1, 2. Чыл санында Сактыышкын кежээзинче чүге барып турар бис?

 ИИСУС бисти мөңге чурттазын дээш, 2 000 хире чыл бурунгаар чок апарган. Ол өлүрүнүң мурнундагы кежээзинде эдерикчилеринге ооң кижилерге ынакшылдыы-биле кылган чүүлүн сактып чорзун дээш, хлеб биле кызыл араганы ажыглап, бөдүүн ёзулалды эрттирерин айыткан (1 Кор. 11:23—26).

² Иисуска дыка ынак болгаш, ооң ол айтыышкынын сагып чоруур бис (Ин. 14:15). Чыл санында Сактыышкын кежээзинде ооң биске кылган чүүлү дээш өөрүп четтиргенивисти илередип турар бис. Иисустуң өлүмү кижилерге чүнү эккээрин ханы боданып, мөргүп чоруур бис. Ооң аңгыда, ол тускай болуушкунче улусту чалап, идепкейлиг суртаалдап турар бис. Боттарывыс база ынаар албан баар дээш кызар бис.

3. Бо статьяга чүнү сайгарар бис?

³ Бо статьяга Иегованың бараалгакчылары Иисус Христостуң өлүмүн демдеглээр дээш, чүнү канчап турарын көөр бис: 1) олар Иисустуң айыткан үлегерин эдерип турар, 2) Сактыышкын кежээзинче өскелерни чалап турар,  3) байдалы чеже-даа берге болза, боттары аңаа кээр дээш кызып турар.

4. Чыл санында Сактыышкын кежээзинде кандыг чүүлдерни сайгарып турар база оларны билир бис деп чүге бодавас ужурлуг бис? (Лука 22:19, 20).

⁴ Чыл санында Сактыышкын кежээзинде Библияга үндезилээн илеткелди дыңнап турар бис. Ында кижи төрелгетенге өргүлдүң чүге херегин база чаңгыс кижи бодунуң амы-тыны-биле хөй кижиниң бачыттарын канчаар төлээнин сайгарып турар. Аңаа хлебти кым чиирин, кызыл араганы кым амзаарын база ол демдектер чүнү илередип турарын биске сагындырар. (Номчуптуңар: Лука 22:19, 20.) Черге мөңге чурттаар улус кандыг йөрээлдер алырын база боданыр бис (Иса. 35:5, 6; 65:17, 21—23). Бо бүгүнү шагда-ла билир мен деп бодавас ужурлуг бис. Миллиард-миллиард кижилер ол чүүлдерни-даа, Иисустуң өргүлүнүң кайы хире үнелиин-даа билбес. Оон аңгыда, олар Сактыышкын кежээзин Иисустуң айытканы ёзугаар эрттирбейн турар. Чүге?

5. Элчиннерниң хөй кезии чок апаарга, улус Иисустуң айыткан үлегерин канчаар хажыдып эгелээн?

⁵ Элчиннерниң хөй кезии чок апаарга, чыышка меге христианнар тыптып келген (Мф. 13:24—27, 37—39). Улус «оларны эдерзин дээш, алыс шынны соора өөреди[п]» турганнар (Аж.-ч. 20:29, 30). Ооң бир чижээн көрүптээлиңер. Библияда «Христос... хөй улустуң бачыттарын чүктээри-биле Бодун чаңгыс катап өргүлге салган» дээн-даа болза, олар ол өргүлдү катап-катап эккээр херек деп өөредип турган (Евр. 9:27, 28). Амгы үеде хөй улус ол меге өөредигге бүзүреп турар. Чамдык шажыннарда улус үргүлчү, а чамдыктары безин хүннүң-не, церковьтарже келгеш, литургия b деп ёзулалга киржип турар. А өске шажыннар Христостуң өлүмүн ийи-чаңгыс сактып кээр. Ынчалза-даа ол церковьче кээп турар улустуң хөй кезии Иисустуң өргүлүнүң чүге херегин эки билбес. Чамдык улус: «Иисустуң өргүлү мээң шупту бачыттарымны өршээптер бе?» деп айтыртынар. Олар чүге ол айтырыгны салып турарыл? Чүге дизе священниктер Иисустуң өргүлү бачыттарны өршээринге чедишпес деп оларны бүзүредип чоруур. А Иисустуң алыс шын эдерикчилери ол айтырыгны эки билип алырынга улуска канчаар дузалап турар?

6. 1872 чылда Библия Шинчилекчилериниң бөлүү чүнү билип каан?

⁶ 1870 чылда Чарлз Тейз Расселл болгаш Библия Шинчилекчилериниң бөлүү Ыдыктыг Бижилгени ханы шинчилеп эгелээн. Олар Христостуң өргүлүнүң дугайында база ооң өлүмүн канчаар демдеглээрин билип алыксап турганнар. 1872 чылда олар Иисус өргүлдү шупту улус дээш кылган деп билип кааннар. Ол алыс шынны кижи бүрүзү билип алзын дээш, олар номнарга, солун-сеткүүлдерге ону бижип эгелээн. Ооң соонда, бирги векте христианнар дег, чылда чаңгыс катап Сактыышкын кежээзин демдеглээр апарган.

7. Бурунгу үеде Библия Шинчилекчилериниң кылган шинчилелдери биске чүзү-биле ажыктыг?

⁷ Чүс бежен хире чыл бурунгаар христианнарның кылган шинчилелдери бөгүн биске база дыка ажыктыг. Чүзү-биле? Иегова биске Христостуң өргүлүнүң дугайында база ооң ачызында чүү болдунарын  билип алырынга дузалаан (1 Ин. 2:1, 2). Оон аңгыда, чамдык улус дээрге өлүм чок чурттаар, а сая-сая өске улус черге мөңге амыдыраар деп билип алган бис. Иегованың биске кайы хире ынаан база Христостуң өргүлү биске хууда чүнү илередип турарын бодангаш, Иегова-биле найыралывыс улам быжыгып турар (1 Пет. 3:18; 1 Ин. 4:9). Ынчангаш, бурунгу үеде Библияның Шинчилекчилери дег, Христостуң айыткан үлегери ёзугаар болуп турар Сактыышкын кежээзинче улусту чалап турар бис.

8. Сактыышкын кежээзинче улусту чалаар дээш, Иегованың чону кайы хире хөй күштү үндүрүп турар? (Чурукту көрүңер.)

⁸ Иегованың бараалгакчылары Сактыышкын кежээзинче улусту он-он чылдар дургузунда чалап чоруур. 1881 чылда акы-угбалар Каттышкан Штаттарда Аллегейниде (Пенсильвания штады) бир бажыңга тускай ужуражылганы эрттирер дээш чыглып келген. Ооң соонда чыыш бүрүзү Сактыышкын кежээзин аңгы эрттирип эгелээн. 1940 чылдың март айда суртаалчыларны бодунуң девискээринде алыс шынга сонуургал илереткен улусту чалап болур деп чарлал үнген. 1960 чылда чыыштарга Вефилден бир дугаар парлаттынган чалалгалар келген. Оон бээр миллиард-миллиард чалалгалар тараттынган. Сактыышкын кежээзинче улусту чалаар дээш, чүге хөй үени болгаш күштү үндүрүп турар бис?

9, 10. Сактыышкын кежээзинче кымнарны чалаарын кызып турар бис? (Иоанн 3:16).

⁹ Сактыышкын кежээзинче бир дугаар келген улус Иегова биле Иисустуң оларга  чүнү кылганын билип алзын деп күзээр бис. (Номчуптуңар: Иоанн 3:16.) Аңаа дыңнаан база көрген чүүл оларга Иегованың бараалгакчызы апаарынга дузалаар деп идегээр-дир бис. Ынчалза-даа чүгле алыс шынны билбес улусту чалавайн турар бис.

¹⁰ Ооң мурнунда Иеговага идепкейлиг бараалгап чораан улусту база чалап турар бис. Бурган оларга ам-даа ынак деп оларны бүзүредиксээр бис. Олар байырлалче кээрге, аажок өөрүүр бис. Иеговага бараалгап тургаш, олар кайы хире аас-кежиктиг турганын Сактыышкын кежээзи сагындырып болур. Мониканың c чижээн көрүптээлиңер. Ол COVID-19 деп пандемия үезинде чыыш-биле катап суртаалдап эгелээн. 2021 чылда Сактыышкын кежээзинге келгеш, ол үлешкен: «Бо Сактыышкын кежээзи меңээ дыка тускай болган. 20 чыл эрткен соонда улуска суртаалдап, оларны Сактыышкын кежээзинче чалап турган мен. Иегова биле Иисуска өөрүп четтиргенимни илередиксээш, сеткилимниң ханызындан суртаалдап турдум» (Ыд. ыр. 102:1—4). Улус бисти дыңнаар-дыңнавас-даа болза, Сактыышкын кежээзинче оларны кызып чалап турар бис. Чүге дизе Иегова күжениишкиннеривисти үнелээр деп билир бис.

11. Сактыышкын кежээзинче улусту чалап турар күжениишкиннеривисти Иегова канчаар йөрээп турар? (Аггей 2:7).

¹¹ Сактыышкын кежээзинче улусту чалап турар күжениишкиннеривисти Иегова элбээ-биле йөрээп турар. 2021 чылда COVID-19 деп пандемияның ужундан кызыгаарлаашкыннар турган-даа болза, Сактыышкын кежээзинче 21 367 603 кижи келген. Ол дээрге бүдүн делегейде Иегованың Херечилериниң санындан ийи чартык хире катап хөй! Иеговага саннар эвес, а кижилер чугула (Лк. 15:7; 1 Тим. 2:3, 4). Ынчангаш Сактыышкын кежээзинче улусту чалаарывыска, Иегова чымчак чүректиг улусту тып алырынга дузалап турар. (Номчуптуңар: Аггей 2:7.)

12. Сактыышкын кежээзинче кээри чүге берге бооп болур? (Чурукту көрүңер.)

¹² Иисус сөөлгү хүннерде берге байдалдарга таваржырывысты баш удур чугаалаан. Ол дээрге төрелдеривистиң удурланыышкыны, истеп сүрүүшкүннер, дайыннар, хамчык аарыглар болгаш өске-даа чүүлдер-дир (Мф. 10:36; Мк. 13:9; Лк. 21:10, 11). Бо бүгү дээш Сактыышкын кежээзинче кээри берге бооп болур. Акы-угбалар ол бергелерни ажып эртер дээш, чүнү кылып турар база Иегова оларга канчаар дузалап турар?

13. Артёмнуң кара-бажыңга Сактыышкын кежээзин эрттирер дээн эрес-дидим болгаш шиитпирлиг чоруун Иегова канчаар шаңнаан?

¹³ Кара-бажыңга хоругдал. Бүзүрели дээш кара-бажыңда олурар акы-угбаларывыс Иисустуң өлүмүн төлептиг демдеглээр дээш, шупту чүвени кылып турар. Артёмнуң чижээн көрүптээлиңер. 2020 чылда чазын Сактыышкын кежээзи боор үеде ол 17 квадрат метр шөлдүг камерага дөрт херектен-биле кады олурган. Артём чеже-даа кара-бажыңда болза, Сактыышкын кежээзиниң демдектерин белеткеп алгаш, боду бодунга илеткел чугаалаар деп шиитпирлеп алган. Ооң чанында херектеннер үргүлчү таакпылаар, майтаныр турган. Артём чүнү кылган? Ол олардан оода чаңгыс  шак ишти таакпылавазын база майтанмазын дилээн. Солун чүүл, олар чөпшээрешкен. Артём оларны Сактыышкын кежээзин дыңнаар кылдыр чалаарга, олар ынаваан. А кажан ол Сактыышкын кежээзин эрттирип эгелээрге, олар аңаа хөй-ле айтырыгларны салып эгелээн.

14. COVID-19 деп пандемия үезинде Сактыышкын кежээзин канчаар эрттирип турган?

¹⁴ COVID-19 деп пандемия. Ковид эгелей бээрге, Иегованың бараалгакчылары Хурал залдарынга чыглып шыдавас апарган. Ынчалза-даа Сактыышкын кежээзин эрттиреринге ол чүүл шаптыктаваан d. Интернеттиг чыыштар Сактыышкын кежээзин видеохарылзаа таварыштыр эрттирген. А интернет чок сая-сая улус канчалган? Чамдык чурттарга акылар Сактыышкын кежээзинге дыңнаар илеткелди телевизор, радио таварыштыр дамчыдып турган. Оон аңгыда, салбырлар ол илеткелди 500 ажыг дылга тырттырып бээрге, акылар ону ырак черлерде чурттап чоруур улуска чедирип берген.

15. Сьюнуң чижээнден чүнү өөренип ап болур?

 ¹⁵ Өг-бүлениң удурланыышкыны. Чамдык ха-дуңмага чоок улузу удурланып турар. Сью дээр херээжен кижиниң чижээн көрүптээлиңер. 2021 чылда Сактыышкын кежээзиниң мурнунда Сью ооң-биле Библия өөренип турар угбайга: «Өг-бүлем удурланып турар. Ынчангаш ынаар барып шыдавас-тыр мен» — дээн. Угбавыс аңаа Лука 22:43—44-тү көргүскеш, дыка берге байдалда, Иисус ышкаш, Иеговага мөргүп, Аңаа бүрүнү-биле ынаныр болза эки деп тайылбырлап берген. Дараазында хүн Сью Сактыышкын кежээзиниң демдектерин белеткеп алгаш, jw.org деп сайтыга тускай эртенги мөгейиишкинни көрүп алган. Ол хүн Сью өрээлинден телефон таварыштыр коштунуп алган. Соонда ол угбавыска мынча деп бижээн: «Дүүн сен мени дыка-ла сорук киирдиң! Сактыышкын кежээзинче баар дээш, шупту чүүлдү кылдым. А арткан чүүл дээш Иегова Боду сагыш човаан. Сеткилимден өөрүп четтиргенимни илередип тур мен. Мен дыка аас-кежиктиг мен. Ону дамчыдар сөс безин тыппас-тыр мен!» Чүү деп бодаар силер, Иегова силерге база ындыг байдалда дузалаар бе?

16. Иегова Сактыышкын кежээзинче баар дээн күжениишкиннеривисти йөрээр деп чүге бүзүрээр бис? (Римчилерге 8:31, 32).

¹⁶ Иисустуң өлүмүн төлептиг демдеглээр дээн күжениишкиннеривисти Иегова аажок үнелеп турар. Бурганның биске кылган чүүлү дээш өөрүп четтиргенивисти илередир болзувусса, Ол бисти йөрээр. (Номчуптуңар: Римчилерге 8:31, 32.) Ынчангаш бо чылын Сактыышкын кежээзинче баар дээш база ол тускай үеде Иеговага хөйнү кылыр дээш хөөнненип алыылыңар!