1, 2. а) Бистиң кайгамчыктыг идегеливис бо делегейде кижилерниң идегеп турар чүүлдеринден чүзү-биле ылгалып турарыл? б) Кандыг чугула айтырыгларны сайгарып көөр бис?

 ШУПТУ алыс шын христианнарда кайгамчыктыг идегел бар. Шилип чагдырган христианнар болгаш «өске хойлар» Иегованың баштайгы күзел-соруу боттанып, Ооң ады ыдыктаттына бээр үени четтикпейн манап турар (Ин. 10:16; Мф. 6:9, 10). Ол дээрге эң-не кайгамчыктыг идегел-дир. Ол ышкаш бис шаңналды — дээрге азы черге мөңге амыдыралды алырын күзеп турар бис (2 Пет. 3:13). Оон аңгыда бо сөөлгү хүннерде Иегова бодунуң чонун оон-даа быжыктырып деткиир деп манап турар бис.

² Бо делегейде кижилер база бир-ле чүүлге идегеп турар, ынчалза-даа оларның манаашкыннары үргүлчү күүсеттинмес. Чижээ, миллион-миллион кижилер лотерея ойнап алырын күзеп турар, ынчалза-даа оларның манаашкыннарының күүсеттинери чигзинчиг. А алыс шын бүзүрел христианнарның «идегелин боттандырып, каракка көзүлбес чүүлдерни бадыткап турар» (Евр. 11:1). Ынчалзажок айтырыгларыңар тыптып кээр чадавас: манаашкыннарым бадыткалдыг болур кылдыр, чүнү кылып болур мен? Идегеп турар чүүлүмге быжыг бүзүрел меңээ канчаар дузалап болур?

3. Бурганның аазаашкыннары күүсеттине бээр деп, чүге бүзүреп турар бис?

 ³ Кижилер ала чайгаар чүрээнде бүзүрелдиг төрүттүнүп келбес. Бурганның ыдыктыг сүлдези дыңнангыр чүрээвисче салдар чедирерге, ынчан бүзүрел тыптып келир (Гал. 5:22). Библияда Иегованың бүзүрели бар азы ол Аңаа херек деп биживээн. Чүге дээрге Иегова — Октаргайда эң-не күчүлүг, эң-не мерген угаанныг; Аңаа Бодунуң күзел-соруун күүседиринге чүү-даа шаптыктап шыдавас. Дээрде Адавыс аазаашкыннарын күүсеттине бээр деп билир болгаш, оларның дугайында: «Боттанган-дыр!» деп чугаалаан. (Ажыдыышкын 21:3—6 номчувут.) Иегова аазаашкыннарын кезээде күүседип турар деп билир бис. Ол — «бүзүрелдиг Бурган». Ынчангаш Ооң келир үеге хамаарыштыр чугаалаан бүгү чүвезинге бүзүреп турар бис (Ы. х. к. 7:9).

4. Иисус Христостуң мурнунда чурттап чораан шынчы эр биле херээжен улус кандыг идегелдиг турганыл?

⁴ Еврейлерге чагааның 11 дугаар эгеде быжыг бүзүрелди көргүскен 16 эр биле херээжен улустуң дугайында бижээн. Чагааның автору ол болгаш өске-даа, «бүзүрелиниң ачызында... эки херечилел» алган, Иегованың бараалгакчыларының дугайында бижээн (Евр. 11:39). Оларның шуптузу Эрликтиң үймээнин чок кылып, Иегованың баштайгы күзел-соруун күүседиптер, Бурганның аазаан «оглунуң» кээрин манап турган (Э. д. 3:15). Ол Бурганның шынчы бараалгакчылары, кижилерге дээрге чурттаар арганы ажыткан, аазаттынган «салгакчы» Иисус Христостуң төрүттүнериниң бетинде-ле чок апарган (Гал. 3:16). Ынчалзажок Иегова оларны черге дываажаңга диргизиптерин база Ооң аазаашкыннары ыяап-ла күүсеттине бээрин аазап турар (Ыд. ыр. 36:11; Иса. 26:19; Ос. 13:14).

5, 6. Авраам болгаш ооң чоок кижилери кандыг идегелдиг турган база оларга быжыг бүзүрелдиг артарынга чүү дузалаан? (Статьяның эгезинде чурукту көрүңер.)

⁵ Иисустуң мурнунда чурттап чораан чамдык христианнарның дугайында Еврейлерге 11:13-те: «Ол бүгү улус аазаан чүүлдерни албайн, оларны чүгле ырактан көргеш, өөрүп, бүзүрелин ышкынмайн, өлгүлеп калган» — дээн. Ол бараалгакчыларның бирээзи Авраам турган. Аазаттынган «салгакчының» башкарылгазының адаанга чурттаар идегелдиң дугайында ол үргүлчү сактып чораан бе? Иисус удурланыкчыларынга: «Силерниң адаңар Авраам Мээң кээр хүнүмнү көөрүн бодап келгеш, өөрүп-байырлап турган. Ол ону көрген-даа, аас-кежиктиг болган-даа!» — деп чугаалаан (Ин. 8:56). Ону Сарраның, Исаактың, Иаковтуң болгаш оон-даа өске бараалгакчыларның дугайында чугаалап болур. Олар «Бурганның төлевилээш, тутканы», Чагыргага идегелинден карак салбайн турган (Евр. 11:8—11).

⁶ Авраам болгаш ооң чоок кижилери чүнүң ачызында быжыг бүзүрелдиг арткан? Олар Иегованың улгады берген шынчы бараалгакчыларының чугааларын дыңнап, олар-биле чугаалажып, бүзүрелге төлептиг бурунгу документилерни номчуп, Бурганның дугайында билип ап турган. А эң чугула чүүл, олар ол билиглерни үнелеп, Бурганның аазаашкыннарының, негелделериниң дугайында сактып база боданып турган. Олар Бурганга шынчы артар дээш, кандыг-даа бергелерни ажып эртеринге белен турган. Оларның идегели ол хире быжыг турган.

7. Бүзүреливисти быжыглаар кылдыр, Иегова ынакшылы-биле биске чүнү кылган база боттарывыстың талавыстан чүнү канчаар ужурлуг бис?

⁷ Бистиң бүзүреливис кошкай бербезин дээш, Иегова биске ынакшылдыы-биле Бодунуң Сөзүн берген. Ажыл-херээвиске аас-кежиктиг болгаш чедиишкинниг болурун күзеп турар болзувусса, аргалыг-ла болза,  Бурганның Сөзүн хүннүң-не номчуур ужурлуг бис (Ыд. ыр. 1:1—3; Ажыл-чорудулга 17:11 номчувут). Оон аңгыда Иегованың бурунгу бараалгакчылары ышкаш, Бурганның аазаашкыннарының дугайында үргүлчү боданып, Ооң негелделерин күүседир ужурлуг бис. Иегова «шынчы болгаш сарыылдыг чалчаны» таварыштыр библейжи билиглерни, дептерлерни биске элбээ-биле берип турар (Мф. 24:45). Билип алган чүүлүвүстү үнелээр болзувусса, Бурганның Чагыргазынга идегели күүсеттине бээр деп манап турган, бурунгу үеде чурттап чораан Бурганның шынчы бараалгакчыларынга дөмей болур бис.

8. Мөргүл бүзүреливисти канчаар быжыглап болур?

⁸ Бүзүрелин быжыг кадагалап арттырарын күзээн бурунгу бараалгакчыларның чуртталгазынга мөргүл чугула рольду ойнап турган. Мөргүлдеринге Бурганның харыылап турарын көргеш, оларның бүзүрели оон-даа быжыгып турган (Неем. 1:4, 11; Ыд. ыр. 33:5, 16, 18; Дан. 9:19—21). Бис база Иеговага сеткиливисти тө каап берип, Ол бисти дыңнап каар деп бүзүреп база шупту чүвени өөрүшкүлүг ажып эртеринге күштү бээр деп чигзинмес бис. А кажан мөргүлдеривистиң харыызын алгаш, бүзүреливис улам быжыгар. (1 Иоанн 5:14, 15 номчувут.) Бүзүрел ыдыктыг сүлдениң үре-түңнелиниң бирээзи болганда, ону Бургандан дилээр ужурлуг бис. Иисус ынчаар чагаан (Лк. 11:9, 13).

9. Хууда дилеглеривистен аңгыда, чүнүң дугайында мөргүп болур бис?

⁹ Ынчалзажок мөргүлдеривиске чүгле Бургандан дуза дилээринден аңгыда, Ооң кайгамчыктыг ажыл-херектери дээш, хүннүң-не Аңаа четтиргенивисти илередир болзувусса эки (Ыд. ыр. 39:6). «Кара-бажыңда улусту, боттарывыс олар-биле кады хоругдаттырган дег», сактыры чугула. Оон ыңай бүгү делегейде ха-дуңма дээш, ылаңгыя удуртукчулар дээш, мөргүүр ужурлуг бис. Иегованың мөргүлдеривиске канчаар харыылап турарын көргеш, сеткиливис өөрүшкү-биле долар (Евр. 13:3, 7).

10. Бурганның бараалгакчыларындан кым бүзүрелинден ойталавааныл? Олар күштү кайыын ап турган?

¹⁰ Павел элчин Еврейлерге 11-ги эгеде, аттарын адаваан, хөй бараалгакчыларның ажып эрткен шенелделериниң дугайында бижээн. Оларның санында быжыг бүзүрел илереткен шынчы херээженнерни база демдеглээн. Олар оолдарын чидириген, ынчалза-даа соонда «боттарының өлген улузун катап дирилген кылдыр дедир алганнар». Павел улаштыр «оон-даа эки амыдыралга катап дирлир дээш, оларга саналдаан хосталганы хүлээп албаан» улустуң дугайында бижээн (Евр. 11:35). Павел оларның ат-сывын адаваан-даа болза, Бурганга шынчызы дээш база Ооң күзел-соруун күүсеткени дээш, даштар-биле соп өлүрткен Навуфей биле Захария дээн ышкаш Бурганның бараалгакчыларының дугайында чугаалаан чадавас (3 Хаан. 21:3, 15; 2 Чыл. 24:20, 21). А Даниил өңнүктери-биле Бурганга шынчызын үрепкеш, хосталганы ап болур турган-даа болза, Бурган күчүлүг күжү-биле оларны деткиир деп бүзүрээн болгаш, «арзылаңнар аксынче кирбээннер, отту өжүрүпкеннер» (Евр. 11:33, 34; Дан. 3:16—18, 20, 28; 6:13, 16, 21—23).

11. Чамдык медээчилер бүзүрелиниң ачызында чүнү шыдажып эрткенил?

¹¹ Бүзүрели дээш, Михей биле Иеремия медээчилер «кочу-шоотту... кара-бажыңны көрүп эрткеннер». Бурганның өске бараалгакчылары, чижээ, Илия, «ээн черлерге, дагларга, куйларга, оңгар, кызаа черлерге улчуп чорааннар». Олар шупту туруштуг арткан, чүге дизе оларның «бүзүрели идегелин боттандыр[ган]» (Евр. 11:1, 36—38; 3 Хаан. 18:13; 22:24—27; Иер. 20:1, 2; 28:10, 11; 32:2).

12. Шыдамык чоруктуң кайгамчыктыг үлегерин кым арттырганыл?

 ¹² Павел быжыг бүзүрелди илередип турган эр биле херээжен улустуң дугайында бижээш, бүзүрелдиң кайгамчыктыг үлегеринче — Дээргивис Иисус Христосче — кичээнгейни салган. Еврейлерге 12:2-де мынча дээн: «Ону манап турар өөрүшкү дээш, Ол белдир-ыяшка өлүмнү шыдажып эртип, бужар байдалга киргенин-даа херекке албайн, Бурганның дүжүлгезиниң оң талазынга барып олурупкан». Иисустуң дыка аар-берге шенелдени бүзүрели-биле шыдажып эрткениниң дугайында боданыр ужурлуг бис. (Еврейлерге 12:3 номчувут.) Иисус ышкаш, чамдык христианнар, чижээ Антипа өөреникчи, Бурганга шынчызы дээш өлүрткен (Ажыд. 2:13). Дээрге чурттаар, «оон-даа эки амыдыралга катап дирлир дээш», Бурганның бурунгу бараалгакчыларының манап чорааны шаңнал оларны манап турар (Евр. 11:35). 1914 чылда Бурганның Чагыргазы тургустунуп кээрге, кезек үе болганда, ол шупту өлүг турган шилип чагдырган эр биле херээжен улус Христос-биле кады кижилерни чагырар дээш, дээрге чурттаары-биле дирилген (Ажыд. 20:4).

13, 14. Рудольф Грайхен кандыг шенелделерге таварышканыл база оларны шыдажып эртеринге аңаа чүү дузалааныл?

¹³ Бистиң үеде миллион-миллион Бурганның бараалгакчылары Христосту өттүнүп, идегелин чидирбейн, шенелделерге бүзүрелин кошкадыптарын чөпшээревейн турар. 1925 чылда Германияга төрүттүнген Рудольф Грайхенниң үлегерин көрээлиңер. Кажан ол бичии турда, ооң бажыңынга библейжи үзүндүлерниң чуруктарын азып каан турган. Ол үлешкен: «Оларның бирээзинде тайбыңны көргүскен: бөрү хураган-биле, ирбиш анай-биле, бызаа арзылаң-биле, а бичии оол оларны одарже сүрүп бар чыдар.  [...] Ол чуруктар мээң угаанымга таңмаланып артып калган» (Иса. 11:6—9). Рудольфту эгезинде нацист гестапо, ооң соонда ГДР-де Штази үр үе иштинде истеп сүрүп турган. Ынчалза-даа ооң черге дываажаңга чурттаар бүзүрели черле кошкаваан.

¹⁴ Рудольфтуң амыдыралынга оон-даа өске шенелделер база турган. Ооң ынак авазы Равенсбрюктуң концентрастыг лагеринге тифтен аарааш, чок болган, а ачазы бүзүрели кошкай бергенинден Иегованың Херечилериниң бүзүрелинден ойталаарының документизинге адын салып берипкен. Рудольф кара-бажыңдан үнүп келгеш, кожуун хайгааракчызы бооп бараалгай берген. Ооң соонда ону Галаад школазынче чалаан. Миссионер кылдыр томуйлаткаш, Чилиге кожуун бараалгалын ол уламчылаан. Ынчалзажок ону мурнунда чаа шенелделер манап турган. Пэтси дээр миссионерге өгленгенинден бээр бир чыл эрткенде, хай-халап болган — оларның бичии уруу чок апарган. Элээн үелер эрткенде ооң ынак кадайы 43 харлыында чок болган. Рудольф ол шупту хай-халапты шыдамыы-биле ажып эрткен. 1997 чылдың август 1-ден «Таңныыл суургазында» (20—25 арыннарда) (орус дылда) ооң допчу намдарын бижээн. Ол үеде Рудольф назылай берип, аарып турган-даа болза, ол удуртукчу болгаш эгелекчи бооп бараалгап турган ¹.

15. Бөгүн Иегованың Херечилери истеп сүрүүшкүннер үезинде өөрүшкүзүн канчаар чидирбейн турар? Чижектерден чугаалаңар.

¹⁵ Иегованың Херечилери кадыг-дошкун, төнчү чок шенелделерге-даа торулбайн, идегелин чидирбейн, өөрүшкүлүг артып турар. Чижээ, Сингапурда, Эритреяда болгаш Мурнуу Көреяда хөй акы-угбаларывыс, Иисустуң сөзү ёзугаар алдынып, ок-чепсек тударындан ойталааны дээш, кара-бажыңнарда олурар (Мф. 26:52). Чүс-чүс хоругдаттырганнар аразындан Исаак, Негеде болгаш Паулос акыларывыс Эритреяда хоругдал адаанда 20 чыл ажа берген! Оларның назылап кырый берген ада-иезин азыраар база өг-бүле тудар аргазы чок-даа болза, чеже-даа каржы хамаарылга турза, олар Бурганга шынчы артып турар. Ол акылар чүректеринде тайбыңны болгаш быжыг бүзүрелди кадагалап турар. Олар таңныылдарның хүндүткелин безин чаалап алган.

16. Быжыг бүзүрел силерни канчаар камгалап болур?

¹⁶ Иегованың Херечилериниң хөй кезии каржы истеп сүрүүшкүннерге кажан-даа таварышпаан. Оларның бүзүрели оон өскээр шенеттинип турар. Дыка хөй улус ядыы байдалга азы хамааты дайыны бооп турар черлерге чурттаар ужурга таваржып турар, а өскелери бойдус халаптарындан хилинчектенип турар. Чамдык улус, Авраам, Исаак, Иаков болгаш Моисей ышкаш, эптиг чуртталгазын каап азы ат-алдардан ойталаан. Таалал ап чурттаар күткүлгеге алыспас дээш, олар бар шаа-биле кызып турар. Оларга чүү дузалап турар? Олар Иеговага ынак болгаш, Ооң чөптүг эвес чорукту ап каапкаш, шынчы бараалгакчыларынга чөптүг чорук тергиидээр чаа делегейге мөңге чуртталганы бээр дээн аазаашкынынга ыяк бүзүреп турар. (Ырлар 36:5, 7, 9, 29 номчувут.)

17. Чүнү кылырынче шиитпирлиг хөөнненип алган силер база дараазында статьяга чүнү сайгарар бис?

¹⁷ Бо статьяга идегеливис бүзүреливисти канчаар боттандырып турарын көрдүвүс. Шак ындыг быжыг бүзүрелдиг болур дизивиссе, Иеговага мөргүп, ооң аазаашкыннарының дугайында ханы боданырын уламчылаары чугула. Ынчан кандыг-даа аар-берге шенелделерни ажып эртип шыдаар боор бис. Дараазында статьяга быжыг бүзүрелдиг болуру дээрге чүл ол дээрзин сайгарар бис.