1, 2. Самсоннуң дугайында төөгүнү сайгарары биске чүге ажыктыг?

 САМСОН деп атты дыңнааш, чүнү бодаар-дыр силер? Бурганның кайгамчык күштүг бараалгакчызын сактып кээр чадавас силер. Самсоннуң бир шын эвес шиитпири ону өлүмге чедирген. Ынчалза-даа Иегова ону шынчы бараалгакчызы деп санап чораан. Бурган ооң дугайында төөгүнү биске ажыктыг болзун дээш, Библияда бижидип каан.

² Шилип алган чону израиль дээш, Иегова Самсонну таварыштыр кайгамчыктыг херектерни кылган. Чүс-чүс чылдар эрткенде, Иегова ооң адын бүзүрели быжыг бараалгакчыларының аразынче киирерин Павел элчинге чагаан (Евр. 11:32—34). Берге үелерде безин Самсон Иеговага идегеп чораан. Бо статьяга ол бараалгакчыдан чүнү өөренип алырывысты база ооң чижээ бисти канчаар деткиирин көөр бис.

3. Самсон кандыг даалга алган?

³ Самсон Бурганның чону филистимнерниң каржы дарлалынга турда төрүттүнген (Башт. 13:1). Чон дыка хилинчектенип чораан. Иегова «израиль чонну филистимнерниң холундан» камгалаар тускай сорулга-биле Самсонну шилип алган (Башт. 13:5). Дыка-ла белен эвес даалга! Ону күүседирде, Самсон Иеговага идегээр ужурлуг турган.

4. Иегова Самсонга филистимнерден хосталып алырынга канчаар дузалаан? (Баштыңчылар 15:14—16).

 ⁴ Самсон Бурганга идегээрге, ооң канчаар дузалаанын көрүптээлиңер. Бир катап филистимнер Самсонну тудуп аар дээш, Лехиге чедип келген (ол чер Иудеяда чадавас). Иудейлер филистимнерден корткаш, чаңгыс чер чурттуу, Самсонну, хендирлер-биле шарааш, дайзыннарынга чедирип берген (Башт. 15:9—13). Ынчан Иегованың «Сүлдези ооң кырынче бадып» келгеш, хүлүглеринден хостаптарга, Самсон филистимнерни «элчиген чаагының сөөгү-биле муң кижини ийи оваа кылдыр өлүрүп каапкан»! (Номчуптуңар: Баштыңчылар 15:14—16.)

5. Самсоннуң элчиген чаагының сөөгүн ажыглааны чүнү көргүскен?

⁵ Самсон чүге чаак сөөгүн ажыглаан? Ону дайылдажыр чепсек деп болбас. Самсон чедиишкинин шилип алган чепсээнден эвес, а Иеговадан деп билип турган. Ол холунга туттунган-на чепсекти ажыглапкан. Ооң улуг тиилелгези Иеговага долузу-биле бүзүрээнинден тода көскү.

6. Иегованың берген даалгаларын күүседиринге биске чүү дузалаар?

⁶ Иегованың дузазы-биле болдунмас ышкаш даалгаларны кылып шыдаар бис. Ынчаар ол бисти кайгадып болур, ынчангаш Иеговага идегеңер! Ол Самсонга күштү берген. Ол силерни база деткиир, ооң күзел-соруун күүседиринге дузалаар (У. ч. 16:3).

7. Иегованың удуртулгазын дилээри чугула деп, кандыг таварылга көргүзүп турар?

⁷ Организациявыстың тудуг проектилеринде акы-угбалар Иеговага идегеп турарлар. Ооң мурнунда Хурал залдарын болгаш өске-даа тудугларны боттарывыс тудуп турган бис. Иегованың организациязы өскен тудум, өскерлиишкиннер негеттинип келген. Харыысалгалыг акылар Бургандан удуртулганы дилеп, чаа аргаларны өөренип эгелээн. Чижээ, белен  бажыңнарны садып алгаш, эде кылып эгелээн бис. Делегейниң аңгы-аңгы булуңнарынга тудугга киржип турган Роберт мынча дээн: «Ол чаа арганы хүлээри чамдыывыска баштай берге турган. Чаартылгаларны Иегова деткип турар деп көстүп келген. Акыларывыс база өөрениринге белен болган». Бо дээрге Бурган күзел-соруун күүседир дээш, чонун канчаар удуртуп турарының чүгле чаңгыс чижээ-дир. «Мээң бараалгалым моон-даа соңгаар бедик шынарлыг болур кылдыр, Иеговадан удуртулганы дилеп, эде тургустунарынга белен мен бе?» — деп үе-үе болгаш, шупту бодувустан айтырар болзувусса эки.

8. Самсон хөлчок суксай бергеш, чүнү канчалган?

⁸ Самсоннуң өске-даа кайгамчык херектериниң дугайында номчаан боор силер. Чижээ, ол хол даяң арзылаңны тиилеп каан, а соонда Ашкелонга 30 филистимни өлүрген (Башт. 14:5, 6, 19). Иегованың дузазы чокка ол болдунмас деп Самсоннуң билип турганы кайыын көскү? Муң филистимнерни тиилээн соонда, ол хөлчок суксай берген. Ынчан ол сугну боду дилевейн, Иеговага мөргээн (Башт. 15:18).

9. Иегова Самсоннуң мөргүлүнге канчаар харыылаан? (Баштыңчылар 15:19).

⁹ Самсоннуң дилээнге Иегова хуулгаазын арга-биле черден суг бажы аксып берген. «Самсон ол сугну ижип аарга, ооң күжү катап кирип... келген». (Номчуптуңар: Баштыңчылар 15:19.) Чылдар эрткенде, Самуил медээчи Баштыңчылар номун бижип турда, ол суг бар турган. Иегованың шынчы бараалгакчылары берге үеде Бурганга ынанып болурун израильчилерге ол суг сагындырып турган чадавас.

10. Иегованың дузазын алыр дизе, чүнү кылыр болза эки? (Чурукту база көрүңер.)

¹⁰ Кандыг-даа салым-чаяанныг, бараалгалга чедиишкинниг болзувусса, Иеговадан дуза дилээри чугула. Ёзулуг чедиишкин чүгле Иеговага ынаныры-биле болдунар деп биче сеткилдии-биле миннири чугула. Бурганның берген суун Самсон ижип аарга, күжү эглип келгени дег, бис база Иегованың берген бүгү чүүлүн ажыглаар болзувусса, шак-ла ындыг күштүг боор бис (Мф. 11:28).

11. Иегованың дузазынга идегээривис чүден көстүр? Чижекти чугаалаңар.

¹¹ Каржы истеп сүрүүшкүнге таваржып турар Россияда акыларывыстың бирээзи Алексейниң чижээн көрээлиңер. Ындыг берге байдалда Бурган-биле быжыг харылзаалыг артарынга аңаа чүү дузалап турарыл? Алексей кадайы-биле эки чаңчылды сайзырадып алганын мынча деп чугаалаан: «Хүннүң-не Библияны номчуп, шинчилээр чурумумну сагыырын кызып турар... мен. Өөм ишти-биле эртенниң-не хүннүң номчуур шүлүктү сайгаргаш, Иеговага мөргүүр бис». Оон чүнү өөренип ап болур бис? Бодунга эвес, чүгле Иеговага идегээри чугула. Маңаа быжыг бүзүрел херек. Ону канчаар сайзырадырыл? Библияны өөренир, мөргүүр, чыыштарже баар, суртаалдаар. Кызымак бараалгаарывыска, Иегова бодунуң талазындан элбээ-биле йөрээр. Бурган Самсонга күштү берген болганда, биске база бээр.

12. Самсоннуң чуртталгазында өске херээженнерден Далида чүзү-биле ылгалып турган? Ол чүге багай шилилге болган?

¹² Самсон бис ышкаш тергиин эвес болгаш, чамдыкта шын эвес шиитпирлерни үндүрүп турган. Бирээзи багай түңнелге чедирген. Ол баштыңчы чораан үезинде «Сорек шынаазы чурттуг Далида деп херээженге ынакшый берген» (Башт. 16:4). Ооң мурнунда Самсон Иегованың башкарылгазынга дүүштүр «филистимнерни кезедир» арга дилеп, филистим кыска өгленир деп турган. Ооң соонда филистимнерниң Газа деп хоорайынга самыын садар херээженниң бажыңынга хоначалап келген. Дүне када Бурган Самсонга күштү бээрге, ол хоорайның хаалгаларын чүктеп аппарган. Хоорай камгалал чок арткан (Башт. 14:1—4; 16:1—3). А Далида-биле байдал көңгүс өске турган. Ол израиль чораан чадавас, ынчангаш филистимнер-биле демисежиринге ооң дузазы чок болган.

13. Далида Самсонга кандыг хамаарылга көргүскен?

¹³ Далида Самсонну филистимнерге хөй түңнүг акшага садыпкан. Самсоннуң күжүнүң чажыдын билип аар дээш, Далида хүннүң-не ээрежип туруп берген. Самсон ооң кажар бодалын билбейн, ынакшылга согурарып, ол хире бүзүрээчел болганы ол бе? Канчаарга-даа ол көгүдүгге алзыпкан. Харааданчыг чүүл, Самсон частырыының хайындан түр када күжүн база Иегованың ээ көрүүшкүнүн чидирип алган (Башт. 16:16—20).

14. Самсоннуң Далидага бүзүрээни чүү чүвеге чедирген?

¹⁴ Самсон Иеговага эвес, а Далидага бүзүрээш, улуг чидиригге таварышкан.  Филистимнер ону тудуп алгаш, карактарын дежип каан. Оон хаалгазын чүктеп аппарганы Газа хоорайның кара-бажыңынче Самсонну киир октааш, тараа дээрбелээр кулу кылып алган. Филистимнер Самсонну боттарының бурганы холунче киирип берген деп бүзүреп турган. Ынчангаш олар Дагон бурганынга улуг өргүл салыр дээш, байырлалче чыглып келгеннер. Самсонну кочулаары-биле үндүрүп алганнар (Башт. 16:21—25).     

15. Самсон Иеговага катап идегеп эгелээнин канчаар көргүскен? (Баштыңчылар 16:28—30). (Журналдың даштында чурукту көрүңер.)

¹⁵ Самсон улуг частырыгны кылган-даа болза, дүжүп бербейн, Бурганның даалгазын күүседир хөөнүн чидирбээн. (Номчуптуңар: Баштыңчылар 16:28—30.) Ынчангаш ол Иеговадан: «Филистимнерден өжээнимни негеп алыйн» — деп дилээн. Бурган Самсоннуң мөргүлүнге харыылап, кайгамчыктыг күжүн эгидип берген. Ол удаада Самсон кажангызындан артык хөй филистимнерни узуткаан.

16. Самсоннуң частырыында бисте кандыг кичээл бар?

¹⁶ Частырыы дээш аар өртек төлээн-даа болза, Самсон Иегованың күзелин күүседиксеп турган. Биске база эдип-чазаашкын херек апарганда азы хүндүткелдиг даалганы чидирип алган болзувусса, дүжүп бербес ужурлуг бис. Бурган өршээринге белен деп утпаңар (Ыд. ыр. 102:8—10). Эрткен үеде чазыпкан-даа болзувусса, Самсонга ышкаш, Иегова биске чаа даалгаларны бүзүреп, күш киирип болур.

17, 18. Майклдың таварылгазы силерни канчаар сорук киирер-дир? (Чурукту база көрүңер.)

¹⁷ Майкл дээр аныяк акывыстың таварылгазын көрээлиңер. Ол чыышка дузалакчылап, долу эгелекчилеп, Иеговага идепкейлиг бараалгап чораан. Харааданчыг чүүл, чаңгыс частырыы дээш, Майкл хүлээлгелерин чидирип алган. Ол мынча деп үлешкен: «Ол үеге чедир долу бараалгап келген мен. Оон даалгалар чок арткан мен. Иегова менден хая көрнү берген деп бодал кирбээн. Ынчалза-даа биеэги идепкейлиг бараалгалымны, Бурган-биле  чоок хамаарылгамны катап эгидип шыдаар мен бе деп чигзинип турган мен».

¹⁸ Майклдың дүжүп бербээни өөрүнчүг. Оон ыңай ол мынча дээн: «Мен Иегова-биле найыралымны эгидип аар дээш, бүгү күжүмнү үндүрген мен. Сеткилимде чүү барын аңаа үргүлчү чугаалап, ооң Сөзүн өөренип, боданып турган мен». Үе эртерге, Майкл чыышка эки адын катап эгидип алган. Амгы үеде ол удуртукчу, долу эгелекчи кылдыр бараалгап чоруур. Ол демдеглээн: «Шупту улус, ылаңгыя удуртукчулар, мени сорук киирип, деткээннер. Иегова меңээ ам-даа ынак деп билип алырынга ол деткимче дузалаан. Ам чыышка катап арыг арын-нүүрлүг бараалгап болур мен. Бо таварылга мени сеткилинден буруузун миннип турар кижи бүрүзүн Иегова өршээр деп өөреткен». Ол чүүл шупту улуска хамааржыр. Чазыпкаш-даа, эттинип, Иеговага ынанырын соксатпас болзувусса, ол биске бүзүреп, бисти шаңнаар (Ыд. ыр. 85:5; У. ч. 28:13).

19. Самсоннуң төөгүзүнден силерни чүү сорук киирер-дир?

¹⁹ Бо статьяга Самсоннуң чуртталгазындан солун болуушкуннарны көрдүвүс. Ол тергиин эвес болгаш, Далидага бүзүреп, шыңгыы частырыгны кылган. Ынчалза-даа ол Иеговага бараалгаарын соксатпаан. Бурган база Самсондан хая көрүнмээн, харын-даа улуг ажылга киржирин чөпшээрээн. Иегова Самсоннуң бүзүрелин үлегерлиг деп санаан. Ол чүүл Еврейлерге 11 дугаар эгеде ооң адын Бурганның өске шынчы бараалгакчыларының аразынче кииргенинден көскү. Берге үелерде биске күзелдии-биле күштү хайырлаар дээрде ынакшылдыг Адавыска бараалгаары дыка-ла аянныг! Ынчангаш Самсон ышкаш: «Мени бодап келем, меңээ... күштен берем» — деп Иеговадан дилээлиңер (Башт. 16:28).