СРЕДАДА, 2023 чылдың январь 18-те jw.org сайтыга тускай чарлал үнүп келген. Аңаа Гейдж Флигл биле Джеффри Уиндер акыларывысты Иегованың Херечилериниң Удуртукчу чөвүлелинге бараалгаарынга томуйлаттынган деп чарлаан. Олар кайызы-даа хөй чылдарда Иеговага шынчы бараалгап чоруур.

Флигл акый АКШ-ка Пенсильвания штадының барыын чүкке Иегованың Херечилериниң өг-бүлезинге өскен. Флигл элээди турда, өг-бүлези суртаалчылар чедишпес бичии хоорайжыгашче көже берген. Удатпаанда 1988 чылдың ноябрь 20-де ол сугга суктуруп алган.

Флигл акыйны ада-иези долу бараалгаарынче үргүлчү деткиир чораан. Оларның бажыңынга бо-ла аалдап кээр кожуун хайгааракчыларының, удуртукчуларның, вефилчилерниң кайы хире өөрүшкүлүүн Гейдж көрүп өскен. Сугга суктурган соонда чыл четпээнде, 1989 чылдың сентябрь 1-де, Флигл долу эгелекчилей берген. Ийи чыл эрткенде, 1991 чылдың октябрьда, 12 харлыындан тура чүткүп чораан сорулгазын ол чедип алган — Бруклинде Вефилге бараалгап эгелээн.

Вефилге Флигл акый ном карттаар цехке сес чыл ажылдааш, бараалгал килдизинче томуйлаткан. Ол үеде орус чыыш-биле суртаалдап турган. А 2006 чылда Надя деп угбайга өгленип алгаш, кады Вефилге бараалгалды уламчылаан. Олар португал чыышка, а оон испан чыышка 10 чыл ажыр бараалгаан. Флигл акый хөй чылдар дургузунда бараалгал килдизинге, Өөредилге комитединиң, а соонда Бараалгал комитединиң бюрозунче томуйлаткан. 2022 чылдың мартта Удуртукчу чөвүлелдиң Бараалгал комитединиң дузалакчызы апарган.

 А Уиндер акый Муррие́та хоорайга (Калифорния штады, АКШ) Иегованың Херечилериниң өг-бүлезинге өскен. 1986 чылдың март 29-та сугга суктуруп алгаш, дараазында айда-ла дузаламчы эгелекчилей берген. Ол бараалгал аңаа дыка эки болган, ынчангаш ону кагбас деп шиитпирлээш, каш ай эрткенде, 1986 чылдың октябрь 1-де долу эгелекчи апарган.

Джеффри элээди тургаш, Вефилге бараалгап турган ийи акызынга аалдап четкен. Ооң соонда вефилчи болур күзели өөскүй берген. Назы-хары чеде бээри билек, анкетаны долдурар деп шиитпирлеп алган. 1990 чылдың майда ону Уолкиллде Вефилче чалаан.

Аңаа Уиндер акый арыг-силиг килдизинге, фермага болгаш Вефилдиң бюрозунга ажылдап турган. 1997 чылда ол А́нджела деп угбайга өгленип алган, оон бээр кады Вефилде бараалгап турарлар. 2014 чылда оларны Уорвикче көжүрүптерге, Уиндер акый делегей чергелиг кол удуртулга чериниң тудуунга дузалажып турган. 2016 чылда олар Паттерсонда Таңныыл суургазының өөредилге төвүнче көжүп кээрге, Уиндер акывыс аудио болгаш видео бижидер килдиске ажылдап турган. Дөрт чыл эрткенде, олар катап Уорвикке келген, аңаа Уиндер акый Вефилчилер харыылаар комитединиң бюрозунга бараалгай берген. А 2022 чылдың мартта Удуртукчу чөвүлелдиң Вефилчилер харыылаар комитединиң дузалакчызы кылдыр томуйлаткан.

Иеговага ооң белектери болган кижилер дээш, өөрүп четтирер бис. Чагырганың ажыл-херээ дээш, оларның кызымаккай ажыл-ижин элбээ-биле йөрээрин мөргүп турар бис (Эф. 4:8).