1. Бис Иегованы канчаар өөртүп болур бис?

 ЭЖИҢЕРГЕ чараш, ажыктыг болгаш тускай белек берген дижик силер. Ол ону шыгжап кааш уттуптарга, хомуданчыг чадавас. А эжиңер белекти ажыглап турарын көргеш, өөрүүр силер. Бо чижек чүнү көргүзүп турар? Иегова бис дээш Оглун берген. Ооң белээн база ынакшылын үнелээр болзувусса, ол дыка өөрүүр! (Ин. 3:16; Рим. 5:7, 8).

 2. Бо статьяга чүнү сайгарар бис?

² Үе эртерге, төлевирниң үнези уттундуруп болур. Бурганның биске берген үнелиг белээн өөрүшкүлүг хүлээп алгаш, ону шкафче суп кааш, сагынмазы-биле дөмей. Кезээде ону үнелеп чоруур дээш, чүнү канчаар ужурлуг бис? Бурганның болгаш Иисустуң биске көргүскен ачы-буянын боттарывыска үргүлчү сагындырары чугула. Аңаа бо статья дузалаар. Төлевирниң ачызында амгы база келир үеде алыр йөрээлдеривисти сайгарар бис. Ылаңгыя Сактыышкын кежээзиниң үезинде Иегованың ынакшылы дээш өөрүп четтиргенивисти канчаар көргүзүп болурун база чугаалажыр бис.

АМГЫ ҮЕДЕ БИСТЕ КАНДЫГ ЙӨРЭЭЛДЕР БАР?

 3. Төлевир биске амгы үеде безин чүнү берип турар?

³ Төлевир амгы үеде безин дыка хөйнү берип турар. Чижээ, Иегованың хүлээлгези чок-даа болза, төлевирниң ачызында ол күзелдии-биле бачыттарывысты өршээп  турар. Ыр күүседикчизи аңаа өөрүп четтирген сеткилин: «Иегова, буянныг база өршээринге белен сен» деп илереткен (Ыд. ыр. 86:5, ЧД; 102:3, 10—13).

 4. Иегова төлевирни кым дээш берген? (Лука 5:32; 1 Тимофейге 1:15).

⁴ Чамдык улус бодун Иегованың өршээлинге төлептиг эвес деп бодаар. А шынында өршээлге кым-даа төлеп чок. «Элчин деп адаттырарынга төлеп чогун» Павел миннип турган. Ынчалза-даа ол: «Бурганның авыралы-биле ам кандыг-дыр мен, ындыг кижи болганым ол-дур» дээн (1 Кор. 15:9, 10). Иегованың өршээли чедиишкиннеривиске эвес, а биске ынакшылынга үндезилеттинген. Бир эвес бодуңарны херекчок, чөгенчиг деп бодаар болзуңарза, Иегова бачыт чок улус дээш эвес, а бачыдын миннип турар кижилер дээш төлевирни бергенин утпаңар. (Номчуптуңар: Лука 5:32; 1 Тимофейге 1:15.)

 5. Иегова мени өршээр ужурлуг деп бодаары шын бе? Тайылбырлаптыңар.

⁵ «Иегова мени өршээр, чүге дизе аңаа хөй чылдар дургузунда бараалгап чоруур болгай мен» деп бодаары шын эвес. Аңаа кылып турар шупту чүүлүвүстү Иегова үнелээр болгай (Евр. 6:10). Ынчалза-даа төлевир — ажыл-херээвис дээш өртек эвес, а Бурганның улуг белээ-дир. Иегованың энерелин азы ооң тускай хамаарылгазын бодувус чедип алган деп бодаар болзувусса, төлевир биске херекчок база Иисус хей черге өлген апаар. (Деңнеңер: Галатчыларга 2:21.)

 6. Иеговага бараалгаар дээш, Павел чүге хөй күжениишкин үндүрген?

⁶ Иегованың өршээлин кандыг-даа ажыл-херек-биле чедип алыры болдунмас деп, Павел билир турган. Ынчаарга ол чүге хөй күжениишкин үндүрген? Иегованың өршээлинге төлептиин бадыткаар дээш эвес, а кайы хире өөрүп четтиргенин Павел көргүскен (Эф. 3:7). Бис база Иеговага бүгү сеткиливистен бараалгап чоруур бис. Бургандан бир-ле чүүлдү чедип алыр дээш эвес, а ооң ачы-буяны дээш өөрүп четтиргенивисти илередиксээр бис.

 7. Төлевирниң ачызында ам безин кандыг аргавыс бар? (Римчилерге 5:1; Иаков 2:23).

⁷ Төлевирниң ачызында ам безин, Иегова-биле чоок, хууда хамаарылгалыг болур аргалыг бис a. Мурнунда статьяга кым-даа бачыды дээш Бурганның өңнүү кылдыр төрүттүнмес деп көрген бис. Ынчалза-даа төлевир биске «Бурган-биле эп-найырал» тудуп, олче чоокшулаар арганы берген. (Номчуптуңар: Римчилерге 5:1; Иаков 2:23.)

 8. Иеговага мөргүүр арганы чүге үнелээр болза эки?

⁸ Иегованың өңнүктери аңаа мөргүүр онзагай аргалыг. Чыышка ниити мөргүлдерден аңгыда, кижи бүрүзүнүң хууда мөргүлдерин база Иегова дыңнап турар. Мөргүл бистиң угаанывысты, чүрээвисти оожургадып болур. Ынчалза-даа мөргүүрүнүң кол чылдагааны ол эвес. Бурган-биле чугаалажып тургаш, олче чоокшулап турар бис (Ыд. ыр. 64:3; Иак. 4:8; 1 Ин. 5:14). Иисус черге чурттап тургаш, бо-ла мөргүүр чораан. Адазы ону дыңнаарын база мөргүл дузазы-биле найыралы быжыгарын, ол билир турган (Лк. 5:16). Иисустуң өргүлүнүң ачызында бис база Октаргайның Чаяакчызының өңнүктери болуп, безин ооң-биле чугаалажып болур бис. Ону дыка-ла үнелээр бис!

 БИСТИ КЕЛИР ҮЕДЕ КАНДЫГ ЙӨРЭЭЛДЕР МАНАП ТУРАР?

 9. Шынчы бараалгакчыларынга Бурган кандыг келир үени белеткээнил?

⁹ Бурган шынчы бараалгакчыларынга кандыг келир үени белеткээнил? Мөңге чуртталга. Хөй улус мөңге чурттаары болдунмас деп бодаар, чүге дизе кижи төрелгетенниң төөгүзүнде муң-муң чылдар дургузунда кижилер черле өлүп турган. Ынчалза-даа Иегованың күзел-бодалы-биле кижилер төнчү чок чурттаар турган. Адам бачыт кылбаан болза, мөңге чуртталганы кым-даа элдептиг дивес, а черле ындыг боор деп санаар ийик. Мөңге чуртталга амгы үеде тоол ышкаш, ынчалза-даа Иегованың ол дээш төлеп каан өртээ, ынак Оглун бергени, оон-даа кайгамчык (Рим. 8:32).

10. Чагдырган христианнарны болгаш өске хойларны кандыг келир үе манап турар?

¹⁰ Мөңге чуртталга келир үеде болур. Ынчалза-даа Иегова амдан эгелеп, аңаа белеткенип эгелээривисти күзеп турар. Чагдырган акыларывыс өрү дээрге Иисус-биле кады чагырып, карак-кызыл ажылдаар (Ажыд. 20:6). А өске хойлар черге хилинчек-човалаң, качыгдал болгаш аарыг-аржык чок дываажаңга чурттаар (Ажыд. 21:3, 4). Чагдырган христианнарның алыр шаңналынга көөрде, черге мөңге чурттаар аргаңарны бөдүүн белек кылдыр бодаваңар. Иегова кижилерни черге чурттазын дээш чаяап каан! Ынчангаш бис аңаа төнчү чок аас-кежиктиг чурттаар бис.

11, 12. Чаа делегейге чуртталгадан чүнү манаар-дыр силер? (Чурукту база көрүңер.)

¹¹ Черге дываажаңга чуртталга кандыг болурун сагыштаалап көрүңер даан! Аарыырындан азы өлүрүнден безин кортпас апаар силер (Иса. 25:8; 33:24). Иегова шупту эки күзелдериңерни хандырар. Чүнү кылыксаар-дыр силер? Дириг амытаннарны шинчилексээр силер бе? Чуруттунуп азы хөгжүм херекселинге өөренип алыксаар силер бе? Азы физиканы, химияны,  математиканы ханы сайгарар күзелиңер бар бе? Дываажаңга архитекторлар, тудугжулар болгаш чер ажылдыг улус херек болуру чугаажок. Аъш-чем белеткээр, күш-ажыл херексели кылыр база черни чаагайжыдар дээн ышкаш оон-даа хөй ажылдар база турар (Иса. 35:1; 65:21). Мөңгеде чурттаар болганыңарда, күзээн чүүлүңерни, кандыг-даа арга-мергежилди чедип ап болур силер.

¹² Келир үеде дирлип келген улусту уткуп, магадап, медээжок өөрүүр бис! (Аж.-ч. 24:15). Иегованың дугайында оон-даа хөйнү билип алыры, ооң санап четпес чаяалгаларын шинчилээри дыка-ла аянныг боор (Ыд. ыр. 103:24; Иса. 11:9). Хензиг-даа буруузунар миннишкин чок бараалгаары дыка-ла эки! Ол шупту йөрээлдерни «бачыттың түр када таалалынга» орнаар силер бе? (Евр. 11:25). Чок, болбайн канчаар! Ол йөрээлдер амгы үеде шупту чидириглеривисти солуптар. Дываажаңга чуртталганы бүтпес күзел деп бодаваңар. Үези кээрге ол херек кырында чуртталгавыс апаар. Иегова эвес болза, ол болдунмас турган. Бис дээш бодунуң Оглун бериптеринче Бурганны дыка улуг ынакшыл оттурган!

ИЕГОВАНЫҢ ЫНАКШЫЛЫН ҮНЕЛЭЭРИВИСТИ КАНЧААР КӨРГҮЗЕР БИС?

13. Иегованың ынакшылы дээш өөрүп четтиргенивисти канчаар көргүзүп болур бис? (2 Коринфичилерге 6:1).

¹³ Төлевир дээш четтиргенивисти Иеговага канчаар көргүзүп болур бис? Бурганга бараалгал чуртталгавыска кезээде эң-не кол болуру чугула (Мф. 6:33). Чүге дизе «улус ам бодун бодап эвес, а олар дээш өлген база катап дирилген» Иисусту бодап амыдыраар болгай (2 Кор. 5:15). Иегова биске эгээртинмес ачы-буянын чүү дээш көргүскенин канчап-даа уттурун күзевес бис. (Номчуптуңар: 2 Коринфичилерге 6:1.)

14. Иеговага бүзүрээривисти, дыңнангырывысты канчаар көргүзүп болур бис?

¹⁴ Иеговага бүзүрээр база ону дыңнаар болзувусса, ооң ынакшылын үнелээривисти көргүзер бис. Чуртталгада ону канчаар кылып болур? Чижээ, өөредилге азы ажыл шилиирде, Иегова-биле сүмележири чугула (1 Кор. 10:31; 2 Кор. 5:7). Бурганның чугаалааны ёзугаар кылгаш, аңаа бүзүреливисти ажыл-херээвис-биле көргүзер бис. Ооң ачызында Иеговага оон-даа чоок апаар бис. Түңнелинде бүзүреливис дам быжыгар (Рим. 5:3—5; Иак. 2:21, 22).

15. Сактыышкын кежээзиниң мурнунда, ооң үезинде база соонда Иеговага төлевир дээш четтиргенивисти канчаар көргүзүп болур бис?

¹⁵ Иеговага өөрүп четтиргенивисти канчаар илередип болур бис? Сактыышкын кежээзиниң мурнунда, ооң үезинде база соонда ажыл херээвис-биле. Сактыышкын кежээзинче боттарывыс баарындан  аңгыда, ол болуушкун дугайында өске улуска база чугаалап болур бис (1 Тим. 2:4). Ол байырлал канчаар эртерин чалаан улузуңарга тайылбырлап бериңер. Чижээ, jw.org сайтыда «Иисус чүү дээш өлген?» база «Христос бис дээш өлген деп сактып чоруңар» деп видеоларны көргүзүп болур. Чыышче келбейн барган акы-угбаларны чалаарын хуралдың удуртукчулары албан кызар. Иегованың читкен хойлары эглип кээрге, дээрге-даа, черге-даа кайы хире өөрүшкү болурун бодап көрүңер даан! (Лк. 15:4—7). Сактыышкын кежээзинге чүгле бот-боттарывысты эвес, аңаа бир дугаар келген азы үрде келбээн улусту кады мендилээлиңер. Олар — күзенчиг аалчылар деп көргүзүксээр бис (Рим. 12:13).

16. Сактыышкын кежээзиниң үезинде Иеговага оон-даа хөйнү кылырын бодаары чүге чугула?

¹⁶ Сактыышкын кежээзиниң үезинде, оон-даа хөй суртаалдап шыдаар силер бе? Ынчалдыр Иеговага болгаш ооң Оглунга биске кылган бүгү буяны дээш, өөрүп четтиргенивисти көргүзээлиңер. Хөй бараалгаан тудум, Иегованың деткимчезин хөй миннир силер база аңаа бүзүрелиңер күштелир (1 Кор. 3:9). Оон ыңай ол үеде көрдүнген шүлүктерни номчуңар. Ону «Бижилгени хүннүң шинчилээри» деп брошюрадан азы «Христиан чуртталгавыс болгаш бараалгалывыс» деп ажылчын кыдырааштан тып ап болур. Ол шүлүктерниң чамдыызын хууда ханы шинчилексээр чадавас силер.

17. Иегованы чүү өөртүр? ( «Иегованың ынакшылын үнелээриңни канчаар көргүзүп болур сен?» деп көзенекти база көрүңер.)

¹⁷ Бо статьядан шупту сүмелерни ажыглаксаар боор силер. Ынчалза-даа силерниң байдалыңарда болдунмас чадавас. Иеговага кылган ажыл-ижиңерни ол өске улус-биле деңневес деп утпаңар. Аңаа ынааңарны Иегова дыка эки билир. Ооң үнелиг белээ — төлевир дээш, өөрүп четтиргениңерни көөрү аңаа дыка өөрүнчүг (1 Хаан. 16:7; Мк. 12:41—44).

18. Иегова биле Иисуска чүге өөрүп четтирер бис?

¹⁸ Төлевир эвес болза, бачыттарывыс-даа өршээттинмес, Иегова-биле чоок хамаарылга-даа, мөңге чуртталга-даа болдунмас ийик. Бурганның кайгамчык белектерин болгаш ынакшылын үнелээривис чуртталгавыстан көскү болурун күзээр бис (1 Ин. 4:19). Оон аңгыда, бис дээш амы-тынын берген Иисуска четтиргенивисти ажыл-херээвис-биле көргүзээлиңер! (Ин. 15:13).