1, 2. Иегованың шынчы бараалгакчылары кандыг бергелерге таваржып болур?

 ХЕНЕРТЕН айыыл-халап чуртталгавысты өскертип болур. Чижээ, Луи́с a деп акывыска рактың ховар хевири тодараттынган. Эмчизи ооң каш ай чурттаарын чугаалаан. Мо́ника өөнүң ээзи-биле хөй бараалгап чораан. Бир катап өөнүң ээзи, хуралдың удуртукчузу ону хөй чыл ишти мегелеп келген деп билип каан. Бот угбавыс Оли́вия улуг шуургандан дүрген дезер ужурга таварышкан. Чанып кээрге, бажыңындан чүгле бузундулар арткан болган. Луис, Моника база Оливияның чуртталгазы карак чивеш аразында өскерли берген. Оларның байдалын билип шыдаар-дыр силер бе? Силерниң чуртталгаңарны долузу-биле өскертипкен болуушкун болган бе?

² Иеговага бараалгал шупту кижилерниң таваржып чоруур бергелеринден, аарыг-аржыктардан бисти камгалавас. Бурганның чонун көөр хөңнү чок улустуң талазындан удурланыышкынга азы истеп сүрүүшкүнге таваржып болур бис. Иегова бисти ол бергелерден камгалавас-даа болза, дузалаарын аазап турар (Иса. 41:10). Ооң деткимчезиниң ачызында бис өөрүшкүлүг болуп, эки шиитпирлерни хүлээп ап, дыка берге байдалдарда безин аңаа шынчы артып болур бис. Бо статьяга муңгаранчыг үелерде Иегованың дузалаар дөрт аргазын шинчилээр бис. База ооң дузазын алыр дизе, чүнү кылырын көөр бис.

 ИЕГОВА СИЛЕРНИ КАМГАЛААР

3. Чуртталгавыска айыыл-халап болурга, биске чүү берге апарып болур?

³ Бергедээшкин. Айыыл-халапка таварышкаш, тода боданып шыдавайн, чүнү канчаар аайын тыппайн баар бис. Чүге дизе чүрээвисте шыдаар аргажок аарышкыдан угаан-бодалывыс караңгылай бээр. Чугаалашканывыс Оливия кандыг байдалга келгенин чугаалаан: «Шуурганның хайындан бажың чок арткаш, анаа-ла хоозурап каан мен» — дээн. А Моника ашааның өскерлиишкинин билип каан үеде миннишкиннерин үлешкен: «Мээң-биле ындыг чүве болур деп черле бодаваан мен. Мээң минниишкиннеримни дамчыдары берге. Ол аарышкы бижектепкени-биле дөмей коргунчуг болган. Бүгү күжүм төнүп калган. Улаштыр чурттаарын, канчаар чыгдынып, туттунарын билбейн барган мен». Сеткил-сагыжывыс дүшкүүрлүг байдалга кээрге, Иегова дузалаарын канчаар аазаан?

4. Филипчилерге 4:6, 7-ден алырга, Иегова биске чүнү аазаан?

⁴ Иегова чүнү кылып турар? Бурган биске амыр-тайбыңны аазаанын Библияда бижээн. (Номчуптуңар: Филипчилерге 4:6, 7.) Ол амыр-тайбың — Иегова-биле үнелиг хамаарылгавыстың ачызында тыптып кээр угаан-бодалывыстың, чүрээвистиң оожургалдыг байдалы. Ол тайбың кижилерниң «угаап-билиптер шаандан ажа бээр». Өскээр чугаалаарга, угаанга кирип болур бүгү чүүлден дээре. Сеткилиңер ханызындан мөргээн соонда кайгамчыктыг тайбыңны миннип көрген силер бе? Ол дээрге Иегова Бурганның хайырлаар амыр-тайбыңы-дыр.

5. Бурганның тайбыңы бистиң угаанывысты, чүрээвисти канчаар камгалап турарыл?

⁵ Ол-ла шүлүкте Бурганның амыр-тайбыңы «чүректериңер болгаш угаан-сарыылыңарны... кадагалаар» дээн. «Кадагалаар» деп очулдурган грек сөс — дайынчы термин. Ону хоорай камгалаар шериг кезээнге хамаарыштыр ажыглап турган. Шеригниң камгалалында чурттакчыларның уйгузу дыштыг. Ооң-биле дөмей Бурганның тайбыңы угаанывысты, чүрээвисти камгалап турда, айыыл чок кылдыр миннир бис (Ыд. ыр. 4:9). Байдалывыс дораан өскерилбес-даа болза, ишти-хөңнүвүс тайбың. Чижээ, Самуил медээчиниң авазы Анна шак ындыг амыр-тайбыңныг болган (1 Хаан. 1:16—18). Дүвүрел чокта тода боданыр бис, мерген угаанныг шиитпирлер хүлээри чиик болур.

6. Бурганның тайбыңын миннир дизе, чүнү канчаары чугула? (Чурукту база көрүңер.)

⁶ Чүнү канчаар болзувусса эки? Дүвүреп  турар болзуңарза, камгалалды дилеңер. Канчаар? Бурганның амыр-тайбыңын билип каарынга чедир мөргүңер (Лк. 11:9; 1 Фес. 5:17). Луис каш ай чурттаары артканын билип кааш, өөнүң ишти А́нэ-биле канчаар хөделгенин үлешкен: «Ындыг байдалда эмнээшкинге хамаарыштыр азы өске-даа шиитпир үндүрери дыка берге. Үргүлчү мөргүүр болгаш, девидевээн бис». Луис өөнүң ишти-биле Иеговадан оожургалды база мерген угаанныг алдынарынга дузалаарын дилеп турганнар. Сеткилинден мөргүлүнге Иегованың харыылаанын көргеннер. Нарын байдалда үргүлчү мөргүңер, ынчан Иегова силерниң чүрээңерни, угааныңарны канчаар камгалаарын албан билип каар силер (Рим. 12:12).

ИЕГОВА САГЫШ СЕТКИЛИВИСТИ ООЖУРГАДЫР

7. Шыңгыы шенелде угаан-медереливистиң байдалынга кандыг салдарлыг?

⁷ Бергедээшкин. Улуг шенелделер сеткил-сагыжывысты доюлдуруптарга, бодувусту танывайн барып болур бис. Шуурган үезинде корабль чайганы бээри ышкаш, сеткил-сагыжывысты ыңай-бээр октай бээр. Ашаа чок апаарга, сеткилиниң өскерлип турганын Анэ үлешкен: «Чүрээмниң хоозуралы оожургай бээрге, бодумну кээргеп эгелээн мен. Луис чанымда чок боорга хорадап турган мен». Анэ чааскаанзырап, ашааның харыылап турган ажыл-херээн кылыр ужурга таварышкаш, дыка бергедээн. Чамдыкта ооң сеткил-сагыжы чалгып мөөрээн далай ышкаш турган. Шак ындыг минниишкиннер хөме ап кээрге, Иегова канчаар дузалап турарыл?

8. Исайя 33:6-да Иегованың биске кандыг бүзүредии бар?

⁸ Иегова чүнү кылып турар? Ол биске деткимче болурун, сагыш-сеткилдиң оожургалын чедип алырынга дузалаарын аазап турар. (Номчуптуңар: Исайя 33:6.) Улуг шуурган үезинде корабль ыңай-бээр чайганы бээр. Ону аңдарлы бербезин дээш, тускай стабилизаторлар ажыглаар. Ол дээрге корабльдың адаанда ийи талазында тускай чакпалар. Корабль оларның дузазы-биле дыка чайганмас. А пассажирлери чүден-даа кортпайн барып болур. Солун чүүл болза, шак ындыг тургузуглар корабль эжиндирип чорда эки ажылдаар. Ооң-биле дөмей бис доора уткалыг чаңгыс черге турбас болзувусса, Иегова биске оожургалды чедип алырынга дузалаар.

9. Шинчилел кылыр херекселдер угаан-медереливистиң байдалы эки болурунга канчаар дузалап турарыл? (Чурукту база көрүңер.)

⁹ Чүнү канчаар болзувусса эки? Сагыш  сеткилдиң дүвүрелдерин канчаар оожургадыр? Мөргүүрүн, чыыштарны үспезин, суртаалдаарын уламчылаңар. Ооң мурнунда ышкаш хөй ажыл кылып шыдавас силер. Иегова база ону силерден манавас деп утпаңар. (Деңнеңер: Лк. 21:1—4.) Хууда шинчилелче, боданырынче үени үндүрүңер. Ону кылыры чүге чугула? Иегова организациязы таварыштыр биске дүвүрелдерни ажып эртеринге дузалаар дыка эки статьяларны, видеоларны берген. Херек бодалдарны дилээрде, JW Library^® приложение, «Индекс публикаций Сторожевой башни», «Путеводитель по публикациям Свидетелей Иеговы» дээн ышкаш шинчилел кылыр херекселдерни ажыглаңар. Моника сеткил-сагыжының дүвүрелдери чагыртпайн баарын билип кааш, чижээ, «килең» деп сөске хамаарыштыр шинчилелди кылган. Азы «өскерлиишкин», «шынчы чорук» деп сөстерни дилээн. Оон байдалы экижий бээринге чедир номчуттунарынче шымны бээр турган. Угбавыс мынчаар үлешкен: «Шупту чүве дилээшкин одуруунче херек сөстү сири-кавы парлаптарымдан эгелээр. А сөөлүнде Иегова мени чылыг-чымчак куспактап каар турган. Номчуттунуп тургаш, Иегова мени, мээң сеткил-сагыжымны дыка эки билирин, дузалаарын билип каар мен». Иегованың деткимчези шуурган оожургаарынга чедир, сагыш сеткилдиң тайбыңын тударынга дузалаар (Ыд. ыр. 118:143, 144).

ИЕГОВА СИЛЕРНИ ДЕТКИИР

10. Берге байдалда кандыг минниишкинниг болур бис?

¹⁰ Бергедээшкин. Берге байдалда мага-бот, сагыш-сеткил талазы-биле хоозуралды миннип болур бис. Бис кемдээшкин алган спортчуга дөмей апаар бис. Ооң мурнунда дыка дүрген маңнаар турган кижи ам аская берген. Биске белен турган ажылга бергедежир апарган чадавас бис. Азы ынак турган ажылывыска бодувусту албадаар апарган бис. Шаанда шагда Илия медээчи ышкаш, туруп шыдавас, чүгле удуурунга өй апарып болур бис. (3 Хаан. 19:5—7). Күш чок апарган үелеривисте Иегова биске канчаар дузалаарыл?

11. Ырлар 93:18-тен алырга, Иегованың дузазы чүден көскү?

¹¹ Иегова чүнү кылып турар? Ол бисти деткиирин аазаан. (Номчуптуңар: Ырлар 93:18.) Кемдээшкин алган спортчуну сактып кээлиңер. Аңаа өске кижиниң  дузазы чокта кылаштаары берге. Иеговага улаштыр идепкейлиг бараалгаарынга биске деткимче херек. Ындыг үелерде ынакшылдыг Адавыс бисти: «Мен сээң Бурганың Иегова-дыр мен, сени оң холуңдан тудуп алгаш: „Кортпа, мен сеңээ дузалаар мен“» — деп бүзүредип турар (Иса. 41:13, Чаа делегей). Давид хаан ону бодунга көрген. Ооң чуртталгазынга берге үеде дайзыннарга истедип сүрдүрүп чорааш, ол Иеговага мынча дээн: «Сен... мени [оң] холуң-биле туткан сен» (Ыд. ыр. 17:36). Ылавылаар болза, Иегова канчаар деткиирил?

12. Кошкай бергенивисте Иегова кымны таварыштыр дузалап болурул?

¹² Иегова болганчок биске өске кижилер таварыштыр дузалаар. Чижээ, Давид бодун кошкак кылдыр миннип турда, эжи Ионафан келгеш эки сөстер-биле быжыктырган (1 Хаан. 23:16, 17). А Илияга Иегова Элисейни дузалакчы кылдыр берген (3 Хаан. 19:16, 21; 4 Хаан. 2:2). Амгы үеде Иегова бисти чоок улузувус, эш-өөрүвүс, удуртукчулар таварыштыр деткип болур. Дыка муңгараан үеде өске улустан оспаксыраар сундулуг бис. Чааскаан артыксаар күзелде багай чүве чок. Ынчалза-даа бистиң шуптувуска Иеговадан дуза херек. Ону канчаар алырыл?

13. Иегова биске дузалаар кылдыр чүнү кылыр болзувусса эки? (Чурукту база көрүңер.)

¹³ Чүнү канчаар болзувусса эки? Чааскаанзыраар күзелге удурланыңар. Өске улустан дезип, ояр болзувусса, чүгле бодувуска база бодувустуң бергелеривиске алзыптар сундулуг бис. Ынчаар алдынары багай шиитпирлерге чедирер (У. ч. 18:1). Бистиң шуптувуска, ылаңгыя кажыыдалга таварышкан болзувусса, үе-үе болгаш, чааскаан турар үе херек. А бир эвес бодувусче кымны-даа чоокшулатпас болзувусса, Иегованың дузазын хүлээп албайн баар бис. Ынчангаш берге-даа болза, өг-бүлеңерниң, эш-өөрүңерниң, удуртукчуларның деткимчезинден ойталаваңар. Иегова оларны таварыштыр дуза кадарын утпаңар (У. ч. 17:17; Иса. 32:1, 2).

ИЕГОВА СИЛЕРНИ АРГАЛАП ООЖУРГАДЫР

14. Кандыг байдалдарда биске коргунчуг апарып болур?

¹⁴ Бергедээшкин. Биске чамдыкта дыка коргунчуг апаар. Библияда берге байдалдарда азы дайзыннарынга истедип сүрдүрүп тургаш коргуп, сирилеп чораан Бурганның шынчы бараалгакчыларының сөстерин  бижээн (Ыд. ыр. 17:5; 54:2, 6). Бис база школага, ажылга, өг-бүлевиске азы чазактың талазындан дайынзырак хамаарылганы көрүп болур бис. Азы өлүмге чедирер аарыглыг апарып болур бис. Ол ышкаш үелерде бодувусту чүнү-даа канчап шыдавас чаш төл ышкаш миннип болур бис. Ындыг байдалдарда Иегова чүнү кылырыл?

15. Ырлар 93:19-тан алырга, Иегова биске чүнү аазап турар?

¹⁵ Иегова чүнү кылып турар? Ол бисти аргалап оожургадып турар. (Номчуптуңар: Ырлар 93:19.) Диңмирээшкинден корткаш удуп чадап турар бичии уругну бодап кээлиңер. Ачазы уруун холунга ап алгаш, удуй бээрге чедир чайгап олурар. Соңга өттүр диңмиреп турза-даа, ачазының куспаанда бичии уругга чылыг-чымчак, коргунчуг эвес боор. Дыка коргунчуг апаар үелерде дээрде Ачавыс бисти холунга ап алгаш, байдалывыс экижий бээрге чедир салбазын күзээр бис. Иегованың эрге-чассыг куспаанга кирер дизе, чүнү канчаар болза эки?

16. Иегованың аргалалын миннир дээш, чүнү кылыр бис? (Чурукту база көрүңер.)

¹⁶ Чүнү канчаар болзувусса эки? Иегова-биле кады үени эрттириңер. Аңаа үргүлчү мөргүп, ооң Сөзүн номчуңар (Ыд. ыр. 76:2, 13—15). Ынчаар чаңчыга бергеш, стресстиг байдалда дузаны бир дугаарында дээрде Адаңардан дилээр силер. Иеговага шупту дүвүрелдериңерни, коргуушкуннарыңарны чугаалап бериңер. Ооң соонда Библияның арыннарындан ол чүнү чугаалап турарын дыңнаңар. Ынчан Иегованың аргалалын, оожургалын билип каар силер (Ыд. ыр. 118:28). Коргунчуг апаарга, оожургап алырынга дузалаар Библиядан ынак үзүндүлериңер бар апаар чадавас. Чамдык улуска Иов, Ырлар, Угаадыглыг чугаалар номнарында, Матфей 6-гы эгеде Иисустуң сөстери оожургалды берип турар. Мөргүп, Библияны номчууруңарга силерни аргалаар, оожургадыр арганы Иеговага ажыдар силер.

17. Чүү чүвеге чигзинмейн барып болур бис?

¹⁷ Чуртталгавыстың эң-не муңгаранчыг үелеринде безин Иегова чанывыска турар (Ыд. ыр. 22:4; 93:14). Ол бисти камгалап, сагыш-сеткилдиң оожургалын чедип аарынга дузалап турар. Исайя 26:3-те Иегованың дугайында мынча дээн: «Чайгылыш чок туруштуг кижиге чаагай чорукту чорудуп бээр сен, ол кижи Сеңээ идегеп турган болгай». Ынчангаш Иеговага бүзүреңер. Кажан ол дузалаар дээш холун сунарга ойталаваңар. Ооң-биле эң-не берге үелерни шыдажыптар силер.