1, 2. Биске, Иегованың Херечилеринге, Римчилерге 5:12-де сөстер чүзү-биле солунул?

 ИЕГОВАНЫҢ Херечилериниң билири база колдуунда ажыглаары библейжи шүлүктерниң даңзызын тургузар дээн дижик силер. Ооң эгезинге Римчилерге 5:12-ни бижиир силер бе? Суртаалга бо шүлүктү болганчок ажыглаар болгай силер: «Ынчангаш бачыт бо делегейже чаңгыс кижи дамчып кирип келген, а бачыт-биле кады — өлүм база; а өлүм бүгү улустуң салым-хуузу апарган, чүге дээрге шупту улус бачыт үүлгеткен».

² Ажы-төлүңер-биле азы бир кижи-биле библейжи кичээл эрттирип тургаш, Бурганның черге хамаарышкан күзел-соруун, төлевирниң ролюн, өлүм соонда чүү болурун сайгарарда, Римчилерге 5:12-ни номчуп турар силер. Ынчалза-даа Иегова-биле хамаарылгаңарга, ажыл-херектериңерге болгаш келир үеде идегелиңерге хамаарыштыр ол шүлүктүң дугайында боданыр-дыр силер бе?

3. Бачытка хамаарыштыр чүнү миннир ужурлуг бис?

³ Шуптувус бачыттыг бис деп, миннир ужурлуг бис. Частырыгларны хүннүң-не кылып турар бис. Ынчалзажок Бурган довурактан тывылганывысты билир болгаш, биске ээ-хайыралыын көргүзерин аажок күзеп чоруур (Ыд. ыр. 102:13, 14).  «Бачыттарывысты... биске өршээ» деп дилегни Иисус үлегерлиг мөргүлүнче киирген (Лк. 11:2—4). Ынчангаш Бурганның өршээпкени частырыгларывыс дээш, боттарывысты чемелээн ажыы чок. Ындыг-даа болза Бурган бисти чүге үндезилеп алгаш, өршээп турарының дугайында боданыр болза эки.

4, 5. а) Римчилерге 5:12-де сөстерниң утказын билип алырынга чүү дузалаар? б) Римчилерге 3:24-те бижээн «Бурганның авыралы» деп чүл ол?

⁴ Павелдиң Римчилерге 5:12-де бижээн сөстерин эки билип алырынга дузалаар чугула бодалдарны, чагааның өске эгелеринден, ылаңгыя 6-гы эгеден, тып ап болур бис. Ол чүүл Иегованың бисти чүү дээш өршээп турарын билип алырынга дузалаар. 3-кү эгеде мынча дээн: «Олар шупту бачыт үүлгетке[н]... Ындыг-даа болза, улус шупту Бурганның авыралы-биле, оларны хостаар дээн Христос Иисусту дамчыштыр, агартыышкынны халаска ап шыдаар» (Рим. 3:23, 24). «Бурганның авыралы-биле» дээн сөстер-биле Павел чүнү чугаалаксааныл? Бир эртем ажылы-биле алырга, Павелдиң ажыглаан грек сөзү «орнунга бир чүве манавайн азы негевейн, эки тура-биле көргүскен ээ көрнүүшкүннү» илередип турар.

⁵ Эртемден Джон Паркхерст: «Бир эвес Бурганның азы Христостуң дугайында чугаа чоруп турар болза, ол [грек сөс] колдуунда оларның, кижилерни хостап, камгалаар дээш, күзелдии-биле илереткен ээ көрнүүшкүнүн азы ачы-буянын илередип турар» — деп демдеглээн. Ынчаарга Бурган биске авыралын канчаар көргүскенил? Ооң авыралы биске бөгүн канчаар дузалап турарыл база келир үеде кандыг идегелди берип турарыл? Бо айтырыгларны сайгарып көрээлиңер.

6. Бурганның авыралының ачызында улус чүнү чедип ап болур?

⁶ Делегейже бачыт биле өлүм «чаңгыс кижи» дамчып кирип келген. Ол кижи — Ада́м-дыр. «Чаңгыс кижиниң кемниг херээ» дээш, өлүм кижилерни чагырып эгелээн. Оон ыңай Павел «чаңгыс Кижиниң — Иисус Христостуң ачызында Бурганның элбек авыралы» болдунган деп бижээн (Рим. 5:12, 15, 17). Бурганның авыралы шупту улуска йөрээл болган. Библиядан алырга, «чаңгыс Кижиниң дыңнангырын дамчыштыр хөй улус агартырар». Бурган авыралын көргүскен болганда, «Иисус Христосту дамчыштыр... мөңге амыдыралды» ап болур бис (Рим. 5:19, 21).

7. Бурганның берген төлевирин чүге Ооң авыралы деп болурул?

⁷ Иеговага Оглун черже, төлевирни берзин дээш, чоргузары албан эвес турган. Бачыттыг, тергиин эвес улус Иегова биле Иисустуң бачыттарны өршээп болур төлевиринге төлеп чок турган. Бачыттарывысты өршээп, мөңге чурттаар идегелди бергени-биле Бурган биске авыралын көргүскен. Ынчангаш ол белекти бедик үнелеп, ону кажан-даа утпас болзувусса эки.

8. Чамдык улус бачыттарынга кандыг хамаарылгалыгыл?

⁸ Ада́мның бачыттыг үре-салгалы болганывыста, чазарынче, бачыт үүлгедиринче сундулуг бис. Ынчалза-даа Бурганның авыралын шын эвес ажыглап, чижээ: «Бурганның караанга бачыттыг чүүлдү кылзымза-даа, эмин эрттир дүвүрээн херээм чок. Иегова мени дөмей-ле өршээптер» деп бодаары шын эвес. Харааданчыг чүүл, элчиннерниң үезинде чамдык христианнар безин ынчаар бодап турган. (Иуда 4 номчувут.) Ындыг чүвени кажан-даа үндүр чугаалавас-даа болзувусса, ишти-хөңнүвүсте ындыг шын эвес бодалдар, үрезин дег, өзүп кээп болур.

9, 10. Павел база өске христианнар кандыг уткалыг бачыттан болгаш өлүмден хосталы бергенил?

 ⁹ «Бурган өршээчел, Ол кандыг-даа шын эвес херектеривисти анаа эрттириптер» деп боданмас кылдыр, Павел бисти деткээн. Чүге? Павелдии-биле алырга, христианнар «бачытка хамаарыштыр өлген». (Римчилерге 6:1, 2 номчувут.) Ынчаарга баштайгы христианнар, дириг турган хирезинде, кандыг уткалыг «бачытка хамаарыштыр өлгенил»?

¹⁰ Бурган төлевирни Павелге болгаш ооң үезинде христианнарга ажыглаан. Иегова оларның бачыттарын өршээгеш, ыдыктыг сүлде-биле шилээш, дээрге чурттаар ажы-төлү боор кылдыр, идегелди берген. Шынчы арткаш, олар Христос-биле дээрге чагырып болур турган. Олар Бурганга чер кырынга бараалгап турган-даа болза, Павел оларны «бачытка хамаарыштыр өлген» деп болур турган. Чижек кылдыр ол Иисусту Христосту чугаалаан. Ол чер кырынга өлгеш, дээрге өлүм чок чурттаар кылдыр диргистинген. Өлүм ону ам чагырып шыдавас апарган. Шак ындыг чүүл шилиттинген христианнар-биле болган, олар Иисус Христостуң ачызында «бачытка хамаарыштыр — өлүг, а Бурганга хамаарыштыр — дириг» апарган (Рим. 6:9, 11). Олар чуртталгазын бүрүнү-биле өскертип, бачыттыг күзээшкиннеринге моон соңгаар чагыртпайн, биеэги чуртталгазы-биле чурттавайн барган.

11. Кандыг уткалыг «бачытка хамаарыштыр өлген» бис?

¹¹ Бистиң дугайывыста чүнү чугаалап болурул? Христианнар апаарының мурнунда, Бурганның караанга бачыт деп билбейн, багай чүүлдерни кылып чораан бис. «Мага-бодувустуң кезектерин бужар болгаш хай-чагырга чок чорукка кулданыгга» берип, «бачыттың кулдары чораан» бис (Рим. 6:19, 20). Оон Библиядан алыс шынны билип алгаш, чуртталгавысты өскертип, бодувусту Бурганга бараалгадып, сугга суктуртуп алган бис. Оон бээр Бурганның өөредиинге болгаш негелделеринге «чүрээвис ханызындан чагырты» берген бис. Павелдиң сөстери-биле алырга, «бачыттың кулданыындан» хосталгаш, «буянның кулдары» апарган бис (Рим. 6:17, 18). Ынчангаш бисти база «бачытка хамаарыштыр өлген» деп болур.

12. Кандыг шилилгени кылыр ужурлуг бис?

¹² «Өлүр салымныг мага-бодуңарга бачыт хааннавазын, ооң туралаашкыннарынга силерни чагырты бербезин» дээн Павелдиң сөстерин бодуңарга хамаарыштырып көрүңер (Рим. 6:12). Бачыттыг күзелдеривиске алзыр болзувусса, оларга бисти «хааннаарын» чөпшээреп турарывыс ол. Бисте шилилге бар: бир болза бачыттыг бодалдарга болгаш күзелдерге алзып болур бис, бир болза оларны чагырып болур бис. Бодуңардан айтырыңар: бачыт кылыптарынга чедир бачыттыг күзелдеримге болгаш шын эвес бодалдарымга алзып турар мен бе? Азы оларның дугайында бодавазын кызып турар мен бе? Ол айтырыглар Бурганның бисти өршээгеш, авыралын көргүскенин кайы хире үнелеп турарывысты билип алырынга дузалаар.

13. Багай херектерден ойталап болур деп, бисти чүү бүзүредип турарыл?

¹³ Иегованың Херечилери Бурганны билип алгаш, Аңаа ынак апаргаш, бараалгап эгелээриниң мурнунда кылып чораан багай херектеринден ойталаан. Эрткен үеде олар, ам боттарынга ыянчыг, өлүмге төлептиг херектерни үүлгедип чораан чадавас (Рим. 6:21). Оон олар өскерли берген. Коринфиде христианнарның хөй кезии-биле шак ындыг чүүл болган. Мооң мурнунда оларның чамдыызы дүрзү-бурганнарга мөгеер, ашак-кадайынга өскерлир, эр улус-биле холбажыр эрлер, ооржулар, арагачылар чораан. Ынчалза-даа олар  «арыдыр чугдурган» база «ыдыктаттырган» (1 Кор. 6:9—11). Римде христианнар база ындыг байдалга турган. Павел: «Мага-бодуңарның кандыг-бир кезектери, бузуттуң чепсектери бооп, бачытка ажыглаттырып аарын соксадыңар. Ооң орнунга, өлүмден амыдыралче ээлген улусту дег, бүгү бодуңарны Бурганның бүрүн ажыглаар эргезинге бериптиңер. Мага-бодуңарның кезектери база буянның чепсектери бооп, Ооң ажыглалынче кирзиннер» — деп бижээн (Рим. 6:13). Бурганның авыралын моон-даа соңгаар алыр кылдыр, олар Ооң мурнунга кем-буруу чок артып болур деп, Павел чигзинмейн турган.

14, 15. Чүрээвистиң ханызындан дыңнангыр болуксап турарывысты канчаар көргүзүп болур бис?

¹⁴ Ындыг чүүлдер бистиң үевисте база болуп турар. Чамдык акы-угбаларывыс, Коринфиде христианнар ышкаш, шын эвес алдынып чораан. Ынчалза-даа олар өскерилген. Олар бачыттыг оруун каапкаш, «арыдыр чугдурган». Силерни база ынча деп болур болза, амгы үеде Бурган-биле хамаарылгаңар кандыгыл? Бурганның авыралдыын болгаш өршээринге беленин билип тургаш, Павелдиң «мага-бодуңарның кандыг-бир кезектерин... бачытка ажыглаттырып аарын соксадыңар. Ооң орнунга, өлүмден амыдыралче ээлген улусту дег, бүгү бодуңарны Бурганның бүрүн ажыглаар эргезинге бериптиңер» дээн чагыын кичээнгейге ап турар силер бе?

¹⁵ Ону кылыр дизе, христианнар болурунуң мурнунда, коринфичилерниң кылып чорааны аар бачыттардан оваарныр бис. Оон башка Бурганның авыралын хүлээп алгаш, бачытка башкартпайн чоруур бис деп, чугаалап шыдавас бис. Ынчалза-даа чүрээвистиң ханызындан дыңнангыр бооп, өскелерниң шыңгыы эвес деп санаары бачыттардан ойталаарын кызар бис бе? (Рим. 6:14, 17).

16. Христианнар аар эвес-даа бачыттардан чүге ойталаар ужурлуг?

¹⁶ 1 Коринфичилерге 6:9—11-де бижээн аар бачыттарны Павел кылбайн чораан деп, чигзинмейн барып болур бис. Ынчалза-даа ол бодун бачыттыг деп миннип турган. Ол: «Мен дээрге бачытка кул кылдыр саттырыпкан база бачыттыг бүдүштүг кижи болгай мен. Чүнү кылып турарымны бодум безин билбес-тир мен. Күзээн чүүлүмнү боттандырбас, а хөңнүм чок чүүлдү боттандырар-дыр мен» — деп бижээн (Рим. 7:14, 15). Ооң өске-даа бачыттары бар деп, ол билип турган. (Римчилерге 7:21—23 номчувут.) Чүрээвистиң ханызындан дыңнангыр болурунче чүткүп, Павелди өттүнээлиңер!

17. Чүге шынчы болуксап турар бис?

¹⁷ Чижээ, шынчы чорукту көрээлиңер. Шынчы чорук — христиан шажынның чугула демдээ. (Чугаалар 14:5; Эфесчилерге 4:25 номчувут.) «Мегениң адазы» болур Эрликке, ол ышкаш, мегелепкеш, амы-тынын чидирген, Анания биле ооң кадайынга дөмей болуксавас бис. Ынчангаш мегелевейн турар бис (Ин. 8:44; Аж.-ч. 5:1—11). Ынчалзажок шынчы чорукче оон-даа хөй чүүл кирип турар. Бурганның авыралы дээш өөрүп четтиргенивис бисти бүгү талазы-биле шынчы болурунче деткип турар.

18, 19. Шынчы болур дизе, ажыы-биле мегелээринден ойталаары чүге чедишпезил?

¹⁸ Кижи ажыы-биле мегелевес-даа болза, меге чүвени чугаалай берип болур. Чижээ, Иегова израильчилерге мынча дээн: «Оорланмаңар, шын эвес чүүл чугаалаваңар база бот-боттарыңарны мегелевеңер». Олар ону чүге сагыыр ужурлуг турганыл? Иегова: «Ыдыктыы-биле чурттаңар, чүге дээрге Дээрги-Чаяакчы Бурганыңар болур Мен ыдыктыг-дыр мен» — деп тайылбырлаан (Лев. 19:2, 11). Харааданчыг чүүл, кажан-даа ажыы-биле мегелевес мен деп ыяк шиитпирлеп алган кижи бир кижини кажарлап болур.

 ¹⁹ Мындыг чижекти көрээлиңер. Ажылчын кижи даргазынга азы кады ажылдап турар улузунга «эмчилээр дээш, эртежик чоруптар мен» дээн дижик. Шынында ол чүгле аптека чедиптер азы эмчиден рецепт бижидип алыр дээн. Херек кырында ол эртежик чаныксап азы өг-бүлези-биле дыштаныксап турар. Чогум ол мегелевээн-даа болза, ону шынчы алдынган деп болур бе? Азы ол мегелепкен бе? Оон-даа өске ындыг чижектерни билир боор силер. Кижи кеземчеден дезиксээш азы бодунуң ажыын бодааш, өскелерни мегелеп турар чадавас. Ажыы-биле мегелевес-даа болза, ол Бурганның «шын эвес чүүл чугаалаваңар» дээн айтыышкынын күүседип турар бе? Ол ышкаш Римчилерге 6:19-та: «Мага-боттарыңарның кезектерин... ыдыктыг амыдырал дээш буянның кулданыынче бериптиңер» деп сөстерниң дугайында боданып көрүңер.

20, 21. Кандыг бачыттардан ойталап турар бис?

²⁰ Бурганның авыралы дээш, өөрүп четтирип турар болзувусса, ашак-кадайынга өскерлир чоруктан, арагалаашкындан база оон-даа өске аар бачыттардан ойталаарындан аңгыда, Иегованы хомудадыпкы дег чүүлдерден дезер ужурлуг бис. Чижээ, самыыраар чоруктан чүгле ойталаар эвес, а куду шынарлыг оюн-тоглааны безин сонуургавас ужурлуг бис. Арагачы чоруктан ойталаарындан аңгыда, өй хемчээлин ажыр ишпес ужурлуг бис. Бачыттыг бүдүштүң күзээшкиннери-биле демисежиринге хөй күжениишкиннер херек, ынчалза-даа тиилеп болур бис.

²¹ Аар бачыттардан дезеринден аңгыда, ындыг-ла коргунчуг эвес ышкаш үүлгедиглерден база ойталаарын кызар болзувусса эки. Үе-үе болгаш-ла, частырыгларны дөмей-ле кылыптар бис. Ындыг-даа болза шын алдынар дээш, Павел ышкаш, хөй күжениишкиннерни үндүрер ужурлуг бис. Ол христианнарны: «Өлүр салымныг мага-бодуңарга бачыт хааннавазын, ооң туралаашкыннарынга силерни чагырты бербезин» деп кыйгырган (Рим. 6:12; 7:18—20). Бир эвес бачыттың шупту хевирлери-биле демисежир болзувусса, Христосту дамчыштыр илереткен Бурганның авыралы дээш, өөрүп четтиргенивисти көргүзер бис.

22. Бурганның авыралы дээш, өөрүп четтирип турар улусту чүү манап турарыл?

²² Бурган авыралын илередип, бисти өршээген, ынчангаш улаштыр-даа өршээринге белен. Бурганга четтиргенивисти илередип, өскелерниң ындыг-ла коргунчуг эвес деп санаар үүлгедиглерден ойталаалыңар. Павел бисти манап турар шаңналче тускай кичээнгей салып, мынча дээн: «Ам, бачыттан хосталган соонда, Бурганның кулдары апаргаш, ооң үре-түңнели кылдыр Бурганның мурнунга ыдыктыы-биле амыдырай бердиңер; а эчис түңнел — мөңге амыдырал болур» (Рим. 6:22).