1. Иаков кандыг өг-бүлеге өскен?

 ИИСУСТУҢ дуңмазы Иаков * Бурганның шынчы бараалгакчыларының өг-бүлезинге төрүттүнүп келген. Ооң ада-иези Иосиф биле Мария Иеговага аажок ынак чораан. Оон аңгыда, Иаковтуң улуг акызы аазаттынган Мессия апаар турган. Чүгле бодап көрүңер даан, Иаков ындыг өг-бүлеге төрүттүнер аас-кежиктиг болган!

2. Иаков улуг акызын чүге магадап болур турган?

² Иаковтуң акызын магадаар чылдагааннары хөй турган (Мф. 13:55). Чижээ, Иисус 12 харлыг тургаш, Бижилгени эки билир турган. Оозу-биле ол хоойлуну эки билир башкыларны кайгаткан (Лк. 2:46, 47). Иаков Иисус-биле кады бызаңчы бооп ажылдап турган чадавас. Бир эвес шын бодап турар болзувусса, Иаков акызы-биле кады ажылдажып тургаш, ооң дугайында хөйнү билип алган. Нейтан Норр акывыс *: «Бир кижини эки билип алыр деп бодаар болзуңза, ооң-биле кады ажылда» — деп чугаалаарынга ынак турган. Лука 2:52-де: «Иисус улам-на угаан-сарыыл кирип, өзүп-мандып орган, а Бурганның болгаш кижилерниң Аңаа ээ көрүүшкүнү күштелип орган» — дээн. Иаков база ону эскерип турган. Кижи бодаарга, ол Иисустуң бир дугаар өөреникчизи болгу дег, ынчалза-даа ол ындыг болбаан.

3. Иисус черге бараалгап турда, Иаков аңаа кандыг хамаарылгалыг турган?

³ Иисус черге бараалгап турда, Иаков аңаа бүзүревейн чораан  (Ин. 7:3—5). Иисустуң угааны анаа эвес дээн төрелдериниң аразынга ол база турган чадавас (Мк. 3:21). Кажан Иисусту чагыга шаажылап өлүрүп турда, Иаковту авазы Марияның чанынга турган деп кайда-даа биживээн (Ин. 19:25—27).

4. Бо статьядан чүнү билип алыр бис?

⁴ Сөөлүнде Иаков Иисуска дөмей бүзүрей берип, христиан чыыштың хүндүткелдиг удуртукчузу апарган. Бо статьяга Иаковтуң чижээнден ийи кичээлди көөр бис. Оон ыңай чүге биче сеткилдиг болуру чугула база мергежилдиг башкылар апаарынга биске чүү дузалаарын сайгарар бис.

5. Дирлип келген Иисус-биле ужуражылга Иаковче кандыг салдар чедирген?

⁵ Иаков кажан Иисустуң эдерикчизи апарган? Иисус дирлип келгеш, «Иаковка, а ол ышкаш бүгү элчиннерге» көзүлген (1 Кор. 15:7). Ол ужуражылга Иаковтуң чуртталгазын бүрүнү-биле өскертипкен. Кажан элчиннер Иерусалимде бажыңның кырында өрээлге ыдыктыг сүлдеге чагдыртырын манап турда, Иаков база оларның аразынга турган (Аж.-ч. 1:13, 14). Удатпаанда ол удуртукчу чөвүлелге бараалгап эгелээн (Аж.-ч. 15:6, 13—22; Гал. 2:9). А б. э. 62 чыл четпээнде ол ыдыктыг сүлдеге бүргеткеш, шилип чагдырган христианнарга чагаа бижээн. Бис дээрге-даа, черге-даа чурттаар идегелдиг болзувусса, ол чагаа биске база ажыктыг (Иак. 1:1). Иосиф Флавийниң сөстеринден алырга, Иаковту иудей дээди бараалгакчы Ананияның (хеймери) дужаалын ёзугаар шаажылаан. Иаков өлүмүнге чедир Иеговага шынчы арткан.

6. Иаков бирги вектиң шажын башкарыкчыларындан чүзү-биле ылгалып турган?

⁶ Иаков биче сеткилдиг турган. Чүге ынча деп болур? Иаковтуң үезинде чурттап турган шажын башкарыкчылары Иисус — Бурганның Оглу деп хөй бадыткалдарны көрген. А Иаков канчалган? Ол шын эвес билип турганын биче сеткилдии-биле миннип, Иисуска бүзүреп эгелээн. Шак ынчаар ол шажын башкарыкчыларындан оранчок ылгалып турган. Чижээ, Иисус Лазарны диргизипкен деп, олар билир турган. Ынчалза-даа Иисусту Иегова чорудупкан деп хүлээриниң орнунга, олар Лазар биле Иисусту өлүрер деп дугуржуп алганнар (Ин. 11:53; 12:9—11). А сөөлүнде, кажан Иисус дирлип кээрге, кижилерден ону чажырар дээш, бар шаа-биле кызып турганнар (Мф. 28:11—15).  Ол улуургак шажын башкарыкчылары Мессиядан ойталаан.

7. Чүге өрү көрдүнмес болза эки?

⁷ Кичээл: өрү көрдүнмейн, Иеговадан өөрениринге белен болуңар. Чамдык чүрек аарыглары кедерээрге, дамыр када бээр, ооң ужундан чүректиң ажылдаары баксырап каар. Ооң-биле дөмей, бистиң доора уткалыг чүрээвис дашталып, Бурганның удуртулгазын херекке албайн барып болур. Фарисейлерниң чүрээ дашталып калган болгаш, Иисус — Мессия деп чайгылыш чок бадыткалдар турда безин, олар ону херекке албаан (Ин. 12:37—40). Олар улуургааш, мөңге амыдыралче оруун муңгаштап алганнар (Мф. 23:13, 33). Мында кандыг оваарындырыг бар? Бурганның эдип-чазаашкынын чөпшүл хүлээп, боданырда база шиитпирлер хүлээрде, ыдыктыг сүлдени болгаш Библиядан удуртулганы дилээри эргежок чугула! (Иак. 3:17). Иаков биче сеткилдиг болгаш, Иеговадан өөрениринге белен турган. Иаковка мергежилдиг башкы болурунга база биче сеткил дузалаан деп ам көөр бис.

8. Эки башкы болурунга биске чүү дузалаар?

⁸ Иаковту тускай эртем-билиглиг турган деп чугаалап болбас. Ол үениң шажын башкарыкчылары аңаа, Пётр биле Иоаннга ышкаш, эртем чок, бөдүүн кижиге дег, хамаарылгалыг турган (Аж.-ч. 4:13). Ынчалза-даа ооң чагаазын номчааш, кайы хире кайгамчык башкы апарганын кижи кайгап ханмас. Бисте база мактаныптар хире тускай эртем чок-даа болза, дөмей-ле эки башкылар бооп шыдаар бис. Аңаа биске Иегованың сүлдези болгаш Ооң организациязының берип турар өөредилгези дузалаар. Иаков биске эки башкы болурунга кандыг үлегерни арттырган, көрүптээлиңер.

9. Иаков кандыг башкы чораан? Тайылбырлаптыңар.

⁹ Иаков бөдүүн сөстер ажыглап, билдингир кылдыр тайылбырлап чораан. Ынчангаш ооң чагаазын номчаан улус чүнү база канчаар кылырын дораан билип каар турган. Бир чижектен көрээлиңер. Христианнарны чөптүг эвес аажылаарга, олар каржыланмас ужурлуг деп, Иаков өөредип турган.  Ол ону кайы хире бөдүүн сөстер-биле дамчытканын эскерип көрүңер: «Шыдажып үнген улусту ам амыр-чыргалдыг деп алгап-йөрээп турар бис. Иовтуң туруштуунуң дугайында дыңнаан, түңнелинде ооң Дээрги-Чаяакчыдан чүнү алганын билир силер. Чүге дээрге Дээрги-Чаяакчы аажок өршээлдиг болгаш кээргээчел болгай» (Иак. 5:11). Мында көөр болзувусса, Иаков Ыдыктыг Бижилгеге даянган. Ол Иовтуң төөгүзүнге даянып, Иегова Аңаа бердинген улусту албан шаңнаар деп көргүскен. Арта ол бодалды бөдүүн кылдыр илередип, ону берге домактар-биле нарыыдатпаан. Шак ынчаар ол номчукчунуң кичээнгейин бодунче эвес, а Иеговаже угландырган.

10. Иаковтуң кандыг арга-мергежилин өттүнүп болур бис?

¹⁰ Кичээл: бөдүүн кылдыр чугааланып, Бурганның Сөзүн ажыглап тургаш, өөредиңер. Билиглеривис-биле улусту кайгадыр сорулгавыс чок. Иегованың кайы хире мерген угаанныын база кижилер дээш канчаар сагыш човап чоруурун улуска көргүзүксеп турар бис (Рим. 11:33). Ону кылыр дизе, чугаалап турар чүүлүвүстү Библияга үндезилээр ужурлуг бис. Библия өөренип турар кижи силерден сүме айтырган дижик. Ооң орнунга турган болзуңарза, чүнү канчаарыңарны айтып бээриниң орнунга, ол кижи боду библейжи чижектерни ханы шинчилеп, Иегованың минниишкиннериниң дугайында боданыр кылдыр оттуруңар. Шак ынчаар ол силерни эвес, а Иегованы өөртүр күзелин сайзырадып алыр.

11. Бирги векте чамдык христианнар кандыг бергелерлиг турган база Иаков оларга кандыг сүме берген? (Иаков 5:13—15).

¹¹ Иаков берге айтырыгларны оюп турбаан. Ол акы-угбаларның четпес талаларын билир болгаш, оларга чүнү экижидип алырын ажыы-биле чугаалап чораан. Чамдык акы-угбалар билип алган чүүлүн дораан ажыглаарынче далашпас турган (Иак. 1:22). А өскелери чүгле байлар-биле эдержип чораан (Иак. 2:1—3). А бир улуска аксын тудары берген турган (Иак. 3:8—10). Ол бүгү бергелер шыңгыы-даа болза, Иаков акы-угбаларны эттинип шыдавас деп бодавас турган. Ол оларга чылыг-чымчаа-биле, ынчалза-даа дорт сүмени берип, бүзүрели кошкай берген улусту удуртукчулардан дузаны дилээр кылдыр оттуруп турган. (Номчуптуңар: Иаков 5:13—15.)

12. Библия өөренип турар кижиге дузалап тургаш, эки хөөннү канчаар чидирбезил?

¹² Кичээл: улустан хөйнү манаваңар база эки хөөннү чидирбеңер. Библия өөренип турар улустуң хөй кезиинге билип алган чүүлүн ажыглаары ындыг кончуг белен эвес боор (Иак. 4:1—4). Багай чаңчылдардан дораан адырлып, христиан шынарларны кыска үе иштинде сайзырадып алыры берге. Библия өөренип турар кижиге чүнү эдип алырын дорту-биле чугаалаар дизе, Иаков ышкаш, дидим болур херек. Ынчалза-даа эки хөөннүг болуру база чугула. Иегова Бодунче биче сеткилдиг улусту хаара тудуп, оларга эки талазынче өскерлир күштү бээр деп Аңаа бүзүрээлиңер (Иак. 4:10).

13. Иаков чүнү миннип турган? (Иаков 3:2).

¹³ Иаков бодунуң дугайында хөйнү бодавас турган. Ол Иисустуң дуңмазы мен дээш база чыышта харыысалгалыг даалгалар күүседип турар мен дээш, акы-угбалардан бодун өрү көрдүнмес турган. Ол оларны «ханы ынак ха-дуңма» деп чылыг-чымчаа-биле адап турган (Иак. 1:16, 19; 2:5). Оон ыңай ол кажан-даа частырыг кылбас кижи кылдыр бодун улус мурнунга алдынмас турган. «Бис шупту хөй бачыт үүлгедип чоруур бис» дээн сөстерни ол бодунга база  хамаарыштырган. (Номчуптуңар: Иаков 3:2.)

14. Частырыгларны база кылыптар бис деп чугаалаары чүге чугула?

¹⁴ Кичээл: кым-даа тергиин эвес. Библия өөренип турар улузувустан дээре бис деп бодавас ужурлуг бис. Чүге? Бо улус кажанда-даа частырыг кылбас улус-тур деп, ол бодай бээр болза, чүү болур? Ол Бурганның негелделеринге кажан-даа дүгжүп шыдавас мен деп бодай бээр. Ынчангаш ажыы-биле Библия өөренип турар кижиңерге библейжи дүрүмнер аайы-биле алдынары силерге чамдыкта берге база Иегова кошкак талаларыңар-биле туржурунга канчаар дузалап турарын чугаалап бериңер. Ынчан ол Иегованың бараалгакчызы бооп шыдаар мен деп билип каар.

15. Иаковтуң ажыглап турган чижектери чүзү-биле онзагайыл? (Иаков 3:2—6, 10—12).

¹⁵ Иаков чүрекке дээштиг чижектерни ажыглап турган. Чугаажок, аңаа Бурганның ыдыктыг сүлдези дузалап турган. Оон ыңай ол улуг акызындан хөй чүүлге өөренип алган. Сактыр болзувусса, Иисус база чижектерни дыка мергежилдиг ажыглап билир турган. Иаковтуң чагаазында артык чүүлдер чок болгаш, ында бар кичээлдерни кижи белен билип ап болур. (Номчуптуңар: Иаков 3:2—6, 10—12.)

16. Эки чижектерни шилиири чүге чугула?

¹⁶ Кичээл: эки чижектерни шилиңер. Силер чижектерни улус караанга чуруптар кылдыр шилип тайылбырлаңар. Шак ынчаар кылыр болзуңарза, библейжи чугула өөредиглер улустуң чүрээнге артып каар. Ол талазы-биле Иисуска чедер кижи чок турган. Ынчалза-даа ооң дуңмазы Иаков оон дудак чок турган. Ам Иаковтуң чагаазындан бир чижекти тода сайгарыптаалыңар.

17. Иаков 1:22—25-те чижекти чүрекке дээштиг деп чүге чугаалап болур?

¹⁷ Номчуптуңар: Иаков 1:22—25. Иаковтуң көрүнчүк дугайында чижээ кижиниң чүрээнге дээштиг. Чүге дээрге Иаков дыңнакчыларынга кандыг бодалды чедириксеп турарын тода билип турган. Бурганның Сөзү чуртталгавысче салдарлыг болзун дизе, ону анаа номчууру чедишпес — билип алган чүүлүвүстү чуртталгавыска ажыглаар ужурлуг бис. Иаков көрүнчүк дугайында  чижекти анаа эвес шилип алган. Кижи бүрүзү хүннүң-не көрүнчүктенир болгай. Ол чижектиң утказы кандыгыл? Көрүнчүктенген кижи бажының агбайып туруп келгенин эскерип кааш, дыравас болза, ооң угааны анаа деп бе? Ооң-биле дөмей, Бурганның Сөзүн номчуп тургаш, четпес талаларывысты эскерип кааш, этпейн барбас болгай бис. Этпес болзувусса, кайыын боор!

18. Чижектерни ажыглап тургаш, кандыг үш чүүлдү кичээнгейге алыр херек?

¹⁸ Эки чижекти шилип алырда, үш чүүлдү кичээнгейге алыры чугула деп көрдүвүс: 1) чугаалап турар бодалывыска чижек тааржыр боор ужурлуг; 2) ол дыңнакчыларга билдингир боор ужурлуг; 3) чижекти канчаар ажыглаарын тайылбырлаар херек. Бир эвес силерге эки чижектерни тып алыры берге болза, «Индекс публикаций Сторожевой башни» деп дептерде «Наглядные примеры» деп биче эгеден сеткилиңерге тааржыр чижектерни шилип алыңар. Чижектер микрофон ышкаш болур. Ол бистиң онзалап демдеглексеп турар бодалдарывысты ыыткыр кылып турар. Ынчангаш чижектерни чүгле кол бодалдарны тайылбырлаар дээш, ажыглаар болза эки. Бис чижектерни анаа-ла угаанывысты көргүзер дээш эвес, а аргалыг-ла болза, хөй улусту Иегованың аас-кежиктиг өг-бүлезинче хаара тудар дээш, ажыглап турар бис.

19. Акы-угбаларга ынакшылывыс чүүден көскү?

¹⁹ Иаковка бодаарга, бистиң кайывыс-даа тергиин акылыг чорбаан. Ынчалза-даа акы-угбалардан тургустунган өг-бүле-биле Иеговага бараалгаар аас-кежиктиг болган бис. Ха-дуңмавыска дыка ынак болгаш, олар-биле үени эрттирип, олардан өөренип, суртаал болгаш өөреникчилер белеткээр ажылга эгин кожа ажылдажып чоруур бис. Иаковтуң бодунга болгаш өскелерге хамаарылгазындан, ооң улусту канчаар өөредип турганындан хөй чүүлге өөренип ап болур бис. Ооң чижээн өттүнер болзувусса, Иегованы алдаржыдып, ак сеткилдиг улуска дээрде ынакшылдыг Адавыс-биле быжыг найыралдыг апаарынга дузалаар бис.