Вефилден өске-даа акылар турган. Ол кожуун хайгааракчылары болгаш вефилчилер-биле ажылдажыры чиик боорга, оларга өөрүп четтирер турган мен! Ол ынакшылдыг кадарчыларның Библияга ынанып, организацияны сеткилинден деткип турганын ийи караам-биле көрген мен. Ындыг биче сеткилдиг акылар-биле бараалгаары дыка-ла аянныг чорду!

1974 чылда Удуртукчу чөвүлел кожуун хайгааракчыларының өске бөлүүн область хайгааракчылары кылдыр томуйлап каан. А мен Мурнуу Каролинага кожуун хайгааракчызы кылдыр катап бараалгап эгелээн мен. Ол үеде чыыштарны болгаш кожууннарны язы-сөөк аайы-биле аңгылавас апаарга, дыка өөрээн бис.

1976 чылдың төнчүзүнде мени Джорджияже томуйлап каан. Мээң девискээрим Атланта биле Колумбустуң аразынга турган. Аңаа мен чок апарган беш кара кештиг чаш уругларга тураскааткан орнукшудулга илеткелин чугаалап турганымны черле утпас мен. Кем-херек үүлгедикчилери оларның бажыңын өрттедипкен. Чаш уругларның авазы аар кемдээшкиннер алгаш, эмчиге чыдып алган. Кара-даа, ак-даа кештиг Иегованың Херечилери чок апарган ажы-төлдүң ада-иезин аргалаар дээш, эмчиже үзүк чокка барып турганнар. Акы-угбалар дыка улуг ынакшылды көргүскен. Чугаажок, Бурганның бараалгакчылары бот-боттарын кээргеп, дузалажыр болза, кандыг-даа берге ажыг-шүжүгнү ажып эртиптер.

1977 чылда бисти Бруклинде Вефилче бир проектиге дузалажыр кылдыр, каш ай ишти чалаан. Ону доозар деп турувуста, Удуртукчу чөвүлелде ийи акый мээң-биле ужурашкаш: «Руби-биле Вефилге олчаан бараалгаарын күзээр силер бе?» — деп айтырган. Бис чөпшээрешкен бис.

Дараазында 24 чыл ишти бараалгал килдизинге ажылдап келдим. Ында акылар нарын болгаш эпчок айтырыгларны бо-ла шиитпирлээр. Ынчангаш Удуртукчу чөвүлел библейжи дүрүмнерге үндезилээн айтыышкыннарны үргүлчү берип турар. Ол чүүл бараалгал килдизинге айтырыгларны шиитпирлээринге база кожуун хайгааракчыларын, хуралдың удуртукчуларын болгаш эгелекчилерни өөредиринге дузалап турар. Шак ындыг өөредилгениң ачызында хөй улус бүзүрелинге өзүп-мандып турар. А ол чүүл Иегованың организациязын быжыглап турар.

1995 чылдан 2018 чылга чедир кол башкарылга чериниң төлээлекчизи кылдыр, янзы-бүрү салбырларны кезип турган мен. Мен салбырлар комитеттериниң, вефилчилерниң болгаш миссионерлерниң бергелерин шиитпирлежип база оларны деткиир дээш, ужуражып турган мен. Руби-биле мени оларның чугаалап турган таварылгалары сорук киирип турган. Чижээ, 2000 чылда Руандаже барган бис. 1994 чылда коргунчуг геноцид үезинде акы-угбаларның болгаш вефилчилерниң чүнү ажып эрткенин дыңнааш, баарывыс ажып турган. Олар чоок улузун чидирген-даа болза, ындыг коргунчуг үеде бүзүрелин, идегелин болгаш өөрүшкүзүн чидирбээннер.

Бис ам 80 хар ашкан бис. Сөөлгү 20 чыл иштинде АКШ-тың салбыр комитединде бараалгап турар мен. Мен университетке өөренмээн-даа болзумза, Иегова болгаш Ооң организациязы меңээ эң-не дээди дээн эртемни берген. Ооң ачызында мөңге чуртталгаже чедирер алыс шынга өскелерни өөредип чоруур мен (2 Кор. 3:5; 2 Тим. 2:2). Бурганның Сөзүнден медээ улустуң амыдыралын эки талаже өскертип, Чаяакчы-биле найыралды тударынга канчаар дузалаанын көрген мен (Иак. 4:8). Иеговадан өөренири база улусту алыс шынга өөредири — дыка улуг алдар-хүндү-дүр деп, Руби-биле өске улуска үргүлчү сагындырар-дыр бис. Иегованың бараалгакчызынга оон улуг өөрүшкү кайыын турар боор!