1, 2. Матфей 5:11-ден алырга, шенелделерге кандыг хамаарылгалыг боор ужурлуг бис?

ИИСУС эдерикчилерин аас-кежиктиг болур деп аазаан. Ынчалза-даа шенелделер база турар дээн (Мф. 10:22, 23; Лк. 6:20—23). Ийе, Иисустуң өөреникчизи болганывыска өөрүүр бис. Ынчалза-даа чоок улузувус Иеговага бараалгаарывыска шаптыктаарга, эрге-чагырга улузу истеп сүрерге, кады ажылдап турар улузувус азы чаңгысклассчыларывыс шын эвес алдынарынче бисти ыдалаарга, дүвүреп болур бис.

² Улус шенелделерге таварышкаш, өөрүшкүзүн чидирип аар. А Бурганның Сөзү бисти шенелделер үезинде өөрүүрүнче деткип турар. Чижээ, Иаков шенелделерге таварышкаш, өөрүшкүлүг болуңар деп бижээн (Иак. 1:2, 12). Иисус өөреникчилеринге: «Улус силерни бак сөглээр, истеп-сүрер... болза, амыр-чыргалдыг силер» — дээн. (Номчуптуңар: Матфей 5:11.) Шенелделер үезинде өөрүшкүнү канчаар чидирбезил? Иаковтуң кады бүзүрээн ха-дуңмазынга бижээн чагаазында бодалдарны көрүптээлиңер. Баштай бирги векте христианнар кандыг шенелделерге таваржып турганын сайгарыптаалыңар.

3. Иаков христиан апарган соонда, кандыг болуушкуннар болган?

³ Иисустуң кады төрээн дуңмазы Иаков ооң өөреникчизи апарган соонда, Иерусалимге күштүг истеп сүрүүшкүннер эгелээн (Аж.-ч. 1:14; 5:17, 18). Стефанны өлүрүп каапкан соонда, иудейлер хоорайдан дезип, «Иудея биле Самарияже тарап чоруй барган», чамдыктары безин «Кипр биле Антиохияга чеде бергеннер» (Аж.-ч. 7:58—8:1; 11:19). Олар  дыка-ла хөй бергелерге таварышкан. Ындыг-даа болза, олар каяа-даа баргаш, буянныг медээни чүткүлдүү-биле суртаалдап чораан. Түңнелинде бүгү Рим күрүнеге дыка хөй чыыштар тыптып келген (1 Пет. 1:1). Ынчалза-даа оларны оон-даа дүвүренчиг үелер манап турган.

4. Бирги векте христианнар оон ыңай кандыг шенелделерге таваржып турган?

⁴ Бирги векте христианнар оон-даа хөй бергелерни көрүп эрткен. Чижээ, б. э. 50 хире чылда рим император Клавдий хамык иудейлерни Римден үнүп чоруурун дужааган. Ынчангаш иудей христианнар бажыңнарын каггаш, өскээр көжер ужурга таварышкан (Аж.-ч. 18:1—3). Б. э. 61 хире чылда кады бүзүрээн ха-дуңмазын бүгү улустуң мурнунга кочулап-шоодуп, кара-бажыңнарже суп, эт-хөреңгизин хавырып турган деп, Павел элчин бижээн (Евр. 10:32—34). Оон ыңай христианнар, улус дег, аарып-аржып, ядарап-түреп чораан (Рим. 15:26; Флп. 2:25—27).

5. Кандыг айтырыгларның харыызын билип алыр бис?

⁵ Иаков чагаазын б. э. 62 чыл четпээнде бижээн болза, акы-угбаларның кандыг бергелерге таваржып чораанын дыка эки билир турган. Ха-дуңма кандыг-даа шенелделер үезинде өөрүшкүзүн чидирбезин дээш, Иегова Иаковка сүмелерлиг чагааны бижидип каан. Ол чагаадан бо айтырыгларның харыызын билип алыр бис: Иаков кандыг өөрүшкүнүң дугайында бижээнил? Бурганның бараалгакчызының өөрүшкүзүн чүү чидирип болур? шенелделер үезинде өөрүшкүвүстү чидирбезинге мерген угаан, бүзүрел, эрес-дидим чорук биске канчаар дузалаар?

6. Лука 6:22, 23-тен алырга, Бурганның бараалгакчызы шенелделер үезинде өөрүшкүзүн чүге чидирбезил?

⁶ Улустуң хөй кезии ёзулуг өөрүшкүнү эки кадыкшыл, хөй акша, өг-бүлеге эки хамаарылга эккээр деп бодаар. А Иаковтуң чугаалааны өөрүшкү — байдалдардан хамаарышпас, Бурганның ыдыктыг сүлдезиниң үре-түңнели-дир (Гал. 5:22). Бурганның бараалгакчызы өөрүшкүлүг, чүге дизе ол Иегованың күзел-соруу ёзугаар чурттап чоруурун база Иисус Христостуң үлегерин эдерип турарын билир. (Номчуптуңар: Лука 6:22, 23; Кол. 1:10, 11.) Ындыг өөрүшкү Бурганның бараалгакчызының чүрээнде, чаашкын-даа, хат-даа өжүрүп шыдавас лампа иштинде чалбыыш дег, хып чоруур. Бистиң өөрүшкүвүстү багай кадыкшыл-даа, акша-көпеектиң чедишпези-даа, кочу-шоот-даа, чоок болгаш өске-даа улустуң удурланыышкыны өжүрүп шыдавас. Дайзыннарывыс бисче халдаан санында-ла, өөрүшкүвүстүң чалбыыжы өжер хамаанчок, харын-даа чырып-ла орар. Бүзүреливис дээш таваржып турар бергелеривис бисти Иисустуң эдерикчилери деп бадыткап турар (Мф. 10:22; 24:9; Ин. 15:20). Ынчангаш Иаков: «Ха-дуңма, янзы-бүрү шенелделер орууңарны моондактаза, аажок кежиктиг бис деп санаңар!» — деп бижээн (Иак. 1:2).

7, 8. Шенелделер үезинде бүзүреливис чүге быжыгып орар?

⁷ Христианнарның эң каржы-дошкун шенелделерни безин ажып эртеринге чүге беленин Иаков тайылбырлап бижээн. Ол мынча дээн: «Шенелдени ажып эрткен соонда, бүзүрелиңер силерни шыдамык болдурарын билир болгай силер» (Иак. 1:3). Шенелделер каң-демирни каңнаары-биле дөмей: каң-демирни изидипкеш, дораан соодуптарга, ол дыка быжыг апаар. Ооң-биле дөмей, шенелделерге быжыг туруштуг артар болзувусса, бүзүреливис быжыгар. Ынчангаш Иаков: «А шыдамык чорук, бодунуң ээлчээнде, бүрүн салдарын көргүзер, ол силерни бүгү талазы-биле болбаазыраңгай... улус кылыптар» — деп бижээн (Иак. 1:4). Шенелделер бүзүреливисти быжыктырып турарын көргеш, оларны өөрүшкүлүг ажып эртер бис.

⁸ Иаков чагаазында өөрүшкүвүстү чидирип ап болур кезек бергелерниң дугайында бижээн. Ол кандыг бергелер база оларны канчаар ажып эртерил?

9. Мерген угаан биске чүге херек?

⁹ Чүнү канчаарын билбес болзуңарза. Берге үелерде Иеговадан дуза дилээр болзувусса эки. Оон башка Аңаа шынчы артып, акы-угбаларга ачы-дузаны эккээр шын  шиитпирлер хүлээп шыдавас бис (Иер. 10:23). Удурланыкчыларывыс-биле шын алдынып, чугаалажырынга биске мерген угаан херек. А бир эвес чүнү канчаарын билбес болзувусса, боттарывысты күш чок кылдыр миннип, өөрүшкүвүстү дыка дүрген чидирип ап болур бис.

10. Иаков 1:5-тен алырга, мерген угаанныг болур дизе, чүнү канчаарыл?

¹⁰ Чүнү канчаар болза эки? Иеговадан мерген угаанны дилеңер. Шенелделерни өөрүшкүлүг ажып эртер дизе, Иеговадан мерген угаанны дилээри чугула. (Номчуптуңар: Иаков 1:5.) Оон башка шын шиитпирлер хүлээп шыдавас бис. Иеговага мөргүүрүвүске харыылаваан ышкаш болза, канчаарыл? Иаков мерген угаанны чаңгыс катап эвес, а хөй катап дилеңер дээн. Мерген угаан дилээн мөргүлдеривисти Иегова чемелевес база олардан черле анчыгзынмас. Ол харын-даа мерген угаанны биске элбээ-биле бээр (Ыд. ыр. 24:12, 13). Ол бергелеривисти көрүп, бисти кээргеп, дузалажыксап турар. Ону билири биске дыка-ла өөрүнчүг-дүр! Ынчаарга Бурган биске мерген угаанны канчаар берип турарыл?

11. Мерген угаанныг болур дизе, оон ыңай чүнү канчаарыл?

¹¹ Иегова биске мерген угаанны Библия таварыштыр берип турар (У. ч. 2:6). Ынчангаш Библияны база аңаа үндезилеттинген дептерлерни шинчилээр ужурлуг бис. Анаа-ла хөй билиглерлиг болуру чедишпес, оларны амыдыралывыска ажыглаар болза эки. Иаков: «Бурганның сөзүн чүгле кулак дашты-биле дыңнап эрттирбейн, ону херек кырында боттандырып чоруңар» — дээн (Иак. 1:22). Бурганның сүмелерин ажыглаар болзувусса, тайбыңзырак, бодамчалыг болгаш энерелдиг болур бис (Иак. 3:17). Ол шынарлар кандыг-даа бергелерни ажып эртеринге дузалаар.

12. Библияны эки билири чүге чугула?

 ¹² Библия, көрүнчүк ышкаш, боттарывыстың четпестеривисти көрүп кааш, өскерлип алырынга дузалаар (Иак. 1:23—25). Чижээ, Бурганның Сөзүн өөренип тургаш, боттарыңарның туттунуп билбезиңерни билип каан дижик силер. Силерни кым-даа, чүү-даа шугулдадырга, Иегованың дузазы-биле бодуңарны туттунуп өөренип алыр силер. Ооң ачызында бодамчалыг бооп, шын шиитпирлерни үндүрүп, берге байдалдардан үнер арганы тып алыр силер (Иак. 3:13). Шынап-ла, Библияны эки билири эргежок чугула!

13. Библияда бижээн улустуң үлегериниң дугайында боданыры чүге чугула?

¹³ Боттарывыс чазыпкаш, хинчектенириниң орнунга, өске улустуң чижээнден өөренгени дээре. Иаков Авраамның, Раавтың, Иовтуң база Илияның үлегеринче анаа эвес кичээнгейни салган (Иак. 2:21—26; 5:10, 11, 17, 18). Ол Бурганның шынчы бараалгакчылары өөрүшкүзүн чидирип ап болур бергелерни быжыг туруштуг ажып эртип шыдаан болганда, бис база шыдаар бис.

14, 15. Чигзиниглерни херекке албас болза, чүге айыылдыг?

¹⁴ Бир эвес чигзинип турар болзуңарза. Чамдыкта Библияда бир-ле чүүлдүң утказын чедир билбейн барып болур бис. Азы Иегова мөргүлдеривиске манап турарывыс дег харыылавайн турар ышкаш. Ындыг үелерде биске чигзиниглер тыптып кээп болур. Ону херекке албас болзувусса, бүзүреливис кошкап, Иегова-биле найыралывыс баксырап, безин келир үеже идегеливисти чидирип ап болур бис (Иак. 1:7, 8).

¹⁵ Павел элчин идегелди якорьга дөмейлээн (Евр. 6:19). Якорь корабльды улуг шуурган үезинде хая-дашка үспес кылдыр тудуп турар. Якорьнуң илчирбези быжыг эвес боор болза, ооң ажыы чок. Дат илчирбени чип кааптары дег, чигзиниглер база бүзүрелди кошкадыптар. Чигзинип чоруур кижи бергелерге таварышкаш, Иегованың аазаашкыннарынга бүзүревестей бээр. Бүзүреливис чокта, идегеливис база чок боор. Иаковтуң чугаалааны дег, «чигзинген кижи хатка сывыртадып, доза шаптырткан далай чалгыынга дөмей» (Иак. 1:6). Ындыг кижиге өөрүшкү-даа турбас.

16. Чигзиниглер тыптып кээр болза, чүнү канчаар болза эки?

¹⁶ Чүнү канчаар болза эки? Чигзиниглерден адырлып, бүзүрелиңерни быжыктырыңар. Ону соңгаарлаткан ажыы чок. Илия медээчиниң үезинде Бурганның чону чүге бүзүрээрин билбейн турган. Илия оларга: «Чежеге чедир ийи чүдүлге аразынга чайгылып кээр силер? Бир эвес ёзулуг Бурган — Дээрги-Чаяакчы болза, Ону эдериңер, а бир эвес Ваал болза, Ваалды эдериңер» — дээн (3 Хаан. 18:21). Чигзиниглер тыптып кээр болза, дүрген-не хөделиңер. Иегова — алыс шын Бурган, Библия — Ооң Сөзү, Иегованың Херечилери — Ооң чону деп чүүлге шынзыгар дээш, шинчилелдерден кылыңар (1 Фес. 5:21). Ындыг шинчилелдер чигзиниглерден адырлып, бүзүрелди быжыглаарынга дузалаар. Силерге дуза херек болза, удуртукчулардан дилеңер. Иеговага бараалгалыңарга өөрүшкүнү чидирбес дизе, соңгаарлатпайн, чигзиниглерни чок кылыңар.

17. Ундаралга алзыр болзувусса, чүү болу бээр?

¹⁷ Ундарап турар болзувусса. Бурганның Сөзүнде: «Айыыл-халап хүнүнде кошкааң көргүзер болзуңза, күжүң эвээжээни ол-дур» — дээн (У. ч. 24:10). «Кошкааң көргүзер болзуңза» дээн еврей сөстер «эрес-дидим чорууң чидирип алзыңза» дээн утканы база илередип турар. Эрес-дидим болбас болзувусса, өөрүшкүвүстү чидирип алыр бис.

18. Туруштуг болуру дээрге чүү дээни ол?

 ¹⁸ Чүнү канчаар болза эки? Иеговага ынаныңар. Ол силерге эрес-дидим болурунга дузалаар. Эрес-дидим чорук шенелделер үезинде туруштуг артарынга дузалаар (Иак. 5:11). Иаковтуң чагаазында «туруштуг» деп сөс чүү-даа болуп турда, тендиш дивес кижини илередип турар. Ону мындыг чижекке көрүп болур: дайынчы кижи дайзыны чеже-даа каржы-дошкун халдаар болза, бичии-даа аткаарлавайн, бодунуң улузун камгалап турар.

19. Павелдиң чижээнден чүнү өөренип алыр бис?

¹⁹ Павел элчин эрес-дидим болгаш быжыг туруштуг чоруктуң кайгамчык үлегери-дир. Чамдыкта ол бодун кошкак кылдыр миннип турган. Ынчалза-даа аңаа херек күштү берип турган Иегова Бурганга ынанып чорааш, быжыг туруштуг арткан (2 Кор. 12:8—10; Флп. 4:13). Бис база Иегованың дузазы чокта чүнү-даа шыдавас бис деп миннир болзувусса, эрес-дидим база быжыг туруштуг болур бис (Иак. 4:10).

20, 21. Чүү чүвеге чигзинмес бис?

²⁰ Таваржып турар шенелделеривис — Бургандан кеземче эвес-тир. Иаков мынча дээн: «Шенелделерге күткүткен кым-даа болза: „Бурган мени күткүп турар-дыр“ — деп чугаалавазын. Чүге дээрге Бурган бузутка күткүтпес болгаш Боду база кымны-даа күткүвес» (Иак. 1:13). Бо сөстерге быжыг бүзүрээр болзувусса, дээрде ынакшылдыг Адавысче оон-даа чоокшулаар бис (Иак. 4:8).

²¹ Иегова өскерилбес (Иак. 1:17). Бирги векте шенелделерге таварышкан христианнарга дузалап чорааны ышкаш, Иегова биске база дузалаар. Мерген угаанныг, быжыг бүзүрелдиг, эрес-дидим болур дээш, Иеговадан дузаны сеткилиңерден дилеңер. Ол албан харыылаар. Ынчан кандыг-даа шенелделерге таварышкаш, өөрүшкүңерни чидирбезинге Иегова дузалаар деп чигзинмес силер!