Филиппиныда Багио хоорайда хөй улус ажылдап турар девискээрге ийи уруг кылаштап бар чыткан. Олар дептерлеривисти делгеп каан тележканы көргеш-даа, чанынче барбаан. Аңаа турган угбавыс Хелен оларже сеткилинден хүлүмзүрээн. Угбавыстың чылыг хүлүмзүрүү оларның сагыжынга артып каан.

Үе эрткенде, ол уруглар бажыңынче автобуска чанып бар чыткаш, Хурал залының даштында сайтывыстың jw.org деп бижиин көрүп каан. Шак ындыг бижикти дептерлер делгээн тележкага база көргенин сактып келгеннер. Олар автобустан дүшкеш, Хурал залының эжииниң аксында чыыштың расписаниезин көрүп алган.

Удатпаанда олар ужуражылгаларның бирээзинче чедип келгеннер. Хурал залынче кирип келгеш, олар кымны көрүп каан деп бодаар силер? Оларга хүлүмзүрүп турган Хеленни! Угбавыс үлешкен: «Олар менче углаптарга, бичии сести бергеш: „Чүнү канчап кааным ол?“ деп боданган мен». Ынчалза-даа олар аңаа шуптузун тайылбырлап берген.

Ол уругларга ужуражылга-даа, оларны канчаар чылыг-чымчак хүлээп алганы-даа аажок таарышкан. Олар аңаа боттарын хостуг миннинген. Чыыш соонда акы-угбалар Хурал залын аштап-арыглап эгелээрге, олар безин дузалажыксай берген. Соонда оларның бирээзи өске чуртче көжүп чорупкан. А өскези чыыштарже барып, Библияны өөренип эгелээн. Бо бүгү чүгле хүлүмзүрүгнүң ачызында болган!