1. Хуулгаазын арга-биле дыка хөй балык тудуп алгаш, Пётр канчалган?

 ПЁТР хондур балыктааш, куруг болган. Ынчан Иисус: «Терең черже эжиндире бер. Четкилерни... салыптыңар» — дээрге, Пётр ону чигзинзе-даа кылган (Лк. 5:4). Эңдере балык туттуна бээрге, четкилери безин үстүп эгелээн. Ол хуулгаазынны көргеш, Пётр биле өске балыкчылар «аажок кайгааннар». Пётр оон: «Мени каапкаш барыңар, Дээргим! Чүге дээрге бачыттыг кижи-дир мен!» — деп кышкырыпкан (Лк. 5:6—9). Ол бодун Иисустуң чанынга турарын төлеп чок деп бодап турганы чугаажок.

2. Пётрнуң чижээн сайгарары биске чүге ажыктыг?

² Пётрнуң «бачыттыг кижи-дир мен» дээни шын. Чамдыкта чугаалаан, кылган чүүлдери дээш ооң хараадааны Библиядан көскү. Пётрнуң минниишкиннери силерге таныш бе? Үр үе дургузунда кошкак чаңыңардан адырлырын оралдажып келген чадавас силер. Ындыг болза, Пётрнуң чижээнден идегелиңер бар деп билип каар силер. Чүге ынча деп болур бис? Бодап көрүңерем: Иегова Пётрнуң частырыгларын Библияга бижитпейн барып болур турган, ынчалза-даа ону биске ажыктыг болзун дээш бижиткен (2 Тим. 3:16, 17). Пётр бис ышкаш четпестерлиг, коргуушкуннарлыг кижи чораан. Иегова оон тергиин чорукту манаваан, ол ону бистен база манавас. Бистиң сула салдынып, частырыгларывыстың моондак болурун ол күзевес.

3. Чүге дүжүп бербес болза эки?

³ Чүге дүжүп бербес болза эки? Чоннуң мерген угаанныг чугаазында: «Шу дээрге шуудаар, адыр дээрге ара дүжер» — дээн. Чижектен көрээлиңерем. Хөгжүмчү арга-мергежилин чыл-чылы-биле экижидип, муң-муң меге ноталарны  ойнап кээр. Ол ойнап-ла турар болза, хөгжүм херекселинге тулган кылдыр ойнап эгелээр. Мергежээн хөгжүмчү безин чазыптар, ынчалза-даа ол дүжүп бербес. Ооң-биле дөмей, эдип алган частырыывыс үе-үе болгаш үнүп кээп болур. Ынчалза-даа сорулгавыс чедип аар дээш, уламчылаарын кызар бис. Чамдыкта чугаалаан азы кылган чүүлдеривис дээш, хараадай бээр бис. Ынчанмыже дүжүп бербезинче хөөнненип алыр болзувусса, Иегова биске эттинеринге дузалаар (1 Пет. 5:10). Пётрнуң чуртталгазы биске дыка эки үлегер. Частырыгларны кылып-даа турган болза, Иисус Пётрну билип турган. Биске ол бодал Иеговага улаштыр бараалгаарынга дыка улуг идиг-дир.

4. Лука 5:5—10-дан алырга, Пётр бодун кым дээн, а Иисус ону чүү деп бүзүреткен?

⁴ Пётр бодун чүге бачыттыг мен дээнин база кандыг бачыттар дугайында чугаалаанын Библияда биживээн. (Номчуптуңар: Лука 5:5—10.) Ол шыңгыы частырыгларны кылган чадавас. Пётр бодунга бүзүревес болгаш, коргуп турганын Иисус билип каан. Ол өөреникчизи Бурганга шынчы артып шыдаар деп билгеш: «Кортпа» — деп чымчаа-биле оожургаткан. Дээргиниң бүзүрелдиг сөстери Пётрнуң чуртталгазын өскертипкен. Соонда ол акызы Андрей-биле балыктаар ажылын каггаш, чагдырган Чагырыкчыны эдерип чорупканнар. Иегова оларны элбээ-биле йөрээген (Мк. 1:16—18).

5. Коргуушкуннарынга алыспайн, Иисусту эдерип чорупканы дээш, Пётр кандыг йөрээлдер алган?

⁵ Пётр Иисусту эдерип чорааш, дыка хөй кайгамчыктыг болуушкуннарны көрген. Дээргизи ооң караанга аарыг улусту экиртип, аза-буктарны сывырып, өлген улусту безин диргизип чораан (Мф. 8:14—17; Мк. 5:37, 41, 42) b. Оон аңгыда, Пётр Иисустуң алдарын көстүүшкүнге көргеш, бүгү чуртталгазында сактып алган (Мк. 9:1—8; 2 Пет. 1:16—18). Пётр Иисустуң өөреникчизи апарбаан болза, ол хуулгаазыннарны көрбес турган ийик. Коргуштарга база багай бодалдарга алыспайн, йөрээлдер алганын сактып келгеш, ол аажок өөрүүр турган чадавас.

6. Четпес талаларындан адырлып алыры, Пётрга белен турган бе? Тайылбырлаптыңар.

⁶ Пётр хөй хуулгаазыннарны көрген-даа болза, ооң четпес талалары бо-ла көстүп  кээр турган. Каш чижекти көрүптээлиңер. Иисус хилинчектенип өлгеш, библейжи медеглелдерни күүседирин чугаалаарга, Пётр ону чемелээн (Мк. 8:31—33). Пётр болгаш өске-даа элчиннер аразында кайызы эң чугула деп бо-ла маргыжар турганнар (Мк. 9:33, 34). Иисусту тудуп хоругдап турда, Пётр хылыш-биле бир кижиниң кулаан одура шаапкан (Ин. 18:10). Ол-ла дүне коргуушкунга алзып, чоок өңнүү Иисустан үш катап ойталааш, Пётр ишкирнигип ыглай берген (Мк. 14:66—72; Мф. 26:75).

7. Иисус дирлип келгеш, Пётрга кандыг арганы ажыткан?

⁷ Иисус өөреникчизинге чөгенмээн. Пётрнуң сеткили өскерилбээн деп билгеш, аңаа ынакшылын бадыткаар арганы берген. Иисус дирлип келгеш, Пётрдан: «Мээң хойларымче сагыш салып көр» — деп дилээрге, ол күзелдии-биле чөпшээрешкен (Ин. 21:15—17). Иерусалимге Беженги хүннүң байырлалында Иисустуң өөреникчилери бир дугаар ыдыктыг сүлдеге чагдырган үеде Пётр база аңаа турган.

8. Антиохияга Пётр кандыг улуг частырыг кылган?

⁸ Шилип чагдырткаш безин Пётрнуң четпес талалары турган. Ол б. э. 36 чылда кыртыжатпаан еврей эвес Корнилий ыдыктыг сүлде-биле чагдырган үеде чанынга турган. «Бурган улусту ылгай көрбес», ынчангаш шупту чоннардан улус христиан чыыштың кезии апарып болурун ол болуушкун көргүскен (Аж.-ч. 10:34, 44, 45). Ону көргеш, Пётр өске чоннар улузу-биле кады чемненип эгелээн. Мооң мурнунда ол ынчанмас турган (Гал. 2:12). Ынчалза-даа чамдык еврей христианнар өске сөөк улус-биле кады чемненип болбас дээр турган. Антиохияга ындыг үзел-бодалдыг улус кээрге, Пётр еврей эвес акыларын оюп эгелээн. Ол еврей христианнарның сеткилин хомудатпас дээш ынчанган хевирлиг. Павел элчин Пётрнуң ийи арынныг чоруун көргеш, улус мурнунга шыңгыы чемелээн (Гал. 2:13, 14). Чазыпкан-даа болза, Пётр Иеговага шынчы бараалгаарын соксатпаан. Аңаа чүү дузалаан?

9. Иоанн 6:68, 69-та сөстер Пётрнуң шынчызын канчаар көргүскен?

⁹ Пётр Иисус-биле чүге-даа торулбайн, шынчы, чүткүлдүг бараалгап чораан. Иисус билип алыры берге чүүл чугаалаарга, ооң бердингени ылаңгыя илерээн. (Номчуптуңар: Иоанн 6:68, 69.) Чамдык өөреникчилер тайылбырны манавайн-даа, башкызындан хая көрнү берген. Пётр чүгле Иисустуң сөстери мөңге амыдыралды бээр деп эки билир болгаш, башкызын кагбаан.

10. Иисустуң Пётрга чигзинмээни чүден көскү? (Чурукту база көрүңер.)

¹⁰ Пётр чеже-даа часкан болза, Иисус оон хая көрүнмээн. Иисустуң өлүрүнүң бетинде каш шак бурунгаар чүү болганын көрүптээлиңер. Пётр ону өске элчиннер-биле кааптарын Иисус билир турган. Ынчалза-даа өөреникчизи быжыгып келгеш, дөмей-ле Бурганга бараалгаар деп, Иисус чигзинмээн (Лк. 22:31, 32). Ол: «Сеткил-сагыш — сергек, а мага-бот — суларгай» деп база билир (Мк. 14:38). Ынчангаш Пётр үш катап ойталаарга безин, ол аңаа чөгенмээн. Иисус дирлип келгеш, Пётрга чааскаан турда келген (Мк. 16:7; Лк. 24:34; 1 Кор. 15:5). Буруузунуп, хараадаан элчинни ол дыка-ла быжыктырган.

11. Иегова Пётрну кагбас деп билип каарынга, Иисус канчаар дузалаан?

 ¹¹ Иисус Пётрну Иегованың деткимчезинге бүзүреткен. Иисус дирлип келгеш, элчиннери хөй балык тудуп аар кылдыр хуулгаазын кылган (Ин. 21:4—6). Иегова бараалгакчызын акша-көпеек талазы-биле хандырар деп, ол хуулгаазын Пётрну бүзүреткен. Бурганның «Чагыргазын бирги черге салыр» улуска Иегова бүгү херек чүүлдү бээр дээн Иисустуң сөстерин Пётр ынчан сактып келген чадавас (Мф. 6:33, Чаа делегей). Ынчангаш Пётр чуртталгазын балыктаарынга эвес, а Бурганга бараалгаткан. Ол б. э. 33 чылда Беженги хүннүң байырлалынга илеткелди дидим чугаалаан. Ооң ачызында муң-муң кижилер өөрүшкүлүг медээни хүлээп алган (Аж.-ч. 2:14, 37—41). Пётр самарийжилерге болгаш өске еврей эвес улуска Иисустуң өөреникчилери апаарынга база дузалаан (Аж.-ч. 8:14—17; 10:44—48). Моон алырга, Иегова чыышче янзы-бүрү кижилерни хаара тудар дээш, Пётрну идепкейлиг ажыглаан.

12. Кандыг-бир четпес талазы-биле демисежип чоруур улусту Пётрнуң чижээ канчаар быжыктырып болур?

¹² Иегова биске база шынчы бараалгаарынга дузалаар. Бир-ле четпес талавыс дээш, бараалгаары белен эвес бооп болур. Чамдыкта Пётр элчинден-даа артык берге ышкаш болза, Иегова биске сула салдынмазынга күштү бээр (Ыд. ыр. 93:17—19). Чижээ, бир акывыс Иегованың Херечизи апаарының мурнунда хөй чылдар дургузунда гомосексуалист чораан. Ол багай херектерин каггаш, долузу-биле эттинип алгаш-даа, шын эвес күзелдери-биле туржуп келген. Аңаа дүжүп бербезинге чүү дузалаан? Иегованың күжү эвес болза, чааскаан шыдавазын ол чугаалаан: «Алыс шынны кагбазынга ооң күжү дузалаан деп билип каан мен... ...Бараалгакчызы боорун Иегова меңээ чөпшээреп, четпес талаларымче-даа көрбейн, үргүлчү мени деткип турар».

13. Ажыл-чорудулга 4:13, 29, 31-де бижээн Пётрнуң чижээн канчаар эдерип болур бис? (Чурукту база көрүңер.)

¹³ Пётр кижилерден корткаш, шыңгыы частырыгларны кылып чораан деп көрдүвүс. Мөргүл аңаа дидим алдынарынга дузалап турган. (Номчуптуңар: Ажыл-чорудулга 4:13, 29, 31.) Бис база коргуштарывысты тиилеп ап шыдаар бис.  Нацист Германияга чурттап чораан Хорст акывыстың аныяк үезинде чүү болганын көрээлиңер. Ол школага каш-даа удаа базыышкынга алзып, «Хайль Гитлер!» деп турган. Ада-иези ону кончувайн, Иеговадан оглунга эрес-дидим болур күштү бээрин кады мөргүп турганнар. Ада-иезиниң дузазының ачызында Хорст Иеговага идегеп, Бурганга шынчы арткан. Соонда ол: «Иегова мени кажан-даа кагбаан» — деп чугаалаан c.

14. Ынакшылдыг кадарчылар барык дүжүп берипкен улуска канчаар дузалап болур?

¹⁴ Иегова биле Иисус бисти кажан-даа кагбас. Пётр Дээргизинден ойталаан соонда, чугула шиитпирни үндүрер ужурлуг турган: дүжүп бээр бе азы Иисусту улаштыр эдерер бе? Пётрнуң бүзүрели кошкавазын дээш, Иисус Иеговадан дыка-ла дилээн. Иисус Пётрга ол дээш мөргээнин чугаалааш, ол база ха-дуңмазын быжыктырып шыдаар деп ону бүзүреткен (Лк. 22:31, 32). Пётр Иисустуң ол сөстерин сактып келгеш-ле, сорук кирип турган чадавас. Ындыг шилилгеге кээр болзувусса, Иегова бис дээш ынакшылдыг кадарчылар таварыштыр сагыш човаар деп бүзүрээр бис. Биске шынчы артарынга олар дузалаар (Эф. 4:8, 11). Иеговага үрде бараалгап чоруур удуртукчу акывыс Пол шак-ла ындыг кадарчы боорун кызып чоруур. Кошкай берген ха-дуңмазын сорук киирер дээш, Иегованың оларны канчаар тып алганын сагындырып, Бурган кажан-даа кагбас база бердинген ынакшылдыг деп бүзүредип турар. Пол мынча дээн: «Барык дүжүп берипкен дыка хөй акы-угбалар  Иегованың дузазы-биле катап быжыга бергенин көрген мен».

15. Матфей 6:33-те сөстерниң алыс шынныын Пётр элчин биле Хорст Хеншельдиң үлегери канчаар бадыткап турар?

¹⁵ Иегова Пётрнуң-даа, өске-даа элчиннерниң материалдыг хереглелдерин хандырган. Бурганга бараалгалывыс бирги черде болза, бис дээш база сагыш човаар (Мф. 6:33, Чаа делегей). Хорсттуң чижээнче эглип кээлиңер. Ийиги делегей дайынының соонда ол эгелекчи болуксап турган. Ынчалза-даа дыка ядыы болгаш, канчаар амыдыраарын билбейн турган. Хорст канчалган? Ол Иегованың канчаар сагыш човаарын хынаар дээн. Кожуун хайгааракчызы кээрге, ол бүдүн неделя ишти бараалгаан. Неделяның төнчүзүнде ону солун белек манап турган: кожуун хайгааракчызы аңаа ат чок чагаа хавы сунган. Ында элээн айлар иштинде бараалгаарынга четчир акша бар болган. Иегова ооң дугайында сагыш човаарын ол белек-биле бүзүреткенин Хорст билип каан. Оон эгелээш-ле, акывыс Бурганның Чагыргазын кезээде бирги черге салып чоруур (Мал. 3:10).

16. Пётрнуң чижээ болгаш ооң чагаалары бистиң кичээнгейивиске чүге төлептиг?

¹⁶ Пётр Иисустан ону кааптарын дилээрге, оозу кагбаан. Ол дээш Пётр дыка-ла өөрээн! Иисус ону улаштыр өөреткен соонда, Пётр шынчы элчин болуп, христианнарга тулган үлегерни арттырган. Пётрнуң Иисустан өөренип алган кичээлдери биске база ажыктыг. Оларның чамдыызын база оон-даа өске чүүлдерни Пётрнуң ийи чагаазындан тып ап болур. Ол чагааларны бирги вектиң чыыштарынга бижээн, а сөөлүнде Библияже киирип каан. Дараазында статьяга ол чагааларда сагындырыгларны база амгы үеде оларның биске кайы хире ажыктыын көөр бис.