1, 2. Иегова бисти чүге өске улуска буян кылгаш, аас-кежик алыр кылдыр чаяаганыл?

 ӨСКЕ улус биске буян кылырынга бодаарга, боттарывыс өске улуска экини кылгаш, оон-даа аас-кежиктиг, өөрүшкүлүг апаар бис (Аж.-ч. 20:35). Бисти Иегова ынчалдыр чаяап каан. Оон алырга, белектер алырынга ынак эвес бис бе? Чо-ок, дыка ынак бис. Ынчалза-даа улуска буян кылгаш, оон-даа аас-кежиктиг апаар бис. Бисти ынчаар чаяап кааны дыка эки. Чүге?

² Иегова бисти боттарывысты аас-кежиктиг кылып шыдаптар кылдыр чаяап каан. Оон-даа өөрүшкүлүг болур дизе, буян кылыр херек. Дыка-ла кайгамчык кылдыр чаяаттынган бис! (Ыд. ыр. 138:14).

3. Иегова чүге аас-кежиктиг Бурган?

³ Улус дээш сагыш човаары аас-кежик эккээрин Библияда бижээн. Ынчангаш Иегованы аас-кежиктиг Бурган дээри кайгамчык эвес (1 Тим. 1:11). Эң-не буянныг Аданың «ачызында чурттап, шимчеп база амыдырап» чоруурувусту, Павел элчин чугаалаан (Аж.-ч. 17:28). Ийе, шупту буянныг болгаш тергиин белектер — Иеговадан (Иак. 1:17).

4. Хөй өөрүшкү алыр дээш, чүнү кылып болур бис?

⁴ Өске улус дээш сагыш човаары оон-даа улуг өөрүшкү  эккээрин күзээр силер бе? Ынчаарга буянныг Бурганывыс Иеговадан үлегерни алыңар (Эф. 5:1). Иегова кижилер дээш канчаар сагыш човаарын база буянныг ажыл-херээвисти улус үнелевээн ышкаш болза, чүнү кылырын бо статьяга көөр бис. Ооң дузазы-биле дүжүп бербейн, буян кылырынче сорук кирип, түңнелинде оон-даа аас-кежиктиг апаар бис.

ИЕГОВА ЫШКАШ БУЯННЫГ БОЛУҢАР

5. Иегова биске чүнү бергенил?

⁵ Иегованың буянныы чүден көскү? Дараазында чүгле каш чижек. Иегова амыдыралга херек бүгү чүүлдү биске берип турар. Ол дээрге хөй бай-байлак эвес-тир. Иегованың ачызында аъш-чем, идик-хеп, чурттаар оран-сава дээн ышкаш амыдыралга чугула херек чүүлүвүс бар (Ыд. ыр. 4:9; Мф. 6:31—33; 1 Тим. 6:6—8). Ол бүгүнү Иегова чүге кылып турар? Хүлээлгези дээш бе? Чок.

6. Матфей 6:25, 26-да биске кандыг кичээл бар?

⁶ Иегова биске ынак болгаш, бис дээш сагыш човап турар. Матфей 6:25, 26-да (номчуптуңар) Иисустуң куштарга хамаарыштыр: «Олар тараа тарывас, дүжүдүн ажаавас, аңмаарже шыгжавас-тыр, ындыг-даа болза, Дээрде Адаңар оларны ашкарып-чемгерип турар-дыр» — дээнин сактып кээли. Улаштыр ол: «А силер куштардан оранчок үнелиг болгай силер!» — деп ылавылаан. Моон кандыг түңнел үндүрүп болур? Иегова бараалгакчыларын аң-меңден, куштардан оранчок үнелээр. Кушкаштарны бодаар болганда, ол бисти черле утпас. Иегова — ынакшылдыг Ада ажы-төлүн чемгерип, хепкерип турар (Ыд. ыр. 145:16; Мф. 6:32).

7. Дуза кадар дээш, Иегованың үлегерин канчаар эдерип болур бис? (Чурукту база көрүңер.)

⁷ Иегованы өттүнүп, бис база ынакшылды херек кырында көргүзүп болур бис. Чыышта аъш-чемге, идик-хепке чединмейн барган кижини билир сен бе? Иегова сени таварыштыр ол акыйга азы угбайга дузалап болур. Хай-халап болу бергенде, Иегованың чону дүргени-биле дуза кадар. Чижээ, пандемия үезинде акы-угбалар аъш-чем, идик-хеп хереглээн улуска дузалашкан. Өскелери делегей чергелиг ажыл-херекти акша-төгерик-биле деткээн. Ынчалдыр акы-угбалар Еврейлерге 13:16-да: «Буян тарыырын, араңарда  сырый харылзаалыг боорун утпаңар, чүге дээрге ындыг өргүлдер Бурганның сеткилинге кирер» деп сүмени күүсеткен.

8. Иегова күжүн үлежип турары дээш, чүге өөрүп четтирер бис? (Филипчилерге 2:13).

⁸ Иегова күштү берип турар. Ооң күжү кызыгаар чок. Ол шынчы бараалгакчылары-биле күжүн үлежиринге ынак. (Номчуптуңар: Филипчилерге 2:13.) Берге шенелдени шыдажыптар азы күткүлгеге алыспас дээш, Иеговадан күш дилээн силер бе? База бир хүннү анаа чурттап эртер дээш, мөргээн чадавас силер. Иегованың харыылаанын көргеш: «Меңээ күштү хайырлап турар Бурганның ачызында чүнү-даа шыдажып эртер мен» — деп сөстерни сактып кээр боор силер (Флп. 4:13, Чаа делегей).

9. Иеговадан үлегер ап, күжүвүстү канчаар ажыглап болур бис? (Чурукту база көрүңер.)

⁹ Иеговага бодаарга, кызыгаар чок күштүг эвес бис. Ынчангаш күжүвүстү өске улуска дамчыдары болдунмас. Ынчалза-даа улуска бир-ле чүве кылырда, күжүвүстү ажыглап болур бис. Чижээ, улгады берген азы аарып турар акы-угбавыска чүге дузалап болбас деп? Оларга садыгланырынга, бажың ажылынга дузалажып берип болур. Болдунар болза, Хурал залының ашталгазынга чүге киржип болбас деп? Күжүвүстү ынчаар ажыглап тургаш, Иеговага ынак улуска дыка хөй буянны кылыр бис.

10. Деткимче кылдыр дыл-домакты канчаар ажыглап болур бис?

¹⁰ Дыл-домак күжүн база утпаңар. Сеткилиңерден мактаксаар кижини дораан сактып келген чадавас силер. Бир кижиге оожургал, аргалал херек боор. Ол кижи дугайында бодалдар-биле кызыгаарланмайн, сеткилиңерни буянныг сөстер-биле илередиңер. Ооң бажыңынче чеде берип, долгап, открытка бижип азы СМС чортуп болур. Угааныңарга онзагай чүүл кирбес болза, муңгараваңар. Бир кижини деткиир дизе, колдуунда сеткилден каш бөдүүн сөстер четчир. База бир хүн Иеговага шынчы чурттап эртип алырынга, аңаа ол сөстер деткимче болур чадавас (У. ч. 12:25; Эф. 4:29).

11. Иегова мерген угаанын канчаар ажыглап турар?

¹¹ Иегова мерген угаанны берип турар. «Кайы-бирээңерге мерген угаанны чедир бербээн болза, ол кижи Бургандан мөргүп дилезин. Бурган мерген угаанны хамык улуска чүрээниң ханызындан, чеме-хала чокка хайырлап турар» — деп, Иаков  бижээн (Иак. 1:5). Бо сөстерден алырга, Иегова мерген угаанын чажырбайн, «чеме-хала чокка» азы «Чаа делегей» очулгазында тайылбырда «шүгүмчүлевейн» бээр дээн. Дуза дилээрге Иегова бисти чемелевес, харын-даа сүме дилээрин манап турар (У. ч. 2:1—6).

12. Өске улус-биле мерген угаанны канчаар үлежип болур бис?

¹² Иегованың үлегерин эдерип, билиглерни дамчыдып, мерген угаанны үлежип болур бис (Ыд. ыр. 31:8). Чижээ, чаа бараалгакчыларга канчаар суртаалдаарын көргүзер бис. Хуралдың дузалакчыларын болгаш сугга суктурган акыларны аңгы-аңгы даалгаларны күүседиринге удуртукчулар шыдамыы-биле өөредип турар. Тудуг ажылынга азы организациявыстың оран-савазының хандырылгазынга дуржулгалыг акы-угбалар өскелеринге мергежииринге база дузалажып турарлар.

13. Өске улусту өөредирде Иеговадан канчаар үлегер ап болур бис?

¹³ Өске улусту өөредирде, Иеговадан үлегер ап болур бис. Иегова мерген угаанны чажырбас. Ол ышкаш билиглеривисти, дуржулгавысты харам чокка үлежир ужурлуг бис. Өөреткен улузувус бисти солуптар деп кортпас бис. «Мени кым-даа өөретпээн. Боттары өөренип алзын» — деп бодаары шын эвес. Иегованың бараалгакчылары билиглерин сеткилинден үлежиринден аңгыда, «амы-тынын... бээринге белен» (1 Фес. 2:8). Өөреткен улузувус бодунуң ээлчээнде «өскелерни өөредип шыдаар» деп идегээр бис (2 Тим. 2:1, 2). Ол соксаал чок буянныг ажыл-херек бисти база өске улусту оон-даа мерген угаанныг, аас-кежиктиг кылыптар.

БУЯННЫГ ХАМААРЫЛГАВЫСТЫ ҮНЕЛЕВЕС ЫШКАШ БОЛЗА

14. Кижилер колдуу эки чүве кылган улуска кандыг хамаарылгалыг?

¹⁴ Өске улуска ылаңгыя акы-угбаларга эки чүүл кылырывыска, олар харыы кылдыр биске четтиргенин илередир. Чамдыкта открытка бижиир азы өөрүп четтиргенин өске арга-биле көргүзер (Кол. 3:15). Өөрүп четтирген сөстер дыңнаары өөрүнчүг деп чөпшээрежир боор силер.

15. Улус четтиргенин илеретпеске чүнү сактыры чугула?

¹⁵ Биске четтиргенин илеретпес таварылгалар база туруп болур. Чижээ, бир кижини деткиир дээш үеңер, күжүңер, акша-төгерииңер үндүрген силер. Ынчалза-даа ол кижи ону көңгүс үнелевээн ышкаш. Ындыг таварылгада улуска чөгенмейн, өөрүшкүнү канчаар чидирбес бис? Ажыл-чорудулга 20:35-те бо статьяның кол шүлүүн сактып кээлиңер. Аас-кежиивис бистиң холувуста. Өске улустуң үнелелин манавайн, улаштыр-даа буянны кылып, өөрүшкүнү ап болур бис. Аңаа чүү дузалаарын көрээлиңер.

16. Өске улуска дуза кадарда чүге Иеговадан үлегер алыр болза эки?

¹⁶ Иегованың үлегерин эдериңер. Кижилер үнелээр, үнелевес-даа болза, ол шупту улус дээш сагыш човап турар (Мф. 5:43—48). «Орнун дедир эгидип алыр дивейн» буян кылыр болзувусса, «шаңналыңар улуг болур» деп, Иегова аазаан (Лк. 6:35). Улус силерге өөрүп четтиргенин илеретпес-даа болза, муңгараваңар. Өске улуска кылган буянныг ажыл-херээңерни Иегова албан шаңнаар (У.ч. 19:17). Бурган өөрүшкүлүг бээр кижиге ынак (2 Кор. 9:7).

17. Өске улуска буян кылырынга кандыг дүрүм биске дузалап турар? (Лука 14:12—14).

 ¹⁷ Лука 14:12—14-те (номчуптуңар) дүрүмнү сактыры база чугула. Харыы кылдыр бисти чалаар улуска эки хамаарылга көргүзеринде багай чүве чок. А улустан бир чүве манаарывысты эскерген болзувусса, канчаар? Ол байдалда Иисустуң сүмезин эдерери ажыктыг. Буянывыска удур харыылаар аргазы чок кижини бажыңывысче чалап болур бис. Ынчан аас-кежиктиг бис, чүге дизе Иегованы өттүнүп турар бис. Улус биске четтиргенин илеретпес-даа болза, ол-ла дүрүм өөрүшкүлүг артарынга дузалаар.

18. Өске улустуң сеткилин даап бодавазынга чүү дузалап болур?

¹⁸ Өске улустуң сеткилин даап бодаваңар (1 Кор. 13:7). Силерге четтиргенин илеретпээн болза: «Ол кижи шынап-ла четтиргенин илередип билбес азы четтирдим дээрин уттупканы ол бе?» — деп бодуңардан айтырыңар. Манаанывыс дег алдынмаанында, ооң өске чылдагааннары бар чадавас. Чамдык улус сеткилинден четтиргенин илередиксээр, ынчалза-даа ону канчаар кылырын билбес. Колдуунда боттары дузалажып чаңчыккан болгаш, өске улустан дуза хүлээри оларга эпчок. Чүү-даа болза, христиан ынакшыл акы-угбаларны багай кылдыр бодавайн, чүгле эки чүүлге бүзүрээринче оттурар. Шак ынчаар өске улуска дузалажып тургаш, өөрүшкүвүстү чидирбес бис (Эф. 4:2).

19, 20. Өске улус дээш бир-ле чүве кылгаш, өөрүшкүлүг артарынга шыдамык чорук канчаар дузалаар? (Чурукту база көрүңер.)

¹⁹ Шыдамык болуңар. Соломон хаан бир катап мынча деп бижээн: «Бодуңнуң хлеб-тарааңны суг аайы-биле бадырып чорудуп тур, хөй хүннер эрткенде, ооңну катап тып аар сен» (Эккл. 11:1). Бо шүлүктен алырга, өөрүп четтириишкин сөстерин манаарынга хөй үе эртип болур. Бо таварылганы бир угбавыстың чижээнге көрээлиңер.

 ²⁰ Чаа сугга суктурган дуңмазынга кожуун хайгааракчызының кадайы Иеговага шынчы артар деткимче кылдыр каш чыл бурунгаар открытка бижээн. Харыызы сес хире чыл эрткенде келген. Ол чагаа мынчаар эгелээн: «Бо чылдарда меңээ кайы хире деткимче болганыңны билбес сен... Мээң чүрээмге сээң сөстериң дыка-ла дээштиг болган. Шүлүк мени эң-не быжыктырган a. Мен ону кажан-даа утпаан мен». Дуңмавыс чамдык бергелерин база үлежип: «Шупту хүлээлгелеримни болгаш алыс шынны безин кааптар күзел тыптып кээр турган. Бергедей берген санымда-ла, ол шүлүк дүжүп бербезинге дузалаан... Сес чыл ишти сээң открыткаң-биле ол шүлүк мени күш киирип чораан» — деп төнчүзүнде ол немээн. Кожуун хайгааракчызының өөнүң ишти «хөй хүннер эрткенде» ындыг чагаа алгаш, кайы хире өөрээнин чүгле бодап көрүңер даан! Бис база буянныг ажыл-херээвистиң харыызын дораан эвес, а кезек үе эрткенде алыр чадавас бис.

21. Иегованың буянныг чоруун чүге өттүнүксээр силер?

²¹ Иегова бисти алырынга бодаарга, берип тургаш, аас-кежиктиг болур кылдыр чаяаганын статьяның эгезинде чугаалаштывыс. Эргим акы-угбаларывысты өөртүрүнге ынак бис, а ылаңгыя четтиргенин илередирге, амыраар бис. Четтиргенин чугаалавас-даа болза, дөмей-ле өөрүүр бис, чүге дизе шын алдынган бис. Ачы-буянны чежени-даа кылыылы, а Иегова «оон хөйнү берип шыдаар» деп кажан-даа утпаңар (2 Чыл. 25:9). Бурганның буянынга кым-даа деңнешпес! Ооң бодундан шаңнал алырындан дээре чүве чок, ынчангаш дээрде Адавыстың үлегерин улаштыр эдерээлиңер!