1. Биске чүге коргунчуг апаар?

 КОРГУНЧУГ апаар үелер шуптувуска турар. Библияның ачызында кижи төрелгетенниң келир үези дээш база өлген улустан, аза-четкерден кортпас апарган бис. Ынчалза-даа дайыннар, кем-херек үүлгедиглери, аарыглар дээн ышкаш «коргунчуг болуушкуннар» үезинде чурттап турар бис (Лк. 21:11). Чазактың талазындан истеп сүрүүшкүннерден азы чоок улузувус удурланы бээринден сестип болур бис. А чамдык улус амгы азы келир үеде шенелделерни ажып эртип шыдавайн баарындан муңгарап турар.

2. Давид Геф хоорайга кандыг байдалга келген?

² Давидке база коргунчуг үелер турган. Чижээ, ол Саул хаандан Филистияда Геф хоорайже дезе берген. Удатпаанда Гефтиң хааны Анхуска, Давид дээрге израильчилерниң ырлап алдаржыткан коргунчуг дайынчызы деп чугаа четкен. Ында Давид «түмен-түмен» филистимчилерни өлүрүп каан дээн. Анхус ат кылыр боор дээш, ол дыка корткан (1 Хаан. 21:10—12). Давидке кортпазынга чүү дузалаан?

3. Коргуушкуннарындан адырлып алырынга, Давидке чүү дузалаан? (Ырлар 55:2—4, 12).

³ 55 дугаар Ырда Давид Гефке минниишкиннерин бижээн. Ол ырыга коргуушкуннарының чылдагаанын база ону канчаар ажып эрткенин тайылбырлаан. (Номчуптуңар: Ырлар 55:2—4, 12.) Коргунчуг апарган үелерде Давид Иеговага анаа эвес идегеп чораан. Угааны четпес бооп мегеленир тускай арганы ажыглаарынга Давидке Бурган дузалаан! Анхус ону айыыл чок деп көргеш, ойладыптарын  дужааган. Ооң ачызында Давид дезе берген (1 Хаан. 21:13—22:1).

4. Иеговага бүзүреливисти канчаар быжыглап болур бис? Чижекти чугаалаңар.

⁴ Коргунчуг апарган үеде Иеговага бүзүреливис биске дузалаар. Бурганга оон-даа артык канчаар идегеп өөренирил? Чижектен көрээлиңер. Улуг аарыглыг болганыңарны билип кааш, корга берген дижик силер. Ынчалза-даа силерни дыка эки эмчи эмнээр болган. Ол эмчиниң силер ышкаш аарыглыг улусту эмнээн дуржулгазы улуг. Оон аңгыда, эмчиңерниң кичээнгейлиин, силерни шыдамыккай дыңнаарын, сагыш човангырын көрүп каан силер. Ол чедиишкинниг эмнээшкинни сүмелээрге, эмчиңерге бүзүреп, дүвүрээн херээ чок деп боданган силер. Шак ынчалдыр Иеговага долузу-биле бүзүрээрин күзээр бис. Ол таварылгада ышкаш Иегованың чүнү кылганын, амгы болгаш келир үеде чүнү кылырын боданыр ужурлуг бис. Давид база ону кылган. 55 дугаар Ырының сөстерин көргеш, бис база Иеговага бүзүрелди канчаар быжыктырарын, канчаар коргуушкуннарны ажып эртип болурун боданып көрээлиңер.

ИЕГОВА ЧҮНҮ КЫЛГАН?

5. Коргуушкуннарындан адырлып алыр дээш, Давид чүнүң дугайында боданып турган? (Ырлар 55:13, 14).

⁵ Амы-тыны айыылга кээрге, Давид Иегованың кылган чүүлүнче кичээнгейни салган. (Номчуптуңар: Ырлар 55:13, 14.) Давид Бурганның дугайында боданып, ооң чаяалгаларын хайгаараар чаңчылдыг чораан. Чаяалгалар Иегованың улуг күжүн база кижилерге ынакшылын сагындырар турган (Ыд. ыр. 64:7—10). Шупту бараалгакчыларынга Бурганның кайы хире ачы-буянныын база ол боданган (Ыд. ыр. 30:20; 36:25, 26). А ооң бодунга Иегованың сагыш човаашкынын Давид дыка үнелээр чораан. Бурган ону чажындан-на камгалап, деткип келген (Ыд. ыр. 21:10, 11). Ынчаар боданып тургаш, Давидтиң Иеговага бүзүрелин быжыктырып алганы чигзиниг чок!

6. Коргунчуг апарган үеде Иеговага ынанырынга чүү дузалаарыл?

⁶ Коргунчуг апарган үеде Иегованың  чүнү кылганын боданыңар. Ооң чаяалгаларын чижээ, куштарны, чечектерни хайгаарап, боданып болур. Бурганның овур-хевири-биле база аңаа чүдүүр кылдыр чаяаттынмаан-даа болза, Иегова оларны кагбас. А бисти Бурган оон-даа үнелээр болгай (Мф. 6:25—32). Ынчаар боданыры Иеговага бүзүреливисти быжыктырар. Ол бодунуң чонун канчаар деткиирин база бодап көрүңер. Библейжи үелерде азы бистиң үевисте эр-даа, кыс-даа улустуң чуртталгазы-биле таныжып көрүңер a. Оон аңгыда, Иегова хууда силерге чүнү кылганын сактып чоруңар. Ол силерни канчаар хаара туткан? (Ин. 6:44). Мөргүлдериңерге канчаар харыылап турар? (1 Ин. 5:14). Иисустуң өргүлү чуртталгаңарның утказы болуп, өөрүшкүнү эккеп турар бе? (Эф. 1:7; Евр. 4:14—16).

7. Даниил медээчиниң таварылгазы Ванессага коргуушкуннарын ажып эртеринге канчаар дузалаан?

⁷ Гаитиден Ванесса b угбавыс дыка нарын байдалга таварышкан. Ооң бажыңындан ырак эвесте чурттап турар эр кижи хүннүң-не долгап, мөзүзү куду чүүлдер кылыылы деп смстер чорудуп турган. Ванесса ооң-биле кандыг-даа хамаарылга тутпазын тода көргүзерге-даа, ол эр кижиниң долгаары дам барып, каржыланып, безин кыжанып эгелээн. Ванесса дыка корткан. Ол коргуштарындан адырлып, камгаланып алыр дээш, базымнар кылган. А хуралдың удуртукчузу шагдаа черинге чаргылдажырынга дузалаан. Эрткен үеде Иегова шынчы улузунга канчаар болчуп чораанын боданганын угбавыс үлешкен: «Бир дугаарында Даниил медээчини сактып келген мен. Кандыг-даа буруу чок кижини аш арзылаңнарлыг оңгарже киир октапкан. Ындыг байдалда безин Бурган бараалгакчызынга дузалашкан. Ынчангаш Иеговадан бо херекти холунга ап аар кылдыр дилээн мен. Ооң соонда кортпайн барган мен» (Дан. 6:12—22).

ИЕГОВА АМ ЧҮНҮ КЫЛЫП ТУРАР?

8. Давид Бурганның дузазынга чүге чигзинмес турган? (Ырлар 55:9).

⁸ Гефке өлүмнүг айыыл диргелип кээрге, Давид коргуп сирилевээн. Ооң орнунга Иегова ол үеде ону канчаар камгалаарын эскерерин кыскан. Иегова камгалап, удуртуп база ооң ишти-хөңнүн көрүп турар деп, ол билип турган. (Номчуптуңар: Ырлар 55:9.) Давид оон аңгыда, Ионафан болгаш дээди бараалгакчы Ахимелех дээн ышкаш ону деткиир, сагыш човаңгыр, шынчы эштерлиг турган (1 Хаан. 20:41, 42; 21:6, 8, 9). Саул хаан Давидти өлүрерин кызарга-даа, ол алыспаан. Ол бүгүнү көргеш, Давид чүнү эртип турарын база ооң сагыш сеткилиниң саймааралын Иегова кончуг эки билир деп шынзыккан.

9. Кижи бүрүзүнүң дугайында Иегова чүнү билир?

⁹ Шенелделер үезинде Иегова шупту чүүлче, чүнү миннип турарыңче база кичээнгейни салырын утпа. Чижээ, Египетке израильчилерниң кайы хире каржы аажыладып, хилинчектенип турганын Бурган көрген (Хост. 3:7). Давид бодунуң муңгаралын болгаш дүвүрелдерин Иегова билир деп канчап-даа чигзинмээн (Ыд. ыр. 30:8). А чону бодунуң мелегей чоруундан безин айыылга таваржырга, Бурган «оларның бүгү качыгдалын үлежип келген» (Иса. 63:9). Коргунчуг байдалда Иегова силерниң ишти-хөңнүңерни билир, коргуушкундан  адырып алырынга дузалаарынга белен.

10. Иегова бисти кагбас, кандыг-даа шенелделерни ажып эртеринге дузалаар деп чүге чигзиниг чок бис?

¹⁰ Шыңгыы шенелделер үезинде коргуштуң хайындан Иегованың сагыш човаашкынын эскербейн барып болур бис. Ынчан чүнү канчаар бис? Бурганның деткимчезин көрүп каар кылдыр ооң бодундан дузаны дилеңер (4 Хаан. 6:15—17). Чоокта дыңнааның илеткел азы бир кижиниң харыызы силерни сорук киирген чадавас. Статья, видео азы сайтыдан ыры силерни күш киирген бе? Азы хөөннү көдүрүптер библейжи шүлүк азы бодалды бир-ле кижи чугаалаан бе? Чамдыкта ха-дуңманың ынакшылын база ном-дептерни шоолуг-ла үнелевейн баар бис. А ол дээрге Иеговадан кайгамчыктыг белектер-дир (Иса. 65:13; Мк. 10:29, 30). Ону таварыштыр Бурган биске ынакшылын база аңаа кажан-даа идегеп болурун бадыткап турар (Иса. 49:14—16).

11. Коргуштарын тиилеп алырынга, Айдага чүү дузалаан?

¹¹ Сенегалда чурттап чоруур А́йда, берге үеде Иегованың канчаар дузалаарын эскерерин кызып турган. Өг-бүлезинде улуу боорга, ада-иези Айда оларны азыраар деп идегеп турган. Ол эгелекчилээр дээш, ажылдаар шактарын кызырып алырга, акшазы хенертен эвээжей берген. Чоок улузу ол дээш дыка хорадаан. Айда мынчаар үлешкен: «Ада-иемни азырап шыдавайн баарымга, өг-бүлем менден хая көрнү бээринден дыка дүвүреп турган мен. Шупту чүве нарыыдай бээрге, Иегованы безин буруудаткан мен». Оон Айда чыышка илеткел дыңнаанын чугаалаан: «Чүрээвисте кандыг-даа аарышкыны Иегова билип турар деп илеткелчи сагындырган. Иегова меңээ ынак деп удуртукчулар база эштерим бүзүредип турган. Ынчалдыр мээң аңаа бүзүрелим бичиилеп быжыга берген. Ол меңээ дузалаар деп хензиг-даа чигзиниг чокка мөргүп эгелээн мен. А мээң мөргүлүмге Иегованың канчаар харыылаарын көргеш, дыка-ла оожургаан мен». Айда эгелекчилевишаан, ада-иезин азырап шыдаптар ажылды чоорту тып алган. «Мен Иеговага долузу-биле ынанып өөренип алдым.  Мөргээним санында-ла коргуштарым чиде бээр апарган» — деп, Айда түңнээн.

ИЕГОВА КЕЛИР ҮЕДЕ ЧҮНҮ КЫЛЫР?

12. Ырлар 55:10-дан алырга, Давид чүү чүвеге чигзинмес турган?

¹² Номчуптуңар: Ырлар 55:10. Давидке коргуштарын тиилеп алырынга чүү дузалааны бо шүлүктен көскү. Амы-тынынга айыыл бар-даа болза, Иегова келир үеде чүнү кылырын Давид боданып турган. Үези кээрге, Иегова аңаа болчур, ону камгалаар деп, Давид билип турган. Чүге дизе Бурган ону Израильдиң дараазында хааны кылдыр чарлапкан болгай (1 Хаан. 16:1, 13). Иегова аазап каан болганда күүсеттинер деп, Давид канчап-даа чигзинмээн.

13. Иегова келир үеде чүнү кылыр?

¹³ Иегова кижи бүрүзүнге чүнү аазап турар? Амгы үеде шупту бергелерден ол камгалаар деп манавас бис c. Ынчалза-даа бөгүн таваржып кээр кандыг-даа бергелеривисти Бурган чаа делегейге шиитпирлептерин билир бис (Иса. 25:7—9). Чаяакчывыстың өлген улусту диргизиптер, мага-боттуң болгаш сагыш-сеткилдиң аарыгларын экиртиптер, шупту дайзыннарывысты узуткаар күжү бар (1 Ин. 4:4).

14. Чүнүң дугайында боданып болур бис?

¹⁴ Коргуушкунга алысканда Иегованың келир үеде чүнү кылыр дээнин боданыңар. Эрлик-даа, каржы кижилер-даа чок делегейге чурттаары кайы хире экизин сагыштаалап көрүңер. Шупту улус чөптүг-шынныг, хүнден хүнче чоорту тергиин апаар бис. 2014 чылдың регион шуулганынга ачазы өг-бүлезин библейжи идегел дугайында бодандырганын көргүскен. Олар 2 Тимофейге 3:1—5-ке хамаарыштыр дываажаңга чуртталганы бижиир болза, ол сөстер мындыг болур деп чугаалажып турган: «Чаа делегейге дыка аас-кежиктиг үелер кээр. Улус чаагай сеткилдиг, Бурган-биле найыралга хамааржыр чүүлдерге ынак, биче сеткилдиг, томаанныг, Бурганны алдаржыдар, ада-иезинге дыңнангыр, өөрүп четтирер, шынчы, кижилерге ынак, чугаакыр, өске кижилер дугайында экини чугаалаар, бодун туттунуп билир, чымчак, буянга ынак, ынаныштыг, чайлап бээринге белен, биче сеткилдиг, таалалга бодаарга Бурганга ынак база бердинген чорукка башкартыр апаар. Олар-биле эдержип чор». А силер өг-бүлеңерге азы эш-өөрүңер-биле чаа делегейге чуртталганы чугаалажыр-дыр силер бе?

15. Коргуштарлыг-даа болза, Иеговага шынчы артарынга Таняга чүү дузалаан?

¹⁵ Соңгу Македониядан Таня угбавыстың таварылгазын көрүптээлиңер. Ол Библияны өөренип эгелээрге, ада-иези дыка удурланган. Ынчалза-даа Таняга келир үеде Иегованың чүнү кылырын боданыры коргушка алыспазынга дузалаан. Ол мынча деп сагынган: «Мээң чамдык коргуп турган чүүлдерим болу берген. Авам мени чыыш соонда-ла эттээр турган. Ада-ием мени Иегованың Херечизи апаар болзумза, өлүрүп кааптар деп кыжанган». Сөөлүнде Таняны бажыңындан үндүр сывыртаптарга, ол канчалган? Угбавыс мынча деп үлешкен: «Мен Иеговага шынчы артар болзумза, мөңгеде аас-кежиктиг болурумну боданган мен. Амгы үеде чидириимни чаа делегейге Иегова долузу-биле дуглап бээр деп идегеп турган мен. Ынчан шупту багай чүүл уттундура бээр». Иеговадан ол хая көрүнмээн. Харын-даа ооң дузазы-биле чурттаар  бажыңны тып алган. Таня дыка эки акывыска душкаш, амгы үеде Иеговага долу бараалгап чоруурлар.

ИЕГОВАГА БҮЗҮРЕЛИҢЕРНИ БЫЖЫГЛАҢАР

16. Лука 21:26—28-те сөстер күүсеттинип эгелээрге, эрес-дидим артарынга биске чүү дузалаарыл?

¹⁶ Коргунчуг хилинчек үезинде улус кортканындан медерелин чидирип эгелээр. А Бурганның бараалгакчылары туруштуг база дидим артар. (Номчуптуңар: Лука 21:26—28) Бис Иеговага идегээр болгаш, эрес-дидим болур бис. Мурнунда абзацта Таняның сөстеринден алырга, ооң эрткен үеде бергелери чаа бергелерни ажып эртеринге дузалап турар. Ол мынчаар чугаалаан: «Иегованың күш четпези берге айтырыг чок деп бодум хуумда көрген мен. Хат-шуурган соонда аязып, хүннеп кээри дег, Иегова кандыг-даа бергелерни шиитпирлептер». Улаштыр Таня мынча дээн: «Чамдыкта сээң амы-тының өске улустуң холунда ышкаш сагындырар. Шынында ындыг эвес, чүге дизе Иегова кандыг-даа кижиден күштүг. Эң-не берге шенелде безин төнчүлүг».

17. 2024 чылдың шүлүү биске канчаар дузалаар? (Журналдың даштында чурукту көрүңер.)

¹⁷ Амгы үеде бисти коргудуп болур чүүлдер хөй. Ынчалза-даа бис кортпас бис. 2024 чылдың шүлүүнде Давидтиң Иеговага чугаалаан сөстери шилиттинген: «Корга берген хүнүмде Сеңээ идегээр мен» (Ыд. ыр. 55:4). Бир справочникте бо шүлүкке мындыг тайылбыр бар: «Давид коргуушкуннарын азыраваан. Ол коргунчуг чүүлдерже көрбейн, харын-даа ону шынап-ла камгалаар Камгалакчызынче көрүп турар». Бо шүлүктүң сөстери бүдүн чыл дургузунда силерни үдеп чорзун. Ылаңгыя коргунчуг апарган үелерде ону сактып чоруңар. Эрткен, амгы база келир үеде Иегованың кылыр херектериниң дугайында боданыр үени аңгылап алыңар. Ынчан Давидтиң: «Аңаа бодум идегээр мен — корткаш чоорул» дээн сөстеринге каттыжып болур силер (Ыд. ыр. 55:5).