1. Ажылга азы школага бистен чүнү айтырып болур?

 АЖЫЛЫҢАРДА бир кижи азы чаңгысклассчыңар чүдүлгеңерге хамаарыштыр айтырыг салырга, чүнү миннир-дир силер? Девидей бээр-дир силер бе? Ындыг минниишкин дыка хөй улуска таныш. Оон корткан херээ чок. Салган айтырыгларындан ол кижиниң чүү чүвеге бүзүрээри билдинип кээр. Ынчан өөрүшкүлүг медээни үлежири биске белен апаар. Чамдыкта улус бистиң-биле чөпшээрешпес болгаш, маргыжар күзелдиг айтырыг салыр. Олар Иегованың Херечилериниң дугайында шын эвес информация дыңнааш, бүзүрей берген боор (Аж.-ч. 28:22). Оон аңгыда, Библияда «сөөлгү хүннерде» кижилер кээргел чок, каржы болурун өттүр сөглеп каан (2 Тим. 3:1, 3).

2. Томаарыыры чүге чугула?

² «Чүдүлгемге хамаарыштыр анчыг, орааштыг айтырыг салырга, канчаар эвилең-ээлдек харыылаар мен?» — деп боданыр чадавас силер. Ынчан томаанныг болгаш чымчак сеткил дузалаар. Хенертен айтырыг салырга азы маргыжарга, томаанныг кижи туттунуп шыдаар (У. ч. 16:32). «Чугаалаары белен, кылыры берге» деп болур силер. Ынчаарга томаарыышкынны канчаар сайзырадырыл? Шүгүмчүлелге канчаар чымчаа-биле харыылаарыл? Чүдүлгезин томаанныг, эвилең-ээлдек камгалаарынга ажы-төлдү  канчаар өөредир? Ону сайгарып көрээлиңер.

3. Чүге томаарыырын кошкак эвес, а күштүг кижиниң демдээ деп болур? (2 Тимофейге 2:24, 25).

³ Томаанныг болуру кошкак эвес, күштүг чоруктуң демдээ. Белен эвес байдалда оожум артарынга иштики күш херек. Томаарыыр чорук — «Сүлдениң үре-түңнели» (Гал. 5:22, 23). Чамдыкта «томаарыыры» деп очулдуртунган грек сөстү черлик аътты чаажыктырып алган байдалда ажыглаар турган. Чаажыга берген эмдик аътты бодап келиңер. Ол ам дыңнангыр, ынчалза-даа күштүг. Кижилер-биле база шак-ла ындыг. Томаараан тудум, улам күштүг апаар бис. Ол чугула шынарны сайзырадырда чүгле кызымак, шудургу болурундан аңгыда, Бургандан ыдыктыг сүлдени дилеп мөргүүрү чугула. Иегованың Херечилеринден тулдур айтырыг салырга, удурланыкчыларынга эвилең-ээлдек харыылааш, ол шынарны сайзырадып ап болурун көргүскеннер. (Номчуптуңар: 2 Тимофейге 2:24, 25.) Томаанныг чорукту канчаар бодувустуң база бир күштүг талавыс кылып ап болур бис?

4. Томаарыырынга хамаарыштыр Исаактан чүнү өөренип ап болур бис?

⁴ Чымчак сеткилдиг, томаанныг улустуң дугайында Библияда хөйнү бижээн. Оларның бирээзи — Исаак. Ол Филистияның Герар хоорайның чоогунга чурттап турда, ачазының казып каан кудуктарын кожалары адааргааш, хөөп каапканнар. Исаак ону негевейн, өске черже көже бергеш, чаа кудуктар казып алган (Э. д. 26:12—18). Филистимчилер ол сугну бистиң дей бээрге, Исаак дөмей-ле маргышпаан (Э. д. 26:19—25). Өске улус маргыжар сагыштыг-даа турда, томаанныг болурунга аңаа чүү дузалаан? Ада-иези Авраам биле Сарраның үлегери. Ажыл-херээн ачазы канчаар тайбың шиитпирлеп турарын, авазының «томаанныг болгаш оожум аажызын» Исаак көрүп өскен (1 Пет. 3:4—6; Э. д. 21:22—34).

5. Христиан ада-иелер ажы-төлүн томаарыырынга өөредип шыдаар деп, чуртталгадан кандыг таварылга көргүскен?

⁵ Эргим ада-иелер, ажы-төлүңерни томаарыыр чорукка өөредип шыдаар силер. 17 харлыг Макса́нс школага-даа, суртаалга-даа каржы-хажагай улус-биле бо-ла таваржыр турган. Ада-иези аңаа эвилең-ээлдек, томаанныг болурунга шыдамыккай дузалажып турганнар. «Чөңгээлээн кижиге дүржок харыылаарының орнунга, туттунарынга хөй күш херегин оглувус билип каан» — деп, олар чугаалаан. Ёзулуг күш томаанныг кижиде деп көргеш, дуңмавыс ол кайгамчык шынарны бодунга сайзырадып шыдаан.

6. Мөргүл оон-даа эки томаарыырынга дузалап болур бе? Тайылбырлаптыңар.

⁶ Бурганывысты куду көрүп азы Библияны кыжырып турар кижиге таварышкаш, канчаар алдынар ужурлуг бис? Эвилең-ээлдек харыылаар дээш, Иеговадан мерген угаанны, сүлдени дилээри чугула. Соонда кээп, хоомай харыывысты билип кааш, канчаар бис? Ынчан катап мөргүп алгаш, оон-даа эки харыылаарын боданып болур бис. Биче сеткилдиг болуп, туттунуп шыдаарынга дузалаар ыдыктыг сүлдезин Иегова биске бээр.

7. Библейжи шүлүктерни доктаадыры чүге ажыктыг? (Чугаалар 15:1, 18).

⁷ Чамдыкта аксы-сөзүвүстү тудары берге апарганда, библейжи шүлүктерни  Бурганның сүлдези сагындырып дузалаар (Ин. 14:26). Чижээ, Угаадыглыг чугаалар номунда үнелиг сүмелер хөй. Ону дыңнап, ажыглаар болзувусса, оон-даа томаарып болур бис. (Номчуптуңар: Чугаалар 15:1, 18.) Байдал нарыыдаарга, томаарыыры кайы хире чугулазын ол библейжи ном база көргүскен (У. ч. 10:19; 17:27; 21:23; 25:15).

8. Айтырыгның чылдагаанын билири чүге чугула?

⁸ Ёзулуг томаанныг болурунга эскериичел чорук херек (У. ч. 19:11). Чүдүлгезинге хамаарышкан айтырыг салырга, эскериичел кижи далаш түңнел үндүрбес. Чамдык айтырыглар хөй кезии суг адаанда чыдар айсбергтиң чүгле бажы дег боор. Айтырыг салырынга ол кижиге чүү идиг болганын билбес бис. Өске барымдаалар бар бе? Ынчангаш чүгле айтырыгның ёзулуг чылдагаанын тодарадып алгаш, харыылаары чугула (У. ч. 16:23).

9. Гедеон эфремчилерге харыылаарда, эскериичел, томаанныг чоруун канчаар көргүскен?

⁹ Гедеоннуң эфремчилерге харыызын сактып кээлиңер. Израильдиң дайзыннары-биле тулчурда, оларны дораан кыйгырбаан дээш, Гедеонну чемелээннер. Эфремчилерниң хорадаан ёзулуг чылдагааны  чүдел, хомудал бе? Гедеон эскериичел бооп, эфремчилерниң сагыш-сеткилин билип аар дээш, эвилең-ээлдек харыылаарга, «оларның сагыш-хөңнү оожургаан» (Башт. 8:1—3).

10. Бүзүреливистиң шынныынга чигзинген улуска эвилең-ээлдек харыылаарынга биске чүү дузалаар? (1 Пётр 3:15).

¹⁰ Ажылывыска азы школага библейжи негелделерни чүге сагып чоруурувусту айтырарга, хүндүткелдиг харыылаарын кызар бис. (Номчуптуңар: 1 Пётр 3:15.) Салган айтырыгны шүгүмчүлел азы бистиң бүзүреливиске удур кылдыр хүлээвейн, а ону чүү дүвүредип турарын билип аар арга кылдыр көрүңер. Кандыг-даа айтырыг салган болза, эвилең-ээлдек харыылаарын күзээр бис. Чымчак харыывыс ол кижиниң көрүжүн өскертип болур. Ынчангаш айтырыг кочу-шооттуг, каржы-даа болза, эвилең-ээлдек алдынарын кызар бис (Рим. 12:17).

11, 12. а) Нарын айтырыгга харыылаар бетинде чүнүң дугайында боданыр болза эки? (Чурукту база көрүңер.) б) Салган айтырыг эки чугааны эгелеп болур бе, чижекке чугаалаңар.

¹¹ Ажылывыска бир кижи Иегованың Херечилери төрүттүнген хүннерни чүге демдеглевезил деп айтырар болза, бисти шуут хөглевес деп бодап турары ол бе? Азы аравыста найыралды баксырадып турар деп бодап турар бе? Ол кижини канчаар оожургадып болурул? Ажылчыннарның найыралдыг болур дээн күзелин үнелеп турарывысты тайылбырлап, ону бүзүредир бис. Ынчан төрүттүнген хүннер дугайында Библияда чүнү бижээнин, ол кижиге шөлээн байдалга чугаалап бээр арга тыптып кээр чадавас.

¹² Нарын темалар көдүрлүп кээрге, ол арганы ажыглап болур бис. Чижээ, чаңгысклассчывыс Иегованың Херечилери гомосексуализмге хамаарылгазын өскертир ужурлуг дээн дижик. Чүге ол ону чугаалап турар? Иегованың Херечилериниң дугайында шын эвес чугаалар дыңнаан бе? Төрели азы бир эжи гомосексуалист бе? Ындыг чуртталгалыг улуска бисти хөңнү чок деп бодаар чадавас. Шупту улуска ынак болгаш, кижи бүрүзүнүң хууда шилилге кылыр эргезин хүндүлээривисти чугаалаары чугула (1 Пет. 2:17) b. Ынчан библейжи мөзү-шынар негелделери биске аас-кежиктиг болурунга дузалыг деп тайылбырлап бээр арга тыптып кээр чыгыы.

13. Бурганга бүзүреливисти кыжырарга, канчаар алдынар болза эки?

¹³ Чүгле бодунуң бодалы шын дээр кижиниң чүү чүвеге бүзүрээрин билир бис деп түңнээринче далашпас болза эки (Тит. 3:2). Чижээ, чаңгысклассчывыс Бурганга бүзүрээри каттырынчыг дээн дижик. Ол эволюцияга бүзүрээр бе база ол теманы дыка эки билир бе? Азы өске улустан дыңнаан чүүлүн катаптап турар бе? Эртем сайгарылгазы кылырының орнунга, каш бодалдан чугаалаңар. Чижээ, jw.org сайтыда чаяалга дугайында чүү дээнин көргүзүп бериңер азы ынаар шөлүгден октап бериңер. Оон ол кижиниң сайтка көрген, номчаан чүүлүн сайгарар күзели тыптып кээр чадавас. Бистиң хүндүткелдиг хамаарылгавыс Библияга сонуургалды оттуруп болур.

14. Чаңгысклассчызы Иегованың Херечилериниң дугайында шынны билип аар кылдыр дузалаар дээш, Нилл сайтыны канчаар ажыглаан?

¹⁴ Нилл деп элээди оол дуңмавыс сайтывысты эки билир болгаш, Иегованың  Херечилериниң дугайында шын эвес бодалдыг турган чаңгысклассчызынга канчаар дузалаанын үлешкен: «Ол мени бадыткаттынган эртем шинчилелдеринге эвес, анаа тоолдарга бүзүрээр сен дээр турган». Ол дыңнавас боорга, Нилл аңаа jw.org сайтыда «Наука и Библия» деп кезекти айтып берген. Чаңгысклассчызы ооң соонда чуртталга канчаар тывылганының дугайында күзелдии-биле чугаалажып эгелээрге, сайтче кирип турган деп, Нилл билип каан. Ол арганы база ажыглап көрүңер. Түңнели эки боор чадапчок.

15. Бүзүрелге хамаарышкан айтырыгларга эвилең-ээлдек харыылаарынга ажы-төлүн ада-иелер канчаар өөредип болур?

¹⁵ Школага бичии христианнардан чүдүлгезиниң дугайында айтырып болур. Ада-иелер ажы-төлүн эвилең-ээлдек харыылаарынга канчаар өөредир? (Иак. 3:13). Чамдык ада-иелер өг-бүле мөгейиишкининге уруглары-биле чуртталгадан байдалдарны көргүзүгге ойнап турар. Олар школага көдүрлүп кээр темаларны шилип алгаш, канчаар хүндүткелдиг, эвилең-ээлдек харыылаарын көргүзүп, сайгарып турарлар. ( «Өг-бүле мөгейиишкининге шенеп көрүңер» деп көзенекти көрүңер.)

16, 17. Өг-бүле мөгейиишкининге көргүзүглер элээди ажы-төлге канчаар дузалап болур?

¹⁶ Өг-бүле мөгейиишкининге көргүзүглерден ажы-төл бүзүрелин тайылбырлап өөренип ап турар. Ынчалдыр олар Библияга бүзүреп болур деп боттары шынзыгар. JW.ORG сайтыда «Аныяктарның айтырыглары» деп чыынды статьяларда элээдилерге ажылчын схемалар бар. Оларның сорулгазы — элээди дуңмаларывыстың бүзүрелин быжыктырары база айтырыгларга  бодунуң сөзү-биле харыылаарынга белеткээри-дир. Ол статьяларны бүдүн өг-бүлези-биле сайгарып тургаш, ажы-төл-даа, ада-иелер-даа бүзүрелин хүндүткелдиг, эвилең-ээлдек камгалаарынга өөренип ап турар.

¹⁷ Өг-бүле мөгейиишкининге көргүзүг тургузары кайы хире дузалыын Мэ́тью тайылбырлаан. Ол ада-иези-биле школага сайгара бээр айтырыгларны бо-ла шинчилээрлер. Мэтью мынча дээн: «Таваржыр байдалдарны даап бодааш, шинчилээш, шенеп тургузар бис. Бир-ле чүүлге чүге бүзүрээримни тода билип алырымга, девидевейн, томаанныг, эвилең-ээлдек харыылаары меңээ чиик».

18. Колосчуларга 4:6-да кандыг кыйгы бар?

¹⁸ Чамдык улуска чүгле бүзүрелдиг бадыткалдар чедишпес. Ынчалза-даа томаанныг, эвилең-ээлдек хамаарылгавыс чүректерни чаалап ап болур. (Номчуптуңар: Колосчуларга 4:6.) Бодал солчуру мячик октаан оюнга дөмей. Мячикти эптиг-даа, хамаанчок-даа октап болур. Ону таптыг октаар болзувусса, ойнап турар кижиге тудары белен боор, а оюн соксавас. Ооң-биле дөмей, бодалдарны томаанныг, эвилең-ээлдек илередиривиске, улус бисти дыңнап, чугаалажыксаар. Анаа-ла маргыжар, чүдүлгевисти кыжырар кижи-биле чугааны улаштырары албан эвес (У. ч. 26:4). Ындыг улус эвээш, а бисти дыңнаксаар улус хөй.

19. Бүзүреливисти камгалаарда, чүге томаанныг болур ужурлуг бис?

¹⁹ Томаарыыры чугула сорулга дээр болза, чазыг болбас. Шаштырыглыг айтырыгга харыылаарда азы чөптүг эвес шүгүмчүлел дыңнаанда, эвилең-ээлдек болур дээш, Иеговага мөргүңер. Томаанныг, эвилең-ээлдек аажы-чаң бисти маргыштарга киириштирбес деп утпаңар. Хүндүткелдиг, чымчак харыыңар чамдык дыңнакчыларның силерге болгаш Библияга хамаарылгазын өскертип болур. Ынчангаш «идегелиңер дугайында айтырыг салган улуска харыы бээринге кезээде белен болуңар. Чүгле ол харыыны эвилең-ээлдек, дыңнакчыларга хүндүткелдиг бериңер» (1 Пет. 3:15, 16). Моон-даа соңгаар томаарыырын кызаалыңар, чүге дизе ол аажы-чаң бисти ёзулуг күштүг кылып каар!