1. Пётр элчинниң өлүмүнүң мурнунда Бурган аңаа кандыг даалга берген?

 ПЁТР Иеговага хөй чылдар дургузунда шынчы бараалгап келген. Ол Иисус-биле кады суртаалдап чораан. Ооң ачызында өөрүшкүлүг медээ өске чоннарга тараттынып эгелээн. Соонда ол удуртукчу чөвүлелче кирген. Пётрнуң өлүмүнүң мурнунда, б. э. 62—64 чылдарда, Иегова аңаа Библияже кирген ийи чагааны бижиирин дааскан. Амгы үеде Пётрнуң 1-ги, 2-ги чагаалары деп адаар. Чок апаарга-даа, ооң чагаалары Бурганга шынчы артарынга христианнарга дузалаар деп, Пётр идегеп турган (2 Пет. 1:12—15).

2. Пётрнуң чагаалары чүге үезинде бижиттинген деп болур?

² Пётр чагааларын акы-угбалар «янзы-бүрү шенелделерни» ажып эртип турда бижээн (1 Пет. 1:6). Ынчан чыышка меге өөредиглер тарадыр, мөзү-шынар чок чүүлдерни деткиир кижилер тыптып келген (2 Пет. 2:1, 2, 14). Рим аг-шеригниң Иерусалимни болгаш ооң өргээзин узуткаар үези база чоокшулап орган. Ол хоорайда христианнар серемчилелин чидирбес ужурлуг турган (1 Пет. 4:7). Чигзиниг чок, акы-угбаларга шенелделерни ажып эртеринге, келир үеде бергелерге белеткениринге Пётрнуң чагаалары дузалаан b.

3. Пётрнуң чагааларын чүге шинчилээр болза эки?

³ Пётр чагааларын бирги вектиң христианнарынга бижээн-даа болза, Иегова оларны Библияже киирген болганда, биске база ажыктыг (Рим. 15:4). Бис база мөзү-шынары кудулаан делегейде чурттап турар бис. Ынчангаш  Иеговага бараалгаары амыр эвес. Удавас бис делегей чергелиг айыыл-халапка таваржыр бис. Пётрнуң чагааларында чугула сагындырыглар биске Иегованың хүнүн манаарынга, кижилерден коргушту ажып эртеринге база бот-боттарывыска ынакшылды илередиринге дузалаар. Ол сагындырыгларның ачызында удуртукчулар чыышта акы-угбалар дээш оон-даа эки сагыш човап шыдаар.

4. 2 Пётр 3:3, 4-тен алырга, бүзүреливис чүден кошкап болур?

⁴ Бис библейжи медеглелдерге бүзүревес улус аразында чурттап чоруур бис. Делегейниң төнчүзү чоокшулаанын хөй чылдарда чугаалап келгенивис дээш, удурланыкчылар бисти кыжырып турар. А чамдык улус үениң төнчүзү кажан-даа келбес дээр. (Номчуптуңар: 2 Пётр 3:3, 4.) Суртаалга, ажылга азы төрелдерден дыңнаан ындыг бодалдар бүзүреливисти кошкадып болур. Пётр ону канчаар болдурбазын тайылбырлаан.

5. Бо делегейниң төнчүзүн шыдамык манаарынга биске чүү дузалаар? (2 Пётр 3:8, 9).

⁵ «Иегова каржы делегейни чүге ам-даа узуткаваан? Чүге далашпайн турарыл?» — деп бодал бар. Бурганның үеже көрүжү кижилерден ылгалдыг деп, Пётрнуң сөстери биске сагындырып турар. (Номчуптуңар: 2 Пётр 3:8, 9.) Бурганга муң чыл чаңгыс хүн ышкаш. Иегова кымның-даа өлүрүн күзевес болгаш, шыдажып манап турар. А үези кээрге, бо делегей төнүп каар. Ынчангаш арткан үени шын ажыглап, шупту улуска суртаалдаалыңар.

6. Иегованың хүнүн утпазынга биске чүү дузалаар? (2 Пётр 3:11, 12).

⁶ Иегованың хүнүн сактып чоруурун Пётр чагаан. (Номчуптуңар: 2 Пётр 3:11, 12.) Ону канчаар кылыр? Болдунар-ла болза, хүннүң-не чаа делегейге тергиин чуртталганың дугайында боданыры чугула. Арыг-кылаң агаарны тынарыңарны, чаагай чемни амзаарыңарны, дирлип келген чоок улузуңарны уткууруңарны база бурун шагның кижилеринге библейжи медеглелдерниң күүсеттингенин чугаалаарыңарны сагыштаалаңар. Ындыг бодалдар манаашкындан шылавазынга база долгандыр болуушкуннарга тоомча чок болбазынга дузалаар. Болуушкуннарның канчаар болурун билир болзувусса, Иегованың хүнү дыка дүрген чоокшулап орарынга бүзүревес кижилер бисти астыктырып шыдавас (2 Пет. 3:17).

7. Кижилерден коргары биске кандыг салдар чедирип болур?

⁷ Иегованың хүнү чоок деп билир болгаш, өөрүшкүлүг медээни үлежип турар бис. Чамдыкта Библия дугайында чугаалажырын диттикпейн баар бис. Чүге дизе бисти чүү деп бодаар дээш азы хора чедириптеринден корткаш, ыыттавас бис. Пётр база ынчалган. Дүнеки шииткел үезинде ону Иисустуң өөреникчизи сен дээрге, Пётр шуут танывас мен деп башкызындан үш катап ойталаан (Мф. 26:69—75). Ол элчин соонда: «Олардан шуут коргуп-сүртевеңер» деп бүзүрелдии-биле бижээн (1 Пет. 3:14). Кижилерден коргушту ажып эртип болурун Пётрнуң сөстери бүзүредип турар.

8. Кижилерден кортпазынга биске чүү дузалаар? (1 Пётр 3:15).

⁸ Кижилерден кортпазынга биске чүү дузалаар? «Чүректериңерге Дээрги... Христостуң ыдыктыын хүндүлеңер» — деп,  Пётр харыылаан. (Номчуптуңар: 1 Пётр 3:15.) Аңаа чүү хамааржыр? Дээргивис, Хаанывыс Иисус Христостуң амгы үеде эрге-дужаалын боданыры чугула. Өөрүшкүлүг медээни чугаалаарындан дидинмейн баргаш, сая-сая ангелдер долганган дүжүлгезинде саадаан Хаанывысты сактып кээли. «Дээрге база черге бүгү эрге-чагырганы» Иисуска берген болгаш, ол «кажан кезээде, бо делегейниң төнчүзүнге чедир силер-биле кады» дээрзин утпаңар (Мф. 28:18—20). Бүзүреливисти камгалаарынга кезээде белен болурунче Пётр бисти оттурган. Ажылывыска, башкыларга, чаңгысклассчыларга база үргүлчү таваржыр улуска суртаалдаксаар-дыр силер бе? Суртаалдаар байдал кажан тургустунуп кээрин база чүнү чугаалаарыңарны эрте дээре боданып ап туруңар. Дидим болур дээш мөргүңер база чүден-даа кортпазынга Иегова дузалаар деп чигзинмеңер (Аж.-ч. 4:29).

9. Пётр акы-угбаларга ынакшылды кандыг байдалда көргүспейн барган? (Чурукту база көрүңер.)

⁹ «Чаа чагыгны силерге берип тур мен: бот-боттарыңарга ынак болуңар. Силерге Мээң ынаам ышкаш, силер база бот-боттарыңарга... ынак болуңар» — дээн Иисустуң чагыын Пётр хууда дыңнаан (Ин.  13:34). Ынчалза-даа ол еврей христианнардан сезингеш, еврей эвес акы-угбалары-биле кады чемненмейн барган. Ынакшылды илередип билбес турганы оон көскү. Павел элчин ону ийи арынныг чорук дээрге, Пётр кичээндиригни хүлээп алган (Гал. 2:11—14). Ынчангаш акы-угбаларга ынакшылды сөс кырындан аңгыда, ажыл-херээ-биле көргүзери чугула деп ийи чагаазында ол онзалап демдеглээн.

10. Ха-дуңма ынакшылды бот-боттарывыска сеткиливистен илередиринге биске чүү дузалаар? Тайылбырлаптыңар (1 Пётр 1:22).

¹⁰ Пётр бирги вектиң христианнарынга: «Бот-боттарыңарга арыг чүрээңер ханызындан ынак» апарган силер деп бижээн. (Номчуптуңар: 1 Пётр 1:22.) Библейжи өөредиглерни шуптузун ажыглаар болзувусса, ынакшылды илередип шыдаар бис. Библияда: «Бурган улусту ылгай көрбес» — дээн (Аж.-ч. 10:34, 35). Ынчангаш чыышка чүгле каш кижиге ынак болзувусса, Иисустуң «бот-боттарыңарга ынак болуңар» деп айтыышкынын күүсетпейн турар бис. Чамдык акы-угбалар-биле дыка чоок эдержиксээр болгай бис. Иисус база шупту өөреникчилеринге бир аай чоок турбаан (Ин. 13:23; 20:2). Ынчалза-даа чыышта шупту улуска акы-дуңмашкы ынакшылды кызып илередирин Пётр сагындырган. Ынчан кижи бүрүзү бодун чаңгыс найыралдыг өг-бүлениң кезии кылдыр миннир (1 Пет. 2:17).

11. Күштүг ынакшылдың утказы кандыг?

¹¹ Пётр бисти бот-боттарывыска «арыг чүрээңер ханызындан ынак болуңар» деп кыйгырган. Ынак эвес кижизин безин бодунуң чүрээнче киирерин бо контекстиде илереткен. Бир-ле кижи бисти хомудадыпкан дижик, эгезинде өжээргээр чадавас бис. Ынчаар алдынары Иеговага таарымча чок деп Иисустуң ачызында Пётр билген (Ин. 18:10, 11). Ол мынча дээн: «Хора дээш хора-биле, дорамчылал дээш дорамчылал-биле харыылаваңар. Ооң орнунга... алгап-йөрээп мөргүңер» (1 Пет. 3:9). Хомудадыпкан кижиге безин буянныг, кичээнгейлиг болурунче силерни күштүг ынакшыл оттурзун.

12. а) Күштүг ынакшыл бисти чүже оттурар? б) «Дорожите нашим единством» деп видеодан чүнү ажыглаксаар-дыр силер?

¹² Пётр бирги чагаазында күштүг ынакшыл бир-ийи эвес, а «хөй... бачытты» өршээринге дузалаар деп бижээн (1 Пет. 4:8). Хөй чылдар бурунгаар Иисустуң өршээринге өөреткенин ол сактып келген чадавас. Хирези ол үеде Пётр акызын 7 катап өршээри дыка эки деп санап чораан. А Иисус аңаа база шуптувуска 77 катап, азы төнчү чок, өршээрин чугаалаан (Мф. 18:21, 22). Ынчаар өршээри берге апарза, муңгараваңар! Шупту бачыттыг болганывыста, чамдыкта өршээри белен эвес. Ынчалза-даа багай минниишкиннерден адырлып, тайбыңны тургузар дээш, болдунар-ла чүвени кылыры чугула c.

13. Хуралдың удуртукчуларынга акы-угбалар дээш сагыш човаары чүге амыр эвес болгулаар?

¹³ «Мээң хойларымче сагыш салып көр» — дээн Иисустуң сөстерин Пётр кажан-даа утпааны чигзиниг чок (Ин. 21:16). Хуралдың удуртукчузу болзуңза, бо айтыышкын сеңээ база хамааржыр деп билир сен. Ынчалза-даа удуртукчуларга ол чугула даалганы күүседир үени тып аары  белен эвес апарып болур. Олар өг-бүлезин азыраар, сагыш-сеткил база Бурган-биле хамаарылгазы дээш сагыш човаар ужурлуг. Удуртукчулар оон аңгыда суртаалга идепкейлиг киржип, чыыштарга, шуулганнарга илеткелдерин кызымаккай белеткеп турар. А чамдыызы тус черниң тудуг-проект килдистеринде азы эмнелгелер-биле харылзажыр комитеттерде бараалгап турар. Бистиң эргим удуртукчуларывыс — ёзулуг ажыл-ишчилер-дир!

14. Бурганның кодан хоюн кадарарынга хуралдың удуртукчуларынга чүү дузалаар? (1 Пётр 5:1—4).

¹⁴ «Бурганның кодан хойларын кадарыңар» — деп, Пётр элчин хуралдың удуртукчуларын кыйгырган. (Номчуптуңар: 1 Пётр 5:1—4.) Эргим удуртукчу, акы-угбаларга ынааңны, сагыш човангырыңны билир бис. Чамдыкта чай чогуңдан азы могап-шылааныңдан хүлээлгелериңни күүседип шыдавас мен деп бодаар-дыр сен бе? Ийе болза, чүнү канчап болур? Сеткилиңни Иеговага чугаалап бер. «Кижи бүрүзү бараан болуушкунга херектиг күштү Бургандан ап турзун» — деп, Пётр бижээн (1 Пет. 4:11). Акы-угбаларның чамдык бергелери чүгле чаа делегейге шиитпирлеттинер. Ынчалза-даа дээди кадарчы Иисус Христос сээң шыдавазың чүүлдү кылып болурун утпа. Ам безин ол дузалаар, а келир үеде оон-даа хөйнү кылыр. Удуртукчулардан Бурганның манаар чүүлү — акы-угбаларга ынакшыл, олар дээш сагыш човаары база үлегерлиг болуру.

15. Бир удуртукчу Иегованың хойлары дээш канчаар сагыш човап турарыл? (Чурукту база көрүңер.)

¹⁵ Дуржулгалыг удуртукчу акывыс Уи́льям акы-угбазы дээш сагыш човаарының чугулазын билир. COVID-19 деп пандемия эгелей бээрге, ол өске удуртукчулар-биле кады бодунуң суртаал бөлүүнде кижи бүрүзү-биле неделяда бир катап харылзажыр деп шиитпирлээн. «Дыка хөй акыларга бажыңындан үндүнмес апаарга, шын эвес бодалдарга алзыры белен» — деп, ол тайылбырлаан. Бергелер тургустунуп кээрге, акывыска азы угбавыска чүү херегин, канчаар дузалаарын билип аар дээш, Уильям оларны кичээнгейлиг дыңнааш, информацияны дилеп бээр. Ол колдуунда сайтывыстан видеолар боор. «Акы-угбаларны деткиир ажыл амгы үеде кажангызындан  артык чугула. Кижилерни Иегова-биле таныштырар дээш, хөй күштү үндүрүп турар бис. А Иегованың хойлары алыс шынга артсын дээш сагыш човаары база чугула» — деп, Уильям үлешкен.

16. Пётрнуң чагааларында кичээлдерни канчаар ажыглап болур бис?

¹⁶ Пётрнуң чагааларындан чүгле каш кичээлди сайгарып көрдүвүс. Экижиир талаларны кичээнгейге алган боор силер. Чижээ, чаа делегейге чүнү кылырыңарны оон-даа хөй боданырын күзээр-дир силер бе? Азы ажылда улуска, чаңгысклассчыларга, башкыларга болгаш бо-ла таваржып кээр кижилерге суртаалдаар сорулга салып алдыңар бе? Акы-угбаларга оон-даа артык күштүг ынакшылды илередир аргаларны көөр-дүр силер бе? Хуралдың удуртукчулары, Иегованың хойларын күзелдии-биле, кызымаккай кадарарын уламчылаар силер бе? Ажыы-биле хынангаш, четпес талаңарны эскерип кааш, муңгараваңар! Бистиң буянныг Дээргивис эттинип аарынга дузалаар (1 Пет. 2:3). «Бурган [өөредилгеңерни эчизинге чедирер]... катап тургузар база күш болгаш шыдамык чорукту силерге бээр» — деп, Пётр бисти бүзүреткен (1 Пет. 5:10).

17. Дүжүп бербейн, Иегованың өөредиин хүлээр болзувусса, түңнели кандыг болур?

¹⁷ Бурганның Оглунуң чанынга бараалгаарынга төлеп чок мен деп, Пётр миннип турган (Лк. 5:8). Ынчалза-даа ол Иегова биле Иисустуң деткимчезиниң ачызында дүжүп бербейн, Христосту шынчы эдерип чораан. Түңнелинде, Пётр «Дээргивис болгаш Камгалакчывыс Иисус Христостуң мөңге Чагыргазынга» кирер хүндүткелди алган (2 Пет. 1:11). Дүжүп бербейн, силерни өөредир кылдыр Иеговага чөпшээреп, Пётрдан үлегерни алыр болзуңарза, мөңге амыдыралды шаңналга ап, «камгалалыңар чедип» алыр силер (1 Пет. 1:9).