ӨӨРЕНИР СТАТЬЯ 3
ЫРЫ 35 Эң эки чугула чүүлдү билип алыңар
Шиитпирлериңер Иеговага таарымчалыг болзун.
Иеговадан «коргары — мерген угаанның үнер дөзү ол-дур, ыдыктыг Бурганны билип аары — сарыыл» (У. Ч. 9:10).
КОЛ БОДАЛ
Эки шиитпир хүлээп алырда чүү дузалаар?
1. Кижилерде кандыг харыысалга бар?
БИС шупту хүннүң-не, чүнү чиир азы каш шакта удуп чыдар дээн хевирлиг бөдүүн шиитпирлер хүлээр бис. А оон нарын шиитпирлерден кадыкшыл, аас-кежик, өг-бүлевистиң чедимчелии база Бурганга мөгейиишкинивис хамааржыр. Шиитпирлеривис бистерге болгаш чоок улузувуска эки боорун күзээр бис. А эң-не кол күзеливис — Иегованы өөртүрү (Рим. 12:1, 2).
2. Эки шиитпир үндүреринге кандыг базымнар дузалаар?
2 Эки шиитпирге кээр дизе: 1) барымдааларны чыыр, 2) Иегованың күзел-бодалын билип алыр база 3) болдунар аргаларны деңнээр болза эки. Ол базымнарны сайгаргаш, угаан-сарыылывысты ажыглап, шын шиитпир тыварынга чүү дузалаарын көөр бис (У. ч. 2:11).
ФАКТЫЛАРНЫ ЧЫЫП АЛЫҢАР
3. Шиитпир үндүрериниң мурнунда фактылар чыыры чүге чугула? Чижекти чугаалаңар.
3 Шиитпир хүлээриниң бетинде фактылар чыыры чугула. Чүге? Бир кижи аарааш, эмчиге келген дижик. Эмчи аарыг кижини шинчивейн, чаңгыс-даа айтырыг салбайн, эмнеп эгелээр бе? Чок, болбайн канчаар. Бис база шиитпир хүлээрде, фактылар чыыр арганы ажыглап болур бис. Байдалывыска хамааржыр шупту барымдааларны баштай көөр бис. Ону канчаар кылырыл?
4. Чугаалар 18:14-тен алырга, фактылар чыырынга чүү дузалаар? (Чурукту база көрүңер.)
4 Фактылар чыырда каш айтырыг чедер. Чижээлээрге, чалалга алгаш, баар-барбазын шиитпирлээр ужурлуг силер. Ону эрттирер кижини танывас азы аңаа чүү болурун эки билбес болзуңарза, дараазында айтырыгларны салыңар: «Ол ужуражылга каяа, кажан эртерил? Аңаа каш кижи кээр? Чурум дээш кым харыылаар? Оон өске кымны чалаан? Программазы кандыг? Арага аймаа турар бе?» Ол айтырыгларның харыылары силерге мерген угаанныг шиитпир үндүреринге дузалаар. (Номчуптуңар: Чугаалар 18:14.)
Айтырыглар дузазы-биле фактыларны чыып алыңар (абзац 4). a
5. Фактылар чыып алган соонда, чүнү кылыр херек?
5 Ол айтырыгларның харыызын билип алгаш, улаштыр чүнү канчаар силер? Фактыларны ажыглап, байдалды долузу-биле көрүңер. Чижээ, Иегованың дүрүмнерин хүндүлевес аалчылар бар азы арагага хамаарыштыр чурум тудар кижи чок деп билип каан силер. Баш удур боданыңар: ол ужуражылга чурум чокталып, үен-даян хөглээшкинче шилчий бээр эвеспе? (1 Пет. 4:3). Оон ыңай бир чүүлдү база херекке алыр болза эки. Ол үеде чыыш болур азы суртаалче дугуржуп алган чадавас силер. Байдалды долузу-биле көргеш, эки шиитпир хүлээп ап болур. Ам ийиги базымче шилчип болур. Ол байдалче силерниң көрүжүңерден Иегованың көрүжү өске болур чадавас (У. ч. 2:6).
ИЕГОВАНЫҢ БОДАЛЫН БИЛИП АЛЫҢАР
6. Иаков 1:5-тен алырга, Иеговадан мерген угаанны дилээри чүге чугула?
6 Байдалыңарже Иегованың көрүжүн билип алыр дээш, оон дузаны дилеңер. Мерген угаанны бээрин ол аазаан. Шиитпириңер Бурганга таарымчалыг болганын тодарадырынга мерген угаан херек. Мерген угаанны Иегова «чеме-хала чокка» бээр. (Номчуптуңар: Иаков 1:5.)
7. Иегованың бодалын канчаар билип алырыл? Чижекти чугаалаңар.
7 Мөргээн соонда Иеговага харыылаар аргадан бериңер. Өске хоорайга аза бергеш, ол черниң чурттакчызындан орук айтырган дижик силер. Ол кижи харыылап төндүрбээнде-ле чоруй баар силер бе? Чок, болбайн. Ооң чугаазын кичээнгейлиг дыңнаар болгай. Шак ынчалдыр Иеговадан мерген угаан дилээн болзуңарза, ооң харыызын билип алыр дээш кызыңар. Силерниң байдалыңарга кандыг библейжи дүрүмнер болгаш хоойлулар тааржырын боданыңар. Чижээ, чугаалашканывыс чалалгаже баар-барбазын шиитпирлээринге чүү дузалаар? Бурганның Сөзүн шинчилеңер. Ында хөлүн эрттир арагалап-хөглээринге база багай эш-өөрге хамаарыштыр чүнү бижээн? Христиан кижи бирги черге Бурганның Чагыргазын азы хууда күзелдерин салыр ужурлуг бе? (Мф. 6:33; Рим. 13:13; 1 Кор. 15:33).
8. Херек информацияны канчаар тып алырыл? (Чурукту база көрүңер.)
8 Херек информацияны тып алыры амыр эвес апарып болур. Ынчан дуржулгалыг акывыс азы угбавыс-биле сүмележиңер. Хууда шинчилелди кылыры чугула. Дыка хөй ажыктыг чүүлдерни чижээ, «Иегованың Херечилериниң дептерлер айтыкчызы» биле «Библейские стихи в помощь христианину» деп номдан тып ап болур. Сорулгаңар — Иегованы өөртүр шиитпир үндүрери деп утпаңар.
Иегованың көрүжүн билип алыңар (абзац 8). b
9. Бистиң шиитпиривис Иегованы өөртүр деп канчаар хынап алыр? (Эфесчилерге 5:17).
9 Шиитпиривис Иегованы өөртүр деп канчаар шынзыгар бис? Бир-ле дугаарында, Бурганны эки билири чугула. Библияда: «Ыдыктыг Бурганны билип аары — сарыыл ол-дур» деп бижээн (У. ч. 9:10). Ийе, Иегова кандыг Бурганыл база ооң күзел-соруун, чүү чүвеге ынак азы хөңнү чогун билип алыр ужурлуг бис. Ынчангаш: «Иегованың дугайында билиримни барымдаалап, кандыг шиитпирим ону өөртүр?» деп боданыңар. (Номчуптуңар: Эфесчилерге 5:17.)
10. Библейжи дүрүмнер өг-бүлениң ёзу-чаңчылдарындан чүге чугула?
10 Иегованы өөртүр дээш чоок улузувусту хомудадыптар таварылгалар турар. Чижээ, бай-шыырак, ынчалза-даа Бурган-биле хамаарылгазы кошкак кижиге өгленип алырын ада-иези уруундан негеп турар. Олар экини күзээрлер, ынчалза-даа: «Өгленип алырымга, ол кижи меңээ Бурган-биле найыралымны быжыглаарынга дузалаар бе?» — деп, кыс кижи бодундан айтырып болур. Ол байдалга Иегованың бодалы кандыг? Харыызы Матфей 6:33-те бар. Бо шүлүк христианнарны чуртталгазында кезээде Бурганның Чагыргазын бирги черге салырынче кыйгырып турар. Ада-иевисти, долгандыр улусту хүндүлээр-даа болзувусса, биске эң-не кол чүүл — Иегованың сеткилин өөртүрү.
БОЛДУНАР АРГАЛАРНЫ ДЕҢНЕҢЕР
11. Болдунар аргаларны деңневишаан, шилилге кылырынга чүү дузалаар? (Чугаалар 2:11, ЧД).
11 Библейжи дүрүмнерни көрген соонда, шиитпирлериңер кандыг түңнелдерлиг болурун даап бодаары чугула. (Номчуптуңар: Чугаалар 2:11, ЧД.) Ону кылыры чамдыкта белен, а чамдыкта амыр эвес. Ынчалза-даа эскериичел чорук кандыг-даа берге байдалдарда мерген угаанныг шиитпирни хүлээринге дузалаар.
12, 13. Ажылды мерген угаанныг шилииринге баш удур боданыры канчаар дузалаар?
12 Өг-бүлеңерни азыраар дээш, ажыл дилеп турар дижик силер. Ийи чарлал көрүп каан силер. Ажылга хүлээлгелерни, графикти, орукче үнер үени болгаш өске херек информацияны чыып алган силер. Ол ийи ажыл христианнарга тааржыр. Бир дугаар ажылдың шалыңы хөй болгаш солун. Ынчалза-даа шиитпир хүлээр бетинде өске чугула чүүлдерни бодаар херек.
13 «Ол ажыл дээш, чыыштар үзер апаар мен бе? Өг-бүлемниң Иегова-биле хамаарылгазы база өске-даа хереглелдери дээш сагыш човаарынга үе артар бе?» — деп бодангаш, түңнеп көрүңер. Ындыг айтырыглар акшаны эвес, а «ёзулуг чугула чүүлдү» — Бурганга мөгейиишкин биле өг-бүлениң хереглелдерин шилип алырынга дузалаар (Флп. 1:10а, ЧД). Ынчан Иегованың йөрээлин эккээр шиитпирни хүлээп ап шыдаар силер.
14. Эскериичел чорук биле ынакшыл өске кижиниң бүзүрелин кошкатпазынга канчаар дузалаар?
14 Шиитпирлеривис өске улуска кандыг салдар чедирип болурун боданырынга биске эскериичел чорук дузалаар. Моондак тургузарын күзевес болгай бис (Флп. 1:10б). Идик-хеп, даштыкы хевир дээн ышкаш айтырыгларга безин, өске улусту бодаары чугула. Хептиң азы причёсканың тускай хевирин сонуургаар дижик силер. Шиитпиривис чыышка-даа, өске-даа улуска таарымчалыг болур бе? Оларның миннишкиннерин хүндүлээринге эскериичел чорук дузалаар. Ынакшыл чөпшүл болурунче болгаш бодунуң эвес, «а өске улустуң ажык-дүжүү дээш сагыш» човаарынче оттурар (1 Кор. 10:23, 24, 32; 1 Тим. 2:9, 10). Ынчан өске улуска ынакшылды болгаш хүндүткелди көргүзүп шыдаар бис.
15. Чугула шиитпир үндүрериниң мурнунда чүнүң дугайында боданыры шын?
15 Чугула шиитпир үндүрериниң мурнунда, ону амыдыралга боттандырарда, чүү херегин боданыңар. Иисус бүгү чарыгдалдарны санап алырын өөреткен (Лк. 14:28). Ол дээрге үе-шак болгаш акша-төгерик, күжениишкиннер. Чамдык байдалдарда кижи бүрүзү канчаар дузалажып болурун билип алыр дээш, чоок улузу-биле сүмележир болза эки. Ынчаар кылыры чүге ажыктыг? Ынчан шиитпириңерни эдерин азы шуут-ла өскертирин көрүп каар чадавас силер. Ооң кадында өг-бүлеңерниң кежигүннериниң үзел-бодалын дыңнаар болзуңарза, олар шиитпириңерни улуг күзелдии-биле деткиир (У. ч. 15:22).
ЭКИ ШИИТПИРЛЕРНИ ШИЛИҢЕР
16. Эки шиитпир үдүреринге силерге кандыг базымнар дузалаар? ( «Эки шиитпир үдүреринге чүү дузалаар?» деп көзенекти база көрүңер.)
16 Статьяда бердинген базымнарны дөгерезин кылыр болзуңарза, эки шиитпир үндүреринге белен силер. Шиитпириңер Иегованы өөртүр деп шынзыгар дээш, фактыларны чыггаш, библейжи дүрүмнерни боданган силер. Ам шиитпириңерни боттандырарынга дузалаар кылдыр Иеговадан мөргүп дилеңер.
17. Эки шиитпирлер үндүрериниң чажыды чүдел?
17 Ооң мурнунда эки шиитпирлерни хүлээп турган-даа болзувусса, ёзулуг чедиишкинниң чажыды чүдел деп сактыры чугула. Ол дээрге бодувустуң угаанывыс, дуржулгавыс эвес, а Иеговадан мерген угаан-дыр. Ёзулуг мерген угаанга чедирер билигни, бодамчалыг болгаш эскериичел чорукту чүгле Бурган бээр (У. ч. 2:1—5). Иегованың дузазы-биле ону өөртүр шиитпирлерни хүлээп шыдаар бис (Ыд. ыр. 22:2, 3).
ЫРЫ 28 Иегованың өңнүү бол
