1, 2. а) Чок апарган эргим улузувустуң дугайында ылаңгыя кажан сактып кээр бис? б) Иисус өлүрүнүң мурнуда чүнү сагыырын айыткан?

 БИР эвес бис чоок киживисти чидирип алган болзувусса, кайы хире-даа үе эртерге, ооң дугайында дөмей сактып чоруур бис. А ылаңгыя ооң чок апарганының чылдааны биске ону оон-даа артык сагындырар.

² Бис чыл санында бүдүн делегейде миллион-миллион акы-угбалар-биле эргим өңнүүвүстүң, Иисус Христостуң, өлүмүнүң чылдаанынче барып турар бис (1 Пет. 1:8). Ол бисти мөңге амыдыразын дээш, бодунуң амы-тынын өргүлге берген (Мф. 20:28). Христианнар ооң өлүмүнүң дугайында бодап чорзун деп, Иисус күзээн. Шаажылаттырып өлүрүнүң мурнунда, шынчы элчиннери-биле кежээки чем үезинде, ол тускай ёзулалды киирип: «Меңээ тураскаал кылдыр ынчаар кылып чоруңар» — деп айыткан (Лк. 22:19).

3. Бо статьяга чүнү сайгарар бис?

³ Христостуң өлүмүнүң Сактыышкын кежээзинче кээп турар улустуң чүгле эвээш кезээ дээрге чурттаар идегелдиг. А ынаар кээп турар миллион-миллион кижилер черге мөңге чурттаар идегелдиг. Бо статьядан оларның чылдың-на ынаар чүге барып турарын база ол чүүл оларның чуртталгазын канчаар ужур-уткалыг кылып турарын билип алыр бис. Эгезинде шилип чагдырган христианнарның Сактыышкын кежээзинче кээп турар каш чылдагаанын көрүптээлиңер.

4. Сактыышкын кежээзинде хлеб биле кызыл араганы чагдырган христианнар чүге амзап турар?

⁴ Чыл санында шилип чагдырган христианнар Сактыышкын кежээзиниң киржикчилери бооп, хлеб биле кызыл араганы  амзап турар. Чүге? Иисустуң өлүмүнүң сөөлгү кежээзинде чүү болганын сактып кээлиңер. Ол элчиннери-биле Хосталыышкын байырлалын кады демдеглеп эрттирген. Оон ол Сактыышкын кежээзи кылдыр билдингир апарган байырлалды эрттирерин айыткан. Ол 11 шынчы элчининге хлеб биле кызыл араганы сунгаш, ону амзаарын чугаалаан. Иисус чаа чагыг-керээ биле Чагырганың чагыг-керээзиниң дугайында база чугаалаан * (Лк. 22:19, 20, 28—30). Ол ийи чагыг-керээ элчиннерге болгаш эвээш санныг шилип чагдырган христианнарга хааннар апаар арганы берип турар (Ажыд. 5:10; 14:1). Ынчангаш ол чагыг-керээже кирип турар черде арткан чагдырган христианнар Сактыышкын кежээзинде хлеб биле кызыл араганы амзап турар.

5. Шилип чагдырган христианнар чүнү ыяк билир?

⁵ Оон ыңай шилип чагдырган христианнар Сактыышкын кежээзинге келгеш, Иегованың оларга кандыг келир үени белеткеп каанын ханы боданып турар. Бодап көрүңер даан, ол 144 000 кижи өлүм чок, ирип чыдывас мага-боттуг боор. Оон аңгыда, олар алдарлыг Иисус Христос-биле кады бараалгап, барып-барып Иегованың Бодун көөр! (1 Кор. 15:51—53; 1 Ин. 3:2). Олар шак ындыг алдар-хүндүге төлептиг болганын билир. Ынчалза-даа олар дээрге чурттаар шаңналды алыр деп бодаар болза, черге чуртталгазының төнчүзүнге чедир Иеговага шынчы артар ужурлуг (2 Тим. 4:7, 8). Шилип чагдырган христианнар келир үезиниң дугайында боданырынга ынак (Тит. 2:13). Ам Сактыышкын кежээзинге «өске хойлар» чүге кээп турарын көрүптээлиңер (Ин. 10:16).

6. «Өске хойлар» Сактыышкын кежээзинче чүге кээп турар?

⁶ «Өске хойлар» Сактыышкын кежээзинче киржикчилер кылдыр эвес, а аалчылар кылдыр кээр. 1938 чылда черге чурттаар идегелдиг улусту Сактыышкын кежээзинге бир дугаар тускай демдеглээн. Ооң дугайында 1938 чылдың март 1-ниң «Таңныыл суургазында» (англи дылда) мынча дээн: «Олар [«өске хойлар»] Сактыышкын кежээзинге кээп, ында болуп турар чүүлдү көөр болза, шын боор... Чүге дээрге ол оларга улуг өөрүшкүнү миннир арга-дыр». Аалчылар куда-дойже аныяктар дээш өөрүп база оларны деткиир дээш кээр болгай. Ооң-биле дөмей, «өске хойлар» Сактыышкын кежээзинге аалчылар кылдыр келгеш, өөрүп турарлар.

7. «Өске хойлар» Сактыышкын кежээзинге илеткелди дыңнаарынга чүге ынак?

⁷ «Өске хойлар», шилип чагдырган христианнар дег, Сактыышкын кежээзинге келгеш, Иегованың оларга кандыг келир үени бергенин ханы боданып турар. Чижээ, аңаа библейжи илеткел чугаалаар. Иисус Христос болгаш 144 000 шилип чагдырган христианнарның Муң чыл чагыргазының үезинде «өске хойларга» чүнү кылырын ол илеткелде чугаалап турар. Иисус Христос хаанның удуртулгазы-биле ол башкарыкчылар Бурганга дыңнангыр улуска тергиин апаарынга база черни дываажаң кылырынга дузалаар. Сактыышкын кежээзинче чылдан чылче кээп турар миллион-миллион кижилер Исайя 35:5, 6; 65:21—23 биле Ажыдыышкын 21:3, 4-те өттүр билген медеглелдерниң дугайында сагыштаалаарынга ынак. Олар боттарын болгаш чоок улузун чаа делегейде кылдыр сагыштаалап тургаш, келир  үеже идегелин болгаш Иеговага эчизинге чедир бараалгаар шиитпирин быжыктырып ап турар (Мф. 24:13; Гал. 6:9).

8. «Өске хойларның» Сактыышкын кежээзинче кээр оон өске кандыг чылдагааны бар?

⁸ Оон ыңай «өске хойлар» Сактыышкын кежээзинче кээп турары-биле чагдырган христианнарга ынакшылын база деткимчезин көргүзүп турар. Бурганның Сөзүнде чагдырган христианнар биле черге мөңге чурттаар улус аразында быжыг харылзаалыг боор дээн. Аңаа хамаарыштыр каш библейжи өттүр билген медеглелдерни көрүптээлиңер.

9. Захария 8:23-те өттүр билген медеглелде шилип чагдырган христианнарга «өске хойларның» бердинген чоруун канчаар бижээн?

⁹ Номчуптуңар: Захария 8:23. Мында «өске хойларның» шилип чагдырган акы-угбаларынга бердинген чоруун өттүр билип медеглээн. «Аңгы-аңгы дылдарда чугаалап турар бүгү чоннардан он-он кижи» дээрге «өске хойлар-дыр». Олар иудей кижиге, азы шилип чагдырган христианнарга: «Силер-биле кады чоруурун биске чөпшээреп көрем» — дээн (Рим. 2:28, 29). Эскердиңер бе, ол ийи бөлүктүң аразында быжыг харылзааны канчаар бижээн-дир? Медээчи мында он-он кижини «иудей кижиниң эдээнден халбактанып», азы оларның шилип чагдырган христианнарны бүрүнү-биле деткип, Иеговага кады бараалгап турарын бижээн. Ийе, «өске хойлар» чагдырган акы-угбаларга аажок ынак. Ынчангаш оларның Сактыышкын кежээзинче кады кээп турары кайгамчык эвес.

10. Иезекиил 37:15—19, 24, 25-те өттүр билген медеглелди Иегова канчаар күүсеткен?

¹⁰ Номчуптуңар: Иезекиил 37:15—19, 24, 25. Бо өттүр билген медеглел канчаар күүсеттинген? Иегованың ачызында «өске хойлар» биле шилип чагдырган христианнар сырый ажылдажып турар. Бо өттүр билген медеглелде ийи мерге дугайында чугаалаан. «Иуданың мергези» дээрден чагырар христианнарны илередип турар, чүге дизе хааннарны Израильдиң ол аймаандан шилип турган. А «Эфремниң мергези» черге мөңге чурттаар идегелдиг улусту илередип турар. Иегова «олардан чаңгыс мерге кылыр деп тур мен» дээни-биле ол ийи бөлүктү каттыштыргаш, Иисус Христос хаанның удуртулгазы-биле оларның Бурганга эгин кожа бараалгаарын көргүскен *. Ынчангаш «өске хойлар» биле чагдырган христианнар Сактыышкын кежээзинче ийи аңгы кылдыр эвес, а «чаңгыс кадарчылыг чаңгыс кодан» дег кээп турарлар (Ин. 10:16).

11. Иисустуң угаадыглыг чугаазында хойлар шилип чагдырганнарны канчаар деткип турар? (Матфей 25:31—36, 40).

¹¹ Номчуптуңар: Матфей 25:31—36, 40. Бо угаадыглыг чугаада хойлар кымнарны илередип турар? Келир үеде мөңге чурттаар идегелдиг бо делегейниң төнчүзүнде чурттап турар «өске хойларны» илередип турар. Олар Христостуң акыларын деткип турар. Канчаар? Олар төөгүде кайгамчык дээн улуг ажылды — бүгү делегейге суртаалдаар база өөреникчилер белеткээр ажылды — кылырынга шилип чагдырганнарга дузалап турар (Мф. 24:14; 28:19, 20).

12, 13. «Өске хойлар» Христостуң акыларын оон ыңай канчаар деткип турар?

¹² Чыл санында Сактыышкын кежээзиниң мурнунда, каш неделя дургузунда, ол кайгамчык болуушкунче улусту чалаар дээш кампания боор. «Өске хойлар» шилип чагдырган акы-угбаларын деткиир дээш аңаа идепкейлиг киржип турар. ( «Сактыышкын кежээзинге белеткенип эгеледиңер бе?»  деп көзенекти көрүңер.) Хөй черлерге Сактыышкын кежээзинге кээп турар улустуң чаңгызы-даа кызыл арага биле хлебти амзавас. Ынчалза-даа «өске хойлар» чыыш бүрүзүнге Сактыышкын кежээзи болуп эртер кылдыр шупту чүвени белеткеп турар. Ынчаар олар шилип чагдырган христианнарга күзелдии-биле дузалап турар. «Мээң бо эң бичии дуңмаларымның бирээзинге ол бүгүнү кылганыңар дээрге-ле ону Меңээ база кылганыңар ол-дур» дээн Иисустуң сөстери оларның чүрээн чылдып чоруур (Мф. 25:37—40).

¹³ Шупту христианнарның Сактыышкын кежээзинче кээр оон өске кандыг чылдагааннары бар?

14. Иегова биле Иисус биске күштүг ынакшылын канчаар көргүскен?

¹⁴ Иегова биле Иисустуң ынакшылы дээш өөрүп четтиргенивисти илередип турар бис. Иегованың биске ынакшылының бадыткалдары хөй, ынчалза-даа оларның бирээзи өскелеринге канчап-даа деңнешпес. Бурган бис дээш дыка улуг өргүлдү кылган: Ол бисти мөңге амыдыразын дээш, эргим ынак Оглунуң хинчектенип өлүрүн чөпшээрээн (Ин. 3:16). А Иисус чөпшээрешкеш, биске күштүг ынакшылын көргүскен (Ин. 15:13). Иегова биле Иисуска оларның ынакшылы дээш, өревисти чүнүң-биле-даа төлеп шыдавас бис. Ынчалза-даа хүн бүрүде канчаар чурттап турарывыс-биле оларга четтиргенивисти илередип болур бис (Кол. 3:15). Оон ыңай Сактыышкын кежээзинче келгеш, оларга ынаавысты база оларны сактып чоруурувусту көргүзүп турар бис.

15. Шилип чагдырганнар-даа, «өске хойлар-даа» төлевир дээш чүге өөрүп четтирип турар?

¹⁵ Төлевир дээш өөрүп четтирип турар бис (Мф. 20:28). Төлевирниң ачызында шилип чагдырган христианнарның кайгамчык идегели бар. Ынчангаш олар ол белекти аажок үнелеп чоруур. Олар Иисус Христостуң өргүлүнге бүзүрээр боорга, Иегова оларны азырап ап, чөптүг-шынныг деп санап турар (Рим. 5:1; 8:15—17, 23). «Өске хойлар» база төлевир дээш, өөрүп четтирип турар. Олар Христостуң төккен ханынга бүзүреп турар болгаш, Иегованың өңнүктери бооп, Аңаа бараалгап, «коргунчуг хилинчекти» ажып эртиптер дээрзинге идегеп чоруур (Ажыд. 7:13—15). Шилип чагдырганнар-даа, «өске хойлар-даа» Сактыышкын кежээзинче чылдың-на кээп тургаш, төлевир дээш четтиргенин илередип болур.

16. Оон ыңай кандыг чылдагаан-биле Сактыышкын кежээзинче кээп турар бис?

¹⁶ Оон аңгыда, Сактыышкын кежээзинче кээп турарывыс-биле Иисуска дыңнангыр болуксап турарывысты көргүзүп турар бис. Иисус Сактыышкын кежээзин киирип тургаш: «Ону Меңээ тураскаал кылдыр ынчаар кылып чоруңар» — дээн (1 Кор. 11:23, 24). Каяа-даа чурттаар идегелдиг болзувусса, ол айтыышкынны биске хууда чугаалаан ышкаш кылдыр хүлээп ап турар бис.

17. Сактыышкын кежээзи Иегова-биле хамаарылгавысты быжыктырарынга канчаар дузалап турар?

¹⁷ Сактыышкын кежээзи биске Иеговага оон-даа чоокшулаарынга дузалап турар (Иак. 4:8). Ынаар кээп тургаш, Иегованың биске берген идегелиниң болгаш күштүг ынакшылының дугайында боданып турар бис деп көрдүвүс (Иер. 29:11; 1 Ин. 4:8—10). Келир үеже быжыг идегеливистиң дугайында база Иегованың төнүп читпес ынакшылының дугайында боданып тургаш, Иеговага оон-даа ынак апарып, найыралывыс дам быжыгып орар (Рим. 8:38, 39).

18. Иисустуң үлегериниң дугайында боданыры биске чүзү-биле ажыктыг?

 ¹⁸ Сактыышкын кежээзи бисти Иисустуң үлегерин эдереринче оттуруп турар (1 Пет. 2:21). Сактыышкын кежээзиниң мурнунда Библияны номчуп тургаш, Иисустуң черге сөөлгү хүннериниң, өлүмүнүң база дирлип келгениниң дугайында ханы боданып турар бис. А кажан библейжи илеткел дыңнап тургаш, ооң ынакшылының база бодун хайыралавазының дугайында боданып турар бис (Эф. 5:2; 1 Ин. 3:16). Сактыышкын кежээзинче келген санывыста-ла, «Иисустуң амыдырап чорааны дег амыдыраар» күзеливис улам күштелип орар (1 Ин. 2:6).

19. Иегованың ынакшылынга канчаар шынчы артып болур бис?

¹⁹ Сактыышкын кежээзи бисти Бурганның ынакшылынга шынчы артарынга дузалап турар (Иуда 20, 21). Иегованың ынакшылын чаалап аар дизе, Ооң чүрээн өөртүп, адын ыдыктап, Аңаа бар шаавыс-биле дыңнангыр болурун кызар ужурлуг бис (У. ч. 27:11; Мф. 6:9; 1 Ин. 5:3). Сактыышкын кежээзи бисти Иеговага: «Мен Сээң ынакшылыңны кезээ-мөңгеде минниксеп тур мен» деп чугаалаарынга төлептиг кылдыр хүн бүрүде чурттаарынче оттуруп турар.

20. Сактыышкын кежээзинче баар кандыг чугула чылдагааннарывыс бар?

²⁰ Шупту христианнарның Сактыышкын кежээзинче баар чугула чылдагааннары бар деп көрдүвүс. Чылдың-на бис ол тускай хүнде эргим өңнүүвүс Иисус Христостуң дугайында сактыр дээш кады чыглып турар бис. А оон-даа чугула чүүл, шак ынчаар бис Оглун бис дээш төлевир кылдыр берген Иегованың өндүр улуг ынакшылы дээш өөрүп четтиргенивисти илередип турар бис. 2022 чылда Сактыышкын кежээзи апрель 15-те, пятницада болур. Иегова биле Иисуска дыка ынак бис. Ынчангаш Иисус Христостуң өлүмүнүң чылдаанын демдеглээр дээш, Сактыышкын кежээзинче албан баар бис!