1. Христостуң Муң чыл башкарылгазының үезинде бисти кандыг өөрүшкүлүг болуушкуннар манап турарыл?

 ХРИСТОСТУҢ Муң чыл башкарылгазының үезинде чок апарган улустуң дирлип турарын хөй катап сагыштаалаан чадавас силер. Бис ол үени четтикпейн манап турар бис! Эргим улузун чидирген кижилер оларны катап көрүксеп турар. Иегова база оларны аажок чоктап чоруур (Иов 14:15). Ол үеде чер кырынга та чеже кижи чоок улузунга ужуражыр деп! Эрткен статьядан амыдыралдың номунда аттары киир бижиттинген «шынчы улус» мөңге чурттаар дээш дирлип кээр деп билип алдывыс (Аж.-ч. 24:15; Ин. 5:29). Эргим улузувус эң бир дугаар дирлип кээр чадавас *. Оон аңгыда, «шынчы эвес» улус шииттирер дээш дирлип кээр. Оларның Иегованы эки билип алыр база Аңаа бараалгаар аргазы чок турган чадавас.

2, 3. а) Исайя 11:9, 10-да кандыг делегей чергелиг өөредилге программазының дугайында бижээн? б) Бо статьяга чүнү сайгарар бис?

² Шупту дирлип келген улусту өөредир херек (Иса.  26:9; 61:11). Ынчангаш бүгү чер кырынга өөредилге программазы эртер. (Номчуптуңар: Исайя 11:9, 10.) Шынчы эвес дирлип келген улус Иисус Христостуң, Чагырганың, өргүлдүң база Иегованың эрге-чагыргазынга хамаарышкан маргыштыг айтырыгның дугайында билип аар ужурлуг. Шынчы улус безин Иегова черге хамаарыштыр күзел-соруун канчаар чоорту ажыдып берип турганын билип аар ужурлуг. Оларның чамдыызы Библияны төндүр биживээнде-ле, чок апарган. Ынчангаш шынчы-даа, шынчы эвес-даа улус хөй-ле чүүлге өөренир.

³ Бо статьяга мындыг айтырыгларны сайгарар бис: Делегей чергелиг өөредилге программазы канчаар чоруттунар? Кижиниң адын амыдыралдың номунче кезээ-мөңгеде киир бижиир-биживезинче ол кандыг салдар чедирер? Ол айтырыгларның харыызын билип алыры чугула. Аңаа биске Даниил болгаш Ажыдыышкын номнарында кайгамчык өттүр билген медеглелдер дузалаар. Ооң ачызында диргизиишкин үезинде чүү болурун эки билип алыр бис. Эгезинде Даниил 12:1, 2-де баш удур бижээн кайгамчык болуушкуннарны сайгарыптаалыңар.

4, 5. Даниил 12:1-де төнчү үе дугайында чүү дээнил?

⁴ Номчуптуңар: Даниил 12:1. Даниил ному төнчү үезинде болуушкуннарның кандыг чурум-биле болурун биске айтып турар. Чижээ, Даниил 12:1-де Михаилди, азы Иисус Христосту, Бурганның «чонунуң болчукчузу» болур дээн. Ол өттүр билген медеглелдиң кезии 1914 чылда, кажан Иисус дээрде Бурганның Чагыргазының Хааны апаарга, күүсеттинип эгелээн.

⁵ Оон ыңай Даниилге «мурнуку үелерде чаңгыс-даа чоннуң көрүп көрбээни айыыл-халап үези эгелээрге», Иисусту «чедип кээр» дээн. Ол «айыыл-халап үезин» Матфей 24:21-де «коргунчуг хилинчек» деп адаан. Иисус «чедип кээр», өскээр чугаалаарга, ол «айыыл-халап үезинде» — Армагеддонда — Бурганның бараалгакчыларын камгалаар. Ажыдыышкын номунда ол улусту «коргунчуг хилинчекти көрүп эрткен» «мөөң чон» деп адаан (Ажыд. 7:9, 14).

6. Мөөң чон коргунчуг хилинчекти ажып эртиптерге чүү болур? Тайылбырлаптыңар. (Черге диргизиишкин дугайында бо үндүрүлгеде «Номчукчуларның айтырыгларын» көрүңер.)

⁶ Номчуптуңар: Даниил 12:2. Мөөң чон коргунчуг хилинчекти ажып эртиптерге чүү болур? Бис мооң мурнунда бо өттүр билген медеглелди доора уткалыг диргизиишкинге, азы 1918 чылда күштүг истеп сүрүүшкүннер соонда суртаал ажылының сайзырап эгелээн үезинге, хамааржыр деп бодап турган бис *. Ынчалза-даа ам бис ол сөстер чаа делегейге болур диргизиишкинге хамааржыр деп билип эгелээн бис. Ол диргизиишкин сөөлгү хүннерде Армагеддоннуң соонда эгелээр.

7. а) «Мөңге амыдыраар дээш» оттуп кээр дээрге чүү дээни ол? б) Олар кандыг уткалыг «оон-даа эки амыдыралга катап дирлип» кээр?

⁷ Даниил 12:2-де чамдык улус «мөңге амыдыраар дээш» оттуп кээр дээн. Ол чүү  дээни ол? Муң чыл башкарылга үезинде дирлип келген улус Иегова биле Иисустуң дугайында билиглерни ап, оларга дыңнангыр болур болза, мөңге амыдыралды алыр (Ин. 17:3). Олар «оон-даа эки амыдыралга катап дирлир» (Евр. 11:35). Чүге ону эки амыдырал дээн? Чүге дизе ооң мурнунда бачыттыг чорааш, дирлип келген улус дөмей-ле катап чок апарган.

8. «Мөңгеде бужар бак, шоотка кирер дээш» дирлип кээр дээрге чүү дээни ол?

⁸ Дирлип келген улустуң чамдыызы Иегованың өөредилгезин хүлээвес боор. Даниилдиң өттүр билген медеглелинде чамдык улус «мөңгеде бужар бак, шоотка кирер дээш» дирлир дээн. Олар үймээнчи хөөннүг боорга, оларның аттарын амыдыралдың номунче биживес база олар мөңгеде чурттавас. Оларны «мөңгеде бужар бак, шоот», азы узуткаашкын, манап турар. Ынчап кээрге, улустуң дываажаңга мөңге чурттаар-чурттавазы дирлип келген соонда кылыр ажыл-херектеринден хамааржыр деп Даниил 12:2-де бижээн (Ажыд. 20:12) *. Чамдык улус мөңге амыдыралды алыр, а өскелери — албас.

9, 10. а) Даниил 12:3-тен алырга, коргунчуг хилинчек соонда оон ыңай чүү болур? б) «Сылдыстар дег кезээ мөңгеде чырый бээр» улустар дээрге кымнарыл?

⁹ Номчуптуңар: Даниил 12:3. Удавас болур «айыыл-халап үезиниң» соонда чүү болур? Даниил 12:2-де болуушкуннарның уламчызын 3 дугаар шүлүкте бижээн. Ында коргунчуг хилинчек соонда чүү болурун айтып каан.

¹⁰ «Сылдыстар дег кезээ мөңгеде чырый бээр» улустар дээрге кымнарыл? Ооң харыызын Иисустуң Матфей 13:43-те: «А чөптүг-шынныг улус Адазының Чагыргазынга хүн дег чырыыр» дээн сөстеринден тып алыр бис. Иисус ооң мурнунда «Дээрниң Чагыргазынга хамааржыр улусту», азы ооң-биле кады дээрге чагырар шилип чагдырганнарның дугайында, чугаалап турган (Мф. 13:38). Ынчангаш Даниил 12:3-те шилип чагдырганнарның дугайында база оларның Муң чыл башкарылга үезинде чүнү кылырын бижээн.

11, 12. 144 000 шилип чагдырганнар 1000 чыл дургузунда кандыг ажылды кылыр?

¹¹ 144 000 шилип чагдырганнар «хөй кижилерни шын орукче» канчаар киирер? Олар Иисус Христос-биле кады 1000 чыл ишти черге болур өөредигни уштап-башкарар. Шилип чагдырганнар чүгле хааннар эвес, а «Бурганның бараалгакчылары» (священниктер) база боор (Ажыд. 1:6; 5:10; 20:6). Ынчангаш олар кижилерге «эмненири[нге]», азы чоорту тергиин апаарынга, дузалаар (Иез. 47:12; Ажыд. 22:1, 2). Ол ажылды кылгаш, шилип чагдырганнар кайы хире улуг өөрүшкүнү миннир деп бодаар силер!

¹² Шын орукче кирер «хөй кижи» дээрге кымнарыл? Оларның санынче чаа дирлип келген улус, Армагеддонну ажып эрткен улус база чаа делегейге төрүттүнер ажы-төл кирип турар. 1000 чылдың төнчүзүнде ол бүгү улус тергиин апаар. Ынчаарга оларның аттарын амыдыралдың номунче карандаш-биле эвес, а ручка-биле кажан киир бижиир?

13, 14. Мөңге амыдыралды алыр дизе, тергиин улус чүнү канчаар ужурлуг?

¹³ Тергиин болуру дээрге-ле албан мөңге амыдыралды алыр дивээни ол-дур. Чижээ, Адам биле Ева тергиин турган. Ынчалза-даа мөңге амыдыралды алыр дизе, олар Бурганга дыңнангыр боор ужурлуг турган. Хомуданчыг чүүл, олар бодунуу-биле алдынганнар (Рим. 5:12).

¹⁴ 1000 чыл эртерге, черге чурттаар улустуң дугайында чүнү чугаалап болур? Олар шупту тергиин апаар. Олар кезээ-мөңгеде Иегованың башкарылгазын деткиир бе? Азы оларның кайы-бирээзи, Адам биле Ева ышкаш, Бурганга шынчы эвес апаар бе? Бо айтырыгларның харыызын билип алыр ужурлуг бис.

15, 16. а) Кижи бүрүзү Иеговага бердингенин кажан көргүзер аргалыг боор? б) Сөөлгү шенелде чүү-биле төнер?

¹⁵ 1000 чыл дургузунда Эрлик, кара-бажыңда дег, кинчиледир база ол кымны-даа дуурайлап шыдавас апаар. Ынчалза-даа 1000 чыл эртерге, ону хостаптар. Оон ол тергиин улусту Иеговадан хая көрнү бээр кылдыр оралдажыр. Ол шенелде үезинде улус Бурганның адын хүндүлеп, Ооң эрге-чагыргазын деткип турарын көргүзер аргалыг боор (Ажыд.  20:7—10). Ынчан кижиниң канчаар алдынарындан ооң адын амыдырал номунче киир бижиир-биживези хамааржыр.

¹⁶ Чамдык улус, Адам биле Ева ышкаш, Иегованың эрге-чагыргазындан ойталаар. Оларның саны билдинмес. Ажыдыышкын 20:15-те оларны чүү манап турарын бижээн: «Амыдыралдың номунче адын киир биживээн кижи бүрүзүн оттуг хөлче киир октапкан». Өскээр чугаалаарга, ол үймээнчилер кезээ-мөңгеде узуткаттырар. Ынчалза-даа тергиин улустуң хөй кезии сөөлгү шенелдени төлептиг ажып эрте бээрге, оларның адын амыдыралдың номунче балаттынмас кылдыр киир бижип каар.

17. Дээрниң төлээзи Даниилге бистиң үевис дугайында чүнү чугаалаан? (Даниил 12:4, 8—10).

¹⁷ Келир үеде болур болуушкуннар дугайында бодап кээрге безин, кижиниң сагыш-сеткили хөлзей бээр! Ынчалза-даа дээрниң төлээзи Даниилге бистиң үевис — «төнчү үениң» — дугайында база бир чугула чүүл чугаалаан (номчуптуңар: Даниил 12:4, 8—10; 2 Тим. 3:1—5). Ол «билиг көвүдеп кээр үе» чедип  кээр дээн. Ол дээрге Бурганның чону Даниил номунда өттүр билген медеглелдерни оон-даа эки билир апаар дээни ол-дур. Ол үе иштинде оон ыңай чүү болурун дээрниң төлээзи мынча дээн: «Бузут-бактыг улус бузут-бакты кылырын уламчылаар. Бузут-бактыг улус чүнү-даа угаап билбес».

18. Бузуттугларны чүү манап турар?

¹⁸ Сактырга, бузуттуглар кеземче чок артар ышкаш (Мал. 3:14, 15). Ынчалза-даа Иисус ол каржы кижилерни шиидип, «кадарчының хоюн өшкүзүнден үзери дег», шынчы улусту аңгылап аар (Мф. 25:31—33). Бузуттуглар коргунчуг хилинчекти ажып эртип шыдавас база оларны чаа делегейге диргиспес. Оларның аттарын Малахия 3:16-да «тураскаалдыг номче» киирбес.

19. Бис ам чүнү канчаар ужурлуг бис база чүге? (Малахия 3:16—18).

¹⁹ Бузуттуглар-биле дөмей чүвүс-даа чок деп, ажыл-херек-биле бадыткаар үе бо-дур. (Номчуптуңар: Малахия 3:16—18.) Иегова «үнелиг өнчү-хөреңгим» деп санап турар улузун чыып турар. Чугаажок, бис оларның аразынга болуксаар бис.

20. Даниилге кандыг аазаашкын берген база ооң күүсеттинерин чүге манап турар силер?

²⁰ Бис төөгүнүң кайгамчык дээн үезинде чурттап турар бис! Ынчалза-даа ол келир үеде болур чүүл-биле канчап-даа деңнешпес. Удавас бузут-бактың изи-чыды безин артпас. Ооң соонда Иегованың Даниилге: «Сөөлгү хүнде туруп келгеш, шаңналың алыр сен» дээн аазаашкынының күүсеттинип турарын ийи караавыс-биле көөр бис (Дан. 12:13). Даниил болгаш эргим улузуңар дирлип кээр үени дыка манап турар силер. Ынчангаш Иеговага шынчы артар дээш, бүгү-ле чүүлдү кылыңар. Ынчан Ол силерниң адыңарны амыдыралдың номундан балавас.