1. Иегова-биле үени канчаар эрттирип болур бис?

 ЧООК улузувус-биле үе эрттиреринге дыка ынак бис. Хүнзедир ажылдааш, ашак-кадай улуска үени кады эрттирери эргежок чугула. А аныяктар эш-өөрү-биле үе эрттиреринге ынак. Акы-угбалар-биле аралашкан үевисти чүү-биле-даа солуп болбас. Ынчалза-даа чүүден-даа артык үени Иегова-биле эрттирерин дыка үнелээр бис. Силер айтырар боор силер: ындыг чүүл канчаар болдунарыл? Иеговага мөргүп тургаш, Библиядан Ооң шынарларын база келир үеде чүнү кылырын билип ап тургаш, Ооң чанында ышкаш боор бис. Бурган-биле кады эрттирген үевис чүүден-даа артык үнелиг! (Ыд. ыр. 138:17).

2. Кандыг бергеге таваржып турар бис?

² Чамдыкта ажыл-херектиң хөйүнден Иегова-биле найыралывысты быжыглаар үени тып алыры берге апаар. Ажыл-агыйывыста, өг-бүлевисте хүлээлгелеривисти күүседип халып турувуста, мөргүүр, Библия номчуур, ханы боданыр үевис шуут артпайн барган ышкаш кылдыр сагындырар.

3. Бистиң үевисти оон өске чүү оорлап болур?

³ Бистиң үевисти оорлап болур оон өске чүүл база бар. Оваарымчалыг болбас болзувусса, Иегова-биле найыралывысты быжыктырар ужурлуг үениң орнунга, дыштанып, хөглээр дээн ышкаш, ынча дыка багай эвес херектерже дүлнү берип болур бис. Чугаажок, үе-үе болгаш, кижи  бүрүзүнге дыштаныры чугула. Ынчалза-даа дыштанылга, оюн-тоглаа чеже-даа эки шынарлыг болза, өйүн билбес боор болзувусса, Бурган-биле найыралывысты быжыктырар үе артпайн баар. Чүү-даа чүве өйлүг болур (У. ч. 25:27; 1 Тим. 4:8).

4. Ам чүнү сайгарар бис?

⁴ Чуртталгавыска эң кол чүүлдерни шын салып алыры чүге чугулазын бо статьяга сайгарар бис. Иегова-биле үени оон-даа эки канчаар эрттирерин база ол чүүл чуртталгавысты канчаар оон-даа ужур-уткалыг кылыптарын моон билип алыр бис.

5. Эфесчилерге 5:15—17-де сөстер аныяк оолдар-кыстарга чуртталганың эң дээре оруун шилип алырынга канчаар дузалаар?

⁵ Чуртталганың эң дээре оруун шилип алыңар. Хөй аныяк оолдар-кыстар чуртталгазын чүү чүвеге бараалгадырын аай-бажын тыппайн турар. Бир талазында, школада башкылары, Иегованың Херечизи эвес төрелдери оларны дээди эртем чедип алгаш, чедиишкинниг ажыл-агыйлыг болурунче кыйгырып турар. Ол дээрге хөй үе негээр, узамдыга бээр улуг ажыл-дыр. Өске талазында, ада-иези болгаш чыышта акы-угбалар оларны чуртталгазын Бурганга бараалгадырынче деткип болур. Иеговага ынак оолдар-кыстарга эң-не дээре шиитпир үндүреринге чүү дузалаар? Эфесчилерге 5:15—17-де сөстерниң дугайында боданып көрээлиңер (номчуптуңар). Аныяк дуңмаларывыс боттарыңардан айтырып көрүңер: «Иегованың күзел-соруу кандыг? Ону кандыг шиитпир өөртүр? Чуртталганың кандыг оруун шилип алыр болзумза, үемни эң-не дээре кылдыр ажыглап болур мен?» «Бузуттуг-бак чорук көвүдээн» Эрликтиң делегейи удавас төнер деп утпаңар. Ынчангаш Иегова-биле кады чорааны дээре.

6. Мария кандыг шилилгени кылган база ол чүге эң дээре?

⁶ Чугула чүүлдерни бирги черге салыңар. Эфесчилерге 5:15—17-де сүмени эдерер дизе, эки биле эң дээре чүүлдүң кайы-бирээзин шилиир апаар. Ону эки билип алыр дээш, Иисустуң Мария биле Марфага аалдап чораанын сактып кээлиңер. Хүндүлээчел Марфа эң күзенчиг аалчызын элбек аъш-чем-биле өөрүшкүлүг хүлээп алыр дээн. А Мария чүнү канчап турган? Мария ындыг арганы чидирбес дээш, «Иисустуң буттарының чанынга олуруп алгаш, Ооң чугаазын дыңнап эгелээн». Марфаның сеткилинден кызып турганы чугаажок, ынчалза-даа Мария эң дээре «үлүгнү шын шилип алган» (Лк. 10:38—42). Мария ол хүнде чүнү чигенин сактып албаан-даа болза, Иисустуң сөстерин бүгү назынында сактып алган деп болур бис. Иисус-биле эрттирип турар үезин Мария аажок үнелээн. Иегова-биле эрттирип турар үевиске база шак-ла ындыг хамаарылгалыг болуулуңар. Ол үени эң дээре кылдыр ажыглаарынга биске чүү дузалаар?

7. Мөргүүрүнче, шинчилел кылырынче, ханы боданырынче үени аңгылап алыры чүге эргежок чугула?

⁷ Мөргүүрү, шинчилел кылыры, ханы боданыры — Иеговага мөгеериниң эң чугула кезээ деп утпаңар. Мөргүп тургаш, ынакшылдыг Адавыс-биле чугаалажып турар бис (Ыд. ыр. 5:8). Библияны өөренип тургаш, мерген угаанның үндезини болур Бурганның дугайында билип ап турар бис (У. ч. 2:1—5). А ханы боданып тургаш, Бурганның  кайгамчыктыг шынарларын, биске хууда база бүгү чаяалгага хамаарыштыр бодап алган күзел-соруун билип алыр бис. Оон артык үени кижи канчаар эрттирер боор деп?! Бодувуста бар үени эң-не дээре кылдыр канчаар ажыглап болур бис?

8. Иисустуң ээн кургаг ховуга турган үезинде биске кандыг өөредиг бар?

⁸ Болдунар болза, дыштыг черден тып алыңар. Иисустуң чижээн көрээлиңер. Иисус бараалгаарының бетинде дыштыг черге, ээн кургаг ховуга, 40 хонук иштинде Адазынга мөргүп, Ооң күзел-соруун канчаар күүседирин боданып турган (Лк. 4:1, 2). Ынчалдыр ол шенелделерге белеткенип алган. Ооң үлегеринде биске кандыг өөредиг бар? Силерниң өг-бүлеңерде кижи саны хөй болза, дыштыг черни тып алыры амыр эвес. Франциядан Жюли дээр угбавыс шак-ла ындыг байдалда. Ол өөнүң ээзи-биле кожалары шимээнниг бичии бажыңда чурттап турар. Угбавыс Иеговага мөргүүр дыштыг черни кайыын тып алган? «Хүннүң-не сесерликке баргаш, кым-даа шаптыктавас черге Иегова-биле сеткилимден чугаалажыр чордум» — деп, Жюли үлешкен.

9. Иисустуң Иегова-биле найыралын үнелеп турганы чүүден көскү?

⁹ Иисус дыка чай чок чораан. Каяа-даа ону хөй чон үглеп, дилеглерлиг кижилер аңаа бо-ла кээр турган. Бир катап Иисустуң келген бажыңының даштынга «хоорайның бүгү чурттакчылары... чыглып келген». Ындыг чай чок тургаш-даа, Иисус Адазы-биле эрттирер үени тып ап турган. «Иисус дараазында эртен чер чырываанда-ла тургаш, дашкаар үнгеш, ээнзиргей черге барып, Бурганга мөргүп турган» (Мк. 1:32—35).

10, 11. Иисус өөреникчилеринге Гефсимания деп черге кандыг сүме берген база ооң соонда чүү болган? (Матфей 26:40, 41).

¹⁰ Чуртталгазының сөөлгү дүнүнде Иисус дыштыг, оожум черге боданып, мөргүп алыр дээш, Гефсимания дээр черже чорупкан (Мф. 26:36). Ындыг харыысалгалыг үеде, бараалгалының төнчүзү чоокшулап кээрге, Иисус өөреникчилеринге мөргүлге хамаарыштыр шыңгыы сүме берген.

¹¹ Аңаа чүү болганын сактып кээлиңер. Иисус өөреникчилери-биле Гефсимания дээр черге орайтап каанда, безин дүн ортузу ажа бергенде, келген. Ол өөреникчилерин удувайн, сергек болурун дилээш, боду мөргүүр дээш чорупкан (Мф. 26:37—39). «Иисус өөреникчилеринче ээп келгеш, оларның удуп чыдарын көргеш», оларга база катап: «Серемчилелдиг болуп, мөргүңер» — деп чугаалаан. (Номчуптуңар:  Матфей 26:40, 41.) Ол кежээ хөй болуушкуннар болганындан өөреникчилери дыка могап-шылаан деп, Иисус билип турган. Ол оларны кээргээш: «Сеткил-сагыш — сергек, а мага-бот — суларгай болгай» деп сураглыг сөстерни чугаалаан. Ооң соонда Иисус өөреникчилерин ийи катап одуг-сергек бооп, мөргүңер деп дилээн, ынчалза-даа кээрге-ле, олары удуп чыдар болган (Мф. 26:42—45).

12. Кедергей могап-шылаан үеде безин мөргүүрүнге биске кандыг сүме дузалаар?

¹² Мөргүүр кылдыр эң-не эки үени аңгылап алыңар. Чамдыкта кедергей могап-шылааш, мөргүүр харык чок апаар бис. Бистиң хөй кезиивис ындыг байдалга таваржып турар. Маңаа кандыг сүме дузалап болур? Чижээ, удуурунуң мурнунда мөргүп турар болзуңарза, ындыг кончуг шылаваан үеңерде мөргүп ап болур силер. Чамдык акы-угбаларның эскергени-биле алырга, орунга чыдып алгаш эвес, а олуруп азы дискектенип алгаш мөргүүр болза эки. А бир эвес сагыш-сеткилиңер хоозураанындан Иеговага чүнү чугаалаарын аайын тыппас болзуңарза, Иеговага ону ажыы-биле чугаалаңар. Ол силерни дыка эки билип турар (Ыд. ыр. 138:4).

13. Иегова-биле харылзажып турар үевисте электроннуг херекселдер канчаар шаптыктап болур?

¹³ Библия өөренип турар үеңерде кайнаар-даа чардыкпаңар. Мөргүлден аңгыда, Бурганның Сөзүн өөренип тургаш, чыыштар үезинде база Иегова-биле кады үени эрттирип турар бис. Ол үени эки шынарлыг эрттиреринге биске чүү дузалаар? Кижи бодундан айтырып болур: «Чыыш үезинде азы хууда шинчилел кылыр дээш олуруп алырымга, мени чардыктырып турар чүүл бар бе?» Телефонче азы бир электроннуг херекселивисче долгаарга азы СМС кээрге, чардыга бээр бис. Амгы үеде ажыктыг харылзаа херекселдери миллиард-миллиард кижилерде бар. Чамдык шинчилекчилерниң даап бодаан саналындан алырга, кижиниң чанында анаа чыдар телефон безин кичээнгейлиг болурунга шаптыктап болур. Бир психология профессору мынча дээн: «Чаныңарга электроннуг херексел чыдырда, ал-сагыжыңар ынаар чардыгып, ажылыңарже дүлнүп кирери силерге берге боор». Шуулган  бетинде өске улуска шаптыктавазын дээш, электроннуг херекселдеривисти дааш чок байдалче киирип алырын бистен дилеп турар. Иегова-биле чугаалажып турар үевисте электроннуг херекселдер биске шаптык катпазын дээш, шак-ла ынчаар кылып болур бис бе?

14. Филипчилерге 4:6, 7-ден алырга, Иегова биске кичээнгейлиг болурунга канчаар дузалаар?

¹⁴ Кичээнгейлиг болурунга дузалаар кылдыр, Иеговадан дилеңер. Ужуражылгаларга азы Библия өөренип турган үеңерде бодалдарыңар чардыгып турар болза, Иеговадан дузаны дилеңер. Дүвүрелдерге алыспайн, Иегова-биле найыралды быжыктырары амыр эвес. Ынчалза-даа ону кылыры эргежок чугула. Дуза дилээр болза, Иегова чүрээвисти болгаш угаан-бодалывысты камгалап, амыр-тайбыңны бээр. (Номчуптуңар: Филипчилерге 4:6, 7.)

15. Иегова-биле эрттирген үевис биске чүзү-биле ажыктыг болур?

¹⁵ Иегова-биле чугаалажып, Ону дыңнаары биске аянныг, харын-даа ажыктыг. Бирээде, шын шиитпирлер үндүрер бис. Аңаа хамаарыштыр Библияда: «Мерген угаанныг улус-биле эдеришкеш, мерген угаанныг апаар сен» — дээн (У. ч. 13:20). Ынчангаш делегейде эң-не угаанныг Хуу-бот-биле үени эрттирер болзувусса, мерген угаанныг апаар бис. Ынчан бис Иегованы кандыг шиитпирлер өөртүрүн, кандыызы муңгарадырын эки билир боор бис.

16. Чүге Иегова-биле хөй үени эрттирген тудум, эки башкылар апаар бис?

¹⁶ Ийиде, оон-даа эки башкылар апаар бис. Библейжи кичээл үезинде бистиң кол сорулгавыс — өөредип турар киживиске Иегова-биле өңнүктежип алырынга дузалажыры-дыр. Боттарывыс Бурган-биле хөй үени эрттирген тудум, Аңаа ынакшылывыс дам өзер. Бистиң чугаа-сөзүвүсте Иеговага ынакшылывыс кыптыгып турар болза, ону Библия өөренип турар кижиге дамчыдары белен боор. Аңаа хамаарыштыр Иисус тулган чижекти көргүскен. Иисус Адазының дугайында чылыг-чымчаа-биле чугаалаар боорга, ооң өөреникчилери Иеговага ынак апарганнар (Ин. 17:25, 26).

17. Мөргүл болгаш хууда шинчилел бүзүреливисти быжыктырып турар деп чүге чугаалап болур?

¹⁷ Үште, бүзүреливис быжыгып турар. Удуртулга, аргалал болгаш деткимче дилээн мөргүлдеривиске Иегова харыылаан санында-ла, бүзүреливис өзүп турар (1 Ин. 5:15). Оон аңгыда, бүзүрелди быжыглаарынга биске хууда шинчилел дузалаар. «Бүзүрел Буянныг Медээни дыңнап турар улуска чедип кээр-дир» деп Библияда анаа  эвес бижээн (Рим. 10:17). Чүгле билиглерни көвүдедири чедишпес — аңаа база бир чүүл херек.

18. Ханы боданыры чүге чугула, чижектен чугаалаңар.

¹⁸ Билип ап турар чүүлүвүстүң дугайында боданыры чугула. 76-гы Ырның автору база ханы боданыр чораан. Бир катап ол Иегова оон база израильчилерден хая көрнү берген деп бодааш, дүвүрээнинден уйгузун безин чидирип алган (шүлүктер 3—9). Ол чүнү канчалган? Ол Иеговага: «Сээң хамык ажыл-үүлеңни хандыр бодап, Сээң кылган ажыл-херектериң дугайында боданыр мен» — дээн (шүлүк 13). Ыр күүседикчизи Иегованың Бодунуң чону-биле хамаарылгазының дугайында төөгүнү кончуг эки билир-даа болза: «Таанда-ла Бурган ээ-хайыралдыын уттупкан бе, килеңнеп тура, өршээл көргүзерин соксаткан бе?» — деп кайгап турган (шүлүк 10). Ынчангаш ол Иегованың ооң мурнунда үелерде Бодунуң чонунга көргүзүп турган ээ-хайыралының болгаш кээргелиниң дугайында сактып бодап эгелээн (шүлүк 12). Оон ол кандыг түңнелге келген? Иегова чонун кажан-даа кагбаан база кажан-даа кагбас (шүлүк 16). Иегова чонунга база биске хууда чүнү кылганын сактып бодаар болзувусса, бүзүреливис улам быжыгар.

19. Иегова-биле эрттирип турар үевистиң кол чылдагааны кандыг?

¹⁹ Дөртте, Иеговага оон-даа артык ынак апаар бис. Эң-не чугула чылдагаан ол-дур. Ынакшыл, өске шынарларга бодаарга, бисти Иеговага дыңнангыр бооп, Ол дээш сонуургалдарывыстан ойталап, кандыг-даа шенелделер үезинде Аңаа шынчы артарынче бисти оттуруп турар (Мф. 22:37—39; 1 Кор. 13:4, 7; 1 Ин. 5:3). Иегова-биле найыралдан артык үнелиг чүү-даа чок! (Ыд. ыр. 62:2—9).

20. Иегова-биле оон-даа хөй үени эрттирер дээш, чүнү канчаар деп бодап тур силер?

²⁰ Мөргүүрү, хууда шинчилел кылыры болгаш ханы боданыры — чүдүлгевистиң чугула кезээ деп утпаалыңар. Иисус ышкаш, Иегова-биле үени шимээн чок черге эрттирерин кызыңар. Чүү-даа силерни чардыктырбазын! Иегова-биле найыралыңар быжыктырар үеде кичээнгейлиг болур дээш, Оон дузаны дилеңер. Амгы эвээш үевисти эң дээре кылдыр ажыглаар болзувусса, келир чаа делегейге Иегова биске мөңге чурттаар шаңналды белекке бээр! (Мк. 4:24).