1. Иисустуң өлүмүнүң Сактыышкын кежээзин чылдың байырлаары чүге чугула?

 ИЕГОВАНЫҢ биске берген үнелиг белээ — төлевир (2 Кор. 9:15). Бурган бодунуң Оглун амы-тынын бээр кылдыр черже чоруткан. Ооң ачызында Иегова-биле чоок хамаарылгалыг бис. Биске мөңге чурттаар арга база ажыттынып келген. Иегова биске дыка ынак болгаш, төлевирни хайырлаан (Рим. 5:8). Бурганның, ооң Оглунуң чүнү кылганын утпайн, өөрүп четтиргенин илередип чорзун дээш, Иисус чылдың-на Сактыышкын кежээзин демдеглээрин биске айыткан (Лк. 22:19, 20).

 2. Бо статьяга чүнү сайгарар бис?

² 2025 чылда Сактыышкын кежээзи апрель 12-де, субботада эртер. Ол байырлалче баарын бис шупту чигзиниг чок планнап алган бис. Сактыышкын кежээзиниң бетинде база соонда каш неделя дургузунда Иегова болгаш ооң Оглу бис дээш чүнү кылганын боданыр a болзувусса эки. Төлевир Иегова биле Иисустуң дугайында чүнү ажыдып турарын бо статьяга сайгарар бис. А бисте ооң ачызында кандыг йөрээлдер барын база ону үнелээривисти канчаар көргүзүп болурун дараазында чугаалажыр бис.

ТӨЛЕВИР ИЕГОВАНЫҢ ДУГАЙЫНДА ЧҮНҮ АЖЫДЫП ТУРАР?

 3. Чаңгыс кижиниң өлүмү сая-сая кижилерни бачыт биле өлүмден канчаар хостап болур? (Чурукту база көрүңер.)

³ Төлевирниң ачызында Иегованы чөптүг деп билир бис (Ы. х. к. 32:4). Адам дыңнангыр эвези дээш, бачыттыг  апаргаш, өлген. Бис шуптувус Адамның ажы-төлү бис. Ооң бачыдын салгап алган болгаш, өлүп турар бис (Рим. 5:12). Бачыт биле өлүмден бисти хостаар дээш, Иегова төлевир дугайында сагыш човаан. Чаңгыс кижиниң, Иисустуң, өлүмү сая-сая кижилерни канчап камгалап шыдаарыл? Павел элчин ону: «Чаңгыс кижи [Адамның] Бурганның сөзүн дыңнавааны хөй улусту бачыттыг кылып каанда, чаңгыс Кижи [Иисустуң] дыңнангырын дамчыштыр хөй улус агартырар» — деп тайылбырлаан (Рим. 5:19; 1 Тим. 2:6). Өскээр чугаалаарга, чаңгыс тергиин кижи Бурганны дыңнавайн баарга, бис шупту бачыт биле өлүмнүң кулданыында апарган бис. А ол кулданыгдан бисти хостаар дээш, өске тергиин кижи Бурганга дыңнангыр артар ужурлуг турган.

 4. Адамның дыңнангыр салгалынга төлевир чокка мөңге чурттаарын Иегова чүге чөпшээревээн?

⁴ Бисти камгалаар дээш, Иисус шынап өлүр ужурлуг турган бе? Адамның дыңнангыр салгалынга мөңге чурттаарын Иегова чүге чөпшээревээнил? Биске тергиин эвес улуска эки ышкаш көстүр шиитпир чөптүг болур бе? Ындыг таварылгада Адам бачыт үүлгетпээн ышкаш апаар. Ол ындыг эвес болгай!

 5. Иегова кажанда-даа чөптүг болур деп чүге чигзинмес бис?

⁵ Бир эвес Иегова бодунуң чөптүг дүрүмнерин херекке албайн, төлевир чокка Адамның тергиин эвес ажы-төлүнге мөңге чурттаарын чөпшээрээн болза, түңнели кандыг болур турган? Ынчан кижилер: «Бурган моон соңгаар чөптүг дүрүмнерин сагыыр бе? Аазаашкыннарын күүседир бе?» — деп чигзине бээр ийик. Ооң дугайында дүвүрээн херээ чок. Чүге дизе төлевирниң өртээ кедергей аар-даа болза, ол бодунуң ынак Оглун өргээш, чөптүүн көргүскен. Ынчангаш Бурган кезээде чөптүг шиитпир үндүреринге бүзүреп болур бис.

 6. Чөптүг чоруктан аңгыда, төлевир бээринче Иегованы чүү оттурган? (1 Иоанн 4:9, 10).

⁶ Төлевир Иегованың чөптүүн билип алырынга биске дузалыг. Бурганның ынакшылының кайы хире ханызын база ажыдып турар (Ин. 3:16; номчуптуңар: 1 Иоанн 4:9, 10). Иегова чүгле мөңге чурттаарывысты эвес, а ооң өг-бүлезиниң кезии апаарывысты күзеп турар. Бодап көрүңерем: Адам бачыт кылыптарга, Иегова ону өг-бүлезинден ойладыпкан. Оон эгелээш, кижилерниң чаңгызы-даа Бурганның ажы-төлү кылдыр төрүттүнмес апарган. Ынчалза-даа төлевирниң ачызында Иегова бачыттарывысты өршээп турар.  Түңнелинде Бурганга бүзүрээр, ону дыңнаар улус шупту ооң ажы-төлү апаар. Ам безин Иегова болгаш акы-угбаларывыс-биле чылыг-чымчак хамаарылгалыг болур аргалыг бис. Бурган биске дыка-ла ынак! (Рим. 5:10, 11).

 7. Төлевирни бээр дээш, Иисус дыка хинчектенген. Ол хемчег Иегованың ынакшылының дугайында биске чүнү ажыдып турар?

⁷ Иеговага Оглунуң хилинчектенирин көөрү кайы хире аарышкылыг болганын бодап келгеш, ооң биске ынакшылының күштүүн эки биле бээр бис. Бергелерге таварышканда чаңгыс-даа кижи Бурганга шынчы артпас деп Эрлик нүгүлдеп турар. Ол буруудадыышкынны ойтур шавар дээш, Оглунуң хилинчектенип өлүрүн Иегова чөпшээрээн (Иов 2:1—5; 1 Пет. 2:21). Шажынчы удурланыкчылар Иисусту кыжырып турарын Бурган көрген. Шериглер ону каржызы-биле эриидээш, хилинчектенип өлүр кылдыр чагыга азып каан (Мф. 27:28—31, 39). Ол үеде, Иисус аңаа «эргим болза, Бурган ам Ону камгалап алзын» дээн сөстерни дыңнааш, Иегова дораан киржи берип болур турган (Мф. 27:42, 43). Ындыг таварылгада төлевир-даа, идегеливис-даа чок болур ийик. Ынчангаш Иегова Оглун сөөлгү тынынга чедир хилинчектенирин чөпшээрээн.

 8. Иеговага Оглунуң хилинчээн көөрү кайы хире аарышкылыг болганын кайыын билир бис? (Чурукту база көрүңер.)

⁸ Бурган күчү-күштүг болганда, минниишкиннер чок деп бодаары шын эвес. Бисти ол бодунуң овур-хевири-биле чаяаган, ооң минниишкиннери бистиң-биле дөмей. Кижилерниң Бурганны хорададып, хомудатканын Библияда бижээн (Ыд. ыр. 77:40, 41). Авраам биле Исаактың чуртталгазындан таварылганы сактып кээли. Бурган Авраамга чаңгыс оглун өргүлге бээрин дааскан (Э. д. 22:9—12; Евр. 11:17—19). Исаактың амы-тынын үзер деп тургаш, Авраамның чүрээ кайы хире ыстаанын бодап көрүңер. А Иеговага каржы улустуң холундан Оглунуң өлүрүн көөрү кайы хире берге болган! (JW.ORG сайтта «Подражайте их вере. Авраам (часть 2)» деп видеону көрүңер.)

 9. Римчилерге 8:32, 38, 39-тан Иегованың биске ынакшылының дугайында чүнү билип ап турар бис?

⁹ Иегова биске эш-өөрүвүс болгаш чоок улузувустан-даа артык ынак деп төлевир бадыткап турар. (Номчуптуңар: Римчилерге 8:32, 38, 39.) Кижиниң бодунга ынакшылындан Иегованың биске ынакшылы оон-даа күштүг. Мөңге чурттаарын күзээр силер бе? Иегова ону силерден артык күзеп турар. Бачыттарыңар өршээттинерин күзээр силер бе? Иегова ону кайы хире күзээрин долузу-биле билип шыдавас  силер! Бурган бистен чүгле ооң белээн хүлээп алгаш, бүзүрелди илередип, дыңнангыр боорун дилеп турар. Төлевирни бергеш, Иегова биске кайы хире ынаан көргүскен. А чаа делегейге ооң ынакшылынга оон-даа хөй шынзыгар бис (Эккл. 3:11).

ТӨЛЕВИР ИИСУСТУҢ ДУГАЙЫНДА ЧҮНҮ АЖЫДЫП ТУРАР?

10. а) Шаажылал мурнунда Иисустуң сагыжы чүү дээш аарып турган? б) Иегованың буянныг адын Иисус канчаар камгалаан? ( «Иисус амы-тыны-биле Иегованың буянныг адын камгалаан» деп көзенекти көрүңер.)

¹⁰ Иисус Адазының ады дээш сагыш човап турар (Ин. 14:31). Бурганны дорамчылаан үймээнчи деп шаажыладырын Иисус билир турган. Ооң өлүмү Адазын бак атка киириптеринден сагышсырааш: «Ачай! Болдунар-ла болза, хилинчектиң бо дашказы Менден чайлай берзин» — деп, ол мөргээн (Мф. 26:39). Төнчүзүнге чедир Иеговага шынчы арткаш, Иисус Адазының буянныг адын камгалаан.

11. Иисустуң кижилерге ынакшылының кайы хире ханызы чүден көскү турган? (Иоанн 13:1).

¹¹ Иисус кижилер дээш, ылаңгыя өөреникчилери дээш сагыш човап турарын төлевир биске көргүскен (У. ч. 8:31; номчуптуңар: Иоанн 13:1). Черге чамдык даалгалары дыка берге болур деп Иисус билир чораан. Чижээ, ол хилинчектенип өлүр ужурлуг турган. Ол ужур аайы-биле эвес, а кижилерге ынак болгаш, даалгазын күүсеткен. Иисус бүгү сеткилинден өөрүшкүлүг медээни суртаалдап, өөреникчилерни белеткеп, өске улуска дузалажып чораан. Өлүмүнүң хүнүнде безин элчиннериниң буттарын чуп бергеш, оларны өөредип, чагыг-сүмезин бээр үени тып алган (Ин. 13:12—15). Чагыга аарышкыдан хинчектенип тургаш-даа, Иисус ооң-биле кады өлүмге шииттирген херектенге чырык  идегелди бергеш, авазы Марияны Иоаннга чагып каан (Лк. 23:42, 43; Ин. 19:26, 27). Ынчалдыр Иисус улуска ханы ынакшылын чүгле өлүмү эвес, а ажыл-херээ-биле база илереткен.

12. Иисус ам-даа бис дээш кандыг ажыл-херек кылып турар?

¹² Иисус «кажан кезээде» өлген-даа болза, ол бис дээш дыка хөйнү ам-даа кылып турар (Рим. 6:10). Кандыг уткалыг? Ол төлевирниң ачызында ажыттынган йөрээлдерни биске бээр дээш үезин, күжүн үндүрүп турар. Амгы үеде Иисус — Хаанывыс, Дээди бараалгакчывыс болгаш чыыштың баштыңы (1 Кор. 15:25; Эф. 5:23; Евр. 2:17). Коргунчуг хилинчек төнерге чедир чагдырган христианнарның болгаш мөөң чоннуң чыылдазы дээш, ол харыылап турар (Мф. 25:32; Мк. 13:27) b. Оон аңгыда, бо сөөлгү хүннерде, Иегованың шынчы бараалгакчыларының бүзүрелин быжыктырар аъш-чеми эки болзун дээш Иисус харыысалгалыг (Мф. 24:45). Муң чыл башкарылгазының үезинде база, ол бис дээш сагыш човаар. Ийе, Иегова биске Оглун херек кырында берген!

БИЛИГЛЕРИҢЕРНИ КӨВҮДЕДИРИН СОКСАТПАҢАР

13. Бурган биле Иисустуң ынакшылының дугайында оон-даа хөйнү билип алырынга чүү дузалаар?

¹³ Иегованың болгаш Иисустуң кылган ажыл-херээниң дугайында боданыр болзувусса, оларның биске ынакшылын оон-даа эки билип алыр бис. Бо чылын, Сактыышкын кежээзиниң үезинде азы ооң соонда, Иисустуң амыдыралын бижээн номнарны чүге кичээнгейлиг номчуп болбас деп? Ынчалза-даа чаңгыс угда эмин эрттир хөй материал албаңар. Далашпааны дээре. Иеговага болгаш Иисуска ынак болурунга оон-даа хөй чылдагааннарны тывар сорулгадан салып алыңар. Билип алган солун бодалдарыңарны өске улус-биле база албан үлежиңер!

14. Төлевир болгаш өске-даа темалар дугайында хөйнү билип алырынга шинчилел канчаар дузалап турар? (Чурукту база көрүңер.)

¹⁴ Хөй чылдар бурунгаар сугга суктурган болзуңарза, Бурганның чөптүү, ынакшылы база төлевир дээн ышкаш темаларны эки билир болгаш, чаа ажыдыышкыннар тыппас деп бодаар чадавас силер. Ынчалза-даа бо болгаш өске-даа темаларны төнчү чок  шинчилеп болур! Силерге чүнү сүмелээр бис? Ном-дептеривистен кызыгаар чок, кедергей үнелиг информацияны тып алыр силер. Библия номчааш, билдинмес шүлүк таваржып кээр болза, ону шинчилеңер. Оон шинчилел үезинде тып алган чүүлүңерни болгаш Иегованың, Иисустуң силерге ынакшылының дугайында хүнзедир боданыңар. (Номчуптуңар: Ырлар 118:97.)

15. Библияда чажыртынган эртинелерни дилээрин соксатпайн, дүжүп бербези чүге чугула?

¹⁵ Библияны номчуп шинчилээш, чаа, солун чүүлдер тыппайн баргаш, муңгараваңар. Силер алдынчыга дөмей силер. Ол хөй үе-шак үндүргеш, чүнү-даа тыппайн баар. Ынчалза-даа ол дүжүп бербес, хензиг-даа алдын тып алгаш аажок өөрүүр. А библейжи алыс шын билиг оон-даа артык үнелиг! (Ыд. ыр. 118:127; У. ч. 8:10). Ынчангаш шыдамык болуп, Библияны номчуп, ында чажырган эртине-байлакты дилээрин уламчылаңар (Ыд. ыр. 1:2).

16. Иегова биле Иисустуң үлегериниң кандыг талазын эдерип болур бис?

¹⁶ Библиядан билиглериңерни амыдыралга ажыглаарын кызыңар. Чижээ, Иегованың чөптүг, улус ылгай көрбес үлегерин эдериңер. Иисус дег дээрде Адаңарга болгаш кижилерге ынакшылды сайзырадыңар. Бергелер тыптып кээр-даа болза, Иегованың күзелин күүседиринге болгаш өске улуска дузалаарынга белен болуңар. Оон аңгыда, өске кижилер Иегованың белээн, төлевирни, хүлээп алыр аргалыг болзун дээш суртаалдаңар.

17. Дараазында статьяга чүнү сайгарар бис?

¹⁷ Төлевирниң дугайында хөйнү билип ап, ону үнелээр болзувусса, Иеговага болгаш ооң Оглунга оон-даа ынак боор бис. Оларның биске ынакшылы база күштелир (Ин. 14:21; Иак. 4:8). Ынчангаш Библияны шинчилеп база Иегованың организациязының шупту материалдарын ажыглавышаан, төлевир дугайында билиглеривисти көвүдедиилиңер. Дараазында статьяга төлевирниң ачызында бисте кандыг йөрээлдер барын база Иегованың ынакшылын үнелээривисти канчаар көргүзерин сайгарар бис.