Бо айтырыгларга Библия канчаар харыылап турар эвес, билип алыылыңарам.

Ажыл-чорудулга 24:15-те «шынчы-даа, шынчы эвес-даа улусту катап диргизер» дээн. Шынчы улус дээрге өлүрүнүң мурнунда Бурганга дыңнангыр чораан улус-тур. Ынчангаш оларның аттарын амыдыралдың номунче киир бижип каан (Мал. 3:16). А шынчы эвес улус — Иегованың дугайында эки билип алыр аргазы чок турган улус-тур. Ынчангаш оларның аттарын амыдыралдың номунче киир биживээн.

Иоанн 5:28, 29-та база-ла, Ажыл-чорудулга 24:15-те дег, дирилген ийи бөлүк улус дугайында бижээн. Иисус мынча дээн: «Буян кылып чорааннар катап дирилгеш, амыдыраар, а бузут-бак кылып чорааннар катап дирилгеш, шииттирер». Шынчы улус чок апаарының мурнунда эки херектерни кылып чораан. Олар мөңге амыдырал алыр дээш дирлип кээр, чүге дизе оларның аттары амыдыралдың номунда бар. А шынчы эвес улус өлүмүнүң бетинде багай херектер үүлгедип чораан. Олар шииттирер дээш дирлип кээр, оларның аттары амдыызында амыдыралдың номунда чок. Ынчангаш оларның канчаар алдынарын дээрде шииткекчилер кичээнгейлиг хайгаараар. Шынчы эвес улуска Иегованы эки билип алыр арганы бээр. Ол арганы канчаар ажыглаарындан оларның адын амыдыралдың номунче бижиир-биживези хамааржыр.

Ажыдыышкын 20:12, 13-тен алырга, шупту дирилген улус чаа дүрүг-номнарда бижээн чүүлдерни сагыыр апаар. Тодаргайлаарга, олар чаа делегейге Бурганның тургускан хоойлулары-биле чурттаар ужурлуг. Ол хоойлуларга чагыртпас улусту Иегова узуткап кааптар (Иса. 65:20).

Даниил 12:2-де мынча деп өттүр медеглээн: «Черде хөмдүрген мөчү-сөөктерниң хөй кезии оттуп кээр: чамдыызы мөңге амыдыраар дээш, өскелери — мөңгеде бужар бак, шоотка кирер дээш». Дирлип келген улусту төнчүзүнде чүү манап турарын бо шүлүкте бижээн: олар «мөңге амыдыраар» азы «мөңгеде бужар бак, шоотка кирер». Өскээр чугаалаар болза, 1000 чыл төнүп турда, чамдык улус мөңге амыдыралды алыр, а өскелери кезээ-мөңгеде узуткадыр (Ажыд. 20:15; 21:3, 4).

Мындыг чижекти көрүптээлиңер. Дирлип кээр улустуң ийи бөлүүн өске чуртка чурттаксап турар даштыкы улуска дөмейлеп болур. Шынчы улус үр хуусаалыг виза алган улуска дөмей: ооң ачызында олар ажылдап база өске-даа эргелерлиг болур. А шынчы эвес улус түр када виза алган даштыкыларга дөмей. Чуртка үр артар дизе, олар эрге-чагырга мурнунга боттарын эки улус кылдыр көргүзер ужурлуг. Ооң-биле дөмей, дирлип келген шынчы эвес улус дываажаңга артар дизе, Иегованың хоойлуларынга чагыртып, боттарының чөптүг-шынныын көргүзер ужурлуг. Даштыкылар чуртче кандыг-даа виза-биле кирип келген болза, оларның чамдыызы чурттуң хамаатылары апарып болур, а өскелерин чурттан шөлүп болур. Бо чүүл оларның чаа чуртка боттарын канчаар алдынарындан хамааржыр. Шак ол ышкаш дирлип келген кижи бүрүзүнүң Бурганга шынчызын болгаш чаа делегейге канчаар алдынарын барымдаалап, сөөлгү шиитпирни үндүрер.

Иегова — чүгле кээргээчел эвес, а чөптүг Бурган-дыр (Ы. х. к. 32:4; Ыд. ыр. 32:5). Ол ынакшылдыг болгаш, шынчы-даа, шынчы эвес-даа улусту диргизиптер. Ындыг турбуже, Ол Бодунуң бедик негелделерин бичии-даа кудулатпас. Чаа делегейге чүгле Иеговага ынак болгаш Ооң хоойлуларын сагыыр улус чурттаар.