1. Улус колдуунда чүже кол кичээнгей салыр?

 АМГЫ үеде хөй улус боттарынга ынак деп чөпшээрежир чадавас силер. Чижээ, чамдыктары боттарынче, чедиишкиннеринче кичээнгей салыр дээш, хөй үезин, күжүн үндүрүп турар. А чүгле эвээш кезии Иегова Бурганны алдаржыдып чоруур. Бо статьяга Иегованы алдаржыдары дээрге чүл, олче бисти чүү оттурар база ону канчаар кылырын сайгарар бис.

ИЕГОВАНЫ КАНЧААР АЛДАРЖЫДАР?

 2. Синай дагның эдээнге Иегова алдарын канчаар көргүскен? (Чурукту база көрүңер.)

² Алдар-ат дээрге чүл? Библияда «ат-алдар» деп сөс бир-ле кижини чугула деп санаарын демдеглээн. Иегова израильчилерни Египеттен үндүрүп тургаш, бодунуң ат-алдарын кайгамчык арга-биле көргүскен. Синай дагның эдээнге Бурганга мөгеер дээш, сая-сая улустуң чыглып келгенин сагыштаалап көрүңер даан. Дагны кара булут шыва апкан. Хенертен күштүг чер шимчээшкининден вулкан часты берген. Чер сирилеп, дээр кызаңнап, диңмиреп, эдиски үнү-биле агаар дола берген (Хост. 19:16—18; 24:17; Ыд. ыр. 67:9). Иегова ат-алдарын ынчаар көргүзерге, израильчилерге кайы хире коргунчуг болганын бодап көрүңер даан.

 3. Иегованы канчаар алгап-мактаарыл?

³ А бис кижилер Иегованы алгап-мактап болур бис бе? Ийе. Ону канчаар кылырыл? Чижээ, ооң кайгамчыктыг ажыл-херээн, шынарларын улуска чугаалап, чедиишкиннеривисти  ооң күжү-биле чедип алганывысты миннир болгаш, Бурганны алдаржыдып турар бис (Иса. 26:12). Иегованы үргүлчү алдаржыдып чораан, Давид хаанның үлегерин өттүнүп болур бис. Бир катап хөй чон мурнунга ол мынчаар мөргээн: Иегова «өндүр улууң болгаш күжүң, өндүр-чаагайың, тиилелгең болгаш алдарың — Сээңии-дир. Дээрде-даа, черде-даа — бүгү чүве Сеңээ хамааржыр». Ооң мөргүлүнүң соонда, шупту чон Иегованы алгап-йөрээген (1 Чыл. 29:11, 20).

 4. Иисус Иегованы канчаар алдаржыдып турган?

⁴ Иисус черге чурттап тургаш, шупту хуулгаазыннары Бурганның күжүнүң ачызында деп Адазын алгап-мактаан (Мк. 5:18—20). Адазының кайы хире буянныын Иисус улуска чугаалап, оларга эки хамаарылгазы-биле Бурганны база алдаржыткан. Бир катап Иисус синагогага чонну өөредип тургаш, херээжен кижиже кичээнгейни салган. Ону бук хинчектээрге, 18 чыл ишти бүшкүгүр болуп, хөндүрлүп шыдавас турган. Дыка берге болгаш эпчок байдал! Иисус ол херээженни кээргээш: «Аарыыңдан адырылган-дыр сен» — деп чымчак сөстерни чугаалаан. Оон ол «холдарын аңаа дегзиптерге, херээжен доп-дораан хөндүрлү бергеш, Бурганны алдаржыдып эгелээн». Иегова ооң бот-үнелелин, кадыкшылын эгидип бээрге, ол дыка-ла өөрүп четтирген, Бурганны алгап-мактаан! (Лк. 13:10—13). Бистиң база Иегованы алгап-мактаар чылдагааннарывыс хөй.

ИЕГОВАНЫ ЧҮГЕ АЛДАРЖЫДЫКСААР БИС?

 5. Иегованы бис чүге хүндүлээр бис?

⁵ Иегованы ханы хүндүлээр болгаш, алдаржыдар бис. Бурганны хүндүлээр чылдагааннарывыс хөй. Иегова Бүрүн Күчүлүг — кызыгаар чок күштүг (Ыд. ыр. 95:4—7). Ооң ханы мерген угааны чаяалгаларындан көскү. Иегова биске чуртталганы бергеш, бүгү талазы-биле хандырып турар (Ажыд. 4:11). Бурган бердинген (Ажыд. 15:4). Чүнү-даа чогумчалыг кылыр, аксы-сөзүн кезээде ээлээр (Иис. 23:14). Иеремия медээчиниң Иеговага хамаарыштыр: «Аймак-чоннарның бүгү мерген угаанныгларының аразында, бүгү күрүнелерде Сеңээ дөмей кым-даа чок» — деп чугаалааны кайгамчык эвес (Иер. 10:6, 7). Ол дээрге өрү дээрде Адавысты хүндүлээр чүгле каш чылдагааны-дыр. Ынчалза-даа Иегованы чүгле хүндүлээринден аңгыда, аңаа дыка ынак бис.

 6. Иеговага чүге ынак бис?

⁶ Иеговага дыка ынак болгаш, ону алдаржыдып турар бис. Бурганның кайгамчыктыг шынарлары хөй. Ол энерелдиг, кээргээчел (Ыд. ыр. 102:13; Иса. 49:15). Иегова сагыш човаңгыр: биске аарышкылыг болза, аңаа база аарышкылыг (Зах. 2:8). Ооң өңнүктери болурунга ол биске дузалап чоруур (Ыд. ыр. 24:14; Аж.-ч. 17:27). Бурган биче сеткилдиг болгаш, «дээр биле черни көөр дээш, куду алзы ээгип турар. Ол довурактан ядыы кижини тургуза» тыртар (Ыд. ыр. 112:6, 7). Ындыг эки Бурганны канчап алдаржытпас боор! (Ыд. ыр. 85:12).

 7. Бурганывысты чүге өске улуска таныштырыксаар бис?

⁷ Иегованың дугайында шынны улус билип алзын дээш, ону алгап-мактап турар бис. Эрлик улустуң угаан-бодалын чүве эскербес кылып, Бурганның дугайында мегени таратканындан кижилер  колдуунда Иегованы билбес (2 Кор. 4:4). Эрлик Иегованы өжээргек, кижилерни херекке албас, хилинчек-човалаңның хөй кезиинге ол буруулуг деп нүгүлдеп турар. Ынчалза-даа дээрде Адавыстың дугайында шынны билир бис! Улуска ону чугаалап, шак ынчаар Бурганны алдаржыдып турар бис (Иса. 43:10). 95-ки Ыры Иегованы алдаржыдарынче бисти кыйгырган. Ол ырының каш одуруун сайгаргаш, Иегованы бедик деңнелге төлептии-биле канчаар алдаржыдып болурун боданып көрээли.

ИЕГОВАНЫ КАНЧААР АЛДАРЖЫДЫП БОЛУР БИС?

 8. Иегованы чугаа-сөзүвүс-биле канчаар алдаржыдып болур бис? (Ырлар 95:1—3).

⁸ Номчуптуңар: Ырлар 95:1—3. Өске улуска Иегованың дугайында чугаалааш, ону алдаржыдып турар бис. 95-ки Ырының баштайгы шүлүктери бисти: Иегованы «алгап ырла», ооң «адын алгап-йөрээңер», «камгалалын медээлеңер», ооң «алдарын, бүгү аймактарга... чугаалап чедиңер» деп кыйгырган. Бо шупту дээрде Адавысты алдаржыдар аргалар-дыр. Шынчы израильчилер болгаш бирги вектиң христианнары Бурганның кайгамчык шынарларын, оларга кылган ажыл-херээн дидими-биле чугаалап турганнар (Дан. 3:16—18; Аж.-ч. 4:29). Оларның үлегерин канчаар эдерип болур бис?

9, 10. Анджелинаның таварылгазы силерге чүзү-биле өөредиглиг? (Чурукту база көрүңер.)

⁹ Каттышкан Штаттардан Анджели́на a угбайның таварылгазын көрээлиңер. Ол Иегованың адын дидими-биле камгалаан. Ажылдап кирген компаниязында чаа ажылдакчы бүрүзү бодун таныштырар болган. Иеговага бараалгал кайы хире хөй өөрүшкү эккеп турарын көргүзер дээш, Анджелина чуруктардан презентация белеткеп алган. Ынчалза-даа ооң мурнунда эр кижи Иегованың Херечилериниң өг-бүлезинге өскенин таныштыргаш, бүзүреливисти кочулап эгелээн. «Чүрээм өгбеңейнип турган. „Иегованы бактап турда, канчап ыыттавас мен? Иегованың херек кырында кандыызын шупту билип алыр ужурлуг“» — деп боданганын Анджелина сактып чугаалаан.

¹⁰ Анджелина үези чедип кээрге, кысказы-биле  иштинге мөргүпкен. Оон коллегазынга эвилең-ээлдек: «Дөмей чүүлдеривис хөй. Мен база Иегованың Херечилериниң өг-бүлезинге өскен мен, Херечи мен» — дээн. Байдал нарыыдай берген-даа болза, Анджелина девидевээн. Ол презентациязын көргүскеш, чүү чүвеге бүзүреп турарын тайылбырлаан (1 Пет. 3:15). Улаштыр чүү болган? Анджелина доозуптарга, ол эр кижиниң хөөнү өскерли берген. Ол безин бичиизинде Херечилер-биле үени аянныг эрттирип турганын сактып үлешкен. Анджелина: «Иегованың дугайында шынны улус билип алырынга, ол төлептиг. Ооң адын камгалаары, улуг алдар-хүндү» — дээн. Өске улус Иегованы хүндүлевейн-даа турза, бис ону алгап-мактап, алдаржыдып болур бис.

11. «Чаа делегей» очулгазындан Ырлар 96:8-те дүрүмнү Иегованың бараалгакчылары төөгү дургузунда канчаар сагып чоруур?

¹¹ Номчуптуңар: Ырлар 96:8, ЧД. Бис Иегованы өргүлдеривис-биле алдаржыдып турар бис. Бурунгу үеден бээр, Бурганның бараалгакчылары ону бар үнелиг чүүлү-биле алдаржыдып чораан (У. ч. 3:9). Чижээ, израильчилер өргээниң тудуун-даа, септелгезин-даа өргүлдери-биле хандырган (4 Хаан. 12:4, 5; 1 Чыл. 29:3—9). Чамдык өөреникчилер Иисусту база элчиннерни «хууда эт-хөреңгизи-биле» деткээн (Лк. 8:1—3). Оон аңгыда, бирги вектиң христианнары чединмес акы-угбаларга дузаны көргүскеннер (Аж.-ч. 11:27—29). Амгы үеде акша-төгериивисти өргүп тургаш, Иегованы алдаржыдып болур бис.

12. Бистиң өргүлдеривис Иегованы канчаар алдаржыдып турарыл? (Чурукту база көрүңер.)

¹² Өргүлдеривистиң Иегованы канчаар алдаржытканын көргүскен бир таварылганы көрээлиңер. Зимбабвеге 2020 чылда улуг каңдаашкындан сая-сая кижилер аъш-чем чок арткан. Оларның аразында угбавыс Приска база бар. Тарылга үези-даа болза, Приска среда, пятница санында-ла суртаалдаарын соксатпаан. Ооң кожалары: «Шөлге ажылдаарының орнунга, суртаалдап-ла турар сен. Удавас өг-бүлең аштап өлүп каар» — деп кыжырып турганнар. Оларга Приска: «Иегова бодунуң бараалгакчыларын кажан-даа кагбас» — деп бүзүрелдиг харыылаан. Удатпаанда акылар аңаа аъш-чем эккеп берген. Бүгү делегейде ха-дуңманың өргүлдериниң ачызында  ындыг дузаны организациявыс чедирип турар. Ол чүүл Присканың кожаларын кайгаткан: «Бурганың сени шынап-ла кагбаан-дыр. Бис база ол Бурганның дугайында билип алыксап тур бис» — дээннер. Ынчалдыр Присканың чеди кожалары чыыштарже барып эгелээн.

13. Алдынып чоруурувус-биле Иегованы канчаар алдаржыдар бис? (Ырлар 95:9).

¹³ Номчуптуңар: Ырлар 95:9. Алдынып чоруурувус-биле Иегованы алдаржыдып турар бис. Иегованың бараалгакчылары өргээге хүлээлгелерин күүседирде, чунар ужурлуг турган (Хост. 40:30—32). Ынчалза-даа мага-боттуң арыг-силиинден артык чугула чүүл — арыг, төлептиг алдынары-дыр (Ыд. ыр. 23:3, 4; 1 Пет. 1:15, 16). «Эрги бүдүжүвүстү» уштуп октапкаш, чаа бүдүштү кедип алыры чугула. Ол дээрге Бурганга таарышпас бодалдардан, чаңдан, ажыл-херектерден адырлыры-дыр. Иегованың дег шынарларны сайзырадып, ол ышкаш боданырын база алдынарын күзеп турар бис (Кол. 3:9, 10). Эң-не куду мөзүлүг, каржы улус безин, Иегованың дузазы-биле өскерлип, чаа бүдүштү кедип ап болур.

14. Джектиң таварылгазы чүзү-биле өөредиглиг? (Чурукту база көрүңер.)

¹⁴ Джек каржы, айыылдыг кем-херек үүлгедикчизи чораан. Ол безин Аза деп шолалыг турган. Үүлгеткен херектери дээш, ол өлүмге шииттирген. Ынчалза-даа ол шииткелин манап чыткаш, кара-бажыңга суртаалдап турган акывыс-биле таныжып алган. Джек Библияны өөренирин чөпшээрешкен. Ол багай ажыл-херектерин каггаш, удатпаанда сугга суктуруп алган. Ооң ол хире эттингенин көргеш, шаажылал хүнүнде кара-бажыңның чамдык ажылдакчылары ыглажып турган. Бир ажылчын: «Джек бээр кээрде, эң-не багай кижи турган. А ам — дээре дээн улустуң бирээзи» деп чугаалаан. Ооң шаажылалының соонда, бир неделя эрткенде, акылар кара-бажыңга чыыш эрттирип тургаш, танывазы херектенни эскерип кааннар. Чыышче кээринче ону чүү оттурган? Джектиң өскерилгенин көргеш, ол база Иеговага бараалгаксай берген. Бис база дээрде Адавысты алдынарывыс-биле канчаар алдаржыдып болурувусту, бо таварылга тода көргүзүп турар (1 Пет. 2:12).

 ЧООККУ ҮЕДЕ ИЕГОВА АДЫН КАНЧААР АЛДАРЖЫДАР?

15. Чоокку келир үеде Иегова адын канчаар алдаржыдар? (Ырлар 95:10—13).

¹⁵ Номчуптуңар: Ырлар 95:10—13. 95-ки Ырының сөөлгү шүлүктеринде Иегованы Шииткекчи болгаш Хаан деп адаан. Удавас Иегова бодунуң адын канчаар алдаржыдар? Ол чөптүг шииткелдерни үндүрер. Удатпаанда ооң адын бак атка киирген шупту меге шажыннарны, Өндүр улуг Вавилонну, узуткаар (Ажыд. 17:5, 16; 19:1, 2). Чамдык улус ону көргеш, Иеговага чүдүүр дээш, биске каттыжып кээр чадавас. Ооң соонда Армагеддонга Иегова Эрликтиң делегейин чок кылыр. Бурганны куду көөр, ону көөр хөңнү чок улус ис чок чиде бээр. А Иеговага ынак, дыңнангыр база ону чоргаарал-биле алдаржыткан улусту ол камгалаар (Мк. 8:38; 2 Фес. 1:6—10). Христостуң Муң чыл башкарылгазының төнчүзүнде улус сөөлгү шенелдени эртерге, Бурганның ады долузу-биле ыдыктаттынар (Ажыд. 20:7—10). Ынчан Иегованың алдарының дугайында билиг чер-делегей кырынга, далайны долдур аккан суг дег, нептерей бээр (Авв. 2:14).

16. Чүнү кылыр хөөннүг силер? (Чурукту база көрүңер.)

¹⁶ Бүгү чаяалга Иегованың адын төлептии-биле алдаржыда бээр үени дыка-ла манап турар бис! Ам дээрезинде Бурганывысты сөстеривис болгаш херектеривис-биле алдаржыдар дээш, арга бүрүзүн ажыглаар болзувусса эки. Ооң кайы хире чугулазын бисти утпазын дээш, Удуртукчу чөвүлел 2025 чылдың шүлүү кылдыр: «Алдар-макталга төлептиг адынга дүүштүр Иегованы алдаржыдыңар» деп сөстерни шилээн (Ырлар 96:8, ЧД).