1—3. Иегованың бараалгакчылары чүү дээш ыглап болур?

 СӨӨЛГҮ катап кажан ыглаан силер? Кижи өөрүшкүден ыглап болур. Ынчалза-даа хөй кезиинде муңгарааш ыглаар бис, чижээ, чоок киживисти чидирипкеш. Каттышкан Штаттардан Лора * дээр угбавыс мынча деп бижээн: «Уруум чок апаарга, ажыг-шүжүгден чүрээм ыстап-саргып, аарып турган. Ындыг үелерде „чүү дээш чурттап чоруур кижи мен?“ деп бодап турган мен».

² Өске-даа чылдагааннар дээш ыглап болур бис. Чижээ, Хироми дээр Япониядан эгелекчи угбавыс мынча дээн: «Кезип турар девискээримде улус буянныг медээни дыңнаар хөңнү чок боорга, холум сула салдына бээр. Ынчан мен ыглавышаан, Иеговага мөргүп, Ол меңээ алыс шынны билип алыксаар оода чаңгыс кижини тып бээр кылдыр дилээр чордум».

³ Ол угбаларның минниишкиннери хөй кезиивиске таныш (1 Пет. 5:9). Бис Иеговага өөрүшкүлүг бараалгаксаар бис (Ыд. ыр. 99:2). Ынчалза-даа ажыг-шүжүгге, чөгениишкинге болгаш Бурганга бердингенивисти хынап турар байдалдарга бо-ла таваржыр бис (Ыд. ыр. 6:7). Ындыг үелерде чүнү канчаар болзувусса эки?

4. Бо статьяга чүнү сайгарар бис?

⁴ Биске Иисустуң чижээ дузалаар. Ол база сагыш-сеткили дойлурга, ыглап чораан (Лк. 19:41; 22:43—44; Ин. 11:35; Евр. 5:7). Ооң-биле болган үш таварылганы сактып кээлиңер. Ооң ачызында Иисуска болгаш Иеговага оон-даа артык ынак апаар бис. Ол ышкаш чуртталгавыска ыглаксанчыг байдалдар тургустунуп кээрге, канчаар алдынарын билип алыр бис.

5. Иоанн 11:32—36-да бижээн болуушкуннар Иисустуң дугайында биске чүнү ажыдып турар?

⁵ Кыжын б. э. 32 чылда Иисустуң чоок эжи Лазар берге аарааш, чок апарган (Ин. 11:3, 14). Лазар Марфа биле Мария дээр ийи угбалыг турган. Олар шупту Иисуска эргим чораан. Лазарның өлүмү ооң угбаларынга аар согуг болган. Удатпаанда Иисус Марфа биле Марияның чурттап турган черинче, Вифанияже, чедип келген. Ооң дугайында билип кааш, Марфа олче уткуштур маңнап чеде берген. Марфа ыглавышаан, Иисуска: «Дээрги! Силер маңаа турган болзуңарза, мээң акым өлбес ийик» — деп чугаалап турда, ооң сагыш-сеткили кайы хире дойлуп турганын бодап көрүңер даан (Ин. 11:21). Ол угбашкыларның база оларны деткиир дээш келген улустуң ыглап-сыктап турарын көргеш, Иисус база ыглай берген. (Номчуптуңар: Иоанн 11:32—36.)

6. Лазар чок апаарга, Иисус чүге ыглап эгелээн?

⁶ Иисустуң карааның чажы чүге бадып келген? «Понимание Писания» дээр номда ону мынчаар тайылбырлаан: «Ооң эжи Лазарның өлүмү база угбаларының ажыг-шүжүү Иисустуң сагыш-сеткилинге дыка дээштиг боорга, ол кажыыдап, ыглап эгелээн» *. Ооң эргим өңнүү чуртталгазының сөөлгү хүннеринде кайы хире хинчектенип чораанын база ол удавас өлүп каар дээрзин билип турганын Иисус сагыштаалапкан чадавас. Оон аңгыда, ынак дуңмазын чидиргеш, Марфа биле Марияның кайы хире ундарап, хинчектенип турганын Иисуска көөрү берге турган. Чоок кижизин чидирген кижи ол минниишкиннерни дыка эки билир. Бо таварылга бисти үш чугула алыс шынга өөредип турар.

7. Иисустуң ыглай бергенинден Иегованың дугайында кандыг алыс шынны өөренип ап турар бис?

⁷ Иегова чүнү миннип турарыңарны дыка эки билир. Иисус — Адазының «кара чаңгыс дөмей овур-дүрзүзү-дүр» (Евр. 1:3). Иисустуң карааның чажының төктүп келгенин бодаарга, Иегова ол үеде база «ыглап» турган  (Ин. 14:9). Эргим чоок улузуңарны чидирген болзуңарза, Иегова муңгарап турарыңарны анаа-ла көрүп турар эвес, а силерниң-биле кады кажыыдап турар. Силерниң сеткил-хөңнүңер карарган боорга, Ол силерни сегидип, «балыгларыңарны шарып» бээрин күзеп турар (Ыд. ыр. 33:19; 146:3).

8. Иисус эргим улузувусту диргизиптер деп чүге чигзинмес бис?

⁸ Иисус эргим чоок улузувусту диргизерин күзеп турар. Иисус ыглаарының мурнунда Марфаны: «Акың катап дирлип кээр-дир» — деп оожургаткан (Ин. 11:23—27). Марфа Иисуска бүзүреп турган. Ол Иегованың бердинген бараалгакчызы турган болгаш, чүс-чүс чылдар бурунгаар Илия биле Элисей медээчиниң чок апарган улусту диргизип турганын билир чораан (3 Хаан. 17:17—24; 4 Хаан. 4:32—37). Оон аңгыда, Иисус дулгуяк херээжен кижиниң оглун база синагога даргазының уруун диргизипкенин Марфа дыңнаан чадавас (Лк. 7:11—15; 8:41, 42, 49—56). Бис база чок апарган эргим улузувус-биле ужуражыр бис деп чигзинмес бис. Чок апарган улусту диргизиптер мен деп эштерин бүзүредип тургаш, Иисустуң ыглапканы ооң ол үени четтикпейн манап турарын көргүскен.

9. Чоок улузун чидирген улусту, Иисус ышкаш, канчаар деткип болур бис? Чижектен чугаалаңар.

⁹ Чоок улузун чидирген улусту деткиңер. Иисус анаа ыглавайн, Марфа биле Марияны кичээнгейлиг дыңнап, оларны оожургадып каан. Бис ону өттүнүп болур бис. Дэн дээр Австралиядан удуртукчу акывыс мынча деп үлешкен: «Кадайым чок апаарга, меңээ деткимче дыка херек турган. Ону чыышта элээн каш өг-бүле меңээ көргүскен. Олар дүне-хүндүс дивейн, мени кичээнгейлиг дыңнаарынга белен турган. Мен олардан эпчоксунмайн, минниишкиннеримни ажыы-биле тө каап, ыглап турган мен. Чамдыкта машина чуур, аъш-чем садар азы чем кылыр харыым чок апаарга, олар менче дораан келгеш, дузалап, мээң-биле кады бо-ла мөргүүр турган. Олар меңээ „айыыл-халап үезинде дузалаар“ ёзулуг эштер болган» (У. ч. 17:17).

10. Лука 19:36—40-де чүнүң дугайында бижээн?

¹⁰ База бир болуушкун б. э. 33 чылдың нисан 9-та болган. Иисус ам Иерусалимче кирип олурар. Дыка хөй улус олче уткуштур үнүп, хептерин орук дургаар ооң мурнунга чадып берип тура, ону хаан кылдыр хүлээп алганын көргүскен. Улус долгандыр байырлап турар. (Номчуптуңар: Лука 19:36—40.) Дараазында болган чүүл Иисустуң өөреникчилерин кайгадыпкан. Иисус хоорайга чоокшулап келгеш, олче көрүп тура, ооң ажыын ажып ыглап эгелээн (Лк. 19:41—44). Иисус ыглавышаан, Иерусалимниң чурттакчыларын кандыг коргунчуг үлүг манап турарын баш удур чугаалаан.

11. Иерусалимниң чурттакчыларының дугайында бодап келгеш, Иисус чүге ыглапкан?

¹¹ Иисустуң чаңгыс чер чурттуглары ону чылыг-чымчак уткуп алган-даа болза, олар колдуунда Чагырга дугайында медээни дыңнаар хөңнү чок болган. Ону билгеш, Иисус дыка муңгараан. Иерусалим удавас буурап дүжүп каар, ооң чурттакчыларының хөй кезии өлүп каар база чамдыызын кулданыгже алгаш баар (Лк. 21:20—24). Иисустуң бодап турганы ышкаш, хөй улус ону хүлээп албаан. А силерниң чурттап турар чериңерде улус Чагырга дугайында медээге кандыг хамаарылгалыг? Бир эвес ону база эвээш санныг улус хүлээп ап турар болза, Лука 19-ку эгеде кандыг кичээлдер барын боданып көрээлиңер. Ол бисти оон өске 3 чугула алыс шынга өөредип турар.

12. Иисустуң ыглапканы биске Иегованың дугайында чүнү өөредип турар?

 ¹² Иегова кижилер дээш сагышсырап турар. Иисустуң ыглап турганын бодаарга, Иегованың база шупту кижилер дээш сагыжы аарып турар. 2 Пётр 3:9-та Иегова «кымның-даа өлүп чидерин күзевейн, харын бүгү улустуң бачыдын миннип», Олче эглирин манап турар дээн. Өөрүшкүлүг медээни чанывыста улустуң чүрээнге чедир чугаалаарын катап-катап кызар болзувусса, Иегованың минниишкиннерин үлежип турар боор бис (Мф. 22:39) *.

13, 14. Иисустуң улусту кээргеп турганы чүүден көскү? Ону канчаар өттүнүп болур бис?

¹³ Иисус бараалгалга бүгү бодун берип турган. Арга тыптып кээрге-ле, ол кижилерни өөредип чораан (Лк. 19:47, 48). Мөөң чон ону дыңнаар дээш чыглып кээрге, «Иисустуң база ооң өөреникчилериниң чемненир безин чай-хозу чок» турган (Мк. 3:20). А бир эвес бир кижиге дүне ужуражыры эптиг боор болза, ол аңаа таарыштыр үезин аңгылап алыр турган (Ин. 3:1, 2). Чүге? Ол улуска ынак болгаш, оларны кээргеп чораан. Иисустуң суртаалдап турган улузунуң хөй кезии христианнар апарбаан. Ынчалза-даа оларның аңаа бүзүрей берип болур билии четчир турган. Бис база өөрүшкүлүг медээни хөй улуска дамчыдарын күзээр бис (Аж.-ч. 10:42). А ону кылыр дизе, суртаалдаар аргаларны өскертиринге белен боор ужурлуг бис.

¹⁴ Улуска эптиг үеде суртаалдаңар. Өөрүшкүлүг медээни дыңнаксап турар улус ам-даа хөй. Ынчалза-даа бир эвес чаңгыс ол-ла үеде суртаалдаар болзувусса, кымга-даа ужурашпайн барып болур бис. Матильда дээр доктаамал эгелекчи мынча дээн: «Мен ашаам-биле аңгы-аңгы үеде суртаалдаарын кызар чордувус. Эртенги үеде улустуң ажылдап турар черинче баарын кызар бис. А хүндүс улус даштыгаар үнүп кээрге, дептерлерлиг стенди чанынга суртаалдаар бис. А кежээ улус чанып кээрге, бажыңнар кезип суртаалдаар чордувус». Ийе, бистиң кижи бүрүзү өөренген аайы-биле бараалгап турар. Ынчалза-даа бис бодувусту эвес, а өске улусту бодап, оларга таарыштыр бараалгал графигин тургузуп аар болзувусса,  күжениишкиннеривис хилис барбас, а Иегова өөрүүр.

15. Иисустуң черге чуртталгазының сөөлгү дүнезинде чүү болган? (Лука 22:39—44).

¹⁵ Б. э. 33 чылдың нисан 14-те Иисус орай кежээ Гефсимания дээр черге чедип келген. Аңаа ол Иеговага сеткилиниң ханызындан мөргээн. (Номчуптуңар: Лука 22:39—44.) Еврейлерге 5:7-де бижээни дег: «Иисус ыыткыр човууртап база карааның чажын төп, чалбарган». Ол Адазындан чүнү дилээн? Аңаа шынчы артып, Ооң күзел-соруун күүседир күштү. Иегова Оглунуң хинчектенип, сеткил-чүрээниң кайы хире аарып турарын көргеш, ону быжыктырар кылдыр, дээрниң төлээзин чоргузупкан.

16. Иисус Гефсимания дээр черге мөргүп тургаш, чүге ыглап турган?

¹⁶ Иисус Гефсимания деп черге мөргүп тургаш, чүге ыглап турган? Ону Бурганның адын бак атка киирген дээш, шаажылаар деп турарын бодап келгеш, Иисус аажок муңгарап турган. Иисус Адазының адын камгалаар улуг харыысалгалыг турган. Силерниң база Бурганга бердингениңерни хынап турар шенелделерге таваржып турар болзуңарза, Иисусту канчаар өттүнүп болур силер? Ам база үш чугула алыс шынны көрүптээлиңер.

17. Иисустуң мөргүлүнге Иегованың харыылаанындан чүнү өөренип ап болур бис?

¹⁷ Иегова сеткилиңерден мөргүлдериңерни дыңнап турар. Иегова Оглунуң мөргүлүн чүге кичээнгейлиг дыңнаан? Иисуска Адазынга шынчы артып, Ооң адын бужар-бактан арыглаары чүден артык чугула боорга, Ол Иисусту дыңнап турган. Бис база Иеговага шынчы артып, Ооң адын арыглаары биске чүден артык чугула болза, Иегова дуза дилээн мөргүлдеривиске база харыылаар (Ыд. ыр. 144:18, 19).

18. Иисусту чүге кээргээчел өңнүк деп болур бис?

¹⁸ Иисус чүнү миннип турарыңарны дыка эки билир. Кандыг-даа бергелер тургустунуп кээрге, чанывыска бисти эки билир база бис ышкаш бергелерни эрткен өңнүк турар болза, кандыг-даа бергени ажып эртиптер бис. Иисус шак ындыг өңнүк-түр. Күш чок арткаш, дуза хереглээри кандыг боорун ол дыка эки билир. Оон аңгыда, ол бистиң кошкак  талаларывысты база эки билир, ынчангаш деткимче «херек өйде» ол бис дээш албан сагыш човаар (Евр. 4:15, 16). Гефсимания дээр черге дээрниң төлээзи келгеш, деткимчени көргүзерге, Иисус аңаа өөрүп четтиргенин илередип турган. Моон чүнү өөренип ап болур бис? Иегова мөргүлдеривиске дептерлер, видео, илеткел, удуртукчу болгаш өске-даа быжыг бүзүрелдиг эштеривис таварыштыр харыылап болур. Иисус ышкаш, Иегованың дузазындан ойталаваалыңар.

19. Бурганга бердингенивис шенеттинип турда, бисти чүү быжыктырып болур? Чижектен чугаалаңар.

¹⁹ Иегова чүрээңерге амыр-тайбыңны бээр. Иегова бисти канчаар быжыктырып турар? Ол мөргүлдеривиске харыы кылдыр «улустуң угаап-билиптер шаандан ажа бээр Бурганның амыр-тайбыңын» берип турар (Флп. 4:6, 7). «Бурганның амыр-тайбыңы» сагыш-сеткиливиске оожургалды миннип, дүвүренчиг бодалдардан адырлып алырынга дузалаар. Аңаа Люсия дээр угбавыс шынзыккан. Ол үлешкен: «Мен чааскаанзырал-биле туржуп чоруур мен. Безин чамдыкта Иегова меңээ ынак эвес деп бодап эгелээр-дир мен. Ындыг үелерде дораан-на минниишкиннеримни Иеговага чугаалааш, үен-даян бодалдарга алыспас чордум». Люсияның чижээнден көөрге, мөргүлдүң ачызында сагыш-сеткиливиске амыр-тайбыңны миннип болур бис.

20. Иисустуң ыглап турганы үш байдалдан чүү чүвеге өөренип алдыңар?

²⁰ Иисустуң ыглап турганы үш байдалды көрдүвүс. Дыка-ла оожургалдыг, ажыктыг бодалдарны сайгардывыс! Улустуң эргим кижизи чок апаарга, оларның чанынга турары база бистиң-биле ындыг чүүл болу бээр болза, Иегова биле Иисус бисти деткиир деп бүзүрээри чугула дээрзин бо статья көргүскен. Оон аңгыда, Иегова биле Иисус ышкаш, суртаалдап турар улузувусту кээргээр бис. Оон ыңай Иегова биле Иисус кошкак талаларывысты эки билип, берге байдалга биске дуза кадарынга белен деп оожургалдыг бодалдарны бо статья сагындырган. Бо өөренген кичээлдеривисти ажыглап, Иегованың «[бистиң караавыста] чаш бүрүзүн чодуп бээр» дээн кайгамчыктыг аазаашкыны күүсеттинеринге чедир быжыг туруштуг болуулуңар! (Ажыд. 21:4).