ӨӨРЕНИР СТАТЬЯ 39
Силерниң адыңар «амыдыралдың номунда» бар бе?
«Дээрги-Чаяакчыдан коргар... улустуң аттарын киирген тураскаалдыг ном Ооң мурнунга бижиттинип турган» (МАЛ. 3:16).
ЫРЫ 61 Бурунгаар, Херечилер!
ДОПЧУЛАЛ *
Иегова төөгү дургузунда «амыдыралдың номунче» чаа аттарны киирип-ле турар (1, 2-ги абзацтар.)
1. Малахия 3:16-дан алырга, Иегова кандыг номну бижип турар база ында чүнү бижээн?
ИЕГОВА муң-муң чыл дургузунда тускай номну бижип турар. Ында Ооң шынчы бараалгакчыларының аттарын даңзылап бижээн. Ол даңзы Бурганның шынчы херечизи Авелден эгелээн (Лк. 11:50—51) *. Төөгү дургузунда Иегова ол номче чаа аттарны киирип-ле турар. Ам оларның саны миллион-миллион чеде берген. Библияда ону «тураскаалдыг ном» база «амыдыралдың ному» деп адаан. Бо статьяга бис ону «амыдыралдың ному» деп адаар бис (номчуптуңар: Малахия 3:16; Ажыд. 3:5; 17:8).
2. Амыдыралдың номунда кымнарның аттарын бижээн база бистиң адывысты ынаар киир бижип кагзын дизе, чүнү канчаар ужурлуг бис?
2 Ол тускай номда Иеговага ханы хүндүткел-биле бараалгап чоруур база Ооң адын бедик үнелээр улустуң аттарын киир бижээн. Бурган оларга мөңге чурттаар арганы бээр. Бистиң адывысты база ынаар киир бижип кагзын дизе, чүнү канчаар ужурлуг бис? Иисус Христостуң бачыттан хостаар өргүлүнге даянып, Иегова-биле чоок хамаарылганы сайзырадыры чугула (Ин. 3:16, 36). Бис дээрге-даа, черге-даа чурттаар идегелдиг болзувусса, адывысты ол номче киир бижиирин күзеп турар бис.
3, 4. а) Бистиң адывысты амыдыралдың номунда бижип каан боорга-ла, албан мөңге чурттаар бис дээни ол бе? Тайылбырлаптыңар. б) Бо болгаш дараазында статьяларга чүнү сайгарар бис?
3 Ол номче аттары киир бижиттинген улусту албан мөңге чурттаар деп болур бе? Ооң харыызын Иегованың Моисейге: «Чүгле Меңээ удур бачыт үүлгеткен кижиниң адын Бодумнуң номумдан балаар мен» дээн сөстеринден билип алыр бис (Хост. 32:33). Ынчаарга ол номда улустуң адын карандаш-биле бижээни дег балап каап болур (Ажыд. 3:5). Ынчангаш ол номга адывыс турзун дизе база Иегова ону доора уткалыг ручка-биле биживээн шаанда, шупту болдунар чүүлдү кылыр болзувусса эки.
4 Ийе, аңаа хамаарыштыр кезек айтырыглар тургустунуп кээр. Чижээ, амыдыралдың номунче киир бижиттирген база бижиттирбээн улустуң дугайында Библияда чүү дээнил? Ол номда ады бар улус мөңге чуртталганы кажан алыр? Иегованы билип албайн чыткаш, чок апарган улус-биле чүү болур? Оларның аттарын ол номче киир бижиир бе? Ол айтырыгларның харыызын бо болгаш дараазында статьяларга билип алыр бис.
АМЫДЫРАЛДЫҢ НОМУНДА КЫМНАРНЫҢ АТТАРЫ БАР?
5, 6. а) Филипчилерге 4:3-тен алырга, амыдыралдың номунда кымнарның аттарын бижээн? б) Ол аттарны амыдыралдың номунче балаттынмас кылдыр кажан киир бижиир?
5 Амыдыралдың номунда кымнарның аттары бар? Ону билип алыр дээш, беш бөлүктү көрүптээлиңер. Ында чамдык улустуң аттарын бижээн, а чамдык улустуң биживээн.
6 Бир дугаар бөлүк Иисус-биле кады дээрге чагырар улустан тургустунган. Амгы үеде оларның аттарын амыдыралдың номунче киир бижээн бе? Ийе. Павел элчин Филиппыда чыышка чагаа бижип тургаш, шилип чагдырганнарның аттарын амыдыралдың номунче киир бижээн деп сагындырган. (Номчуптуңар: Филипчилерге 4:3.) Ынчалза-даа оларның аттары ол номга кезээ-мөңгеде турзун дизе, олар Бурганга улаштыр шынчы боор ужурлуг. Олар өлүрүнүң мурнунда азы коргунчуг хилинчек бетинде хавактарынга таңма бастыртып алырга, оларның аттарын амыдыралдың номунче кезээ-мөңгеде киирип каар (Ажыд. 7:3).
7. Ажыдыышкын 7:16, 17-ден алырга, мөөң чоннуң аттарын амыдыралдың номунче кажан кезээ-мөңгеде киир бижип каар?
7 Ийи дугаар бөлүкче мөөң чон кирип турар. Оларның аттары амыдыралдың номунда бар бе? Ийе. Армагеддон соонда олар аңаа артып каар бе? Ийе (Ажыд. 7:14). Хойларга дөмей улус «мөңге амыдыралды алыр» деп, Иисус чугаалаан (Мф. 25:46). Ынчалза-даа Армагедонну ажып эрткен улус ол шаңналды дораан албас. Оларның аттары амыдыралдың номунда «карандаш-биле» бижиттинген хевээр боор. Иисус Муң чыл башкарылгазының үезинде «оларның кадарчызы апаар база амыдырал хайырлаар суг бажынче алгаш баар». Христоска дыңнангыр база Иегованың шынчы деп санаан улузунуң аттарын амыдыралдың номунче кезээ-мөңгеде киир бижип каар. (Номчуптуңар: Ажыдыышкын 7:16, 17.)
8. Амыдыралдың номунда кымның аттары чок база оларны чүү манап турар?
8 Үшкү бөлүкче Армагеддон үезинде узуткадыр улус кирип турар. Оларның аттары амыдыралдың номунче кирбээн. Иисус ындыг улусту өшкүлерге деңнеп, «олар ынчан мөңге кеземчеже чоруптар» дээн (Мф. 25:46). Павел элчин база: «Олар мөңге өлүмнүң кеземчези-биле санажыр» деп бижээн (2 Фес. 1:9; 2 Пет. 2:9). Бо-ла сөстерни төөгү дургузунда ыдыктыг сүлдеге удур бачыт кылып келген улуска база хамаарыштырып болур. Оларны мөңге чуртталга эвес, а мөңге узуткаашкын манап турар. Бурган оларны диргиспес (Мф. 12:32; Мк. 3:28, 29; Евр. 6:4—6). Ам черге дирлип кээр ийи бөлүктү тодаргай сайгарыптаалыңар.
КАТАП ДИРЛИП КЭЭР УЛУС
9. Черге кандыг ийи бөлүктү диргизерил база олар чүзү-биле ылгалып турар? (Ажыл-чорудулга 24:15).
9 Бурган «шынчы-даа, шынчы эвес-даа улусту катап диргизер» база оларга черге мөңге чурттаар арганы бээр деп Библияда бижээн. (Номчуптуңар: Ажыл-чорудулга 24:15.) «Шынчы» улус дээрге Иеговага шынчы арткан улус-тур. А «шынчы эвес» улус Иегованы билбес чораан болгаш, шын эвес херектерни кылып турган. Ынчаарга шынчы-даа, шынчы эвес-даа улусту Бурган диргизиптер болза, оларның аттары амыдыралдың номунда бар деп болур бе? Ооң харыызын билип алыр дээш, баштай бөлүк бүрүзүн чаңгыстап көрүптээлиңер.
10. «Шынчы» улус чүге дирлип кээр база олар кандыг алдар-хүндүнү алыр? (Черге диргизиишкин дугайында бо үндүрүлгеде «Номчукчуларның айтырыгларын» көрүңер.)
10 Дөрт дугаар бөлүкче «шынчы» улус кирип турар. Олар дириг чорда, оларның аттары амыдыралдың номунга турган. А кажан олар чок апаарга, Иегова оларның аттарын балап каапкан бе? Чок, чүге дизе Бурган оларны утпаан. Иисустуң сөстери-биле алырга, Иегова — «өлүглерниң эвес, а дириглерниң Бурганы-дыр! Бурганга хамааржыр бүгү улус дириг-дир!» (Лк. 20:38). Ынчаарга шынчы улус дирлип кээрге, оларның аттары ам-даа амыдыралдың номунда бар боор. Чүгле ол аттарны «карандаш-биле» бижээн (Лк. 14:14). Чугаажок, оларның чамдыызы «бүгү чер-делегейге чагырыкчылар» боор алдар-хүндүнү алыр (Ыд. ыр. 44:17).
11. «Шынчы эвес» улус амыдыралдың номунче кирер дизе, чүнүң дугайында билип аар ужурлуг?
11 А бешки бөлүкче «шынчы эвес» улус кирип турар. Олар Иегованың негелделериниң дугайында билбес чораан болгаш, багай ажыл-херектер кылып турган чадавас. Ынчангаш оларның аттары амыдыралдың номунда чок. Ынчалза-даа Бурган оларны чер кырынга диргизипкеш, ол номче киир бижиттирер арганы бээр. «Шынчы эвес» улуска дыка хөй дуза херек апаар. Чүге дээрге оларның чамдыызы дириг чорааш, коргунчуг үүлгедиглерни кылып турган. Ынчангаш оларны Иегованың чөптүг-шынныг дүрүмнери-биле канчаар чурттаарын өөредир апаар. Ону кылыр дээш, Бурганның Чагыргазы төөгүде кажан-даа туруп көрбээн өөредилге программазын бүдүн делегейге чорудар.
12. а) Шынчы эвес улусту кым өөредир? б) Өскерлир хөңнү чок улус-биле чүү болур?
12 Шынчы эвес улусту кым өөредир? Мөөң чон болгаш дирлип кээр шынчы улус. Амыдыралдың номунче аттарын киир бижиттирер дээн шынчы эвес улус Иегованың өңнүктери апарып, Аңаа чуртталгазын бараалгадыр ужурлуг. Шупту шынчы эвес улустуң Иегова-биле хамаарылгазы кайы хире сайзырап турарын дээрде шииткекчилер, Иисус Христос болгаш шилип чагдырганнар, кичээнгейлиг хайгаарап көөр (Ажыд. 20:4). Өскерлир хөңнү чок улус 100 харлыг-даа боор болза, улаштыр чурттавас (Иса. 65:20). Иегова биле Иисус улустуң чүрээнде чүү барын көрүп турар болгаш, кымга-даа хора чедирерин чөпшээревес (Иса. 11:9; 60:18; 65:25; Ин. 2:25).
ЧАМДЫК УЛУС КАТАП ДИРИЛГЕШ, АМЫДЫРААР, А ӨСКЕ УЛУС — ШИИТТИРЕР
13, 14. а) Иисустуң Иоанн 5:29-та сөстерин ооң мурнунда канчаар билип турган бис? б) Ол сөстерниң утказын шын билип алыр дизе, чүнү кичээнгейге алыр ужурлуг бис?
13 Иисус база черге дирлип кээр улустуң дугайында чугаалап турган: «Чевеглерде чыдар бүгү улус Ооң үнүн дыңнааш, чевеглерден туруп кээри үе-шактың келгени бо-дур. Ынчан буян кылып чорааннар катап дирилгеш, амыдыраар, а бузут-бак кылып чорааннар катап дирилгеш, шииттирер» (Ин. 5:28, 29). Иисус кандыг уткалыг ынча дээн?
14 Ооң мурнунда бис Иисустуң бо сөстери улустуң черге дирлип келген соонда кылыр ажыл-херектеринге хамааржыр деп бодап турган бис: чамдык улус буян кылыр, а өскелер бузут-бак кылыр. Ынчалза-даа эскерип көрүңер, Иисус дирлип келген улус буянны кылыр азы бузут-бакты кылыр дивээн. Ол эрткен үениң кылыг сөзүн ажыглаан. Иисус «буян кылып чорааннар» база «бузут-бак кылып чорааннар» дээн. Ынчаарга мында улустуң чок апаарының мурнунда кылып чораан ажыл-херектериниң дугайында чугаа чоруп турар. Ол сөстер дыка ужур-уткалыг деп чөпшээрежир боор силер. Чүге дизе чаа делегейге кымга-даа бузут-бак кылырын чөпшээревес. Шынчы эвес улус багай херектерни өлүмүнүң мурнунда кылып чораан. Ынчаарга Иисустуң сөстериниң утказы кандыгыл?
15. Мөңге амыдыралды алыр дээш, кым дирлип кээр база чүге?
15 Буянныг ажыл-херек кылып чораан шынчы улус мөңге амыдыралды алыр дээш дирлип кээр. Чүге дизе оларның аттары амыдыралдың номунда бар. Иоанн 5:29-та «буян кылып чорааннар» дугайында диргизиишкин Ажыл-чорудулга 24:15-те «шынчы улустуң» диргизиишкини-биле дөмей. Чок апарган улустуң аттары амыдыралдың номунда бар деп чүге чугаалап турар бис? Римчилерге 6:7-ден алырга, «өлген кижи бачыттың чагыргазындан хосталыр» дээн. Ол дээрге кажан шынчы улус чок апаарга, Бурган оларның бачыттарын өршээптер дээни ол-дур. А оларның буянныг ажыл-херектерин Ол утпаан (Евр. 6:10). Ынчангаш оларның аттары амыдыралдың номунда хевээр боор. Чугаажок, шынчы улус дирлип келгеш-даа, Бурган оларның аттарын амыдыралдың номундан балавас кылдыр, эчизинге чедир шынчы артар ужурлуг.
16. «Катап дирилгеш, шииттирер» дээн сөстер кымга хамааржып турар?
16 А бузут-бакты кылыр чораан улустуң дугайында чүнү чугаалап болур? Оларның бачыттарын өлүм соонда өршээп каан-даа болза, олар дириг чорааш, Иеговага бараалгавайн турган. Ынчангаш оларның аттары амыдыралдың номунда чок. Ынчап кээрге, «бузут-бакты кылып чорааннар» дээрге-ле Ажыл-чорудулга 24:15-те «шынчы эвес» улус-тур. Олар «катап дирилгеш, шииттирер» *. Ол чүү дээни ол? Иисус оларның чуртталгазын болгаш ажыл-херектерин кичээнгейлиг хайгаараар (Лк. 22:30). Оларның аттарын амыдыралдың номунче киир бижиир-биживезин тодарадып алырда, үе херек апаар. Бир эвес шынчы эвес улус бузуттуг херектеринден ойталап, Иеговага чуртталгазын бараалгадып алыр болза, оларның аттарын ол номче киирип каар.
17, 18. Черге дирлип келген шупту улус чүнү канчаар ужурлуг база Ажыдыышкын 20:12, 13-те кандыг херектерниң дугайында бижээн?
17 Дирлип келген шынчы-даа, шынчы эвес-даа улус чаа дүрүг-номнарда бижээн хоойлуларга чагыртыр ужурлуг. Ол дүрүг-номнарны Муң чыл башкарылганың үезинде ажыдар. Иоанн элчин мынча деп бижээн: «Мен ынчан дүжүлгениң мурнунда турар улуг, биче өлүг улусту көрүп кагдым. Ажып каан номнар база бар болду. Оон база бир номну — амыдыралдың номун — ажыдып кагды. Өлүглерни оларның кылган херектерин барымдаалап, номнарда оларның дугайында бижээнин ёзугаар шииткен. Далай аңаа чораан өлүг улусту үндүр чалгыпкан. Өлүм болгаш Тамы боттарының өлүг улузун берипкен. Оон оларның кижи бүрүзүн черге кылган херектерин барымдаалап шииткен» (Ажыд. 20:12, 13).
18 Дирлип келген улусту кандыг «херектери» дээш шиидер? Өлүрүнүң мурнунда кылган херектери дээш бе? Чок. Чок апарган улустуң бачыттары өршээттинген боор деп утпаңар. Ындыг болганда, ол эрткен үениң херектери эвес-тир. Мында чаа делегейге өөредилге программазынга оларның хамаарылгазының дугайында бижээн. Ной, Самуил, Давид болгаш Даниил дээн ышкаш, Бурганга шынчы улус безин Иисус Христостуң дугайында билип алгаш, ооң өргүлүнге бүзүрээр ужурлуг. А шынчы эвес улус оон-даа хөйнү билип алыр ужурлуг.
19. Амыдыралдың номунче адын киир бижиттириксевейн баар улусту чүү манап турар?
19 Амыдыралдың номунче адын киир бижиттириксевейн баар улусту чүү манап турар? Ажыдыышкын 20:15-те мынча дээн: «Амыдыралдың номунче адын киир биживээн кижи бүрүзүн оттуг хөлче киир октапкан». Олар кезээ-мөңгеде узуткаттырар. Ынчангаш амыдыралдың номунга бистиң адывыс балаттынмайн кезээ-мөңгеде турзун дизе, шыдаар шаавыс-биле шупту чүүлдү кылыр болзувусса эки!
Акывыс Муң чыл башкарылга үезинде төөгүде туруп көрбээн өөредилге программазында киржип турар (20-ги абзац.)
20. Муң чыл башкарылганың үезинде кандыг кайгамчык ажыл чоруттунар? (Журналдың даштында чурукту көрүңер.)
20 Муң чыл башкарылганың үезинде бис кайгамчык дээн болуушкуннарның херечилери болур бис! Оларның бирээзи — төөгүде туруп көрбээн өөредилге программазы-дыр. Ол үеде шынчы болгаш шынчы эвес улустуң канчаар алдынып турарын дээрниң шииткекчилери кичээнгейлиг хайгаараар (Иса. 26:9; Аж.-ч. 17:31). 1000 чыл дургузунда өөредилге канчаар эртерил? Ону оон-даа эки билип алгаш, үнелээринге биске чүү дузалаар? Ону дараазында статьяга сайгарар бис.
ЫРЫ 144 Шаңналче көрүжүң угла!
^ Иоанн 5:28, 29-та диргизиишкин дугайында Иисустуң сөстерин бижээн. Ол ында мөңге чурттаар дээш база шииттирер дээш дирлип кээр улустуң дугайында чугаалаан. Ол шүлүктүң шын утказын ам канчаар билип эгелээнивисти сайгарыптаалыңар.
^ Ол ном «Өртемчейни чаяаганындан бээр», өскээр чугаалаарга, Христостуң өргүлүнүң ачызында бачыттары өршээттинип болур кижилерниң үезинден тура, бижиттинип келген (Мф. 25:34; Ажыд. 17:8). Ынчангаш шынчы Авелдиң адын ол амыдыралдың номунда бир дугаар бижээн.
^ Мооң мурнунда бис бо шүлүкте «шииттирер» деп сөстү буруудадыр азы багай кылдыр шиидер дээн уткалыг деп бодап турган бис. Чогум ол сөс ындыг утканы база дамчыдып болур. Ынчалза-даа Иисус мында шииткелди делгереңгей уткалыг кылдыр ажыглаан чадавас. Словарьлардан алырга, бо сөс «бир кижиниң канчаар алдынып турарын кыдыындан хайгаараары» азы «судтуң истелге-хыналдазы» дээн утканы база дамчыдып болур.
