1. Иегованың өг-бүле тургузуун чаяаган бир чылдагаанын чугаалаңар.

 ИЕГОВА «аас-кежиктиг Бурган» болгаш, бисти база аас-кежиктиг болзун деп күзээр (1 Тим. 1:11, ЧД). Ынчангаш ол биске хөй белектерни берген (Иак. 1:17). Оларның бирээзи — өг-бүле. Өгленишкен улус бот-боттарынга хүндүлээчел база ынак болурун аазаар. Бир эвес олар чылыг-чымчак хамаарылгазын кадагалаар болза, ёзулуг өөрүшкүнү миннир (У. ч. 5:18).

 2. Дыка хөй өг-бүлелерде чүү болуп турар?

² Хомуданчыг чүүл, амгы үеде хөй өг-бүлелер кудага берген аксы-сөзүн ээлевес. Түңнелинде олар аас-кежик чок. Делегей чергелиг кадык камгалал организациязының чоокку отчёдунда делегейде херээжен улус ашааның талазындан күчүлелдиң бүгү хевирлеринге таваржып турарын демдеглээн. Чамдык эр кижилер кадайын улус мурнунга хүндүлээр, а бажыңынга куду көөр. Ашаа порнография көөрге, кадайы ынакшыл-даа, аас-кежик-даа миннивес. Оларның аразында харылзаазы соок болгаш ырак болуру ховар эвес апарган.

 3. Чамдык эр улус кадайларынга чүге багай хамаарылгалыг?

³ Чамдык эр улус кадайларынга чүге багай хамаарылгалыг? Чылдагааннар янзы-бүрү. Ада-иезин өттүнген эр улус бар: ачазы авазынга каржыланырын анаа чүүл деп санаар турган. А өскелери культура аайы-биле алдынар: бажыңда кым чугулазын кадыг хамаарылга-биле көргүзер. Килеңин тудуп шыдавас эр улус база бар. Чамдык эр улус порнографияга чагырткаш, көрүжү көңгүс өскерлип, херээжен улусту чүгле эр-херээжен күзелдер хандырар кылдыр бодаар. Аңгы-аңгы организацияларның отчёду-биле  алырга, COVID-19 пандемиязының үезинде херээжен улуска күш дөгээр таварылгалар көвүдээн. Бо чугаалашканывыс чылдагааннар кадайынга дошкун хамаарылганы бичии-даа агартпайн турар.

 4. Христиан эр кижи чүден оваарныр ужурлуг база чүге?

⁴ Өг-бүлелиг христиан эр улус бо делегейниң херээжен кижиге шын эвес көрүжүнден оваарныр ужурлуг a. Чүге? Кижиниң алдынары бодалдардан эгелээр. Павел элчин Римде чагдырган христианнарга: «Моон соңгаар бо делегейге бодуңарны хевирлетпеңер» — деп сагындырган (Рим. 12:1, 2, ЧД). Ооң чагаазын бижээн өйде, Римде чыыш каш чыл мурнунда-ла тургустунган турган. Павелдиң сөстеринден алырга, чамдык акыларда чурттап турган ниитилелиниң чаңчылдары болгаш көрүжү ам-даа хевээр болган. Ынчангаш Павел оларны эттинип алырынче оттурган. Бо сүме өг-бүлелиг христиан эр улуска база херек. Муңгаранчыг чүүл, кадайынга каржы-хажагай хамаарылга көргүзүп, бо делегейниң үлегеринден адырылбаан акылар бар b. Иегова эр улустан кадайларынга кандыг хамаарылганы күзээр? Ооң харыызы бо статьяның кол шүлүүнде.

 5. 1 Пётр 3:7-ден алырга, эр кижи кадайынга кандыг хамаарылга көргүзер ужурлуг?

⁵ Номчуптуңар: 1 Пётр 3:7. Иегова эр улуска кадайларынга хүндүткел көргүзерин айыткан. Ону күүседип турар кижи кадайынга ынаан, хүндүлээрин көргүзер. Бо статьяга ону ашаа канчаар кылып болурун сайгарар бис. Ынчалза-даа баштай ашаа канчаар алдынмас ужурлуун чугаалажыптаалыңар.

КАДАЙЫҢАРГА ААРЫШКЫЛЫГ ЧҮҮЛ КЫЛБАҢАР

 6. Кадайынга күш дөгээр эр улуска хамаарыштыр Иегованың бодалы кандыг? (Колосчуларга 3:19).

⁶ Күш дөгээри. Улуска аарышкы чедирер дээш күжүн ажыглаар кижилерге база күчүлелге Иегова хөңнү чок (Ыд. ыр. 10:5). Ылаңгыя кадайын эттээр чорук аңаа бужар (Мал. 2:16; номчуптуңар: Колосчуларга 3:19). 1 Пётр 3:7-ден алырга, бир эвес эр кижи кадайынга багай хамаарылгалыг болза, Бурган-биле найыралын үреп турар. Ооң мөргүлдерин безин, Иегова дыңнавайн баар.

 7. Эфесчилерге 4:31, 32-ден алырга, ашаа кадайы-биле канчаар чугаалашпас ужурлуг? («Тайылбырны» база көрүңер.)

⁷ Сөс-биле куду көөрү. Чамдык эр улус кадыг чугаа-сөзү-биле кадайын куду көөр. А Иегова дошкууралга, килеңге, алгы-кышкыга, дорамчылалдыг сөстерге c хөңнү чок. (Номчуптуңар: Эфесчилерге 4:31, 32.) Бурган шупту чүвени дыңнап турар. Ашааның кадайы-биле чүгле ийилээ тургаш безин, канчаар чугаалажыры аңаа чугула. Кадайы-биле дошкун чугаалажыр эр кижи, чүгле өг-бүлезинге эвес, Бурган-биле найыралынга хораны чедирип турар (Иак. 1:26).

 8. Иегованың порнографияга көрүжү кандыг база чүге ындыг хамаарылгалыг?

⁸ Порнография көөрү. Иегованың порнографияга хамаарылгазы кандыг? Ол ону көөр хөңнү чок! Ынчангаш эр кижи ындыг  чуруктар көөр болза, Иегова-биле хамаарылгазын үреп, кадайынга хүндүткел чогун көргүзер d. Иегова эр кижиден бодалынга безин кадайынга шынчы болурун манаар. Иисус өске херээженче сонуургал-биле көрүпкен эр кижини кадайынга «сагыжында» өскерлипкен дээн (Мф. 5:28, 29) e.

 9. Эр-херээжен харылзаа үезинде кадайының саналы-биле куду деңнелдиг чүүлдер кылырынче ашаа албадаар болза, Иегова чүге хөңнү чок?

⁹ Кадайының бодалы-биле куду деңнелдиг эр-херээжен чорук. Чамдык эр улус кадайының бодалы-биле куду деңнелдиг эр-херээжен чорукче албадаарга, ол бодун арыг эвес, ынакшылга төлеп чок, куду көрдүрген кылдыр миннир. Шак ындыг бодун бодаар, кээргээр сеткил чок чорукка Иегова хөңнү чок. Бурган эр кижиден кадайынга ынак болурун, сагыш човаачал база ооң сеткилин хүндүлээрин күзээр (Эф. 5:28, 29). Бир эвес христиан кижи кадайын эттээр, сөглээр, дорамчылаар азы порнография көөр болза канчаар? Угаан-бодалын база алдынарын ол эр кижи канчаар өскертип ап болур?

ЭТТИНИП АЛЫРЫНГА АШААНГА ЧҮҮ ДУЗАЛААР?

10. Өгнүң эр ээзи Иисустуң чижээн канчаар эдерип болур?

¹⁰ Кадайын мага-бодунга, сеткилинге аарышкылыг азы куду деңнелдиг чүүлдер кылырынче албадаар эр кижиге эттинип алырынга чүү дузалаар? Үлегерни Иисустан алыры чугула. Иисус өг-бүле тутпаан-даа болза, ооң өөреникчилеринге хамаарылгазы — үлегер. Эр улус кадайынга шак ындыг хамаарылгалыг болур ужурлуг (Эф. 5:25). Чижээ, ол элчиннери-биле канчаар алдынып, чугаалажып турганын көрээлиңер.

11. Иисус элчиннеринге кандыг хамаарылгалыг чораан?

¹¹ Иисус элчиннеринге эки хамаарылганы көргүзүп, оларның бот-үнелелин хүндүлээр чораан. Аңаа кажан-даа кадыг, чагырар хөөн турбаан. Иисус өөреникчилериниң Дээргизи-даа болза, оларга биче сеткилдиг бараалгап турган (Ин. 13:12—17). Башкызы мынча дээн: «Менден өөренип алыңар, Мен биче сеткилдиг болгаш чөпшүл чүректиг мен, [ынчан күш кире бээр силер]» (Мф. 11:28—30). Эскерип көрүңер даан, Иисус чөпшүл чораан. Ындыг кижи кошкак эвес, харын-даа бодун туттунарынга дузалаар иштики күштүг. Ону өжегерээн хорададырга-даа, сеткили турум болгаш, минниишкиннерин тудуп билир.

12. Иисус улус-биле канчаар чугаалажыр турган?

¹² Иисустуң сөстери улусту оожуктурар, күш киирер турган. Ол өөреникчилери-биле кажан-даа каржы чугаалашпаан (Лк. 8:47, 48). Удурланыкчылары хорададыр дээш чөңгээлээрге безин, ол «дорамчылал-биле харыылаваан» (1 Пет. 2:21—23). Чамдыкта Иисус хорадап сөглээриниң орнунга, ыыттавайн эрттириптер чораан (Мф. 27:12—14). Өг-бүлелиг эр улуска ол дыка-ла кайгамчык үлегер!

13. Өгнүң эр ээзи Матфей 19:4—6-да сөстерни канчаар эдерип болур? (Чурукту база көрүңер.)

¹³ Иисус эр улуска кадайларынга шынчы болурун айыткан. Ол Адазының эр кижи «кадайы-биле [кезээ шагда] катчы бээр» деп сөстерин сагындырган. (Номчуптуңар: Матфей 19:4—6.) «Кезээ шагда» деп  очулдурган грек кылыг сөзү «хырбаланыр; чыпшынар» деп дорт уткалыг. Ынчангаш ашак-кадай улустуң ынакшылы, бот-бодунга хырбалап каан чаңгыс мага-бот дег, күштүг болур ужурлуг. Ындыг быжыг харылзааны хора чедирбейн үзери болдунмас. Кадайынга ынак эр кижи порнографияның кандыг-даа хевиринден ойталаар. Ол бужар «хоозун чүүлдер көрбес», караан дораан дестирер (Ыд. ыр. 118:37). Ындыг эр кижи, Иов дег, өске херээжен улусче артык кичээнгей салбас деп бодунга аазаар (Иов 31:1).

14. Ашаа кадайын хомудадып турар болза, ооң-биле болгаш Иегова-биле эки хамаарылгазын эгидип алыр дээш, чүнү кылыр ужурлуг?

¹⁴ Кадайын эттээр азы сөс-биле хомудадыр эр кижи, ооң-биле болгаш Иегова-биле хамаарылгазын тургузар дээш, базымнарны кылыр ужурлуг. Кандыг базымнарыл? Бирээде: бодун берге байдалда деп чөпшээрежир. Ооң кылган, чугаалаан бүгү чүүлүн Иегова дөгерезин дыңнап, көрүп турар (Ыд. ыр. 43:22; Эккл. 12:14; Евр. 4:13). Ийиде: кадайын хомудадырын соксаткаш, шын алдынып эгелээр (У. ч. 28:13). Үште: кадайынга болгаш Иеговага кайы хире аарышкыны чедиргенин буруузунуп, олардан өршээлди сеткилинден дилээр (Аж.-ч. 3:19). Оон аңгыда, эттинип алыр күзелди бээрин база бодалдарын, аксы-сөзүн туттунуп, шын алдынарынга дузаны Иеговадан ол чаннып дилээр ужурлуг (Ыд. ыр. 50:12—14; 2 Кор. 10:5; Флп. 2:13). Дөртте: мөргүлдеринге дүүштүр алдынып, күчүлелдиң кандыг-даа хевирлеринге хөңнү чок болурун өөренир (Ыд. ыр. 96:10). Беште: удуртукчулардан дузаны соңгаарлатпайн дилээр (Иак. 5:14—16). Алдыда: шын эвес алдынып болур чүүлдерден ойталаар планны тургузар. Порнография көрүп турар эр кижи бо-ла алды базымны кылыр ужурлуг. Иегова ындыг кижиниң күжениишкиннерин албан йөрээр (Ыд. ыр. 36:5). Ынчалза-даа ол кадайынга аарышкы чедирерин соксатканындан аңгыда, эжин хүндүлеп өөренир ужурлуг. Ол чүнү кылып болур?

 КАДАЙЫНГА ХҮНДҮТКЕЛДИ КАНЧААР КӨРГҮЗЕРИЛ?

15. Ашаа кадайынга ынаан канчаар көргүзүп болур?

¹⁵ Ынааңарны көргүзүңер. Аас-кежиктиг өг-бүлелиг чамдык акылар кайы хире ынаан кадайынга көргүзер дээш, хүннүң-не бир-ле чүүлдү кылырын боданып алган (1 Ин. 3:18). Ындыг эргелиг хамаарылга бичии чүүлдерден көстүр. Чижээ, бир кижи кадайын куспактаар азы холундан чедип алыр. «Кайы хире хүнзедиң?» азы «сактып тур мен» деп СМС-терни чортуп болур. Үе-үе болгаш, ол бодунуң минниишкиннерин открыткага бижип азы чечек сөңнеп болур. Эр кижи ынчалдыр кадайынга хүндүткелди көргүзүп, өг-бүлезин быжыглап турар.

16. Ашаа кадайын чүге мактаар болза эки?

¹⁶ Четтиргениңерни илередип, мактаңар. Кадайын хүндүлээр эр кижи ону үнелээрин чугаалаар. Чижээ, өг-бүлезинге кылып турар шупту ажыл-херээ дээш, кадайынга ол өөрүп четтиргенин илередир (Кол. 3:15). Кажан өөнүң ээзи мактаарга, кадайы өөрүүр. Ашаа аңаа ынак база ону үнелээр деп билир болгаш, кадайы бодун айыыл чок кылдыр миннир (У. ч. 31:28).

17. Ашаа кадайынга хүндүткелди канчаар көргүзер?

¹⁷ Чылыг-чымчак, хүндүткелдиг хамаарылгалыг болуңар. Ынакшылдыг эр кижи кады чурттаан эжин, Иеговадан белек ышкаш, үнелээр (У. ч. 18:23; 31:10). Эр-херээжен харылзаа үезинде безин кадайын хүндүлээр. Ооң арын-нүүрүнге дүүшпес, куду көөр, ыяттырар кылдыныгларже кадайын албадавас f. Ашаа Иегованың мурнунга база арыг арын-нүүрлүг болур ужурлуг (Аж.-ч. 24:16).

18. Ашаа кадайын кайы хире үнелээрин канчаар көргүзүп болур? ( «Кадайыңга хүндүткелиңни канчаар көргүзер сен? Дөрт сүме» деп көзенекти көрүңер.)

¹⁸ Кадайыңарны аксы-сөзүңер болгаш ажыл-херээңер-биле хүндүлээриңерни Иегова эскерип турарынга чигзинмеңер. Ынчангаш аңаа кажан-даа аарышкы чедирбейн, чылыг-чымчак, эки хамаарылгалыг болуңар. Ынчалдыр аңаа ынааңарны база үнелээриңерни илередир силер. Кадайыңарга хүндүткелди көргүскеш, Иегова-биле найыралыңарны быжыктырып, камгалап турар силер (Ыд. ыр. 24:14).