1, 2. а) Иисустуң чуртталгазының болгаш бараалгалының дугайында боданып тургаш, чүнү миннир бис? б) Бо статьяга чүнү сайгарар бис?

 ЧООК киживис чок апаарга, ону дыка сактып, чоктаар бис. Эгезинде ооң сөөлгү хүннериниң дугайында бодап тургаш, ылаңгыя ол өлүмүнүң мурнунда хинчектенип турган болза, аарышкыдан өске чүү-даа миннивес бис. Ынчалза-даа чоорту аарышкывыс чидип, катап өөрүшкүлүг апаар бис. Чоок киживис чугаа-сөзү, ажыл-херээ-биле бисти канчаар деткип, өөредип турганын база ооң-биле кады канчаар хөглеп чораанывысты сактып кээрге, сеткиливиске дыка аянныг боор.

² Ооң-биле дөмей, Иисустуң канчаар хинчектенип өлгенин номчуурувуска, биске дыка аарышкылыг. Сактыышкын кежээзиниң үезинде ооң бачыттан хостаар өргүлүнүң кайы хире үнелиин боданыр дээш, үени аңгылап ап турар бис (1 Кор. 11:24, 25). Иисустуң черге тургаш, чүнү чугаалап, кылып турганын сактып келгеш, дыка өөрүүр бис. Оон ыңай Христостуң амгы үеде чүнү кылып турарын база келир үеде чүнү кылырын боданып тургаш, сорук кирип кээр бис. Бо бүгүнүң база ооң биске ынакшылының дугайында боданыышкын өөрүп четтиргенивисти көргүзеринче оттурар. Ам ону сайгарыптаалыңар.

3. Төлевир дээш өөрүп четтиргенивис илередир кандыг чылдагааннар бар?

³ Иисустуң чуртталгазының болгаш өлүмүнүң дугайында ханы бодангаш, өөрүп четтиргенивис илередиксей бээр бис. Иисус черге бараалгалының үезинде Бурганның Чагыргазының кижилерге эккээр йөрээлдериниң дугайында  чугаалап чораан. Чагырга дугайында алыс шынны аажок үнелээр бис. Өргүл дээш база өөрүп четтирип турар бис, чүге дизе ооң ачызында Иегова биле Иисустуң өңнүктери апарып болур бис. Иисуска бүзүрээр улус мөңге чурттаар база дирлип келген чоок улузун көөр идегелдиг боор (Ин. 5:28, 29; Рим. 6:23). Ол йөрээлдерни боттарывыс чедип шыдавас бис. База Бурган биле Христостуң биске кылган бүгү чүүлүнүң өртээн кажан-даа төлеп шыдавас бис (Рим. 5:8, 20, 21). Ынчалза-даа ол үнелиг белек дээш өөрүп четтиргенивисти көргүзүп болур бис. Канчаар?

4. Иисустуң кылган чүүлү дээш Мария Магдалина өөрүп четтиргенин канчаар илереткен? (Чурукту көрүңер.)

⁴ Мария Магдалинаның чижээн көрүптээлиңер. Ол херээжен кижини чеди бук хинчектеп турган. Ол «мени кым-даа камгалап шыдавас» деп бодап турган чадавас. Кажан Иисус ону буктарның салдарындан хостаптарга, ол кайы хире өөрүп четтирген деп бодаар силер! Ынчангаш ол Христостуң өөреникчизи апаргаш, ооң бараалгалынга дузалаар дээш, үезин, күжүн, акша-төгериин үндүрүп турган (Лк. 8:1—3). Иисустуң көргүскен ачы-буянын Мария дыка үнелээн. Ынчалза-даа келир үеде Иисус аңаа оон-даа улуг алдар-хүндү көргүзер деп, ол бодаваан чадавас. Иисус «аңаа бүзүрээн кижи бүрүзү... мөңге амыдыралдыг болзун дээш» амы-тынын бээр деп турган (Ин. 3:16). Өөрүп четтирген хөөн Марияны Иисуска бердинген болурунче оттурган. Кажан ол чагыга хинчектенип өлүп турда, Мария чанынга ону болгаш өске-даа улусту деткип турган (Ин. 19:25). А Иисус чок апаарга, Мария база өске ийи херээжен кижи ооң мага-бодун чаагай чыттыг үстер-биле чаар дээш, чевег-куйга чедип келген (Мк. 16:1, 2). Иегова Марияны бердинген чоруу дээш шаңнаан. Ол дирлип келген Иисусту көрүп, ооң-биле чугаалашкан. А Иисустуң өөреникчилериниң хөй кезииниң ындыг аргазы чок болган (Ин. 20:11—18).

5. Иегова биле Иисустуң биске кылган бүгү чүүлү дээш өөрүп четтиргенивисти канчаар көргүзүп болур бис?

 ⁵ Иегова биле Иисустуң биске кылган бүгү чүүлү дээш өөрүп четтиргенивисти канчаар көргүзүп болур бис? Чагырганың ажыл-херээнче үевисти, күжүвүстү, акша-төгериивисти үндүрүп тургаш. Чижээ, алыс шын чүдүлгеге ажыглап турар оран-саваны тударынга база хандырарынга дузалажып болур бис.

6. Төлевирни бистиң кижи бүрүзүнге хууда белек деп чүге чугаалап болур?

⁶ Иегова биле Иисустуң биске кайы хире ынаан бодап келгеш, оларга ынакшылывыс оттуп кээр (1 Ин. 4:10, 19). Иисус бистиң кижи бүрүзү дээш өлгенин билип кааш, оларга ынакшылывыс оон-даа күштүг апарып турар. Ону Павел элчин эки билип турган. Ол өөрүп четтиргенин галатчыларга чагаазынга мынчаар бижээн: «Меңээ ынак болгаш, Мен дээш Бодун өргүлге салган Бурганның Оглунга бүзүрээним ачызында амыдырап чоруурум-дур» (Гал. 2:20). Иегова өргүлге даянып, бисти Ооң өңнүү болзун дээш, Бодунче хаара туткан (Ин. 6:44). Иегованың бис дээш дыка улуг өртекти төлээни база бисте бир-ле эки чүүлдү эскерип кааны сагыш-сеткилиңерни чылдып кээр эвес-тир бе? Ооң ужундан Иегова биле Иисуска ынакшылыңар улам күштүг апаар-дыр бе? Бодуңардан айтырыңар: «Ол ынакшыл мени чүнү кылырынче оттуруп турар?»

7. Чурукту көрүңер. Иегова биле Христоска ынакшылывысты канчаар көргүзүп болур бис? (2 Коринфичилерге 5:14, 15; 6:1, 2).

⁷ Бурганга болгаш Христоска ынакшыл бисти өскелерге ынак болурунче оттуруп турар. (Номчуптуңар: 2 Коринфичилерге 5:14, 15; 6:1, 2.) Чагырга дугайында өөрүшкүлүг медээни чүткүлдүг суртаалдап тургаш, улуска ынакшылывысты көргүзер бис. Биске кижиниң язы-сөөгү, ниитилелде туруш-байдалы,  бай-ядыызы хамаанчок. Ужурашкан киживиске-ле суртаалдап турар бис. Шак ынчаар «бүгү улустуң камгалалды алырын база алыс шынны билип аарын күзеп турар» Иегова Бурганның күзел-соруун күүседип чоруур бис (1 Тим. 2:4).

8. Чыышта акы-угбаларга ынакшылывысты канчаар көргүзүп болур бис?

⁸ Бурганга болгаш Христоска ынакшыл бисти чыышта акы-угбаларга ынак болурунче оттуруп турар (1 Ин. 4:21). Бис оларны шын сеткиливистен сонуургап, берге байдалга таваржы бээрге, дузаны дораан чедирип турар бис. Кажан оларның чоок кижизи чок апаарга, оларны оожургадып, аарый бээрге, оларже барып, а ундарап турда, бар шаавыс-биле деткиирин кызып турар бис (2 Кор. 1:3—7; 1 Фес. 5:11, 14). «Чөптүг-шынныг кижиниң мөргүлү аажок күштүг салдарлыг» деп сактып тура, олар дээш мөргүүрүн соксатпайн турар бис (Иак. 5:16).

9. Акы-угбаларга ынакшылывысты оон ыңай канчаар көргүзүп болур бис?

⁹ Акы-угбалар-биле амыр-тайбың болур дээш, бар шаавыс-биле кызар болзувусса, оларга ынакшылывысты көргүзер бис. Иегованың өршээчелин өттүнер дээш кызып чоруур бис. Иегова бачыттарывыс дээш Оглун өргүлге берген болганда, акы-угбаларның биске удур кылган бачыдын чүге өршээп болбас деп? Иисустуң угаадыглыг чугаазында каржы чалчага дөмей болуксавас бис. Дээргизи ооң хөй өрезин өршээп каарга, ол өске чалчаның аңаа эвээш өрезин өршээвээн (Мф. 18:23—35). Чыышта бир кижи-биле билишпейн турар болзуңарза, Сактыышкын кежээзинге чедир ооң-биле эптежип алыр дээш, бирги базымны кылып болур силер бе? (Мф. 5:23, 24). Ынчаар кылгаш, Иегова биле Иисуска күштүг ынакшылыңар көргүзер силер.

10, 11. Хуралдың удуртукчулары Иегова биле Иисуска ынакшылын канчаар көргүзүп болур? (1 Пётр 5:1, 2).

¹⁰ Хуралдың удуртукчулары Иегова биле Иисуска ынакшылын канчаар көргүзүп болур? Иисустуң хойлары дээш сагыш човап тургаш. (Номчуптуңар: 1 Пётр 5:1, 2.) Иисус ону Пётрга дорт чугаалаан. Пётр Христостан үш катап ойталаан соонда, аңаа ынакшылын дыка көргүзүксээн чадавас. Дирлип келген Иисус Пётрдан айтырган: «Иоанның оглу, Симон! Сен Меңээ ынак сен бе?» Пётр Дээргизинге ынакшылын бадыткаар дээш, чүнү-даа кылырынга белен турган чадавас. Иисус аңаа: «Мээң хойларымче сагыш салып көр» — дээн (Ин. 21:15—17). Пётр чуртталгазының төнчүзүнге чедир Дээргизиниң хойлары дээш сагыш човап, Иисуска ынакшылын бадыткаан.

¹¹ Эргим удуртукчулар, Иисустуң Пётрга чугаалаан сөстериниң кайы хире чугулазын билип турарыңарны Сактыышкын кежээзинде канчаар көргүзүп болур силер? Акы-угбаларны үргүлчү деткип, суртаалдаарын соксаткан улуска Иеговаже эглип кээринге дузалаар дээш, хөй күштү үндүрер болзуңарза, Иегова биле Иисуска ынааңарны көргүзер силер (Иез. 34:11, 12). Оон ыңай Библия өөренип турар улуска база Сактыышкын кежээзинче бир дугаар келген улуска кичээнгейни салып болур силер. Олар боттарын хостуг кылдыр миннип, соонда Иисустуң эдерикчилери апаар деп идегээр-дир бис.

12. Өлүмүнүң мурнундагы кежээзинде Иисустуң чугаалаан сөстери биске эрес-дидим болурунга канчаар дузалап турар? (Иоанн 16:32, 33).

¹² Өлүмүнүң мурнундагы кежээзинде Иисус өөреникчилеринге мынча дээн: «Силерни бо делегейде качыгдал манап турар,  ынчалза-даа туттунуңар: Мен бо делегейни тиилээн мен!» (Номчуптуңар: Иоанн 16:32, 33.) Дайзыннарынга эрес-дидим удурланып, Бурганга төнчүзүнге чедир шынчы артарынга Иисуска чүү дузалаан? Ол Иеговага ынанып чораан. Эдерикчилери база ындыг шенелделерге таваржыр деп билгеш, Иисус Адазындан оларны камгалаарын дилээн (Ин. 17:11). Бо чүүл биске эрес-дидим болурунга канчаар дузалаар? Иегова дайзыннарывыстан ушчок күштүг (1 Ин. 4:4). Оон чүнү-даа чажырары болдунмас. Иеговага ынаныр болзувусса, коргуштарывысты ажып эртип, эрес-дидим бооп шыдаар бис.

13. Аримафеядан Иосиф эрес-дидим чоруун канчаар көргүскен?

¹³ Аримафеядан Иосифтиң чижээн көрүптээлиңер. Ол дээди иудей Чөвүлелдиң кежигүнү турган. Ону еврейлер хүндүлээр чораан. Эгезинде Иосифти дидим турган деп чугаалап болбас. Иоанн ооң дугайында «Иисустуң өөреникчизи болур, ынчалза-даа иудей эрге-чагыргадан корткаш, оозун чажырар чораан» деп бижээн (Ин. 19:38). Иосиф Чагырганың дугайында медээни сонуургап турган-даа болза, Иисуска бүзүреп турганын улустан чажырар чораан. Ол ниитилелде туруш-байдалын чидирип алырындан коргуп турган. Ынчалза-даа Иисус чок апаарга, Иосиф Пилатче дидим базып кире бергеш, Иисустуң мага-бодун бээрин дилээн деп Библияда бижээн (Мк. 15:42, 43). Оон бээр ол Иисустуң эдерикчизи мен деп чажырбаан.

14. Улустан коргуп турар болзуңарза, чүнү кылыр херек?

¹⁴ Иосиф ышкаш, улустан коргуп турган силер бе? Школага азы ажылдап турар чериңерге Иегованың Херечизи мен деп чугаалаарындан коргуп турган силер бе? Азы өске улус силерниң дугайыңарда чүү деп бодаар ирги деп дүвүреп, суртаалчы апаарындан азы сугга суктуруп алырындан диттикпейн турар силер бе? Шын алдынарынга шаптыктаар минниишкиннерге черле алыспаңар. Иеговага сеткилиңерден мөргүңер. Ооң күзел-соруун күүседиринге херек эрес-дидим чорукту Оон дилеңер. Ынчан Иегованың мөргүлдериңерге харыылап турарын көрүп кааш, күш кирип, эрес-дидим апаар силер (Иса. 41:10, 13).

15. Иисус-биле ужурашкаш, өөреникчилери өөрээнинден чүнү канчап турган? (Лука 24:52, 53).

¹⁵ Иисус чок апаарга, ооң өөреникчилери аажок ундарап турган. Бодуңарны оларның  орнунга салып көрүңер. Олар чоок ынак өңнүүн чидирип алган. Сактырга, оларның кандыг-даа идегели чок ышкаш болган (Лк. 24:17—21). Оон Иисус көстүп келгеш, библейжи өттүр билген медеглелдерде бодунуң ролюн оларга билип алырынга дузалаан. Оон ыңай ол оларга чугула даалга берген (Лк. 24:26, 27, 45—48). Иисус дээрже үне бээрге, өөреникчилери катап өөрүшкүлүг апарган. Чүге дизе олар Дээргизин дириг деп база чаа даалганы күүседиринге ол дузалаар деп билип турганнар. Олар өөрээнинден Иегованы соксаал чок алгап-мактап эгелээн (номчуптуңар: Лука 24:52, 53; Аж.-ч. 5:42).

16. Иисустуң өөреникчилерин канчаар өттүнүп болур бис?

¹⁶ Иисустуң өөреникчилерин канчаар өттүнүп болур бис? Иеговага чүгле Сактыышкын кежээзинде эвес, а бүдүн чыл ишти өөрүшкүлүг бараалгап болур бис. Ону кылыр дизе, Бурганның Чагыргазын бирги черге салыры чугула. Чижээ, чамдык улус суртаал ажылынга үргүлчү киржип, чыыштарже барып, өг-бүле мөгейиишкинин эрттирер дээш, ажылдаар графигин эде көрүп алган. А өскелери чыыжынга азы суртаалчылар чедишпес черлерге хөй дузалажыр дээш, улустуң херек ышкаш санап турар чүүлдерин сатпас деп шиитпирлеп алган. Ийе, Бурганга үргүлчү бараалгап, Чагырганы бирги черге салыр дизе, туруштуг болуру чугула. Ынчаар кылыр болзувусса, Иегова бисти элбээ-биле йөрээрин аазап турар (У. ч. 10:22; Мф. 6:32, 33).

17. Сактыышкын кежээзиниң үезинде чүнү кылырынче хөөнненип алдыңар? (Чурукту көрүңер.)

¹⁷ Апрель 4-те, вторникте, шупту Сактыышкын кежээзинге чыглып кээр бис. Ол үени четтикпейн манап турар бис! Ынчалза-даа Иисустуң чуртталгазының, өлүмүнүң база Иегова биле ооң биске ынакшылының дугайында чүгле ол хүн эвес, а өске-даа үеде бодаары чугула. Чижээ, «Последняя неделя земной жизни Иисуса» деп таблицада бижээн болуушкуннарны номчуп, ханы боданыр дээш, үени үндүрүп алыңар (Библияның «Чаа делегей» очулгазында Б12 деп капсырылганы көрүңер). Иисустуң чуртталгазын номчуп тургаш, өөрүп четтиргениңерни, ынакшылыңарны, эрес-дидим чорууңарны болгаш өөрүшкүңерни быжыктырар библейжи үзүндүлерже кичээнгейни углаңар. Оон четтиргениңерни ажыл-херээңер-биле канчаар көргүзерин боданыңар. Сактыышкын кежээзиниң дургузунда аңаа кылган шупту чүүлүңерни Иисус аажок үнелеп турар деп чигзинмеңер (Ажыд. 2:19).