Биче сеткил мерген угаандан кээр
Ажаакчы бооп ажылдап турар Тоньи эжикти соктаптарга, херээжен кижи ажыдыпкан. Ол, назылай берген авазынга эртежик келбээни дээш, Тоньини кончуп каапкан. Тоньи озалдаваан-даа болза, ол дээш буруузун миннинген.
ДАРААЗЫНДА база-ла ол чүүл катаптаан. Тоньи канчалганыл? «Меңээ нарын байдал тургустунуп келген. Ооң буруудадыышкыннары чөптүг эвес турган» деп, ол үлешкен. Ынчалза-даа Тоньи ам база буруузун миннингеш, аңаа кайы хире берге деп чүвени билип турарын чугаалаан.
Тоньиниң орнунга турган болзуңарза, канчаар силер? Ол херээжен кижиге биче сеткилдии-биле харыылап шыдаар силер бе? Азы силерге туттунары берге болур бе? Ындыг байдалда туттунары берге болбайн канчаар. Стресстеп турувуста азы бисче чөңгээлеп турда, биче сеткилди илередири берге.
Ынчалзажок Библия христианнарны биче сеткилдиг болурунче деткип турар. Ол шынар мерген угаанны илередип турар деп Библиядан көскү. «Силерниң араңарда мерген угаанныг... кижи бар бе? Бар болза, ындыызын төлептиг амыдыралы, буянныг ажыл-херектери-биле мерген угаандан кээр чөпшүлүн дамчыштыр бадытказын» — деп, Иаков бижээн (Иак. 3:13). Биче сеткил азы чөпшүл чорук дээрден кээр мерген угаан-биле кандыг харылзаалыгыл? Ол шынарны сайзырадырынга биске чүү дузалаарыл?
БИЧЕ СЕТКИЛДИГ БОЛУРУ ЧҮГЕ МЕРГЕН УГААННЫГЫЛ?
Биче сеткил байдалды чавырылдырар. «Эптиг-ээлдек харыы килеңни чайладыр, а доңгун сөс — хайныктырар» (У. ч. 15:1).
Килеңнээш, байдалды дам-на нарыыдадып алыр бис (У. ч. 26:21). А чымчак сөстер байдалды чазыктырып, хорадаан кижиниң сеткилин безин чымчадып болур.
Тоньи ону бодунга көрген. Херээжен кижи, ооң доңгун сөстерин Тоньиниң канчаар хүлээп алганын көргеш, ыглай берген. Олче хары угда хөй бергелерниң чүдүрлү бергенин ол тайылбырлаан. Тоньи Бижилгеден бодалдарны үлежирге, херээжен кижи Библияны өөренирин чөпшээрешкен. Ол бүгү Тоньиниң топтуг-томаанныг алдынганының ачызында болдунган.
Биче сеткил бисти аас-кежиктиг кылып болур. «Биче сеткилдиглер амыр-чыргалдыг, чүге дээрге чер-чуртту салгап алырлар» (Мф. 5:5).
Биче сеткилдиглер чүге амыр-чыргалдыг? Кылыктыг чораан кижилер биче сеткилди «кедип алгаш», аас-кежиктиг апарган. Оларның чуртталгазы эки талаже өскерилген, ынчангаш олар кайгамчыктыг келир үелиг апарган (Кол. 3:12). Оларның бирээзи — Испанияда кожуун хайгааракчызы бооп, бараалгап чоруур Адольфо-дур.
«Чуртталгам көңгүс утка чок турган. Болганчок-ла килеңнээр турган мен. Эштерим безин, билинместээже кылыктаны бээримге, коргар турган. Бир катап, чогуш үезинде алды катап бижектеткеш, хөй хан чидиргенимден өлүп каар часкан мен» — деп, Адольфо чугаалаан.
Ынчалзажок Адольфо ам өскелерни бодунуң үлегери-биле биче сеткилге өөредип турар. Ооң чымчак, найыралчы аажы-чаңы кижилерни олче хаара тыртып турар. Афольфонуң сөстеринден алырга, ол ынчаар өскерли бергенинге кызыгаар чок өөрүп турар. Оожум, биче сеткилдиг кижи апарганы дээш, Адольфо Иеговага өөрүп четтирип турар.
Биче сеткилдиивис Иегованы өөртүп турар. «Оглум, мерген угаанныг бооп, мээң чүрээмни өөртүп көр, ынчан мени бак сөглээр улуска харыылаар сөстер тыпты бээр» (У. ч. 27:11).
Иегованы, Ооң өжээнниг дайзыны, Эрлик чемелеп турар. Ооң үндезин чок буруудадыышкыннары Иегованы аажок килеңнедип болур турган, ынчалзажок Ол килеңнээчел эвес деп Библияда бижээн (Хост. 34:6). Аңаа хамаарыштыр Иегованы өттүнерин кызар болзувусса, мерген угаанныг алдынып, Ону өөртүр бис (Эф. 5:1).
Делегейде күчүлел биле каржы чорук тергиидеп турар. Чамдыкта «мактаныычал, туразы улуг, өгү-дылын караңнадырынга өй... нүгүлчү, бодун туттунуп билбес база каржы» улуска таваржып турар бис (2 Тим. 3:2, 3). Ындыг-даа болза, христианнар болганывыста, биче сеткилдиг болур ужурлуг бис. Бурганның Сөзүнде: «А дээрден кээр мерген угаан... тайбыңзырак, биче сеткилдиг» — дээн (Иак. 3:17). Бир эвес тайбыңзырак, биче сеткилдиг болзувусса, ол чүүл бисте Бургандан мерген угаан барын херечилеп турар. Ындыг мерген угаанны илередип тургаш, бисти хорададырга-даа, биче сеткилдии-биле харыылаар бис. Оон артык, кызыгаар чок мерген угаанныг Иеговага оон-даа чоок апаар бис.
