1. Иегова сагыжыңарга канчаар кирер-дир?

 ИЕГОВА сагыжыңарга канчаар кирер-дир? Мөргүүрде ону канчаар көөр силер? Бурган көзүлбес-даа болза, ооң дугайында Библиядан хөйнү билип ап турар бис. Чижээ, ында Иегованы — хүн, дозуг-камгалал, өрттендир чиир от дээн (Ыд. ыр. 83:12; Евр. 12:29). Иезекиилдиң көстүүшкүнүнде Бурган үнелиг даштарның чырыы үнген челээш дег чайынналган сапфир дүжүлгеде олурган (Иез. 1:26—28). Иегованы ынчаар көргүскени бисти сүрээдедип, хүндүткелдиг коргуушкунну оттуруп болур.

2. Чамдык улуска Иегова-биле чоок хамаарылга тудары чүге берге?

² Иегованы көрүп шыдавас болгаш, ооң ынакшылынга бүзүрээри биске берге чадавас. Өг-бүлезинге безин ынакшылды көрбээн улус, Иегованың ынакшылынга төлеп чок бис деп санаарлар. Бурган ындыг минниишкинни, аңаа бүзүрээри биске берге боорун билир. Ынчалза-даа Иегова бис-биле чоок, чылыг-чымчак хамаарылгалыг болурун күзээр. Ынчангаш энерелдиин, эргелиг ынакшылын ол Библия таварыштыр көргүзүп турар.

3. Иегованың ынакшылының дугайында чүге тодаргай билип алыр болза эки?

³ Ынакшыл деп сөс Иегованы эң-не дээре кылдыр тайылбырлаан (1 Ин. 4:8). Ооң бүгү ажыл-херектеринден күштүг ынакшыл көскү. Аңаа тоомча чок улуска безин ынакшылды ол көргүзүп турар (Мф. 5:44, 45). Бо статьяга Иегованың дугайында база ооң ынакшылын тодаргай чугаалажыр бис. Бурганывысты эки билип алган тудум, аңаа ынакшылывыс дам күштелир.

 ИЕГОВА БИСКЕ ДЫКА ЫНАК

4. Иегованың эрге-чассыг ынакшылы силерге кандыг минниишкиннер оттурар-дыр? (Чурукту база көрүңер.)

⁴ «Иегова... эргелиг ынакшыл[дыг]» (Иак. 5:11). Бурган бодун Библияда эргелиг, сагыш човаңгыр авага дөмейлээн (Иса. 66:12, 13). Ава кижи өпеязын куспактап алгаш, оожум чымчак үн-биле чассыдар. А ыглай бээрге, дораан ооң чанында турар. Дүвүренчиг үелерде бис база Иегованың ынакшылынга ынанып болур бис. Ыр күүседикчизи: «Ишти-хөңнүмде дүвүрел көвүдээн тудум, Сээң аргалалың сеткилимни сергедип чор» деп бижээн (Ыд. ыр. 93:19).

5. Иегованың бердинген ынакшылын чүү дээш үнелээр силер?

⁵ Иегова бердинген ынакшылдыг, чазыптарывыска-даа ол бистен хая көрүнмес (Ыд. ыр. 102:8). Израильчилер улай-улай Иегованы хомудадып келген. Олар буруузун миннип эглип кээрге, Иегова ынакшылы соой бербээнинге бүзүредип турган. Ол сеткил-сагыжын мынчаар илереткен: «Сен Меңээ улуг үнелиг болгаш эргим болганыңда, сеңээ Мен ынак [мен]» (Иса. 43:4, 5). Иегованың биске ынакшылы өскерилбес, үе эртерге-даа соой бербес. Шыңгыы частырыглар безин кылырывыска Иегова бистен ойталавас. Буруувус миннип, эглип кээр болзувусса, ооң ынакшылын, элбек өршээлин көөр бис (Иса. 55:7). Иегованың өршээли катап тургустунуушкун бээрин Библияда чугаалаан (Аж.-ч. 3:19).

6. Захария 2:8-тен Иегованың дугайында чүнү билип алган бис?

⁶ Номчуптуңар: Захария 2:8. Иегова биске ынак болгаш, сеткил-хөңнүвүске кичээнгейлиг, болчурунга белен. Баксырай бээривиске, аңаа база аарышкылыг. Ынчангаш: «Сен мени карак огу дег кадагала» — деп мөргүп болур бис (Ыд. ыр. 16:8). Ол биске албан харыылаар. Кижи караан дыка камнаар, хумагалаар болгай. Иегова бисти карак огунга дөмейлээнинден алырга: «Силерге хора чедирген кижи-ле мени балыглап турар» — дээн.

7. Иегованың ынакшылынга бүзүрелди быжыглаары чүге чугула?

⁷ Иегова бисти ооң ынакшылынга быжыг бүзүрелдиг болзун деп күзээр. Ындыг-даа бол эрткен чуртталгавыс шаптыктап болурун ол билир. Амгы үеде шенелделеривис ооң ынакшылынга чигзинигни тывылдырып болур. Ындыг бодалдарга канчаар  алыспазыл? Иегованың Иисуска, чагдырган христианнарга база бистиң кижи бүрүзүнге ынакшылының бадыткалдарын көрээлиңер.

ИЕГОВАНЫҢ ЫНАКШЫЛЫНЫҢ БАДЫТКАЛДАРЫ

8. Иисус Адазының ынакшылынга чүге чигзинмээн?

⁸ Иегова биле Иисус кады сан-түң чок чылдарны эрттирген. Олар октаргайда чүнүң-биле-даа деңнешпес дыка чоок хамаарылганы сайзырадып алганнар. Иегова Иисуска ынакшылын ажыы-биле чугаалаар турган. Бир чижекти Матфей 17:5-те бижээн. Иегова чүгле: «Ол Мээң сеткилимге кирер-дир» деп болур турган. Ынчалза-даа Иисуска ооң ынакшылының күштүүн кижи бүрүзү билзин дээш: «Бо дээрге Мээң ханы ынак Оглум-дур» — дээн. Иегова Иисустуң ажыл-херээнге чоргаарланыр, ол чөгендирбес деп билир турган (Эф. 1:7). А Иисус Адазы аңаа ынак, ол маргыш чок күштүг деп хензиг-даа чигзинмээн. Ол ынакшыл ооң чуртталгазын долдуруп чораан болгаш, Иисус ону бо-ла чугаалаар чораан (Ин. 3:35; 10:17; 17:24).

9. Чагдырган христианнарга Иегованың ынакшылының ханызын кандыг сөстер илереткен? Тайылбырлаптыңар (Римчилерге 5:5).

⁹ Иегова чагдырган христианнарга база ынакшылын чажырбас. (Номчуптуңар: Римчилерге 5:5.) «Ынакшылын чүректеривисче сиңниктирген» деп сөстерни бир справочникте: оларның чүректеринче «ынакшылдың улуг чалгыглары бадып келген» деп тайылбырлаан. Иегованың оларга ада ынакшылының дыка-ла улуг бадыткалы-дыр! Чагдырган христианнар Бурган оларга ынак деп билир (Иуда 1). Оларның ниити сеткилин Иоанн элчин илереткен: «Адавыстың биске кайы хире ханы ынакшаанын бодап көрүңер даан. Ол биске Ооң ажы-төлү кылдыр аданырын чөпшээрээн-дир» (1 Ин. 3:1). Иегова чүгле оларга ынак бе? Чок, шуптувуска ынак деп бадыткалдар бисте бар.

10. Иегованың силерге ынакшылының бадыткалын чүү илередип болур?

¹⁰ Бурганның ынакшылының эң-не эки бадыткалы — төлевир. Иеговадан оон артык чүнү манаар бис? (Ин. 3:16; Рим. 5:8). Ол шупту кижилер дээш, эргим ынак Оглунуң амы-тынын берген. Иегова ону бачыттарывыс өршээттинзин база бисти ооң-биле найыралдажыр аргалыг болзун дээш кылган (1 Ин. 4:10). Иегова биле Иисустуң кандыг төлевирни кылганын бодаан тудум, бистиң кижи бүрүзүнге оларның кайы хире ынаан оон-даа эки билип эгелээр бис (Гал. 2:20). Төлевирни бергени анаа-ла юридиктиг негелде эвес. Ол дээрге биске дыка ынак Адавыстың белээ. Иегова ынакшылын бодунда эң үнелиг чүүлүн бергени-биле бадыткаан. Ынак Оглун бис дээш хилинчектенип өлүрүн чөпшээрээн.

11. Иеремия 31:3-тен чүнү билип алган бис?

¹¹ Иегова ишти-хөңнүн бодунга шыгжавайн, ажыдып чугаалаарын көрдүвүс. (Номчуптуңар: Иеремия 31:3.) Иегова биске ынак болгаш, бодунче хаара туткан. (Деңнеңер: Ыдыктыг хоойлуну катаптааны 7:7, 8.) Кым-даа, чүү-даа бисти ооң ынакшылындан чарып шыдавас (Рим. 8:38, 39). Ооң ынакшылы силерге кандыг минниишкиннер оттурар-дыр? 22-ги Ырыны номчааш, Давидтиң чүрээ Иегованың ынакшылынга, сагыш човаашкынынга канчаар харыылаанын эскерип көрүңер. Силер база Иегова-биле чоок, бүзүрелдиг найыралды сайзырадып ап болур силер.

ИЕГОВАНЫҢ ЫНАКШЫЛЫ СИЛЕРГЕ КАНДЫГ МИННИИШКИННЕР ОТТУРАР-ДЫР?

12. 22-ги Ырыда чүү дугайында чугаа чоруп турар?

¹² Номчуптуңар: Ырлар 22:1—6. 22-ги Ырының одуруг бүрүзү Иегованың ынакшылынга,  эргелиг сагыш човаашкынынга Давидтиң бүзүрелин илереткен. Ыр күүседикчизи Иегова-биле найыралының күштүүн чугаалап, ону Кадарчым дээн. Давид Бурганынга бүзүрээр болгаш, ооң айыткан оруун дыңнангыр эдерип чораан. Ынчангаш ол айыыл чок минниишкинниг турган. Иегованың ынакшылы бүгү чуртталгазында кады боорун Давид билген. Ол чүге аңаа чигзинмээнил?

13. Иегова ол дээш кажан-даа сагыш човаарын соксатпас деп, Давид чүге быжыг бүзүрелдиг турган?

¹³ «Мээң хереглээн бүгү чүвем бар». Хүн бүрүде хереглээн бүгү чүүлдү Иегова берип, ооң сагыш човаашкынын Давид көрүп чораан. Иегова мээң өңнүүм, чуртталгам-биле ону өөртүп чоруур мен деп, Давид билип турган. Ынчангаш чүү-даа болур болза, Бурганы ону кагбас деп бүзүрелин ышкынмаан. Иегованың эргелиг ынакшылынга бүзүрели кандыг-даа коргуштан күштүг болгаш, ол аас-кежиктиг, сеткил ханып чурттап чораан (Ыд. ыр. 15:11).

14. Иегованың эрге-чассыг ынакшылы чүден көстүп турар?

¹⁴ Дыка улуг бергелерге таваржырывыска Иегова чанывыстан ыравас. Вефилде 20 чыл ажыр бараалгап чоруур Клэр a деп угбавыстың чоок улузунга бергелер улай-улай таваржырга, ол чүнү канчаарын аайын тыппайн барган. Ачазы инсульттай берген, кыс дуңмазы чыыштан үндүрткен, өг-бүлези бизнезин база бажыңын чидирген. Иегова Клерниң өг-бүлези дээш канчаар сагыш човааныл? Ол мынчаар үлешкен: «Чоок улузумнуң хүн бүрүде херек чүүлү турган. Иегова кезээде херек чүүлден артыр бээр турган. Ол үелерде Бурган бисти кайы хире камнап, деткээнин бо-ла бодап кээр мен. Ол  сактыышкыннарымны дыка үнелээр мен, олар мени күш киирер. Чаа бергелерге таварышкаш, дүжүп бербейн, Иеговага улаштыр өөрүшкүлүг бараалгап чор мен».

15. «Сеткилимге чаа күштү хайырлаар» дээни-биле Давид кандыг бодалды чугаалаксааныл? (Чурукту база көрүңер.)

¹⁵ «Сеткилимге чаа күштү хайырлаар». Бергелер чүдүрлүп кээрге, Давид бодун күш чок кылдыр миннир турган (Ыд. ыр. 17:5—7). Ынчан Иегова аңаа күш кирип алырынга дузалажып, харыксыраан эжин «хөлбең ногаан шынааларга одарладыр», суг чанынга дыштандырар чораан. Ооң ачызында Давид күш кирип, улаштыр бараалгап шыдаан (Ыд. ыр. 17:29—33).

16. Иегованың ынакшылы силерни канчаар күш киирген?

¹⁶ Чуртталгавыска бисти чуура базып кээр байдалдар турар. Ынчалза-даа Иегованың ачызында шыдажыптар бис (Ыы. 3:22; Кол. 1:11). Ре́йчелдиң чижээн көрээлиңер. COVID-19 деп пандемия үезинде өөнүң ээзи Бургандан хая көрүнгеш, Рейчелди кааптарга, ооң сеткил-хөңнү хоозурап калган. Иегова уруун канчаар деткээнил? Ол мынчаар үлешкен: «Иегова ол үеде ынакшылын меңээ тода көргүскен. Чанымга үргүлчү эштерим турган. Олар аъш-чемимни кылып, чылыг-чымчак сөстүг, библейжи бодалдарны бижип турган. Оларның хүлүмзүрүү мени чылыдып, Иегова меңээ дыка ынак деп сагындырып турганнар. Ындыг улуг, найыралдыг өг-бүлени бергени дээш, Бурганга үргүлчү өөрүп четтирер мен».

17. Давид чүге: «Кортпас мен» дээнил?

¹⁷ «Кортпас мен — Сен мээң-биле болгай сен». Давидтиң дайзыннары хөй болгаш, ооң амы-тыны хыл кырынга турган. Ынчалза-даа Иегованың ынакшылы аңаа айыыл чок минниишкинни берген. Байдал бүрүзүнде Иегова чанында деп билири Давидти коргуушкундан эмнеп турган, ынчангаш ол мынчаар ырлаан: «Ол мени... коргар бүгү чүүлдеримден камгалап кагды» (Ыд. ыр. 33:5). Иегованың күштүг ынакшылының ачызында ол коргуштарын тиилеп алган.

18. Коргушка алыспазынга Иегованың ынакшылынга бүзүрел дузалаарын чижектерге чугаалаңар.

¹⁸ Чуртталгада улуг бергелерге таваржып болур бис. Ынчалза-даа Иегова биске ынак деп билири бисти камгалаар. Канчаар? Эгелекчи Сью́зиниң төөгүзүн көрээлиңер. Оглу амы-тынынга четтиниптерге, ол ашаа-биле чүнү миннип турганын чугаалаан: «Ындыг берге байдалдан үнүп алыры дыка берге. Кижи бодун чүгле човалаңныг дүвү чок тамыже аңдарлып бар чыдарын миннир. Ынчалза-даа Иегованың ынакшылы бисти бүргей ап кээрге, бодувусту ооң холунда кылдыр миннип турдувус». Ашааның өскерлиишкинин көрген Рейчел мынча дээн: «Бир дүне меңээ дыка берге болган, сеткилим аарып, ыстап, дыка коргунчуг апарган. Ынчан ыыткыр үн-биле ыглап, Иеговага мөргүй бээримге, хенертен чүрээмни кайгамчыктыг  оожургал дола берген. Авазының чылыг-чымчак хойнунда чаш төл ышкаш анаа удуп каан мен. Ону кажан-даа утпас мен». Та́сос дээр удуртукчу шеригден ойталааш, кара бажыңга дөрт чыл олурган. Иегованың ынакшылын болгаш сагыш човаашкынын чүден көргенин ол сактып чугаалаан: «Мээң бүгү херек чүүлүм четчир, безин артыкшылдыг турганы Иеговага бүзүрелимни быжыктырган. Байдал ундаргай-даа болза, Бурганның ыдыктыг сүлдезиниң ачызында өөрүшкүмнү чидирбээн мен. Иеговага чоок болган тудум, ооң шупту белектери кижиге оон-даа тода апаарын катап база көрдүм. Ынчангаш кара-бажыңга-ла долу эгелекчилей берген мен».

ЭРГЕЛИГ ЫНАКШЫЛДЫГ БУРГАНЫҢАРГА ЧООКШУЛАҢАР

19. а) Бурганның биске ынакшылынга бүзүрел мөргүлдеривиске кандыг салдарлыг? б) Иегованың ынакшылын бижээн сөстерниң кайызы сеткилиңерге эң чоок-тур? ( «Иеговадан ынакшылдыг сөстер» деп көзенек.)

¹⁹ Ынакшылдыг Бурганывыс Иегова кезээде бис-биле кады деп сайгарган таварылгалар бадыткап турар! (2 Кор. 13:11). Ол бисти бердинген ынакшылы-биле бүргеп, кижи бүрүзүн сеткилинден сонуургап чоруур (Ыд. ыр. 31:10). Бурган ынакшылын канчаар көргүзүп турарын эки боданыр болзувусса, ол биске көскү болгаш чоок апаар. Дидими-биле мөргүп, ооң ынакшылы биске кайы хире херегин чугаалап болур бис. Сагыш сеткиливистиң дүвүрелдерин үлежип, ол бисти билир база албан дузалажыр деп чигзинмес бис (Ыд. ыр. 144:18, 19).

20. Иеговага чоокшулаары биске чүге өөрүнчүг?

²⁰ Кижи соок хүнде одаг чанынга чыннып туруксаары ышкаш, Иегованың ынакшылынга чоок болуксаар бис. Ооң ынакшылы — эрге-чассыг, күштүг. Иегованың эргим ажы-төлү болуру дыка-ла улуг аас-кежик-тир! Ыр күүседикчизи ышкаш, ооң ынакшылынга харыы кылдыр: «[Иеговага] ынак-тыр мен» деп ыыткыр чугаалаалыңар (Ыд. ыр. 114:1).