1. Давид кандыг берге байдалга келгенил?

 ИЗРАИЛЬДИҢ хааны Саул Давидти, канчап-даа тургаш, өлүрер деп баарга, ол дезип чорупкан. Ооң чиир чүзү-даа чок турган. Давид Нов хоорайга келгеш, өргээ бараалгакчызындан беш хлеб дилээн (1 Хаан. 21:1, 3). А соонда ол улузу-биле куйга чаштынып турган (1 Хаан. 22:1). Канчап Давид мындыг берге байдалга келгенил?

2. Саул биле тура-ла, Бурганга удурланып турган деп чүге чугаалап болур? (1 Хааннар 23:16, 17).

² Иегова Давидти хаан кылдыр томуйлап каан. Аңаа хөй улус ынак турган база ол кайгамчык дээн дайынчы чораан. Ол дээш Саулдуң өдү чарлы бээр часкан. Оон аңгыда, Иеговага дыңнангыр эвес болганындан Ооң ээ көрүүшкүнүн чидирип алганын Саул билир турган. (Номчуптуңар: 1 Хааннар 23:16, 17.) Ол үеде Саул эрге-чагырга ээлеп турган болгаш, хөй талалакчыларлыг база дайынчыларлыг турган. Ынчангаш Давидтиң амы-тыны айыыл кырынга чедип кээрге, ол дезер ужурга таварышкан. Саул Иеговага удурланып, Давидти Израильдиң хааны кылдыр олуртуп каарынга шаптыктап шыдаар деп бодааны ол бе? (Иса. 55:11). Ооң дугайында Библияда чүнү-даа биживээн. Ынчалза-даа Саул биле тура-ла, Бурганга удурланган. А ол дээрге өлүмче дорт орук-тур!

3. Давид бергелерге таварышкаш, канчаар алдынып турган?

³ Давид бодун тогдунар кижи турбаан, ол эрге-чагыргаже чүткүвээн. Иегова Израильдиң хааны кылдыр ону Боду томуйлап каан (1 Хаан. 16:1, 12, 13). А Саул ону өжээнниг дайзыны кылдыр көөр турган. Давид хилинчектенип турарынга Иегованы буруудатпаан. Ол чеже-даа куйлар кезип, аъш-чеми  эвээш-даа турган болза, чарбыттынып турбаан. Харын-даа куй иштинге чаштынып тургаш, Давид Иегованы алдаржыткан кайгамчык чараш ырыны чогаадып каан. Ол ырының «Дээрги-Чаяакчыже чүткээн улус кандыг-даа буянның четпезин эскербес» дээн одуруу бистиң статьявыстың кол шүлүү-дүр (Ыд. ыр. 33:11).

4. Кандыг айтырыгларны сайгарар бис база ол чүге чугула?

⁴ Амгы үеде Бурганның бараалгакчылары чүге-даа чединмейн баар байдалдарга таваржып чоруур *. А COVID-19 деп хамчык аарыг ону оон-даа бергедедипкен. «Коргунчуг хилинчек» чоокшулаан тудум, чуртталгавыска оон-даа хөй бергелер туруп болур (Мф. 24:21). Бо чүүлдерниң шуптузун херекке ап тургаш, дөрт айтырыгның харыызын көрүптээлиңер: 1) Давид «Дээрги-Чаяакчыже чүткээн улус кандыг-даа буянның четпезин эскербес» деп сөстерге канчаар шынзыккан? 2) Бар чүүлүвүске сеткил ханып өөренири чүге чугула? 3) Иегова бис дээш албан сагыш човаар деп чүге чигзинмес бис? 4) Кел чыдар шенелделерге амдыгааштан тура канчаар белеткенип болур бис?

5, 6. «Дээрги-Чаяакчыже чүткээн улус кандыг-даа буянның четпезин эскербес» дээн сөстерни билип алырынга 22-ги Ыр канчаар дузалап турар?

⁵ Давид «Дээрги-Чаяакчыже чүткээн улус кандыг-даа буянның четпезин эскербес» дээни-биле чүнү чугаалаксааныл? Ону эки билип алырынга биске 22-ги Ыр дузалаар. (Номчуптуңар: Ырлар 22:1—6.) Давид ону «Дээрги-Чаяакчы — мээң Кадарчым. Мээң хереглээн бүгү чүвем бар» деп сөстер-биле эгелээн. Еврей дылда «Мээң хереглээн бүгү чүвем бар» дээн сөстер Ырлар 33:11-биле дөмей. 22-ги Ырда эң чугула чүүлдүң, Иегованы Кадарчызы кылдыр шилип алган кижиниң ужур-уткалыг чуртталгазының, дугайында ырлап турар. Иегова ону «шынныг оруктар-биле эдертип», ооң эки-даа, багай-даа үелеринде ону деткиир деп, Давид чугаалаан. Иеговага бараалгап  чурттаары дээрге чүгле «оът-сигени хөлбең ногаан шынааларга» дыштаныры эвес-тир деп, Давид билип турган. Чамдыкта ол «дүмбей караңгы шынаа таварты» эртерин, азы ооң чөгели төнүп, ону дайзыны кылдыр санаар улус турар деп билип турган. Ынчалза-даа Иегова ооң Кадарчызы болганда, Давид: «Айыыл-халаптан кортпас мен» — дээн.

⁶ Давид «Дээрги-Чаяакчыже чүткээн улус кандыг-даа буянның четпезин эскербес» деп сөстерге ынчаар шынзыккан. Бурган-биле чоок харылзаалыг болурунга дузалаар ооң бүгү чүүлү турган. Аас-кежиктиг болурунга хөй өнчү-хөреңги аңаа херекчок турган. Бурганның берип чораан бүгү чүүлү Давидке четчир турган. Аңаа Иегованың камгалалы болгаш ээ көрүүшкүнү эң чугула турган.

7. Иудеяга чурттап турган христианнар кандыг шенелдени эрткенил? (Лука 21:20—24).

⁷ Давидтиң Ырлар 22:1-де сөстери акша-төгерикке хамаарылгавыстың дугайында ханы боданырынче оттуруп турар. Эт-хөреңгиниң боду-даа эвес, а ол биске чугула апарбаан бе деп боданыры чугула. Иудеяга чурттап чораан христианнар шак ындыг шенелдени эрткен. (Номчуптуңар: Лука 21:20—24.) Иерусалимни кажан-бир «аг-шериг бүзээлеп» алыр деп, Иисус оларны оваарындырган. Олар амы-тынын камгалаар дизе, дагларже дезер ужурлуг турган. Ооң ужундан олар дыка хөй чүүлдерден ойталаан. Каш чыл бурунгаар «Таңныыл суургазынга» мынча деп бижээн: «Олар чурттаар оран-савазын, шөлдерин каапкаш, бажыңнарындан безин чүнү-даа албаан. Олар Иегованың камгалалынга болгаш деткимчезинге идегеп, Аңаа бараалгалды чуртталгада чугула ышкаш чүүлдерден бедик салып турганнар» *.

8. Иудеядан дезипкен христианнардан чүнү өөренип ап болур бис?

⁸ Ол христианнар-биле болган таварылга бисти база боданырынче оттуруп турар. Ол-ла «Таңныыл суургазында» улаштыр мынча деп түңнээн: «Удавас бистиң база акша-хөреңгиге хамаарылгавысты шенээр үе кээр. Биске чүү чугула: өнчү-хөреңги бе азы Бурганның камгалалы бе? Бо делегейниң төнчүзү чоокшулаан тудум, янзы-бүрү бергелерге таваржып, хөй-ле чүүлдү чидирер бис. Иудеядан дезипкен христианнар дег, бис база хөй-ле чүүлден ойталаарынга белен боор ужурлуг бис».

9. Еврейлерге 13:5, 6-да Павелдиң сөстери бисти чүү чүвеге бүзүредип турар?

⁹ Сагыштаалап көрүңер даан, ол христианнарга барык шупту өнчү-хөреңгизин каапкаш, чаа черге катап чурттап эгелээри кайы хире берге турган-дыр? Бурган олар дээш сагыш човап шыдаар деп быжыг бүзүрел оларга дыка херек турган. Ынчалза-даа Иегова оларны аңаа баш бурунгаар белеткеп каан. Иерусалимни римчилерниң бүзээлээниниң бетинде, беш чыл бурунгаар, Иегова Павел элчинни таварыштыр еврейлерге аажок үнелиг сүме берген: «Акша-мөңгүнге ынак амыдырал тутпаңар, бар чүвеңерге сеткил ханыңар. Чүге дээрге Бурган: „Сени кажан-даа кагбас мен, сенден кажан-даа ойталавас мен“ — дээн-дир. Ынчангаш бис: „Мээң дузалакчым — Дээрги-Чаяакчы-дыр, корткан херээм чүл: кижи амытан меңээ чүнү кылып шыдаарыл?“ — деп дидими-биле чугаалаалыңар» (Евр. 13:5, 6). Павелдиң сүмезинге кичээнгейлиг хамаарылгалыг болган улуска Переяга бөдүүн амыдыралга чаңчыгып алыры белен болган. Бүгү-ле херек чүүлдү Иегова бээр деп, олар чигзинмээн. Павелдиң сөстери бисти шак ол чүүлге бүзүредип турар.

10. Павел элчин кандыг чажыт-биле үлешкен?

¹⁰ Аңаа дөмей сүмени Павел Тимофейге база берген. Ол сүме биске база хамааржыр. Павел: «Чемивис биле идик-хевивис-ле бар болза, ол биске четчир ужурлуг» — дээн (1 Тим. 6:8). Ол дээрге чүгле кара хлеб биле суг ижип-чип, чаңгыс ол-ла хеп кедип, казанак бажыңчыгашка чурттаары дивээни ол. Павел көңгүс өске утканы дамчыткан: кол чүве — бар чүүлүвүске сеткил ханары-дыр. Ол Павелдиң билип алгаш, бистиң-биле үлешкен чажыды-дыр (Флп. 4:12). Кайы хире-даа хөй бай-байлакшылдыг болзувусса, биске Бурган-биле найыралывыстан артык үнелиг чүүл чок (Авв. 3:17, 18).

11. Моисейниң сөстери бисти бар чүүлүвүске өөрүүрүнге канчаар өөредип турар?

¹¹ Хереглелдеривиске хамаарыштыр Иегованың көрүжү бистен аңгы бооп болур. Израильчилер 40 чыл ишти ээн кургаг ховуга чоруп келген соонда, Моисейниң оларга чүү дээнин боданып көрүңер: «Дээрги-Чаяакчы Бурганыңар силерниң кылып турар бүгү чүүлдериңерге ачы-буянны хайырлаан, шак бо кончуг улуг ээн кургаг ховуда көжүп чоруп турарыңарны-даа билир болгай; Дээрги-Чаяакчы Бурганыңар силер-биле дөртен чыл кады чоруп тур, хереглээн бүгү чүвеңерни ап келдиңер» (Ы. х. к. 2:7). Ол үе дургузунда Иегова израильчилерни манна-биле чемгерип турган, а оларның Египеттен-не үнген хеви элеп самдараваан (Ы. х. к. 8:3, 4). Чамдык израильчилер чемин болгаш идик-хевин өкпелеп турган. Ынчалза-даа Моисей оларга «хереглээн бүгү чүвеңерни ап келдиңер» деп сагындырган. Бис база бар чүүлүвүске сеткил ханып, Бурганның кандыг-даа  белектери дээш Аңаа өөрүп четтирер болзувусса, Ол аажок өөрүүр.

12. Давид бодунга эвес, а Иеговага ынанып турган деп кайыын билир бис?

¹² Иегова Аңаа ынак улуска бердинген база олар дээш эрге-чассыг сагыш човап чоруур деп, Давид ыяк бүзүреп турган. 33-кү Ырны бижип турган үезинде Давидтиң амы-тыны айыыл кырынга турган. Ынчан ол бүзүрелдиң көрүжү-биле дээрниң төлээзиниң ооң чанынга турлагжып алганын көрүп турган (Ыд. ыр. 33:8). Ол дайыннарга хөй киржип чораан болгаш, ынчаар сагыштаалап турган чадавас. Шериг дайынчыларның дайзыннарынга удур халдаарынга белен боор кылдыр, турлагжып алырын Давид чаңгыс удаа эвес көрген. Давид дашты часпайн октаар, хылышты мергежилдиг ажыглап билир, дадыккан дайынчы чораан. Оон артык, Иегова аңаа хаан эргени бээрин база аазаан, ынчангаш Давид бодунга идегей берип болур турган (1 Хаан. 16:13; 24:13). Ынчалза-даа ол «Дээрги-Чаяакчының төлээзи Бургандан коргар улустуң чанынга турлагжып туруп алгаш, оларны камгалаар» деп бүзүрээр болгаш, Бурганга ынанып турган. Амгы үеде Бурган бисти хуулгаазын арга-биле камгалаар деп манавайн турар бис. Ынчалза-даа Иеговага ынаныр улуска эттинмес хире хораны кым-даа чедирип шыдавас деп билир бис.

13. Магогтан Гог халдап кээрге, чүге чөгенчиг кылдыр көстүр бис база оон чүге кортпас бис? (Журналдың даштында чурукту көрүңер.)

¹³ Иегова чонун камгалап шыдаар деп чүүлге удавас бүзүреливис шыңгыы шенеттинер. Кажан Магогтан Гог, азы чоннар каттыжыышкынны, Бурганның чонунче халдап кээрге, узуткадыр деп барган ышкаш боор бис. Ол дүвүрээзинниг үеде Иегова бараалгакчыларын камгалап шыдаар база ону албан кылыр деп Иеговага долузу-биле бүзүрээр ужурлуг бис. Дайзыннарывыс бисти чөгенчиг, белен чуура базыптар хензиг курт кылдыр көөр (Иез. 38:10—12). Шынап-ла, бистиң ок-чепсээвис-даа чок, дайылдажып-даа билбес бис. Ынчалза-даа бисти долгандыр турлагжып алган дээрниң төлээлерин бүзүрелдиң көрүжү-биле көрүп турарывысты ол чоннар билбес боор. Бүзүрели чок улус ону кайыын көөр деп! Биске болчуп, эңме-тикчок дээрниң аг-шерии үнүп кээр деп оларның бажынга безин кирбес боор (Ажыд. 19:11, 14, 15).

14. Келир үеде болур шенелделерге амдыгааштан эгелеп, канчаар белеткенип болур бис?

¹⁴ Келир үеде болур шенелделерге амдыгааштан эгелеп, канчаар белеткенип ап болур бис? Бир дугаарында акша-төгерикке шын хамаарылгалыг болуру чугула, ол ышкаш кажан-бир өнчү-хөреңгиден дөмей-ле чарлыр апаар бис деп чүүлдү хүлээп аар ужурлуг бис. Оон аңгыда, бар чүүлүвүске сеткил ханып, Иегова-биле найыралывысты чүүден-даа артык үнелээр ужурлуг бис. Бурганны эки билген тудум, Ол бисти Магогтан Гогтуң халдаашкынындан камгалап шыдаар деп чүүлге бүзүреливис быжыгар.

15. Иеговага кезээде ынанып болур деп Давидти кандыг болуушкуннар бүзүреткен?

¹⁵ Удавас болур шенелделерге белеткенип алырынга биске оон ыңай чүү дузалаар? Давид мынча дээн: «Амзангырлап шенеп көрүңер, Дээрги-Чаяакчының кайы хире ачы-буянныын билип каар силер. Хоргадалды Оон алыр кижи амыр-чыргалдыг» (Ыд. ыр. 33:9). Ол дээрге Иегованың дузазын кезээде көрүп чораан кижиниң сөстери-дир. Иеговага кандыг-даа байдалда ынанып болур деп,  Давид кайыын билир турган? Ол элээди чорааш, Голиаф дээр филистимчи кижи-биле дайылдажыр дээш үнүпкен. Ол күчүтенниң чаңгыс овур-хевири безин коргунчуг турган. Давид аңаа: «Бөгүн Дээрги-Чаяакчы сени мээң холумга хүлээдип бээр» — дээн (1 Хаан. 17:46). Соонда Давид Саул хаанга бараалгап турган, а ол ону элээн каш катап өлүрерин оралдашкан. Ынчалза-даа «Дээрги-Чаяакчы Давид-биле кады болган» (1 Хаан. 18:12). Аныяк үелеринде Давид Иегованың деткимчезин көрүп чораан болгаш, келир үеде болур шенелделерге Ол албан дузалаар деп чигзинмейн турган.

16. Иегованың ачы-буянныын канчаар амзангырлап шенеп болур бис?

¹⁶ Бөгүн Иеговага долузу-биле ынанып өөренип алган кижиге келир үеде Аңаа ынаныры белен боор. Шуулган баарда азы чыыштар үспейн, суртаал ажылынга киржир графикти ажылывыста даргадан дилээрде, Иеговага долу бүзүрел херек. Ынчалза-даа даргавыс биске чөпшээревейн баар болза, ажылдан үнер ужурга таваржыр бис. Ол байдалда Иегова бисти кажанда-даа кагбас, бистен кажан-даа ойталавас база хүн бүрүде хереглелдеривисти хандырар деп бүзүрээр бис бе? (Евр. 13:5). Долу бараалгап турар акы-угбалардан Иегова эң херек үеде оларны канчаар деткип турганын айтырар болзуңарза, хөй солун болуушкуннарны дыңнаар силер. Шынап-ла, Иегова — бүзүрелдиг Бурган-дыр!

17. 2022 чылда кандыг шүлүктү шилип каан база чүге?

¹⁷ Иегова бистиң-биле кады болганда, келир үеде болур болуушкуннардан кортпас бис. Иегованы бирги черге салыр болзувусса, Ол бисти кажан-даа кагбас. Ону утпазын дээш база келир үеде шенелделерге амдыгааштан тура белен болзун дээш, Удуртукчу чөвүлел 2022 чылдың шүлүү кылдыр Ырлар 33:11-ни шилип каан: «Дээрги-Чаяакчыже чүткээн улус кандыг-даа буянның четпезин эскербес».