1—3. Эводия биле Синтихияның аразынга чөрүлдээ канчап тыптып келгенил база ындыг чүүлдерни канчаар оюп эртип болур бис? (Статьяның эгезинде чурукту көрүңер.)

 ИЕГОВАНЫҢ бараалгакчылары Библияны үнелеп турар. Бис бачыттыг болганывыста, үе-үе болгаш-ла, Библияга үндезилеттинген сүмелерни ап турар бис. Оларны канчаар хүлээп ап турар бис? Чижек кылдыр бирги векте чурттап чораан Эводия биле Синтихияны ап көрээлиңер. Ол христиан угбалар алгыжып алган. Чүү дээш? Библияда ооң дугайында биживээн. Ынчалза-даа ооң канчаар болганын сагыштаалап көрээлиңер.

² Эводия амданныг кежээки чем белеткээш, кезек акы-угбаларны чалап алган. Синтихияны чалаваан, оон ол оларның үени кайы хире эки эрттиргенин билип каан. «Бүзүревейн тур мен: таанда Эводия мени канчап чалаваан кижил?! Ёзулуг эжишкилер бис деп, бодап чораан мен». Синтихия аажок хомудап чөгенгеш, Эводияга бүзүревестей берген. Ооң аңаа хамаарылгазы өскерилген. Ынчан ол база аалчылар чалап аар деп шиитпирлээш, Эводия чокка, ол-ла акы-угбаларны чалаан.  Эводия биле Синтихияның аразынга болган чөрүлдээ бүдүн чыыштың тайбыңын үреп болур турган. Ооң канчаар төнгенин Библияда биживээн, ынчалза-даа ол угбалар Павел элчинниң сагыш човангыр сүмезин хүлээп алган деп, бүзүреп болур бис (Флп. 4:2, 3).

³ Бөгүн ындыг таварылгалар чыыш иштинге чөрүлдээлерни тургузуп болур. Ынчалзажок Бурганның Сөзүнден сүмелерни ажыглап турар болзувусса, оларны шиитпирлеп азы шуут оюп болур бис. Иегованың Сөзүн үнелеп чоруур болзувусса, ооң айтыышкыннарынга дүүштүр амыдыраар бис (Ыд. ыр. 26:11).

4, 5. Минниишкиннерни тударынга биске кандыг библейжи сүмелер дузалаарыл?

⁴ Бисти херекке албайн турар азы чөптүг эвес хамаарылга көргүзүп турар ышкаш болза, минниишкиннерни тудары белен эвес болбайн канчаар. Ук-ызыгуурувус, кеживис өңү азы даштыкы хевиривис дээш, багай аажыладып турар болзувусса, ол чүүл сеткиливисти балыглап болур. Ындыг хамаарылганы акы-угбалар көргүзерге, ылаңгыя аарышкылыг. Улустуң бачыттыг бүдүжү ол хире чүдек кылдыр илерээрге, Бурганның Сөзү биске канчаар дузалап болурул?

⁵ Кижилерниң чаяаттынганындан тура Иегова оларның аразында хамаарылгазын хайгаарап турар. Чүнү миннип база канчаар алдынып турарывысты Ол көрүп чоруур. Багай минниишкиннер оттурар бодалдарга алзыр болзувусса, соонда хараадай бээр чүвевисти чугаалап азы кылып болур бис. Ынчангаш кылыктанырынче далашпайн, бодун туттунар деп библейжи мерген сүмени эдерери чугула. (Чугаалар 16:32; Экклесиаст 7:9 номчувут.) Шупту чүвени чоок хүлээвейн, өскелерни өршээп өөренир дизе, иштики бүдүжүвүстү эдип-чазаар ужурлуг бис. Өскелерни өршээп азы өршээвейн турарывыска Иегова биле Иисус шыңгыы хамаарылгалыг (Мф. 6:14, 15). Улусту күзелдии-биле өршээп, туттунуп өөренип алыр болзуңарза эки деп, эскерер-дир силер бе?

6. Чүрээвиске бак сагыш турумчуй бээрин чүге чөпшээревес ужурлуг бис?

⁶ Туттунуп билбес улус колдуунда каржыланы бээр. Ол дээш олар өскелерни боттарындан хөңнү калдырып, чыышка багай салдар чедирип болур. Чамдыкта ындыг улус хорадаанын, безин көөр хөөн чогун чажырарга-даа, оларның «каржы-багы улус мурнунга ажыттынып кээр» (У. ч. 26:24—26). Хорадаар, көөр хөөн чок чорук, бак сагыш Бурганның организациязынга турбас ужурлуг деп чүүлдү удуртукчулар оларга билип алырынга дузалап шыдаптар чадавас. Ооң дугайында Библияда тодаргай бижээн (Лев. 19:17, 18; Рим. 3:11—18). Ооң-биле чөпшээрежир силер бе?

7, 8. a) Иегова организациязының черде кезээн канчаар удуртуп турарыл? б) Бурганның Сөзүнде кандыг айтыышкыннарны бижээнил?

⁷ Иегова бодунуң организациязының черде кезээнге хамааржыр улуска удуртулганы болгаш «аъш-чемни», христиан ниитилелдиң бажы болур Иисус Христостуң башкарып турары, «шынчы болгаш сарыылдыг чалчаны» таварыштыр берип турар (Мф. 24:45—47; Эф. 5:23). Бирги вектиң удуртукчу чөвүлели дег, ол чалча Бурганның хей-аът киирген Сөзүн, азы медээзин, үнелеп турар. (1 Фессалоникчилерге 2:13 номчувут.) Библияда бижиттинген үнелиг каш айтыышкыннарны сайгарып көрээлиңер.

 ⁸ Христиан ужуражылгаларже доктаамал баар ужурлуувусту Библияда бижээн (Евр. 10:24, 25). Оон ыңай ында бисти өөредиглеривиске чаңгыс аай болурунче кыйгырган (1 Кор. 1:10). Библия бисти Бурганның Чагыргазын бирги черге салыр кылдыр деткип турар (Мф. 6:33). Оон аңгыда бажыңнар кезип, хөй ниити черлеринге база арга тыптып кээрге-ле, суртаалдаар деп хүндүлүг даалганы биске даасканын Библияда демдеглээн (Мф. 28:19, 20; Аж.-ч. 5:42; 17:17; 20:20). Бурганның Сөзү удуртукчуларны чыышты арыг кадагалаар кылдыр өөредип турар (1 Кор. 5:1—5, 13; 1 Тим. 5:19—21). Иегова организациязында шупту улустан бүгү талазы-биле арыг чорукту кадагалаарын манап турар (2 Кор. 7:1).

9. Бурганның Сөзүн угаап-билип алырынга Иисус кымны таварыштыр биске дузалап турарыл?

⁹ Чамдык улус Библияны боттары тайылбырлап шыдаар деп бодаар. Ынчалзажок Иисус биске «аъш-чемни» берип турзун дээш, «шынчы чалчаны» томуйлаан. 1919 чылдан Иисус Христос ол чалчаны таварыштыр эдерикчилеринге Библияны угаап-билиринге дузалап турар. Ында бижээн айтыышкыннарны сагып тургаш, чыыш иштинге тайбың, арыг болгаш демниг чорукту кадагалап алыр бис. Кижи бүрүзү бодундан: «Христостуң томуйлаан чалчазынга бердинген мен бе?» деп айтырар болза эки.

10. Иезекиил номунда Иегованың организациязының дээрде кезээн канчаар тодарадып бижээнил?

¹⁰ Бурганның Сөзү Ооң организациязының дээрде кезээн биске таныштырып турар. Иезекиил медээчи көстүүшкүнге Бурганның организациязының дээрде кезээн чууза хевирлиг кылдыр көрген (Иез. 1:4—28). Иегова ол чуузаны башкарып турар, ынчангаш Бурганның сүлдези кайнаар баар-дыр, ол ынаар чоруп турар. Организацияның дээрде кезээ, бодунуң ээлчээнде, черде кезээнче салдар чедирип турар. Ийе, Иегованың чуузазы чаңгыс черде турбайн турар! Сөөлгү он чыл дургузунда организациявыска хөй өскерлиишкиннер болган. Оларның артында Иегова турар деп утпаңар. Бурганның чуузазы оккуру-биле бурунгаар халдып чоруур. Удавас Христос болгаш дээрниң төлээлери бо бузуттуг делегейни узуткаар, Иегованың чагырар эргези бадыткаттынар, а Ооң ады ыдыктаттынар.

11, 12. Иегованың организациязы бөгүн чүнү кылып турарыл?

¹¹ Бо сөөлгү хүннерде Иегованың организациязы чүнү кылып турарын боданып көрүңер. Тудуг. Чүс-чүс ажылчыннар, күжүн харамнанмайн, Иегованың Херечилериниң Уорвикте (Нью-Йорк штады, АКШ) делегей чергелиг чаа кол башкарылга черин тудуп турган. Бруклинде делегей чергелиг тудуг килдизиниң башкарылгазы-биле муң-муң эки турачылар бүдүн делегейде Хурал залдарын тударынга болгаш салбырларны алгыдарынга киржип  турар. Оларның кызымаккай ажылы дээш, аажок өөрүп четтирер-дир бис! Биче сеткилдии-биле болгаш бердингени-биле тудуг ажылдарын өргүлдер-биле деткип турар Чагырганың суртаалчыларын Иегова йөрээп турар деп утпаңар (Лк. 21:1—4).

¹² Өөредилге. Организациявыста Бурганның өөредилгезин ап болур хөй школалар бар (Иса. 2:2, 3). Оларның аразында Эгелекчи бараалгалдың школазы, Чагырга медээчилериниң школазы, Галаад школазы, Кожуун хайгааракчыларының болгаш кадайларының школазы, Хуралдың удуртукчуларының школазы, Ыдыктыг бараалгал школазы, Салбырлар комитеттериниң кежигүннериниң болгаш кадайларының школазы бар. Иегова чонун өөредиринге дыка ынак! Библейжи өөредилгени организациявыстың чүс-чүс дылдарда дептерлерлиг интернет-курлавырларындан база ап болур. Ында өг-бүлеге болгаш ажы-төлге хамаарышкан материалдарны, оон ыңай медээлерни база киирип каан. Ол курлавырларны ажыглап турар силер бе?

ИЕГОВАГА БЕРДИНГЕН БООП, ООҢ ОРГАНИЗАЦИЯЗЫН ДЕТКИҢЕР

13. Иегованың шынчы бараалгакчыларында кандыг харыысалга барыл?

¹³ Иегованың организациязының кежигүнү болуру — улуг алдар-хүндү-дүр! Бурганның негелделерин билиривис биске, шын алдынмышаан, Иегованың дээди эрге-чагыргазын деткиир харыысалганы онаап турар. Бо делегей бузутче дүлдүнүп бар чыдар, ынчалза-даа, Иегованы өттүнүп, бузутка хөңнүвүс чок болур ужурлуг бис (Ыд. ыр. 96:10). «Бузутту буян деп, буянны бузут деп адаар» улусту эдербейн турар бис (Иса. 5:20). Иегованы өөртүрүн күзеп, мага-бот, мөзү-шынар болгаш чүдүлге талазы-биле арыг чорукту кадагалаарын кызып чоруур бис (1 Кор. 6:9—11). Иеговага ынак болгаш, Аңаа долузу-биле ынанып чоруур бис. Иеговага бердинген болуксап турар болгаш, бердингенивисти Ооң Библияда айыткан негелделеринге дүүштүр чурттап турарывыс-биле көргүзүп чоруур бис. Каяа-даа: бажыңывыска, чыышка, ажыл черинге, школага-даа тургаш, ол негелделерден туттунарын кызып чоруур бис (У. ч. 15:3). Оон ыңай Бурганга бердингенивисти канчаар шынзыдып болур бис?

14. Христиан ада-иелер Бурганга бердингенин канчаар көргүзүп болурул?

¹⁴ Ажы-төлдү кижизидери. Христиан ада-иелер ажы-төлүн Библияга дүүштүр кижизидип турары-биле Иеговага бердингенин көргүзүп турар. Ол талазы-биле Бурганны хүндүлээр ада-иелер ёзу-чаңчылдарны бодал чок эдербейн турар. Бо делегейниң хөөнү христиан өг-бүлелерже сиңмес ужурлуг (Эф. 2:2). Христиан кижи: «Бистиң чурттувуста ажы-төлдү херээжен улус кижизидер ужурлуг» деп бодавас. «Ада-иелер, ажы-төлүңерни... Дээрги-Чаяакчының чурумун болгаш өөредиин ёзугаар өстүрүп-кижизидиңер база сургаңар» — деп Библияда чугаалаан (Эф. 6:4). Бурганга шынчы ада-иелер ажы-төлүн Самуилге дөмей болзун деп күзеп турар, чүге дизе ол өзүп турда, «Дээрги-Чаяакчы үргүлчү ооң-биле кады бооп келген» (1 Хаан. 3:19).

15. Чугула шиитпирлерни хүлээп тургаш, Иеговага бердингенивисти канчаар көргүзүп болур бис?

¹⁵ Шиитпирлерни хүлээри. Оон ыңай Бурганга бердингенивисти шиитпирлер хүлээрде Ооң Сөзүнден болгаш организациязындан дуза дилеп турарывыс-биле көргүзер бис. Ол кайы хире чугула? Хөй ада-иелерниң таваржып турары нарын байдалды сайгарып көрээлиңер. Өске чурттарже көжүп чоруй барган чамдык улус, акша ажылдаарын уламчылаар дээш, ажы-төлүн төрелдеринге азырадыр чаңчылдыг. Ол хууда шиитпир-дир, ынчалза-даа  шиитпирлеривис дээш Бурганның мурнунга харыы тударывысты утпас ужурлуг бис. (Римчилерге 14:12 номчувут.) Библиядан сүме албайн, өг-бүлеге болгаш ажылга хамаарышкан чугула шиитпирлерни хүлээри шын боор бе? Чок! Баар уувусту башкарып шыдавас болганывыста, дээрде Адавыстың дузазы чокта чедиишкин чок боор бис (Иер. 10:23).

16. Бир аныяк иениң мурнунга кандыг шилилге турганыл база шын шиитпир хүлээринге аңаа чүү дузалааныл?

¹⁶ Өске чуртче көже берген бир херээжен кижиниң оглу төрүттүнүп кээрге, ол ону төрээн чуртунче, кырган ада-иезинче чоргузуптар бодаан. Ол-ла үеде ол Иегованың Херечилери-биле Библияны өөренип эгелээн. Төлү Иеговага бараалгаар кылдыр кижизидер хүлээлге ооң бодунда деп, ол билип каан (Ыд. ыр. 126:2; У. ч. 22:6). Библиядан сүмени эдерип, аныяк ие Иеговага сеткилиниң ханызындан мөргүп турган (Ыд. ыр. 51:9, 10). Оон аңгыда, ол бодунуң байдалының дугайында ооң-биле Библия өөренип турган угбай-биле болгаш өске-даа Иегованың Херечилери-биле сүмелешкен. Төрелдери болгаш эштери, төлүн чуртунче чоргузуптар кылдыр, албадаарга-даа, ынчаар кылыры шын эвес деп, ол билген. Ооң ашаа кадайының болгаш ооң төлүнүң дугайында чыыштың сагыш човап турарын көргеш, Библияны өөренип, чыыштарже өг-бүлези-биле кады барып эгелээн. Чигзиниг чок, Иегова ооң сеткилинден мөргүлүнге харыылаан.

17. Библия өөренип турар кижилеривиске хамаарыштыр кандыг сүмелерни ап турар бис?

¹⁷ Организацияның айтыышкыннарынга дыңнангыр болуру. Бурганга бердингенивисти Ооң организациязының айтыышкыннарынга дыңнангырывыс-биле көргүзүп болур бис. Чижээ, Библия өөренип турар кижилеривиске хамаарыштыр сүмелерни көрээлиңер. Бир кижи-биле кол дептерни өөренип эгелээн болзувусса, кичээл соонда-ла, ону организациявыс-биле таныштырарынга каш минут аңгылаар деп сүмени берип турган. Ону кылыр дизе, «Хурал залында чүү болуп турарыл?» деп видеороликти болгаш «Иегованың күзел-соруун бөгүн кым күүседип турарыл?» деп брошюраны ажыглап болур. Бараалгалынга чедиишкиннер кылып турар кижи-биле кол дептерни төндүр өөрениптер болзувусса, «Сохраняйте себя в Божьей любви» деп номну улаштыр өөренир ужурлуг бис. Ол сугга суктуруп алган-даа болза, ону кылыры чугула. Чаа өөреникчилерниң бүзүрели күштүг болзун дээш, Иегованың организациязы ындыг айтыышкыннарны берип турар (Кол. 2:7). Ол сүмелерни ажыглап турар силер бе?

18, 19. Иеговага өөрүп четтирер кандыг чылдагааннарывыс барыл?

¹⁸ Иеговага өөрүп четтирер чылдагааннарывыс эмгежок. «Ооң ачызында чурттап, шимчеп база амыдырап чоруур болгай бис» (Аж.-ч. 17:27, 28). Оон аңгыда Ол биске үнелиг белекти, Библияны, берген. Бис, Фессалоникага чурттап чораан христианнар дег, Бурганның хей-аът киирген медээзин үнелеп чоруур бис (1 Фес. 2:13).

¹⁹ Библияның ачызында Иеговаже чоокшулап шыдаан бис, а ол база бисче чоокшулаан (Иак. 4:8). Дээрде Адавыс биске улуг хүндүткел көргүскен: Ооң организациязынга хамааржыр апарган бис. Ол бүгү дээш чүректеривис өөрүшкү-биле долган! «Дээрги-Чаяакчыга өөрүп четтириңер; Ол ачылыг-дыр. Ооң энерели кезээ шагда үстүп төнмес-тир» дээн ыр күүседикчизиниң минниишкиннеринге каттыжып турар бис (Ыд. ыр. 135:1). 135-ки ырда «Ооң энерели кезээ шагда үстүп төнмес-тир» дээн сөстер 26 катап таваржып турар. Иеговага болгаш ооң организациязынга бердинген чорукту көргүзүп тургаш, ол сөстерниң ылаптыынга шынзыгар бис, чүге дээрге кезээ-мөңгеде чурттаар бис!