1. Амгы үеде хөй улус чүге Библияга бүзүревес?

 АМГЫ үеде хөй улус кымга бүзүрээрин билбес. Чүге дээрге оларның идегеп чорууру политиктер, эртемденнер, бизнесменнер херек кырында олар дээш сагыш човавайн турар. Оон артык, улус церковьтарга база бүзүревестей берген. Ындыг бүзүрел чок шажын башкарыкчылары Библияны ажыглап турар бис дээр боорга, кижилерниң Библияга багай хамаарылгазы кайгамчык эвес.

2. Ырлар 118:160-дан алырга, чүү чүвеге бүзүрээр ужурлуг бис?

² Иегова, «алыс шынныг Дээрги-Бурган-Чаяакчы», биске чүгле экини күзеп турар деп бүзүрээр бис (Ыд. ыр. 30:6; Иса. 48:17). Библиядан номчаан чүүлүвүске база бүзүрээр бис, чүге дизе «[Бурганның] сөзүнүң алыс ужур-утказы шынныг-дыр». (Номчуптуңар: Ырлар 118:160.) «Бурганның чугаалаан бүгү чүвези — ёзулуг алыс шын-дыр. Ооң сөстери кезээде күүсеттинип турар. Бурганның бараалгакчылары Аңаа бүзүрээр болгаш, Ооң сөстеринге база бүзүрээр» — дээн бир эртемденниң сөстери-биле чөпшээрежир бис.

3. Бо статьяга чүнү сайгарар бис?

³ Өске улус база Бурганның Сөзүнге сеткилинден бүзүреп эгелээр кылдыр, канчаар дузалап болур бис? Библияга бүзүреп болур үш чылдагаанны сайгарыптаалыңар. Библияның сөзүглелиниң ылап шынныын, өттүр билген медеглелдериниң канчаар күүсеттинип турарын база кижиниң  чуртталгазынче кандыг салдар чедирип турарын көрүптээлиңер.

4. Чамдык улус Библияның сөзүглелинге чүге чигзинип турар?

⁴ Иегова 40 хире шынчы эр кижини Библияның номнарын бижиир кылдыр оттурган. Ынчалза-даа ол номнарның чаңгызы-даа бо хүнге чедир артпаан. Бисте чүгле хоолгадан кылган хоолгалар бар. Ынчангаш чамдык улус: «Бөгүн номчуп турар Библиявыс шынап өскерилбээн бе?» деп чигзинип турар. Библияны муң-муң чылдар ишти хоолгалаарга-даа, ооң сөзүглели өскерилбээн деп чүү бадыткап турар?

5. Еврей Бижилгелерниң хоолгаларын канчаар кылып турган? (Журналдың даштында чурукту көрүңер.)

⁵ Библейжи сөзүглелди кадагалаар дээш, Иегова Ыдыктыг Бижилгени хоолгалаарын чонунга айыткан. Бурган Израильдиң хааннарын Моисейниң хоойлузун бодунга чара бижидип алырын дааскан. База ол хоойлуга чонну өөредир кылдыр, левиттерни томуйлап каан (Ы. х. к. 17:18; 31:24—26; Неем. 8:7). Вавилонга кулданыының соонда дуржулгалыг бижикчилер Еврей Бижилгениң хоолгаларын дүжүрүп бижип эгелээн (Эзра 7:6). Шак ынчаар Библияның ол кезээниң дыка хөй хоолгалары тыптып келген. Ол бижикчилер дыка хынамчалыг турган. Сөзүглел 100 хуу ылап шын болзун дээш, олар чүгле сөстерни эвес, а үжүктерни безин санап турган. Ындыг-даа бол, кижилерниң тергиин эвес болганындан чамдык бижиктерге частырыглар эрте берген. Ынчалза-даа ол-ла сөзүглелдиң хоолгалары дыка хөй турган болгаш, ол частырыгларны тодарадыры белен турган. Оларны канчаар тодараткан?

6. Библейжи сөзүглелдерниң хоолгаларында частырыгларны канчаар тып ап болур?

⁶ Эртемденнерде библейжи сөзүглелдерни дүжүрүп бижээн улустуң частырыгларын тодарадып алыр дыка эки арга бар. Кандыг? Чижээ, 100 кижини бир арынны дүжүрүп бижиирин дилээн дижик бис. Оон оларның бирээзи частырыг кылып алган. Ону канчаар тып ап болур? Ол частырыглыг арынны өске улустуң ажылдары-биле деңнеп тургаш. Шак ынчаар эртемденнер библейжи бижиктерниң хөй-хөй хоолгаларын деңнеп, частырыгларның бар-чогун тодарадып ап турар.

7. Библейжи сөзүглелди кайы хире хынамчалыг дүжүрүп бижээнил?

⁷ Бижикчилер библейжи сөзүглелди дүжүрүп бижииринге шыңгыы хамаарылгалыг турган. Эң бурунгу болгаш долу Еврей Бижилгелер — б. э. 1008 азы 1009 чылдың Ленинград кодекизи-дир. Ынчалза-даа чоокта чаа ол кодекстен 1 000 чыл бурунгаар бижиттинген сөзүглелдерниң кезектери тывылган. Ынча хөй катап дүжүрүп бижиирге, Ленинград кодекизи шаандакы сөзүглелдерден оранчок ылгалдыг боор эвеспе деп, чамдык улус бодап болур. Ынчалза-даа ол ындыг эвес. Эртемденнер шаандакы болгаш чоокта чаа тывылган бижиктерни деңнеп көөрге, Библияның утказын өскертпейн турар каш частырыг бар болган.

8. Грек Бижилгелерниң бөгүн бар хоолгалары өске бурунгу бижиктерден чүзү-биле ылгалып турар?

⁸ Баштайгы христианнар Еврей Бижилгелерни дүжүрүп бижип турган улусту өттүнүп чораан. Олар чыышка болгаш суртаалга ажыглап турган Грек Бижилгелерниң 27 номун хоолгалаан. Грек  Бижилгелерниң бөгүн артып калган бижиктерин ол-ла үениң өске ажылдары-биле деңнээш, бир эртемден мынча дээн: «[Грек Бижилгелерниң хоолгалары] дыка хөй... база эң-не долу». «Анатомия Нового Завета» деп номда мынча деп демдеглээн: «Амгы шагның [Грек Бижилгелерниң] эки очулгаларында бурунгу авторларның бижээн чүүлүн ол-ла хевээр номчуп турар бис» (Anatomy of the New Testament).

9. Исайя 40:8-тен алырга, библейжи сөзүглелге хамаарыштыр чүнү чугаалап болур?

⁹ Чүс-чүс чылдар дургузунда Библияны кызымаккай дүжүрүп бижип келген улустуң ачызында бөгүн бис ылап шынныг библейжи сөзүглелди номчуп, шинчилеп болур бис b. Чугаажок, Иегова Бодунуң Сөзүн ол-ла хевээр кадагалаар дээш сагыш човаан. (Номчуптуңар: Исайя 40:8.) Ынчалза-даа бир кижи: «Библия өскерилбээн боорга-ла, ону Бургандан деп болбас» деп удурланып болур. Ынчангаш Библия дээрге Бурганның аксындан үндүр тынган Сөзү-дүр деп көргүскен өске-даа бадыткалдарны сайгарыптаалыңар.

10. 2 Пётр 1:21-де сөстерни бадыткаан өттүр билген медеглелдиң чижээн чугаалаптыңар. (Чурукту көрүңер.)

¹⁰ Библияда дыка хөй өттүр билген медеглелдерни бижээн, оларның чамдыызы чүс-чүс чылдар эрткен соонда күүсеттинген. Төөгү база ону бадыткап турар. Ында кайгамчык чүве чок, чүге дээрге өттүр билген медеглелдерниң Автору — Иегова Бурган болгай. (Номчуптуңар: 2 Пётр 1:21.) Бурунгу Вавилоннуң буурап дүжериниң дугайында өттүр билген медеглелдерни көрүптээлиңер. Б. э. чедир VIII-ки векте Исайя медээчи өндүр улуг Вавилон хоорай эжелеттирер дээн. Ол безин эжелекчиниң адын Кир деп база хоорайның канчаар эжелеттирерин тодаргай бижээн (Иса. 44:27—45:2). Оон ыңай Вавилон  чоорту хоозурап каар, аңаа кым-даа чурттавас деп, Исайя чугаалаан (Иса. 13:19, 20). Ол шак ынчаар болган. Б. э. чедир 539 чылда Вавилонче мидийжилер болгаш перстер халдап келген. Ам ол өндүр улуг хоорайдан чүгле бузундулар арткан. («Аас-кежиктиг мөңге чуртта!» деп электроннуг номнуң 3-кү кичээлинде 5-ки пунктуда «Вавилоннуң эжелеттирип алырын Библияда баш удур чугаалап каан» деп видеону көрүңер.)

11. Даниил 2:41—43 бөгүн канчаар күүсеттинип турар?

¹¹ Библейжи өттүр билген медеглелдер чүгле эрткен үеде эвес, а амгы үеде база күүсеттинип турар. Чижээ, Англи-Америк делегей чергелиг күрүне дугайында Даниилдиң кайгамчык өттүр билген медеглелин көрүптээлиңер. (Номчуптуңар: Даниил 2:41—43.) Ол ийи күрүне бир талазында, демир дег, күштүг боор, а өске талазында, дой дег, кошкак боор деп, Даниил өттүр билип чугаалаан. Великобритания биле АКШ демир дег күжүн канчаар көргүзүп турар? Бирги болгаш Ийиги делегей чергелиг дайыннарга олар удуп алырынга улуг рольду ойнаан. Бөгүн безин олар эңмежок ок-чепсектиг база күштүг аг-шериглиг. Ынчалза-даа ол күштү эргези дээш тулчуп, ниитилелде аңгы-аңгы шимчээшкиннерни чорудуп турар хамаатылары кошкадып турар. Чоокта чаа бир политолог мынча дээн: «Каттышкан Штаттар дег сайзыраңгай демократ чурт делегейде чок. Ынчалза-даа ол политиказын долузу-биле чорудуп шыдавайн турар». А Великобританияның дугайында чүнү чугаалап болур? Сөөлгү чылдарда ол Европа эвилели-биле кайы хире сырый ажылдажырын билбейн, чайгылып турар. Бо бүгү Англи-Америк күрүнеге кады шиитпирлиг хөделиринге шаптыктап турар.

12. Библейжи өттүр билген медеглелдер бисти чүү чүвеге бүзүредип турар?

¹² Күүсеттинген өттүр билген медеглелдер Бурганның келир үе дугайында аазаашкыннарынга бүзүреливисти быжыктырып турар. Ыр күүседикчизиниң Иеговага: «Сээң хайырлаарың камгалалды манааш, сеткил-сагыжым ийлеп, Сээң сөзүңге идегеп чор мен» дээн сөстеринге катчыр-дыр бис (Ыд. ыр. 118:81). Иегова Библия таварыштыр бистиң-биле чылыг-чымчак чугаалажып, «келир үени, идегелди» берип турар (Иер. 29:11). Бис кижилерге эвес, а Иеговага идегеп турар бис. Бурганның Сөзүнге бүзүреливисти быжыглаар дээш, улаштыр-ла өттүр билген медеглелдерни кичээнгейлиг шинчилээлиңер.

13. Библияга чүге бүзүреп болур бис? (Ырлар 118:66, 138).

¹³ Оон ыңай Библияда сүмелер ажыктыг боорга, аңаа бүзүрээр бис. (Номчуптуңар: Ырлар 118:66, 138.) Чижээ, чарлы бээр часкан өг-бүлелер ол сүмелерниң ачызында дыка быжыг апарган. Ындыг өг-бүлелерде ажы-төл ынакшылды болгаш айыыл чок чорукту миннип турар (Эф. 5:22—29).

14. Библейжи алыс шын улустуң чуртталгазын канчаар өскертип турар? Чижектен чугаалаңар.

¹⁴ Библиядан мерген угаанныг сүмелер эттинмес херектенни безин өскертип болур. Джектиң c чижээн көрүптээлиңер. Ол дыка дерзии чораан. Ол кара-бажыңга  өлүмге шииткелин манап олурган. Джек эң айыылдыг херектеннерниң бирээзи кылдыр билдингир турган. Бир катап ол библейжи кичээлге олурган. Акыларның чылыг-чымчак хамаарылгазы ооң сеткилинге дыка дээштиг боорга, Джек Библияны өөрениксей берген. Ол Бурганның Сөзүнде алыс шынга дүүштүр чурттап эгелээрге, аажы-чаңы, бүдүжү бүрүнү-биле өскерли берген. Чоорту Джек сугга суктурбаан суртаалчы апаргаш, соонда сугга суктуруп алган. Ол өске херектеннерге Бурганның Чагыргазының дугайында чүткүлдүг суртаалдап, эвээш дизе-ле, дөрт библейжи кичээлди эрттирип турган. Кажан ону шаажылаар хүн кээрге, ооң бир болчукчузу мынча дээн: «Бо дээрге 20 чыл бурунгаар билирим Джек эвес-тир. Иегованың Херечилериниң өөредиглери ону эки талаже долузу-биле өскертипкен». Джекке хамаарыштыр шииткел күүсеттинген-даа болза, ооң үлегери Бурганның Сөзүнге бүзүреп болур база ол кижилерниң чуртталгазын эки талаже өскертиптер деп бадыткап турар (Иса. 11:6—9).

15. Иегованың бараалгакчылары алыс шынның ачызында өскелерден чүзү-биле ылгалып турар? (Чурукту көрүңер.)

¹⁵ Иегованың бараалгакчылары алыс шынның аайы-биле чурттап чоруур болгаш, чаңгыс аай, демниг (Ин. 13:35; 1 Кор. 1:10). Делегейде улус политика, язы-сөөк болгаш ниитилелде туруш-байдалы дээш аңгылажып турда, Иегованың чонунда амыр-тайбың болгаш эп-сеткил тергиидеп турар. Шак ол чүүл Жан дээр бир аныяк оолду аажок кайгаткан. Ол Африканың бир чуртунга өскен. Аңаа хамааты дайын эгелей бээрге, ол шеригже кирип алгаш, соонда кожа чуртче дезе берген. Ол чуртка Жан Иегованың Херечилери-биле таныжып алган. Ол мынча деп үлешкен: «Алыс шын шажынның эдерикчилери политикага киришпес база аңгылашпас деп билип  алган мен. Харын-даа олар бот-боттарынга ынак. Ооң мурнунда чуртумну камгалаар дээш чурттап чораан мен. Ам алыс шынны билип алгаш, Иегова дээш чурттап эгелээн мен». Жан долузу-биле өскерли берген. Ол ооң мурнунда өске язы-сөөктүг улусту өлүреринге белен турган. Ам Жан кандыг-даа улуска өөрүшкүлүг медээни суртаалдап турар. Библия кандыг-даа ук-ызыгуурлуг улуска өскерлип алырынга дузалап турар деп ындыг болуушкуннардан көскү. Шынап-ла, Бурганның Сөзү бистиң бүзүреливиске төлептиг.

16. Бурганның Сөзүнге бүзүреливисти быжыглаары чүге эргежок чугула?

¹⁶ Бо делегей дам-на баксырап бар чыдар. Ынчангаш Бурганның Сөзүнге бүзүрээри берге апарып турар. Алыс шын Библияда чок база Иегова шынчы болгаш сарыылдыг чалчаны томуйлаваан деп чигзиниглерни улус бистиң угаанывыска тарып болур. Ынчалза-даа Иегованың Сөзү кажан-даа мегелевес деп бүзүрээр болзувусса, ындыг халдаашкыннарга алыспас бис. «[Иегованың] дүрүмнерин күүседир кылдыр кезээ мөңгеде» хөөнненип алыылыңар (Ыд. ыр. 118:112). Ынчан улуска алыс шын дугайында чугаалаарындан ыятпайн, оларны аңаа дүүштүр чурттаар кылдыр деткиир бис (Ыд. ыр. 118:46). Оон ыңай кандыг-даа берге шенелделерни, безин истеп сүрүүшкүннерни, шыдамык болгаш өөрүшкүлүг ажып эртиптер бис (Ыд. ыр. 118:143, 157; Кол. 1:11).

17. 2023 чылдың шүлүү биске чүнүң дугайында сагындырар?

¹⁷ Биске алыс шынны ажыдып бергени дээш, Иеговага өөрүп четтирер-дир бис! Алыс шын чуртталгавысты ужур-уткалыг кылып, хүнден хүнче хай-чагырга чок апар чыдар делегейде тода удуртулганы берип, оожургалды минниринге дузалап турар. Алыс шын Бурганның Чагыргазының адаанга кайгамчык келир үеже идегелди биске берип турар. 2023 чылдың шүлүү Бурганның Сөзүнүң алыс ужур-утказы шынныг деп чүүлге бүзүреливисти быжыктырзын! (Ыд. ыр. 118:160).