1, 2. а) Чамдык улус чүге эрге-чагыргаларга бүзүревес апарган? б) Бо статьяга чүнү сайгарар бис?

 АМГЫ үеде улустуң хөй кезии эрге-чагырга улузунга бүзүревестеп калган. Чүге дизе чазактар болгаш хоойлулар бай, ат-сураглыг улусту камгалаар, а бөдүүн, ядыы улусче безин көрүнмес апарган. Библияда «кижи кижини чагырып, аңаа хора чедирип чоруур» дээни дыка шын (Эккл. 8:9). Оон аңгыда, кезек шажын башкарыкчыларының алдынып турары мөзү чок боорга, чамдык улус Бурганга чөгенип эгелээн. Ынчангаш Библияны өөренип турар кижилерге Иеговага болгаш Ооң черде төлээлекчилеринге бүзүреп өөренири белен эвес бооп болур.

² Чүгле Библия өөренип турар улус эвес, а Иеговага хөй чылдар ишти бараалгап чоруур кижилер Аңаа ынанып өөренир ужурлуг. Иеговага бүзүреливисти шенээр байдалдар бо-ла тургустунар, ынчангаш Ооң шупту кылып турар чүүлдери эң-не эки деп боттарывыска сагындырары эргежок чугула. Библияда бир-ле чүүл билдинмес азы Иегованың организациязының айтыышкыннарын сагыыры берге апаарга, бүзүреливистиң канчаар шенеттинерин бо статьяга сайгарар бис. Оон ыңай коргунчуг хилинчек үезинде база ооң соонда бүзүреливис канчаар шенеттинерин көөр бис.

3. Библиядан кандыг үзүндүлер Иеговага бүзүреливисти шенеп болур?

 ³ Библияны номчуп турувуста, Иегованың шиитпирлери биске чамдыкта билдинмес боор. Чок болза, «Бурган бо кижини чүге ынчаар аажылаан?» дээн ышкаш айтырыглар  биске тургустунуп болур. Чижээ, Моисейниң үезинде Бурган бир израильчи кижини амыр-дыш хүнүнде ыяш чыып турганы дээш өлүмге шииткен. А самыын чорукка болгаш өлүрүүшкүнге буруулуг Давид хаанны Ол өршээп каан (Сан. 15:32, 35; 2 Хаан. 12:9, 13). Ынчангаш чамдык улус мынча деп бодап болур: «Бурганның ынчалдыр алдынганы шын бе? Иегова Давидтиң аар бачыттарын өршээп кааш, а ыяш чыып турган кижини чүге өлүмге шиидип кааныл? Ол аар бачыт эвес ышкажыл». Биске ындыг чигзиниглер турбазын деп бодаар болзувусса, Библияны номчуп тургаш, кандыг үш чүүлче кичээнгейни салыр ужурлуувусту сайгарыптаалыңар.

4. Иегова кезээде чөптүг-шынныг алдынып турар деп чүге бүзүрээр бис? (Эге дөс 18:20, 21; Ыдыктыг хоойлуну катаптааны 10:17).

⁴ Библияда чамдык болуушкуннарны тодаргайы-биле биживээн. Чижээ, Давид кылган бачыды дээш шын сеткилинден буруузун миннээн деп билир бис (Ыд. ыр. 50:4—6). А амыр-дыш хүнүнде ыяш чыып турган кижиниң дугайында чүнү чугаалап болур? Ол кылган үүлгедии дээш хараадаан бе? Иегованың хоойлуларын ол ооң мурнунда хажыдып турган бе? Азы аңаа улус сагындырыгларны чугаалаарга-даа, ол херекке албаан бе? Ооң дугайында Библияда чүнү-даа биживээн. Ынчалза-даа Иегова «чөптүг болгаш шынныг» дээрзинге ыяк бүзүреп болур бис (Ы. х. к. 32:4). Иегова шупту барымдааларны херекке ап тургаш, шиитпирлер хүлээр. А кижилерниң угаан-бодалынче өске улустуң дамчыыр чугаалары биле бүдүүлүк бодалдары салдар чедирер. (Номчуптуңар: Эге дөс 18:20, 21; Ыдыктыг хоойлуну катаптааны 10:17.) Иегованы болгаш Ооң негелделерин эки билген тудум, Ооң үндүрген шиитпирлеринге бүзүреливис дам быжыгар. Библияны номчуп турувуста, харыызы амдыызында билдинмес айтырыглар биске тургустунуп болур. Ынчалза-даа Бурганывыстың дугайында билиглеривис четчир болганда, Ол «Бодунуң бүгү оруктарынга чөптүг» деп быжыг бүзүрээр бис (Ыд. ыр. 144:17).

5. Бачыттыг бүдүжүвүс чөптүг чорукка хамаарылгавысче кандыг салдар чедирип турар? ( «Бачыттыг бүдүжүвүс чөптүг чорукче көрүжүвүстү хажыдып турар» деп көзенекти көрүңер.)

⁵ Бачыттыг бүдүжүвүс чөптүг чорукче көрүжүвүстү хажыдып турар. Бурган бисти  Бодунуң овур-хевири-биле чаяап каан. Ынчангаш кандыг-бир кижини чөптүг эвес аажылаарга, ажынып хорадай бээр бис (Э. д. 1:26). Шупту чүвени херекке алган ышкаш-даа болзувусса, бачыттыг болгаш, шын эвес түңнелдерни үндүрүп болур бис. Кажан Иегова Ниневияның чурттакчыларынга энерел көргүзерге, Иона кайы хире хорадаан ийик, сактып келиңер даан (Иона 3:10—4:1). Ол төөгү канчаар төнген? 120 000 ажыг ниневийжилер бачыдын миннингеш, дириг арткан! Оон алырга, Иегова эвес, а Иона бодунуң үзел-бодалын өскертир ужурлуг турган.

6. Иегова үндүрген шиитпирлерин биске чүге тайылбырлавас ужурлуг?

⁶ Иегова үндүрген шиитпирлерин улуска тайылбырлавас ужурлуг. Бурун шагда бараалгакчылары үндүрген шиитпирлери дээш дүвүрээрге, Бурган оларны шыдамык дыңнап турган (Э. д. 18:25; Иона 4:2, 3). А чамдыкта Ол чүге ынчаар кылганын безин тайылбырлап бээр турган (Иона 4:10, 11). Ынчалза-даа Иегова кымның-даа мурнунга харыы тутпас ужурлуг. Ол Чаяакчы болганда, Ону сургаар хире кымнар бис? (Иса. 40:13, 14; 55:9).

7. Биске чүнү кылыры берге бооп болур база чүге?

⁷ Иегова кезээде шын алдынып турар деп бичии-даа чигзинмес бис. Ынчалза-даа Ооң черде төлээлекчилеринге бүзүрээри чамдыкта белен эвес. Чыышта удуртулга ап турар акыларга хамаарыштыр биске мындыг айтырыг тургустунуп болур: «Олар херек кырында Иегованың айтыышкыннарын эдерип турар бе азы боттарының шын деп санаар шиитпирлерин хүлээп турар бе?» Бурунгу үеде кижилерге база ындыг чигзиниглер турган чадавас.  3-кү абзацче эглип кээлиңер. Амыр-дыш хүнүнде хоойлуну үрепкен кижиниң төрели мынча деп бодап болур турган: «Моисей ол кижини өлүмге шиидериниң мурнунда, Иегованың үзел-бодалын ылап-ла билип алган бе?» А Урияның эштериниң бирээзи: «Давид кеземчеден дезер дээш, бодунуң эрге-чагыргазын ажыглаан» — деп түңнеп болур турган. Ындыг-даа бол, бир эвес бис Иегованың томуйлаан черде төлээлекчилеринге бүзүревес болзувусса, Иеговага бүзүрээр бис деп канчап чугаалаар бис?

8. Бирги векте чыыш биле амгы үениң чыыжы чүзү-биле дөмей? (Ажыл-чорудулга 16:4, 5).

⁸ Иегова черде бараалгакчыларын «шынчы болгаш сарыылдыг чалча» таварыштыр удуртуп турар (Мф. 24:45). Бирги векте Удуртукчу чөвүлел дег, амгы үеде «чалча» база Бурганның чону дээш сагыш човап, удуртукчуларга айтыышкыннарны берип турар. (Номчуптуңар: Ажыл-чорудулга 16:4, 5.) А олар ол айтыышкыннарны чыышта ажыглап турар. Бис организациядан болгаш удуртукчулардан алган айтыышкыннарга дыңнангыр боор болзувусса, Иеговага бүзүреливисти көргүзер бис.

9. Кандыг таварылгаларда удуртукчуларның шиитпирлерин деткиири берге бооп болур база чүге?

⁹ Чамдыкта биске удуртукчуларның шиитпирлерин деткиири белен эвес. Чижээ, сөөлгү чылдарда хөй чыыштарны каттыштырып, оларны өске районнарга кожуп каан. Хурал залдары хос турбазын дээш, чамдык суртаалчыларны өске чыыштарже шилчиирин дилээн. Бир эвес ону бистен дилээр болза, эш-өөрүвүстү болгаш төрелдеривисти каапкаш, чаа чыышка катчыры биске берге боор чадавас. Оон аңгыда, суртаалчыларны кайнаар шилчидерин айтып турар, дээрден үннү удуртукчулар дыңнавайн турар болгай. Ынчангаш оларның айтыышкыннарын дыңнаары биске берге бооп болур. Ынчалза-даа Иегова  оларга бүзүреп турар болганда, бис база оларга бүзүрээр ужурлуг бис *.

10. Еврейлерге 13:17-ден алырга, удуртукчуларны чүге дыңнаар ужурлуг бис?

¹⁰ Удуртукчуларның айтыышкыннары бистиң сеткиливиске кирбес-даа болза, оларга чүге дыңнангыр боор ужурлуг бис? Шак ынчаар бис Бурганның чонунуң аразында чаңгыс эпти кадагалаар бис (Эф. 4:2, 3). Шупту акы-угбалар хурал удуртукчуларының чөвүлелиниң шиитпиринге биче сеткилдии-биле чагыртыр болза, чыыш иштинге амыр-тайбың болгаш өөрүшкү тергиидээр. (Номчуптуңар: Еврейлерге 13:17.) Оон артык, удуртукчуларга дыңнангырывыс-биле Иеговага бүзүреливисти көргүзер бис. Чүге дизе Ол Боду удуртукчуларга бис дээш сагыш човаарын дааскан болгай (Аж.-ч. 20:28).

11. Удуртукчуларның айтыышкыннарынга бүзүрээринге биске оон ыңай чүү дузалаар?

¹¹ Хурал удуртукчуларының чөвүлелиниң айтыышкыннарынга бүзүрээринге биске чүү дузалаар? Чыышка хамаарыштыр айтырыгларны шиитпирлээр дээш, акылар Бургандан ыдыктыг сүлдени албан дилээр деп чигзинмеңер. Оон аңгыда, олар библейжи дүрүмнер болгаш Иегованың организациязының берген айтыышкыннарын кичээнгейлиг шинчилеп турар. Удуртукчулар Иегованы өөртүрүн күзеп, Ооң чонунуң дугайында эң эки кылдыр сагыш човаар дээш кызып турар. Күүседип чоруур хүлээлгелери дээш, Бурган олардан харыы негээр деп, ол шынчы эр улус билир (1 Пет. 5:2, 3). Бодап көрүңер даан, язы-сөөк ылгаар, шажын-чүдүлге болгаш политиктиг чөрүлдээлер бо делегейни долган. А Иегованың чону демнии-биле кара чаңгыс алыс шын Бурганга бараалгап чоруур. Бо бүгү Иегова Бодунуң организациязын деткип турар боорга, болдунуп турар.

12. Кижиниң буруузунуп турарын билип алыр дээш, удуртукчулар кандыг айтырыгларны сайгарар ужурлуг?

¹² Хуралдың удуртукчулары чыыштың мөзү-шынар талазы-биле арыг болуру дээш харыылап турар. Ол шыңгыы харыысалганы Иегова оларга дагзып каан. Бир эвес Бурганның бараалгакчызы аар бачытты үүлгедиптер болза, ону чыышка артырып болур бе деп айтырыг тургустунуп кээр. Мындыг таварылгада Иегова удуртукчулардан чүнү манап турар? Бачыт кылган кижи ол дээш сеткилинден хараадап турар бе деп, олар тодарадып алыр ужурлуг. Ол чеже-даа кылган бачыдын миннип турза, кылган үүлгедиин херек кырында көөр хөңнү чок бе? Ону катап кылбас кылдыр, хөөнненип алган бе? Бир эвес кижи бачытты бак эш-өөрүнүң салдарындан кылган болза, ол олар-биле шупту харылзааны үзеринге белен бе? Удуртукчулар мөргүп, шупту фактыларны Бурганның Сөзүнге даянмышаан, шинчилээш, бачыт үүлгеткен кижи бодунуң үүлгедиинге кандыг хамаарылгалыын тодарадып алырын кызар. Оон ол кижини Бурганның чонунуң аразынга артырып болур бе азы болбас бе деп, олар шиитпирлээр. Чамдык таварылгаларда ындыг кижини чыыштан үндүрер апаар (1 Кор. 5:11—13).

13. Чыыштан чоок төреливисти азы эживисти үндүрүпкен болза, чүү дээш дүвүреп болур бис?

¹³ Кандыг байдалдарда удуртукчуларга бүзүрээри берге болур? Бир эвес чыыштан үндүрткен кижи чоок эживис азы төреливис эвес болза, удуртукчуларның шиитпирин деткиири берге эвес. А бистиң эргим киживисти үндүрүптер болза канчаар? «Удуртукчулар шупту чүвени сайгарып көрген бе? Иегова оларның орнунга турган болза, шак ынчаар кылыр бе?» деп дүвүреп болур  бис. Удуртукчуларның шиитпиринге шын хамаарылгалыг болурунга чүү дузалаар?

14. Чыыштан чоок өңнүүвүстү азы төреливисти үндүрүпкен болза, удуртукчуларга бүзүрээринге биске чүү дузалаар?

¹⁴ Аар бачыт кылган кижини чыыштан үндүрер айтыышкынны Иегова Боду берген деп сактыры чугула. Ол хемчег чыышка-даа, бачыт үүлгеткен кижиге-даа ажыктыг. Ындыг кижини Бурганның чонунга артырып каар болза, ол чыышта акы-угбаларны бачыт кылырынче ыдалап болур (Гал. 5:9). Оон артык, ол кылган бачыдының кайы хире аарын медереп билбес боор. Ынчангаш ооң эки талаже эттинип, Иегова-биле найыралын катап тургузар күзели-даа чок боор (Эккл. 8:11). Удуртукчулар кижини чыыштан үндүрер хемчегге дыка шыңгыы хамаарылгалыг деп чигзинмээлиңер. Бурунгу Израильде шииткекчилер дег, олар «улустуң адындан эвес, а Дээрги-Чаяакчының адындан» шиидип турарын эки билип турар (2 Чыл. 19:6, 7).

15. Амдыгааштан тура, Иеговага кажангызындан-даа артык бүзүрээри чүге чугула?

¹⁵ Бо делегейниң төнчүзү оккуру-биле чоокшулап турар болганда, Иеговага кажангызындан-даа артык бүзүрээр ужурлуг бис. Чүге? Коргунчуг хилинчек үезинде бис чиктиг азы ажыглаттынгыр эвес ышкаш айтыышкыннарны алыр бис. Ынчан Иегова бистиң-биле хууда чугаалашпас деп сактыры чугула. Бурган ол үеде биске айтыышкыннарны черде томуйлаан төлээлекчилери таварыштыр бээр. Ынчан чигзинип, «бо айтыышкыннар херек кырында Иеговадан бе азы акылар мону боттары чогаадып алган бе?» деп айтырыгларны салыр үе эвес боор. Кижи төрелгетенниң эң шиитпирлиг үезинде Иеговага болгаш Ооң организациязынга бүзүрээр силер бе? Ол чүүл харыысалгалыг акыларның удуртулгазын амгы үеде канчаар дыңнап турарыңардан хамааржыр. Бир эвес оларның айтыышкыннарынга бүзүреп, оларны дораан ажыглап чоруур болзуңарза, коргунчуг хилинчек үезинде база шак ынчаар кылыр силер (Лк. 16:10).

16. Чоокку келир үеде Иеговага бүзүреливис канчаар шенеттинер?

¹⁶ Оон ыңай мындыг чугула чүүлдүң дугайында боданып көрээлиңер: Иегова бо каржы делегейге хамаарыштыр шииткелдерни үндүрүп турда, Ооң талазынга турар бис бе? Ол үе келбээнде хөй улус, оларның санында бистиң төрелдеривис, Иегованың бараалгакчылары апаар деп идегеп чоруур бис. Ынчалза-даа Армагеддон үезинде Иегованың томуйлаан шииткекчизи, Иисус, оларның келир үезинге хамаарыштыр сөөлгү  шиитпирин үндүрер (Мф. 25:31—33; 2 Фес. 1:7—9). Энерелди кымга көргүзер-көргүспезин бис эвес, а Иегова Боду шиитпирлээр (Мф. 25:34, 41, 46). Бурганның шиитпирин деткиир бис бе азы хорадааш, Аңаа бараалгаарын соксадыптар бис бе? Чугаажок, амдыгааштан тура, Иеговага идегеп өөренир болзувусса, келир үеде Аңаа бичии-даа чигзинмес бис.

17. Иегова бо каржы делегейге шииткелди үндүрүптер кылдыр, чүге күзээр силер?

¹⁷ Бодуңарны дываажаңда кылдыр сагыштаалап көрүңер. Иегова шупту шииткелдерин күүседипкен. Меге шажын-даа, чазый-чилби садыг-саарылга-даа чок. Буруу чок улустуң ханын төп чораан политиктиг тургузугнуң изи читкен. Багай кадыкшылдың, кырыыр назынның, аарыг-аржыктың, өлүм-чидимниң когу үзүлген. Эрлик болгаш ооң буктары 1 000 чыл ишти кинчилеттирген. Удавас оларның үймээнинден изи-чыды-даа артпас (Ажыд. 20:2, 3). Иеговага ынанып чораанывыс дээш кайы хире аас-кежиктиг болурувусту сөс-биле дамчыдары болдунмас!

18. Израильчилерниң чижээнден чүнү өөренип ап болур бис? (Саннар 11:4—6; 21:5).

¹⁸ А чаа делегейге чурттай бергеш, Иегованың кылып турар шупту чүүлүнге чөпшээрежир бис бе? Израильчилер Египеттиң кулданыындан хосталы бергеш, канчалган ийик? Оларның чамдыызы Египетке чемни сактып, чарбыттынып эгелээн. А Иегованың хуулгаазын арга-биле берип турган маннаның дугайында олар: «Бо ческинчиг аъш-чем хөңнүвүске дээпти» — деп хыйланып турганнар. (Номчуптуңар: Саннар 11:4—6; 21:5.) Коргунчуг хилинчектиң соонда бис база олар ышкаш алдынар бис бе? Армагеддон соонда шупту бузундуларны аштап-арыглаарынга, бүгү чер кырын сесерликче болбаазырадырынга та чеже үе болгаш күш херек боорун билбес бис. Эгезинде чер кырынга байдал дываажаңда ышкаш эвес боор. Кылыр чүүлдер дыка хөй боор чадавас. Ол үеде Бурганче чарбыттынарын диттигер силер бе? Ону болдурбас дизе, амдыгааштан тура, Иегованың сагыш човаашкынын үнелеп өөренир болзувусса эки.

19. Бо статьяның кол бодалдарын кысказы-биле чугаалаптыңар.

¹⁹ Иегова кезээде шупту чүвени шын кылып турар деп бичии-даа чигзинмеңер. Ол ышкаш Иегованың айтыышкын берип турар улузунга долузу-биле бүзүреңер. Ынчангаш Иегованың «Силерниң күжүңер — сагыш амыр боорунда, Меңээ идегээринде» дээн сөстерин үргүлчү сактып чоруңар (Иса. 30:15).