БИБЛЕЙЖИ үелерде өг-бүле тударда, душтук кыстың өг-бүлезинге төлевир бээр турган. Ол үнелиг эт-сеп, мал-маган азы акша-төгерик бооп болур турган. А чамдыкта төлевир кылырда, душтук оолдан кандыг-бир ажылды негеп болур турган. Чижээ, ындыг таварылга Иаков-биле болган: ол Рахил дээш ооң ачазының кодан малын 7 чыл ишти кадарарынга белен турган (Э. д. 29:17, 18, 20). Ол ёзу-чаңчыл кайыын тывылган?

Ооң дугайында бир эртем ажылында мынча деп бижээн: «Бурунгу Израильде душтук оол катынга [душтук кыс дээш] төлевирни төлээр турган. Шак ынчаар ол дузалакчының орнун эгидип турган» *. Чүге дээрге көдээ ажыл-агыйлыг өг-бүлелерге ол улуг чидириг турган. Оон аңгыда, ол ёзу-чаңчыл душтук оол биле душтук кыстың өг-бүлелерин демнештирип турган. Төрелдежи берген улус ам берге үелерде бот-боттарын деткижип болур турган. Кыс кижи дүгдеткен деп база ону азыраар харыысалга ачазында эвес, а өөнүң ээзинде деп, ол төлевир бадыткап турган.

Еврейлерниң херээжен кижиге садып алыр азы садыптар эт ышкаш хамаарылгалыг деп, ол төлээн төлевир илеретпейн турар. Бир энциклопедияда мынча дээн: «Израильчи кижи өгленир дээш, душтук кыстың өг-бүлезинге акшаны азы аңаа дең өртектиг чүүлдү берип тургаш, кадайын садып ап турар ышкаш. А шыны херек, ол өг-бүлеге улуг дузалакчызын чидирип ап турары дээш орнун төлеп турган боор» («Ancient Israel—Its Life and Institutions»).

Чамдык чурттарда ол чаңчылды улус ам-даа сагып турар хевээр. Уруун айтырып келген улустан төлевирни дилеп турар христиан ада-иелер кандыг дүрүмден туттунар ужурлуг? «Улуска чөпшүл, буянныг хамаарылгаңар бүгүдеге билдине берзин» деп дүрүм маңаа ажыглаттынгыр (Флп. 4:5; 1 Кор. 10:32, 33). Шынап-ла, ада-иелерге эмин эрттир улуг өртек негевезинге улуска чөпшүл, буянныг хамаарылга дузалаар. Чүге дизе олар кудаларның мурнунга «акша-мөңгүнге ынак», чазый улус кылдыр көстүксевес болгай (2 Тим. 3:2). Оон аңгыда, кыстың ада-иези эмин эрттир аар өртектиг төлевирни негевес болза, күдээ болур дээн кижи херек акшаны чыып алыр дээш, кудазын чылдырбас боор. Ол ышкаш күдээзи акшаны дүрген чыып алыр кылдыр, эгелекчи бараалгалын каггаш, долу ажылдаар ажылче шилчидип алырын олар күзевес болгай.

Бир эвес чурттуң хоойлузунда душтук кыс дээш төлевирни төлээрин негеп турар болза, христиан ада-иелер ону сагыыр апаар. Чүге? Чүге дизе христианнар Бурганның хоойлуларынга чөрүшпейн турар күрүне хоойлуларын сагып, «үстүнден башкарган эрге-чагыргага чагыртып» чоруурун Библия негеп турар (Рим. 13:1; Аж.-ч. 5:29).