1, 2. а) Чамдыкта чүге дүвүрелге алзы берип болур бис? (Статьяның эгезинде чурукту көрүңер.) б) Бо статьяга чүнү сайгарар бис?

 БИС берге үеде чурттап турар бис. Эрлик килеңнеп, «хөректенген арзылаң дег, „Кымны сыырыптар чоор“ деп, долгандыр чимзенип чоруп турар» (1 Пет. 5:8; Ажыд. 12:17). Ынчангаш Бурганның бараалгакчыларын безин чамдыкта дүвүрел хөме ап болур. Эрткен үеде чурттап чораан Иегованың бараалгакчылары, чижээ: Давид хаан база дүвүрелдерге болганчок алзып турган (Ыд. ыр. 12:3). Павел элчин «бүгү-ле христиан ниитилелдер дээш» сагыш човап чораан (2 Кор. 11:28). Бир эвес сагышсырал биске аар чүък бооп турар болза, канчаарыл?

² Ынакшылдыг дээрде Адавыс бараалгакчыларынга ооң мурнунда дузалап чораан, ынчангаш бо үеде Ооң деткимчезиниң ачызында эмин эрттир дүвүревейн барып болур бис. Библия бисти: «Хамык сагыш човаашкыннарыңарны Олче чая кааптыңар, чүге дээрге Ол силер дээш сагыш салып чоруур» — деп кыйгырып турар (1 Пет. 5:7). Ону канчаар кылып болурул? Дөрт арганы көрээлиңерем: сеткилиниң ханызындан мөргүүрү; Бурганның Сөзүн номчувушаан, ханы боданыры;  Иегованың ыдыктыг сүлдезинге идегээри; бүзүрээр кижиңерге сагыш-сеткилиңерни ажыдары. Ол дөрт арганы номчуп тургаш, кандыг базымнарны кылып болур силер, боданып көрүңер.

3. Мөргүл таварыштыр Иеговага үүрге-чүъгүңерни канчаар хүлээдип болур силер?

³ Иеговага сеткилиниң ханызындан мөргүүрү деп бир дугаар арганы көрээлиңер. Дүвүреп, сүрээдеп азы сагышсырап турар болзуңарза, дээрде ынакшылдыг Адаңарга сагыш-сеткилиңерни ажыдыңар. Ыр күүседикчизи Давид Иеговадан чаннып дилээн: «Бурганым, мөргүлүмнү дыңна». Ол-ла ырда ол: «Дээрги-Чаяакчыга үүрге-чүъгүң хүлээдип бер, Ол сени деткиир деп бил» — деп бижээн (Ыд. ыр. 54:2, 23). Берге айтырыгны шиитпирлээр дээш, бүгү чүвени кылган болзувусса, сеткиливистиң ханызындан мөргүл дүвүрелдеривистен артык күштүг деп сактыры чугула. Ынчалза-даа ишти-хөңнүвүсте дүвүрээзинниг бодалдарга алыспазынга мөргүл канчаар дузалап болурул? (Ыд. ыр. 93:18, 19).

4. Дүвүрелдер бисти хөме ап кээр болза, мөргүүрү чүге чугула?

⁴ Филипчилерге 4:6, 7 номчувут. Сеткиливистен дуза дилээн мөргүлдеривиске Иегова харыылап болур. Канчаар? Ол угаан-чүрээвисте дүвүрээзинниг бодалдарны болгаш минниишкиннерни оожургал-биле солуп болур. Хөй улус ону миннинген. Олар келир үе дээш аажок сагышсырап, дүвүреп турда, Иегова кайгамчык амыр-тайбыңны болгаш дыштыг сагыш-сеткилди оларга хайырлаан. «Бурганның амыр-тайбыңы» силерге база кандыг-даа бергелерни ажып эртеринге дузалаар. «Сүрээдеве, чүге дээрге Мен сээң-биле кады мен. Сени быжыктырып, сеңээ дузалаар мен» деп, Бурганның сөстеринге долузу-биле бүзүреп болур силер (Иса. 41:10).

5. Бурганның Сөзү сагыш-сеткилди канчаар оожургадып турарыл?

⁵ Сагыш-сеткилди оожургадырының ийиги аргазы — Бурганның Сөзүн номчувушаан, ханы боданыры. Ол чүге чугула? Дүвүрээзиннерге алыспазынга азы ону ажып эртеринге дузалаар мерген сүмелер Библияда бар. Бурганның Сөзү силерге дузалап, оожургалды берип болур дээрзин кажан-даа утпаңар, чүге дизе ында Чаяакчының мерген бодалдарын бижээн. Дүн-хүн дивейн, библейжи сүмелерни канчаар ажыглаарын ханы боданып тургаш, херек күштү алыр силер. Иегова Нуннуң оглу Иисусту кадыг-быжыг болгаш эрес-дидим бол, коргуп-сүртеве деп чагып тургаш, Бурганның Сөзүн номчуурун чагаан (Иис. 1:7—9).

6. Иисустуң сөстери силерге кандыг салдар чедирип болурул?

⁶ Иисустуң оожургалдыг сөстерин Бурганның Сөзүнден тып ап болур. Ооң сөстерин болгаш өөредиглерин дыңнап турган улус ёзулуг тамчык-дышты миннинген. Иисус ундараан, харыксыраан, муңгаралга бастырткан улусту оожургадып турган боорга, хөй улус олче чүткүп турган. (Матфей 11:28—30 номчувут.) Ол өске кижилерниң мага-бодунуң, сагыш-сеткилиниң болгаш Бурган-биле харылзаа тудар хереглелдерин эки билир турган (Мк. 6:30—32). Иисустуң улусту деткиир дээн аазаашкыны бөгүн база күштүг хевээр. Ооң аазаашкыны силерге база хамааржыр. Иисус чанывыста чок-даа болза, дээрде Хаан бооп, кижилерни кээргевишаан хевээр. Эмин эрттир дүвүреп турар болзуңарза, ол чогуур дузаны чедирип шыдаар. Иисустуң сөстери идегелди берип, дүвүрелди ажып эртеринге база эрес-дидим болурунга дузалап турар (Евр. 2:17, 18; 4:16).

7. Бурганның ыдыктыг сүлдези биске канчаар дузалап турарыл?

⁷ Дээрде Адавыс ыдыктыг сүлдени дилээн улуска ону албан бээр деп, Иисус аазаан (Лука 11:10—13). Бо дээрге дүвүрелди канчаар ажып эртериниң үшкү аргазы-дыр. Ыдыктыг сүлдениң үре-түңнели болур эки шынарларны сайзырадырынга Бурганның хөделдирикчи күжү дузалап турар. Ол шынарлар Бүрүн күчүлүг Бурганның бүдүжүнүң кезээ-дир. (Галатчыларга 5:22, 23 номчувут; Кол. 3:10.) Оларны илередир болзуңарза, өскелер-биле хамаарылгаңар экижип, билишпес байдалдарның тургустунары ховар боор. Сүлдениң үре-түңнели болур шынарларның биске канчаар дузалап турарын кысказы-биле көрээлиңер.

8—12. Бурганның сүлдезиниң үре-түңнели дүвүрелдерни ажып эртип азы шуут дүвүревезинге канчаар дузалап турарыл?

⁸ «Ынакшыл, өөрүшкү, амыр-тайбың». Улусту хүндүлээрин кызып чоруур болзуңарза, билишпес байдалдарның эвээш тургустунарын эскерип каар силер. Чүге ынча деп болур? Өскелерге, ха-дуңмашкы улус дег, эрге-чассыг ынак бооп, хүндүткелдиг боор болзуңарза, дүвүрел тывылдырар байдалдар тургустунмас (Рим. 12:10).

⁹ «Шыдамык болгаш буянныг чорук, энерел». Өскелер-биле тайбың болурунга дараазында сүме дузалаар: «Бот-боттарыңарга буянныг, энерелдиг болуңар... бот-боттарыңарны өршээңер» (Эф. 4:32). Шак ынчаар шыңгыы бергелерни болдурбайн, бачыттыг бүдүштүң ужундан тыптыр чөрүлдээлерни чедиишкинниг шиитпирлээр силер.

¹⁰ «Бүзүрел». Акша-төгерик биле эт-хөреңги дээш болганчок сагышсыраар бис (У. ч. 18:12). Иегова силерниң дугайыңарда сагыш човаар деп ыяк бүзүрээр болзуңарза, ындыг дүвүрелдерни ажып эртип азы шуут дүвүревейн барып болур силер. Канчалдыр? Павел элчинниң Бурганның сүлдезинге башкарткаш, «бар чүвеңерге сеткил ханыңар» дээн сүмезин эдерер болзуңарза. Ол улаштыр: «Чүге дээрге Бурган: „Сени кажан-даа кагбас мен, сенден кажан-даа ойталавас мен“ — дээн-дир. Ынчангаш бис: „Мээң дузалакчым — Дээрги-Чаяакчы-дыр, корткан херээм чүл: кижи амытан меңээ чүнү кылып шыдаарыл?“ — деп дидими-биле чугаалаалыңар» — дээн (Евр. 13:5, 6).

¹¹ «Томаарыыры болгаш бодун туттунуп билири». Ол шынарларны илередири кайы хире мерген угаанныг-дыр, боданып көрүңер. Оларның ачызында амыр-дыжыңарны үрептер чүүлдерни кылбас силер база чуртталгаңарга «дошкуурал, килең, алгы-кышкы» турбас (Эф. 4:31).

¹² Биче сеткил биске херек, чүге дизе Библия бисти «Бурганның күчүлүг холунуң адаанга» томаарыырынче болгаш «хамык сагыш човаашкыннарны Олче чая» каарынче деткип турар болгай (1 Пет. 5:6, 7). Ол шынарны сайзырадып тургаш, Бурганның деткимчезин болгаш ээ көрнүүшкүнүн миннир силер (Мих. 6:8). Шаг-шинээңерниң, сагыш-сеткилиңерниң болгаш угаан-сарыылыңарның байдалын эки билир болзуңарза, хөлүн эрттир дүвүревейн, Бурганга ынанып өөренип аар силер.

13. «Сагыш човаваңар» деп Иисустуң сөстери кандыг уткалыг?

¹³ Матфей 6:34-те (номчувут) Иисус Христостуң: «Сагыш човаваңар» дээн чугула сүмезин бижээн. Ынчалза-даа ону сагыыры берге ышкаш кылдыр сагындырар. Ынчаарга Иисус чүнү чугаалаар деп турганыл? Бурганның бараалгакчыларының кандыг-даа дүвүрелдери турбас деп,  ол чугаалаваан. Аңаа хамаарыштыр Давид биле Павелдиң чүү дээнин көрдүвүс. Хөлүн эрттир дүвүрээрге-даа, бергелер шиитпирлеттинмес деп чүүлдү өөреникчилери билип алзын деп, Иисус күзээн. Чаа хүн чаа бергелерни эккээр, ынчангаш христианнар бөгүнгү хүннүң дүвүрелдеринге эрткен-даа, келир-даа хүннерниң дүвүрелдерин катпас ужурлуг. Сагыш-сеткил өер бодалдардан адырлыр дизе, Иисустуң сүмезин канчаар ажыглап болур?

14. Ооң мурнунда кылган частырыглар дээш дүвүрээрин канчаар соксадып болур?

¹⁴ Чамдыкта ооң мурнунда кылган частырыглар азы бачыттар кижини дүвүредип болур. Өскелерни хөй чылдар бурунгаар кылган частырыы сагыш-сеткилин өйүп чоруур. Давид хаан ындыг чүүлдү миннип тургаш: «Кем-буруум бажым ашкан... Хөрек-чүрээм хилинчээнден алгы-кышкым кедереп тур» деп бижээн (Ыд. ыр. 37:4, 5, 9, 19). Ындыг байдалда Давид чүнү кылыр ужурлуг турган? Ол Иеговага ынанган. Бурган аңаа энерелин көргүзүп, өршээптер деп, ол идегеп турган. Ол: «Дээрги-Чаяакчы ооң бачыдын кем-буруу кылдыр санаваан... кижи амыр-чыргалдыг» — деп бүзүрелдии-биле чугаалаан. (Ырлар 31:1—3, 5 номчувут.)

15. а) Амгы үеде болуп турар чүүлдер дээш чүге дүвүрээн херээ чок? б) Дүвүревес дизе, чүнү канчап болурул? («Дүвүрелди канчаар ажып эртерил?» деп схеманы көрүңер.)

¹⁵ Амгы үеде болуп турар чүүлдер дээш дүвүреп болур бис. Чижээ, Давид амы-тыны дээш коргуп турган үезинде 54-кү ырны бижээн (Ыд. ыр. 54:3—6). Ынчалза-даа дүвүрелдер ооң Иеговага бүзүрелин кошкадыптарын ол болдурбаан. Давид бергелериниң дугайында сеткилиниң ханызындан мөргүп турган-даа болза, дүвүревес дизе, бодунуң талазындан база базымнар херек деп билип турган (2 Хаан. 15:30—34). Ооң үлегерин өттүнүңер. Дүвүрел силерни долузу-биле хөме аптарын чөпшээревеңер. Бодуңарның талаңардан шыдаар-ла чүвеңерни кылгаш, бүгү чүвени Иеговага хүлээдиптиңер.

16. Бурганның адының утказының дугайында боданыры бүзүреливисти канчаар быжыглап болур?

¹⁶ Чамдыкта христиан кижи келир үеде чүү бооп болурун бодап келгеш, чылдагаан чокка дүвүрей бээр. Ынчалза-даа ооң дугайында сагышсыраан ажыы чок. Чүге? Чүге дээрге шупту чүве, бодап турганывыс ышкаш, багай эвес бооп болур. Оон аңгыда Бурганның чагырып шыдавазы байдалдар чок, ынчангаш Олче хамык сагыш човаашкыннарывысты чая каап болур бис. Ооң адының утказы безин «Ол болдурар» дээн (Хост. 3:14, ЧД). Бурганның адының ханы утказының дугайында боданып тургаш, Ол бараалгакчыларынга хамаарыштыр күзел-соруун күүседип шыдаар деп, чигзинмейн барып болур бис. Бурган Аңаа шынчы кижилерни албан шаңнаар база эрткен-даа, амгы-даа, келир-даа үениң дүвүрелдерин ажып эртеринге дузалаар.

17, 18. Сеткил ажыдып, чугаалажыры дүвүрелди ажып эртеринге канчаар дузалаарыл?

¹⁷ Дүвүрелди ажып эртериниң дөрткү аргазы — бүзүрээр кижиңерге сеткилиңерни ажыдып, чугаалажыры-дыр. Кады чурттаан эжиңер, чоок өңнүүңер азы хуралдың удуртукчузу-биле минниишкиннериңерни үлежип болур силер. Дүвүрелдериңерже шын көрүштүг болурунга ол чүүл дузалаар. Библияда: «Сагышсырал кижиниң чүрээн шагзырадыр, а эки сөс — хөгледир» — дээн (У. ч. 12:25). Сеткилди ажыдып, чугаалажыры силерге минниишкиннериңерни эки билип алырынга дузалаар. Чугаалар 15:22-де: «Арга-сүме чок болза, кылыр дээн чүве чогувас, а сүмелекчилер көвей болза, боттаны бээр» — дээн.

¹⁸ Неделя санында болур ужуражылгаларывыс база дүвүревезинге биске дузалап турар. Аңаа бис дээш сеткилинден сагыш човап, деткип чоруур ха-дуңмавыс-биле үргүлчү чугаалажып болур бис (Евр. 10:24, 25). «Удур-дедир деткижеривис» сеткилди аартып чоруур дүвүрелдерни ажып эртеринге болгаш күш киреринге дузалап турар (Рим. 1:12).

19. Бурган-биле харылзаавыс бисти күш киирер деп, чүге чигзинмес бис?

¹⁹ Иеговага үүрге-чүъгүн хүлээдириниң кайы хире чугулазын билип алган, Канададан удуртукчу акывыстың чижээн көрээлиңер. Ооң ажылы аажок дүшкүүрлүг. Ол школада башкылап турар. Оон аңгыда ол хенертен дүвүрей бээр аарыглыг. Акывыска чүү дузалап турарыл? «Чүнү-даа мурнай мону билдим: сагыш-сеткил ундараашкынын ажып эртеринге херек күштү Иегова-биле харылзаам берип турар. Ынчангаш ону бар шаам-биле быжыглаарын кызар-дыр мен. Ылаңгыя берге үелерде мени шынчы эштерим биле чыышта ха-дуңмам деткип турар. Кадайымга минниишкиннеримни аажы-биле чугаалаар чордум. Удуртукчулар болгаш кожуун хайгааракчызы байдалче шын көрүштүг болурунга дузалаан. Оон ыңай эмчилеп, дыштанырынче болгаш сула шимчээшкиннер кылырынче үени үндүрүп алган мен. Чоорту байдалды башкарып эгелээнимни эскерген мен. А чагыртпас байдалдарны Иеговага хүлээдип турар мен» — деп, ол тайылбырлаан.

20. а) Иеговага үүрге-чүъгүвүстү канчаар хүлээдип болур бис? б) Дараазында статьяга чүнү сайгарар бис?

²⁰ Ынчап кээрге, Бурганга үүрге-чүъгүвүстү хүлээдиринге сеткилиниң ханызындан мөргүүрү болгаш, Ооң Сөзүн номчувушаан, ханы боданыры дузалаар деп көрдүвүс. Оон аңгыда ыдыктыг сүлдениң үре-түңнелин сайзырадырының, бүзүрээр киживиске сагыш-сеткиливисти ажыдарының, ха-дуңма-биле аралажырының кайы хире чугулазын көрдүвүс. Дараазында статьяга Иегованың бисти оон ыңай канчаар деткип турарын сайгарар бис: Ол бисти шаңнаарын аазап турар (Евр. 11:6).